လ္ၚဵုမန်ပိုဲစိ၊	ညိဟွံအေၚ်ဒုၚ်၊	စိုပ်ဍုၚ်သအာၚ်သ္ၚောဲ၊၊
ညးမွဲကဵုမွဲ၊	ဟွံမွဲမေတ္တာ၊	ဣဿာဇၞော်သန်၊၊
ညာတ်ညးခိုဟ်ဂး၊	ဟွံဒးစိုတ်အဵု၊	မိက်ဍဵုဍိုက်ပၠန်၊၊
ဂၠံၚ်ကၠေံဨကန်၊	ဖန်မံၚ်သက်က်၊	သွက်ခိုဟ်ဇ္ကုမွဲ၊၊

မန်လ္ၚဵုဂှ်မာ၊	ဗစာအောန်လောန်၊	ကၠောန်ခိုဟ်ဟွံခိုဟ်၊၊
ၜိုန်ညးကၠောန်ခိုဟ်၊	ဟီုဂရိုဟ်ဍေက်၊	ဗဒေက်ဖျဝ်ညး၊၊
ဇ္ကုရောဟွံကၠောန်၊	ညးကၠောန်မိက်ပၠီု၊	သမၠီုကၠးကၠး၊၊
အောန်စိုတ်ကွေံဏး၊	ဟးကၠောဝံသ၊	သိက်ပဂွံခိုဟ်၊၊

ဂွံဇၞော်မောဝ်အာ၊	ဘာသာပညာ၊	သာသနာမန်၊၊
ဒုၚ်ဒဒိုက်ကၠောန်၊	သွက်ကောန်ဂကူ၊	ဟွံဇူသ္ပလွဳ၊၊
မန်လ္ၚဵုဒမြာတ်၊	ညာတ်ညးကၠောန်ဂှ်၊	ဒှ်ဣဿာဇဳ၊၊
စၞးရီုဗၚ်လွဳ၊	ဟွံဗိုၚ်လွဳကီု၊	မိက်ပၠီုမံၚ်ပၠန်၊၊

နွံမံၚ်မန်လ္ၚဵု၊	ဟွံကဵုဇြဟတ်၊	လ္ပာ်လိက်ပတ်မန်၊၊
မုရောဟွံဗ္တောန်၊	ယောန်ကၠုၚ်ယောန်အာ၊	သွက်စသာဓဝ်၊၊
ခြေအ်ကၠုၚ်ခြေအ်အာ၊	ကြာဍာန်ဂဲါဝဲါ၊	ဂၠဲါတက်အဖဝ်၊၊
တ္ၚဲဂၠုတိက်ဂၠဝ်၊	အသဝ်နွံဟာ၊	ဗ္စာညိကၠောမန်၊၊

ဂကူညးသအာၚ်၊	ယေန်သဏာၚ်အိုတ်၊	ဟိုတ်နူပညာ၊၊
မန်ဟွံညဳသာ၊	ပညာလေဝ်တၞီ၊	တီဟာမူဟိုတ်၊၊
မန်ကဵုမန်ရ၊	သပမံၚ်သၞ၊	မသကၠက်အိုတ်၊၊
ကဵုညဳသာအိုတ်၊	စွံစိုတ်ကဵုဂေါဝ်၊	ဂွံဇၞော်မောဝ်အာ၊၊

လိက်မန်ပိုဲပၠန်၊	ဗဒန်မွဲတဲ၊	ရိုဟ်တ္ၚဲဗၠိုက်တၞီ၊၊
လိက်မန်တဏီ၊	မန်တဏီဗက်၊	ဂၠက်ဒဵုဂတာ၊၊
ၜိုန်နွံကြာညး၊	ညးဟွံပတီ၊	လနီဖြာဖြာ၊၊
ကၚ်ဇတ်ဖဳဒွါ၊	ဟိုတ်ပညာအောန်၊	မန်ဒးဗၠိုက်တၞီ၊၊

လ္ပသပအ်သာ၊	ပ္ဍဲပညာကွတ်၊	လ္ၚတ်ညိညးအဲ၊၊
ပညာရီုသ္ကဲ၊	ပ္ဍဲဂကူပိုဲ၊	စိုပ်ဒတုဲပြဟ်၊၊
ဇြဟတ်ပညာ၊	ခါရီုဗၚ်ကွေံ၊	တိုၚ်ချပ်ဍေံဒှ်၊၊
ညိပမဇ္ဇျဟ်၊	နလွဟ်ပညာ၊	စကာရိုဟ်တ္ၚဲ၊၊

*** ကဝိ ဘဒန္တကေတုမတဳ၊ ဘာခရိုက်သာံ၊ ဍုၚ်ရေဝ်
(ကံက်နၚ်နူလိက်လက္ခဏပိ၊ ဘဒန္တဝိန္ဒသာရသာသနဓဇဓမ္မာစရိယ၊ ကွာန်က္ၜၚ်က္ဍဳ)

ဗှ်ကဵုဒဒိုက်ကောန်ၜိုပ်မစိုပ်အာဍုၚ်သအာၚ်တုဲ အဲ ဆန်ဗဒှ်လဝ်ကဝိလၚ်္ကာ ဗွဲမထေက်ကြိုက်ကဵုညာဏ်ရ။ လၟေၚ်ဒဒှ်စလာဲဂှ် ဒှ်သာ်ဝွံရ။ ပ္ဍဲကဵုဒိတ္ထဳအေၚ်ကလိတ် ( April 10, 2008 ) ညးဂၞဴဍုၚ်ဂမၠိုၚ် နူကဵုဍုၚ်ဗၟာတေံ ဗၞတ် ၁၂၁ တၠဂှ် ကၠုၚ်ကၠောန်စကလောန် သွက်ဗုၚ်ဂၞဴ ပ္ဍဲဍုၚ်သေံ။ ဒဒိုက်မကၠတ်လုပ်ဍုၚ်သေံဂှ် ညးညးအဲအဲ တီဒၟံၚ်ဖအိုတ်ရ။ ဗှ်ကဵုဒဒိုက်မကၠတ်လုပ်ဍုၚ်ညးတုဲ ဗွဝ်ပိုန်ဒြပ်ထဝ်သြန်လှုဲလှာ် မဂၠဲါပ္ကောံပကေဝ်လဝ် သီုလၟောၚ်စိုတ်လၟောၚ်ကာယတံဂှ် လ္ပကဵုဒှ်လလေၚ်ဖဵုအိုတ်ညိ ကောန်ၜိုပ်တံ။ ပ္ဍဲညး ၁၂၁ တၠ မကၠတ်လုပ်ဍုၚ်သေံ မဍိုက်အာကွဳစက်ဖ္ဍိုက်ကဂှ် ဟိုတ်နူရဲမကူသာန်သွံရာန်မၞိဟ်တံ ဖ္ဍိုက်ပၞုက်လဝ် ပ္ဍဲတလာကကွဳစက် ဟွံမွဲကဵုပၞော်ယွီုတုဲ ဗၞတ် ၅၄ တၠ မ္ဒးအိုတ်အာလမျီု နကဵုပရိုက်ဘဲယဝီုသ္ဂုတ်။ ညးဂမ္စိုတ်တံဂှ် ဗွဲမဂၠိုၚ် ဒှ်ကောန်မန်ပိုဲတံ မကၠုၚ်နူတွဵုရးဍုၚ်မန်။ ပ္ဍဲ ၅၄ တၠဂှ် မၞိဟ်တြုံ ၁၇၊ မၞိဟ်ဗြဴ ၃၇။ ညးဟွံချိုတ် မသှ်ေဒၟံၚ်တံဂှ် ဗၠာဲသၟိၚ်သေံတံ စာံဂိုၚ်လဝ်ရ။

ဟာဟၜိုပ်အိုဲ ပိုဲမန်ကလော၊
ဒဒိုက်ယောသော ဟောဟောစိုတ်သၠာန်၊
ဘဝကၠၚ်ဟဳ ညံၚ်သွးၜဳကြာန်၊
စိုတ်ပ္ဍဲအာန်တၞာန် သိက်ပလိုတ်မာန်ရော၊၊


ဟးကောန်ၜိုပ်ထဝ် မုအသဝ်ရော၊
ဒဒိုက်ဂၠိုၚ်ဟော စိုတ်သောသၞာသန်၊
ဘဝဂွံဆာဲ ဒးကၠၚ်ဂၠဲါသြန်၊
ဟိုတ်ကုသဵုအန် ညးပၠန်ရီုမွဲရော၊၊


ဟာဲကောန်ၜိုပ်ဟာဲ မုဂွံဆာဲရော၊
ဟိုတ်ဍုၚ်ဟၟဲရော ပူဆာဂၠိုက်သ္ၚောံ၊
ဘဝဂွံသၠုၚ် ဒဒိုက်ကၠုၚ်ကောံ၊
ဒှ်လၞီစိုတ်သ္ၚောံ မုသ္ဇက်ဟီုနွံရော၊၊


ဟိုဲကောန်ၜိုပ်ဟိုဲ ပိုဲမန်ကလော၊
ဟိုတ်နူကၠၚ်ဟော စိုတ်လမောချဳ၊
ဂွံဂျိုၚ်လမျီု ဗီုညးဖဲသအဳ၊
ကန္တာဝိတ္ထဳ ဒးတတ်ၜဳရော၊၊


ဂွံစိုပ်ဍုၚ်သေံ အေံမံၚ်သီုဂွန်၊
ဒဒိုက်တန်တန် ဗ္လေတ်ပၠန်ဟွံဗၠေတ်၊
ဒးအိုတ်သ္ကန်ဒဲ အကြာဘဲခေတ်၊
သိက်ဂွံဗလေတ် ဂွံဗၠေတ်ဗၠးပၠန်၊၊


ဝိပက်တမၠာ ပါဗက်ကၠုၚ်ဟာ၊
ဟိုတ်နူကၠၚ်အာ ဍုၚ်ဟံသာရောၚ်၊
ညးပမွဲသွတ် မုက်မတ်ဟွံသၠောၚ်၊
လၞီခပ်သီရောၚ် ဒှ်ဟွံယောၚ်မှာ၊၊


ဒြပ်ဇကုဂှ် ဒှ်ဒြပ်ညးပၠန်၊
ဗွဝ်ပိုန်ထဝ်သြန် ၚဳလန်ပကောံ၊
ပလက်ကၞေၚ်ဇွောဝ် ညံၚ်ဂြောဝ်တမောံ၊
ၜိုတ်ဂိုတ်ပကောံ ဆောံလေၚ်တန်တန်၊၊


လမျီုကောန်ၜိုပ် ၜိုပ်တံဆာန်ကွေံ၊
ညံၚ်ဟၟဲၚုဟ်မး ဒးဒှ်ရောၚ်ဟေၚ်၊
စဵုသ္ကန်ဒးအိုတ် ချိုတ်အာသေၚ်လေၚ်၊
ညးဗိုတ်ထဝေၚ် ဟွံကလေၚ်ၚဳပၠန်၊၊


ဟးကောန်ၜိုပ်ဟိုဲ အိုဲကောန်ၜိုပ်ဟး၊
မံၚ်ဍုၚ်ညးကွေံ ထေၚ်ဂးညးဆာန်၊
ညးလီလှေံလှန် ညးပဒၞန်ဗြာန်၊
ဒှ်စၞဒၞန်ဗြာန် မုညးဂွံဆာန်ရော၊၊

ဒြပ်လေဝ်ညးကေတ် ညးဝေတ်ထဗး၊
ညးဂြိုၚ်ဟးဟး ဟးဟာဲအဵုဇိုတ်၊
ဇကုမွဲသွံ ရမတ်ဟွံပိုတ်၊
ၜိုန်ပၠာံကၠေံစိုတ် ဟွံဝိုတ်လးလး၊၊


ညံၚ်ညးဆာန်ဍူ ညးဒူၜုၚ်ရောၚ်၊
ညံၚ်ညးမဆာန် ညးလာန်ဟွံယောၚ်၊
ညံၚ်ညံၚ်ဆာန်ဆာန် ညးသၟာန်သၟုက်ရောၚ်၊
ညးလှေံတက်ၜုၚ် ဒးဗ္ဒုၚ်စးရောၚ်၊
ဗၟာဒုက်ဟိၚ်ဟိုပ် စိုပ်သေံဟွံယောၚ်၊
သေံၜုၚ်သာညိ ဟွံဂိမွဲတောၚ်၊
ညံၚ်သေံမဆာန် ဍေံလာန်ဂိရောၚ်၊
ဓဇန်ဍေံအဵု ရုန်မဵုကီုရောၚ်၊၊


ဟးဒဒိုက်ဟး ပဂွံဗၠးရော၊
ယွံမန်ကလော ယောသောစံၚ်သၞာ၊
ဟံသာဇၞူၜိုပ် ကိုပ်အဒိကၠာ၊
မွဲဟွံမိက်အာ အိုတ်ဝါသနာရော၊၊

ကောန်မန်အဲဒှ်	ကတ်ဗှ်ဝေါဟာ၊
နူလိက်သၠပတ်	ဗတ်မန်ဘာသာ၊
ဟွံသြုၚ်မွဲမ	တၟံအက္ခရာ၊
စမဳစဳစတ်	မတ်ဟွံလ္ၜဲကၠာ၊
ၜိုန်ပသာ်ဂှ်	စိုတ်ဒှ်သောသၞာ၊
ဝေါဟာလ္ၚဵုသွံ	ဂွံတီကေတ်မှာ၊
လ္ၚဵုဂှ်ပၠန်စိ	ညိဟွံတီကၠာ၊
သိက်ဒှ်ကုအဲ	ပ္ဍဲစိုတ်ဗစာ၊
ဗှ်လိက်မန်ကွေံ	နွံသၠေဟ်ပမာ၊
ဟိုတ်တၞံဍေံဂှ်	ဟွံဗှ်လ္ၚတ်အာ၊
မန်ဟွံလေပ်မန်	တန်ဒှ်အဲကၠာ၊
သာ်ဂှ်အဲချပ်	ဒဇပ်စိတ္တာ၊၊
ဝေါဟာပိုဲမန်	နွံဂၠိုၚ်သန်ကၠာ၊
ကဝိမန်အဵု	ဂဵုမြဟ်ပညာ၊
ညးတံချူကှ်ေ	ဟွံသှ်ေဝါစာ၊
ဗှ်က္ဍၚ်တီက္ဍၚ်	လောန်က္ဍၚ်ရသာ၊
တဳဇှ်ကွတ်တဲ	နဲကွိတမၠာ၊
ဗှ်တုဲဗှ်ပၠန်	ဟွံခၠန်ခြာတုန်၊၊
ဗှ်ဝါတ်ကွေံရ	ကာပ်ဗျတမၠာ၊
ဗှ်ဟွံစှ်ေဟေၚ်	ဖျေၚ်မုက္ခဝါ၊
လိက်မန်စိစောန်	နဲဇၟန်ပ္ကဴကၠာ၊
အဇမဒှ်	သက်ကုရှ်သာ၊
ဟိုတ်ဂှ်သေၚ်ဟာ	ဝေါဟာပိုဲမန်၊
ညးမန်တံရ	ပမွဲသွတ်သန်၊
လိက်ညးဗှ်ခိုဟ်	တီကၠိုဟ်ဟွံခၠန်၊
ခါလိက်ဇကု	ဗြုဂးဝါတ်သန်၊၊
ညးလ္ၚဵုဂးတဴ	မရဴဝွံရ၊
ဝေါဟာလ္ၚဵုသ္တိုတ်	ခေတ်အိုတ်အာတြ၊
ချူဗတ်မန်ဂး	ညးဟွံတီရ၊
ယဝ်သ္ဂောံချူဏာ	ဘာသာညးရ၊
မန်ဂမၠိုၚ်အဵု	တီတွဵုကာလ၊
သမ္ၚာတ်ကွေံရ	မနောဒွါအဲ၊
သိက်လဵုဒှ်ပၠန်	မန်လ္ၚဵုမွဲရဲ၊၊
လိက်ကၞပ်မပြဲ	နဲမန်တမၠာ၊
ဟွံပံက်ဟွံဗှ်	ဂှ်ရောၚ်ခိုဟ်ဟာ၊
ချူစွံလဝ်ရ	ပ္ဍဲသၠရိုတ်တာ၊
ၜိုန်အဲဟွံကတ်	ဗတ်မန်ဝေါဟာ၊
လိက်မန်ဟွံကၠေံ	ပ္တေဟ်စဂွံဟာ၊၊
လိက်ညးဗှ်အီ	ခပ်သီဒၞဲါရာ၊
ဗှ်ကလိတ်ပါၚ်	ရမျာၚ်သာက္ဍာ၊
ခိုဟ်ကွေံထိုၚ်သး	ဂးပ္ဍဲစိုတ်ကၠာ၊
ခါဗှ်လိက်ရ	မညဘာသာ၊
လတာ်ဂၠဟ်ေၚက်	ယဝီုဂြေက်အာ၊
ဟွံကလိတ်ပၠန်	ပ္ဍဲသၟန်ပါၚ်ကၠာ၊
ဗှ်ဝါတ်ကွေံဏး	ဟးလိက်မညာ၊
ဟီုဗျိဍိတ်ဍိတ်	ပ္ဍဲစိတ္တဒွါ၊
သိက်လဵုဒှ်ရော	ကလောမန်ဟိုဲ၊၊

အကြီုလိက်မန်
ဗီုအစာကဝိမန်တမၠာတံမကြီုလဝ်
( ကံက်နူလိက်မေဃသန်၊ လိက်ဝွံ ကျာ်ဇၞော်ဥတ္တမ ဆန်လဝ်ရောၚ်။ )

သုတ်ဇာတ်ဂညိ	ဇိုၚ်ပိတကတ်၊
မၚ်ဇေန်မၚ်လာ	လွောဟာဇၟာပ်ကွတ်၊
လိက်ဒွက်ဆန်ဗ္ဒဟ်	ညံၚ်အတှ်ရတ်၊
သ္ကဵုဆက်က္ၜဝ်သၟတ်	အနာဂတ်တုန်။

သဂွံဗၠေဝ်ဆက်	ပုံကၞက်အဆတ်၊
တိုၚ်ဂုန်သာ်ဂှ်	ဗဒှ်လဝ်ဗ္ၜတ်၊
အိုတ်တမံညး	ဍုၚ်ရးပြာကတ်၊
ပုံလိက်ဒွက်သၟတ်	ဗၠးယုတ်မတ်သန်။

သၟိက်လန်ပ္တီညး	ထၜးပြာကတ်၊
သကဵုဂွံလ္ၚတ်	ကွတ်ညာန်လက်သန်၊
သြဇပါဇ	၀က်ကျပိုတ်ဗျန်၊
ညံၚ်ဇရှ်ေသြန်	ကှ်ေဇန်လဝ်တုန်။

သာံလုံပဲါဗၠး	သာံလှာန်သ္ဋးခၠန်၊
ရုဲတုဲလွောဟာ	ပိုၚ်ခြာဗိုန်က္ညန်၊
စှ်ဂၠဟ်သေသာတ်	တၞာတ်သအးဇၟူကၟန်၊
လိက်ပတ်ပိုဲပၠန်	ကှ်ေဇန်လဝ်တုန်။

ဒးထိုၚ်သးဟေၚ်	လုတ်ပြေၚ်ပလန်၊
ယရဴညးမွဲ	ဂုန်အဝဲအန်၊
ၜိုန်ဒးသ္ဂးလုတ်	ပၠုတ်ဂုန်ဒုဟ်ပၠန်၊
လိက်ပတ်ပိုဲမန်	ဆန်ဂလိုၚ်တုန်။

ညးနွံပညာ	ဇၟာပ်ဝေါဟာဆန်၊
ယဝ်ညးမွဲတုန်	ဂုန်ဟွံသၟဟ်န်၊
သ္တီပရဲညး	သ္တးလးဗိုန်က္ညန်၊
လိက်ပတ်ပိုဲမန်	ဗှ်ဝါတ်ပၠန်တုန်။

ဇၟာပ်သတ်တြုံဗြဴ	သ္ဂောံတီတဴပၠန်၊
သ္ဂောံဒှ်ကဝိ	မဂ္ညိကွတ်ဆန်၊
တဝှ်အိုတ်သီု	ကြီုလိက်ပတ်မန်၊
သ္ဂောံတီပိုတ်ဗျန်	နဲကဲပၠန်တုန်။

( လိက်ဟီုမ္ဂးဂှ် သၠပတ်ညးမချူလဝ်ဗွဲကဗျလၚ်္ကာဂှ် လိက် သၟိက်ဂး။ )