လိက်မန်နွံရှ် လ္ပကဵုဗျဟ်အာ

ကောန်မန်အဲဒှ်	ကတ်ဗှ်ဝေါဟာ၊
နူလိက်သၠပတ်	ဗတ်မန်ဘာသာ၊
ဟွံသြုၚ်မွဲမ	တၟံအက္ခရာ၊
စမဳစဳစတ်	မတ်ဟွံလ္ၜဲကၠာ၊
ၜိုန်ပသာ်ဂှ်	စိုတ်ဒှ်သောသၞာ၊
ဝေါဟာလ္ၚဵုသွံ	ဂွံတီကေတ်မှာ၊
လ္ၚဵုဂှ်ပၠန်စိ	ညိဟွံတီကၠာ၊
သိက်ဒှ်ကုအဲ	ပ္ဍဲစိုတ်ဗစာ၊
ဗှ်လိက်မန်ကွေံ	နွံသၠေဟ်ပမာ၊
ဟိုတ်တၞံဍေံဂှ်	ဟွံဗှ်လ္ၚတ်အာ၊
မန်ဟွံလေပ်မန်	တန်ဒှ်အဲကၠာ၊
သာ်ဂှ်အဲချပ်	ဒဇပ်စိတ္တာ၊၊
ဝေါဟာပိုဲမန်	နွံဂၠိုၚ်သန်ကၠာ၊
ကဝိမန်အဵု	ဂဵုမြဟ်ပညာ၊
ညးတံချူကှ်ေ	ဟွံသှ်ေဝါစာ၊
ဗှ်က္ဍၚ်တီက္ဍၚ်	လောန်က္ဍၚ်ရသာ၊
တဳဇှ်ကွတ်တဲ	နဲကွိတမၠာ၊
ဗှ်တုဲဗှ်ပၠန်	ဟွံခၠန်ခြာတုန်၊၊
ဗှ်ဝါတ်ကွေံရ	ကာပ်ဗျတမၠာ၊
ဗှ်ဟွံစှ်ေဟေၚ်	ဖျေၚ်မုက္ခဝါ၊
လိက်မန်စိစောန်	နဲဇၟန်ပ္ကဴကၠာ၊
အဇမဒှ်	သက်ကုရှ်သာ၊
ဟိုတ်ဂှ်သေၚ်ဟာ	ဝေါဟာပိုဲမန်၊
ညးမန်တံရ	ပမွဲသွတ်သန်၊
လိက်ညးဗှ်ခိုဟ်	တီကၠိုဟ်ဟွံခၠန်၊
ခါလိက်ဇကု	ဗြုဂးဝါတ်သန်၊၊
ညးလ္ၚဵုဂးတဴ	မရဴဝွံရ၊
ဝေါဟာလ္ၚဵုသ္တိုတ်	ခေတ်အိုတ်အာတြ၊
ချူဗတ်မန်ဂး	ညးဟွံတီရ၊
ယဝ်သ္ဂောံချူဏာ	ဘာသာညးရ၊
မန်ဂမၠိုၚ်အဵု	တီတွဵုကာလ၊
သမ္ၚာတ်ကွေံရ	မနောဒွါအဲ၊
သိက်လဵုဒှ်ပၠန်	မန်လ္ၚဵုမွဲရဲ၊၊
လိက်ကၞပ်မပြဲ	နဲမန်တမၠာ၊
ဟွံပံက်ဟွံဗှ်	ဂှ်ရောၚ်ခိုဟ်ဟာ၊
ချူစွံလဝ်ရ	ပ္ဍဲသၠရိုတ်တာ၊
ၜိုန်အဲဟွံကတ်	ဗတ်မန်ဝေါဟာ၊
လိက်မန်ဟွံကၠေံ	ပ္တေဟ်စဂွံဟာ၊၊
လိက်ညးဗှ်အီ	ခပ်သီဒၞဲါရာ၊
ဗှ်ကလိတ်ပါၚ်	ရမျာၚ်သာက္ဍာ၊
ခိုဟ်ကွေံထိုၚ်သး	ဂးပ္ဍဲစိုတ်ကၠာ၊
ခါဗှ်လိက်ရ	မညဘာသာ၊
လတာ်ဂၠဟ်ေၚက်	ယဝီုဂြေက်အာ၊
ဟွံကလိတ်ပၠန်	ပ္ဍဲသၟန်ပါၚ်ကၠာ၊
ဗှ်ဝါတ်ကွေံဏး	ဟးလိက်မညာ၊
ဟီုဗျိဍိတ်ဍိတ်	ပ္ဍဲစိတ္တဒွါ၊
သိက်လဵုဒှ်ရော	ကလောမန်ဟိုဲ၊၊