ဂလာန်ဗစန်...ပ္ဍဲပုံဗြရတ်ဣဏၚ်ကၚ်ရဳဝွံ ဗီုမအခဝ်လ္ၚဵု ကဝိမၚ်ရောဂေါမချူကှ်ေလဝ်တံဂှ် တၞဟ်ခြာနူကဵုမအခဝ်လၟုဟ်ဏံညိည နွံတဴရ၊၊ ပမာတုန် - ( သြ ) အခဝ်ဝွံ ပ္ဍဲလိက်ပတ်ပိုဲမချူကှ်ေဒၟံၚ်လၟုဟ်ဏံ သွဵုလေဝ်ဒှ်မာန်၊ သဗျဉ်လေဝ်ဒှ်မာန်၊ သကၟက်ရ ( ပ္တိတ်ရမျာၚ်-သရ) လေဝ် ဒှ်မာန်၊၊ ( သြ ) အခဝ်ဝွံ ယဝ်ဒှ်သွဵုမ္ဂး ကဝိမၚ်ရောဂေါ ချူကှ်ေလဝ်ဗီုပြၚ်တၞဟ်ခြာဒၟံၚ်ညိကီုရ၊၊ စၞး( သြ ) သွဵုဂှ် ညးချူ ( အြ ) သွဵု မဖှ်သာ်ဝွံ၊၊ ဟိုတ်ဂှ်ရ ပ္ဍဲပုံဏံ တၠဝါသနာလိက်ပတ်မည်ပိုဲတံ ဆက်ဗှ်အာဂတတေံပၠန်မ္ဂး သ္ဂောံဆဵုညာတ်ကေတ် ( အြ ) သွဵု မဖှ်သာ်ဂှ်ရောၚ် အဲ မိက်ဂွံစွံဂလာန်ဗစန်၊၊

ဗြရတ်ကဵုဂၞကျာ်ပဒုမ္မဝတဳ

---

သေထဳဂွံမိၚ် ပဒွိၚ်မွဲတောၚ်၊ အသံသၟီဂး ဟွံစးအခေါၚ်၊ ဒေံဟွံစးရောၚ် မွဲတောၚ်ဟီုကဵု၊ ဆစိုတ်ကောရ ဂွံပမ္ၚဵု၊ ထပှ်တ္ၚဲဂတ သၞက်ကြကတ်အဵု၊ အမာတ်စဴပၠန် စိုပ်ထာန်နန်မ္ၚဵု၊ ဆစိုတ်ကောအဵု ယဵုဒုၚ်ထၜ၊ ဨကရာတ်မိၚ် တွိၚ်ပါၚ်ဒေံရ၊ ကော်အမာတ်ပန် လတူနန်မြ၊ နန်ပြာသာတ်ဂှ် ထပှ်ဘုံရ၊ ကၠောန်တုဲဒှ်ပၠန် ကမၠောန်ကုန်ကွ၊ ဗဵုတဴလဟိၚ် တာဝတိၚ်သ၊ ဗြဴကမၠောန်သၟတ် တိၚ်တိုက်သဒ္ဒ၊ သေဏာပန်ရ စဳခၠပညာ၊ သြိုၚ်သ္ၚိကြကတ် ပြဟ်သၟတ်တုဲအာ၊ ထပှ်ဘုံပ္ညဳ လျးရတ်ဗဳသ္တာ၊ ပါန်မုတ်ပါန်ခဳ ချူပ္ညဳလဝ်ကၠာ၊ ပ္ကဴကမတ်ဂျ ရာဲပတ်ဒၟဗ္ဂာ၊ ပံၚ်လုံဘုံဟာန် သီုရာဲတာန်ဆာ၊ အဆဝ်ဗလှ် တဝ်စရှ်ဗ္ဂာ၊ စလံၚ်ဂဥုပ် သီုဓုပ်ပြကာ၊ ရုပ်သပဝ်ကၞာတ် ဗိုတ်နာ်ဂိုၚ်ဏာ၊ ဟဝ်ကၠိုၚ်ဒျာန်သၞေၚ် မံၚ်တရေၚ်ဗ္ဂာ၊ တ္ၚေက်ဒြၚ်တ္ၚေက်လဵု သီုကဵုပူပါ၊ ချူပြေၚ်လဝ်က္ဍၚ် ပါၚ်တရၚ်ဒွါ၊ ရုပ်ကၠမၚ်ဂဝ် သပဝ်ဟာန်ဇာ၊ ကၠဇၞော်ကၠဗြန် ဗၜဵုယောန်အာ၊ ပဏုတ်ကသူ ချူလဝ်ဂၠိုၚ်ရာ၊ ရာဇာဒမာတ် စဵုသွာတ်ဒနာ၊ သပဝ်ဗိုတ်နာ် ပ္ဍဲဍာ်ဂၚ်ဂါ၊ ရုပ်စိၚ်ဆဒ္ဒန် ဨရာဝဏ္ဏာ၊ ဗၜေံဂၠဴဝါ သအဳဗ္ဂာပေၚ်ဟး၊ တဵုတၞံဗြာတ်တ္ၜဴ သတ်ဗြဴတၞး၊ သတ်ဗြဴသီုသၞိၚ် သတ်ဓရိၚ်ပျး၊ ဗြာတ်သီုသၞိၚ်ဗ္ဂာ တာသီုသၞိၚ်ပြး၊ ဗြော်ဗြးပေၚ်ဟး သဏးပေၚ်တိ၊ က္ဍိုၚ်ဇၞောဝ်အလာံ ကာဲဝရာံဂ္ညိ၊ ပ္ကဴဒၞဲါမဂေါဝ် မြမောဝ်ဂန္ဓိ၊ တလာဲလၜက် ကဵုကွက်ဂညိ၊ အလာံထိမြိ ဂ္ညိဂ္ညာတ်စိစီု၊ ပၞာၚ်တိုၚ်စဳပျး တမးညံၚ်ဂီု၊ ဂၠိက်ယာတ်ထဝ်သြန် စွံပ္တန်လဝ်ကီု၊ ဓုပ်သ္ၚဴလစး စဳပျးအိုဿီု၊ လျးဂဵုခၠၚ်ပ္ဍီု သီုကဵုလျးသ္ဍဴ၊ ဂီုကဵုဂီုဆက် ကွက်တလာဲတဴ၊ ကြက်စလန်အဵု သီုကဵုအဂၠဴ၊ စံၚ်ဂဂုဲလဝ် မြမောဝ်လောန်တဴ၊ မြမောဝ်ပြာထာ ဒေဝဒါသ္ၚဴ၊ မြမောဝ်ကမြဴ မောဝ်ပ္ဍးတဴဟေၚ်၊ နန္ဒကိတ္တိ နွံဣဓိတၟေၚ်၊ ဖျန်ကဵုအမာတ် မန္ဓာတ်တ္ကံကြေၚ်၊ ယွံအမာတ်တံ နာဲတံစဳရေၚ်၊ လိက်တရးဏာ ရာဇာသာန်ဟေၚ်၊ ဆတိုန်ကဵုဍုၚ် ပရဲ - တၟေၚ်၊ ပိစှော်ၜါပ္ညုၚ် က္ဍိုပ်ဍုၚ်ပဝေၚ်၊ လိက်ရာဇာသာန် တမံကွာန်ဟေၚ်၊ တခဳစဳရေၚ် ပြေၚ်အက္ခရာ၊ တခဳချူလဝ် အခဝ်ညံၚ်ဂွါ၊ ဍေံကေၚ်စဳရေၚ် ပြေၚ်လိက်သၠတာ၊ ပ္ဍဲလိက်ဂှ်ဗျိၚ် ဟီုပၟိၚ်ဏာ၊ လိက်အဲတုန်စိ ကိတ္တိရာဇာ၊ ဟိုတ်ဒှ်မွဲဗဵု နူကဵုတမၠာ၊ ပိစှော်ၜါဍုၚ် ဒးဒုၚ်ဒၟံၚ်ကာ၊ အဲသၟီဇၞော်စိ ကိတ္တိရာဇာ၊ သၞက်ဖရောဲ ကောန်တြုံပြဲဖာ၊ ဒုၚ်ဘိသေခ ပ္ဍဲနန်မြကၠာ၊ ပ္ဍဲဖဝ်ရဂိုန် ကွိုန်တ္ၚဲအ္ၚာ၊ ဃောပုဏ္ဏမဳ ဒိတှဳပေၚ်ကၠာ၊ ကၠုၚ်ကောံအိုတ်မာ ပကာအမှု၊ ကှ်ေလိက်တုဲကၠာ စုတ်ဏာယမု၊ တုဲဗ္ဒုၚ်ကဵုကၠာ သေဏာဇကု၊ ဗတံတၚဲ လိက်အဲတ္ၚဲဝွံ၊ ကဵုကၠုၚ်ဂြုဂြု ပေဲါအမှုပ္ညုၚ်၊ ကလုတ်အာစိုပ် တမံက္ဍိုပ်ဍုၚ်၊ ပိစှော်ၜါအိုတ် ဇက်တသိုတ်ကၠုၚ်၊ ပိစှော်ၜါရ သၟီတလဍုၚ်၊ ဇက်ကၠုၚ်သဓဵု ကြဵုဇာသမုၚ်၊ သီုကွဳသီုတိုက် လ္ၚဵုဍိုက်ဂၠုၚ်၊ မုက်ပၞာန်ဒွံနး ပြးပေၚ်ဝါဓုၚ်၊ စိၚ်ချေံပြေၚ်ဂၠဴ ပေၚ်တဴဝါဍုၚ်၊ လလောၚ်သမုၚ် ဍုၚ်ညံၚ်ဗြံပါ်၊ သီုဍုၚ်ဂမၠိုၚ် ကျိုၚ်ဗ္ဂောဝ်ရုပ်သာ်၊ ... »

တိုန်သဳကၠဳနာဲ ပုၚ်ပဲါဂါံတွာ်၊ တိုန်စိုပ်ပြာသာတ် ဨကရာတ်ဂမၠိုၚ်၊ ပိစှော်ၝောံကိုတ် အိုတ်တမံက္ဍိုၚ်၊ ဖျေံက္ဍိုပ်ဂြီုဂြီု သီုညးဂမၠိုၚ်၊ ညံၚ်ဓုပ်ပြကာ သၟီနာဲသာဂွိုၚ်၊ သဳကၠဳနာဲက္ဍိုၚ် ညးဂမၠိုၚ်စု၊ တုဲသၟာန်ပရိုၚ် သ္ဇိုၚ်သာအမှု၊ သွာမံၚ်ညိဟာ ခန်လွာနန်မြု၊ ရးပးဂြိုပ်ဝါ ပ္ဍဲခန်လွာဝွံ၊ မိပ်သ္ၚိပ်ညိဟာ ဟွံပါသတြု၊ ပ္ဍဲရးပးဝွံ အနုဍုၚ်ကွာန်၊ ကဵုလိက်သမာန် ရာဇာသာန်တြ၊ မၞးတံပြီုရ ပ္ဍဲအဲပကာ၊ ဗဒှ်ပေဲါသ္ဘၚ် အခြၚ်နာနာ၊ ဗိုၚ်ရီုမွဲဝါ ကောန်သာဂမၠိုၚ်၊ သီုပိစှော်က္ဍိုၚ် ကရိုၚ်ညိနာဲ၊ ဟီုကဵုအမာတ် ပူရိသာတ်ဆာဲ၊ ပေဲါနာနာသာ် ခပ်ပြာတ်ကဵုဂၠဲါ၊ စှ်ၜါဘာသာ ဗမာဒဝဲါ၊ ပသူပသေဝ် ကၠေဝ်သီုဇၚ်မှာဲ၊ မန်ဒိုၚ်မန္ဒ ဝသီုၜၚ်သာဲ၊ ယျောန်ကြုက်ဒှ်မွဲ သီုရဲဓဝဲါ၊ ကသှ်ေကျိုၚ်ဗြော် ဗော်ရဲၜၚ်သာဲ၊ မန်ကဵုကရေၚ် ဖျေၚ်မုက်ပၞးဗ္ဒာဲ၊ ဒလိန်ဒလာဲ လှ်ေပဂဲါဍုတ်၊ ဗမာသီုဓဝဲါ ၜၚ်သာဲပြက်စုတ်၊ ခမှေန်ကဵုယျောန် ဒက်ဒေါန်ခဍုတ်၊ လှ်ေပ္တိုန်တဲဒျာန် ဗၠာဲပ္ကာန်ကဵုဝုတ်၊ လှ်ေပလှ်ေဍုတ် ဗြဴဝုတ်တဆိၚ်၊ ပုၚ်တိုၚ်ပရှ် ပေါဟ်ပ္တိုန်ဒြၚ်ဂၞိၚ်၊ ပလှ်ေမုက်မတ် လျတ်သီုဂၞိၚ်၊ ပလှ်ေမုက်ဂဲါ လှ်ေတွာဲကောန်သၟီ၊ မုက်မတ်လွိၚ် လျးကၞိၚ်ဖြာဖြာ၊ ပေဲါသၟီရာဇာ နာနာသာ်ပၠန်၊ ပေဲါမန်ဂၠိုၚ်နဲ ပြိုၚ်ကဵုပေဲါယျောန်၊ သီုကြုက်ဒှ်မွဲ ပြိုၚ်ကဵုပေဲါမန်၊ ဇန်တံတွာ်ဂၠေဲါ ရဲရးတံပၠန်၊ ကဵုကွဳကဵုစောတ် မှတ်ကၠုၚ်မွဲတန်၊ ညးဗ္ၚညးဂြိုပ် စိုပ်ကၠုၚ်လီၜန်၊ က္ဍိုပ်ဍုၚ်မုဟ်ရး လဗးလုပ်ပၠန်၊ သီုသေံသီုမန် ဇက်ပၠန်လုပ်ဍုၚ်၊ ဗဵုပေဲါမန္ဓာတ် တွာ်တိုက်ဍိုက်ဂၠုၚ်၊ ရးကးဒယှ် ပရဟ်တွာ်ကၠုၚ်၊ တိုက်တိုက်ဂၠုၚ်ဂၠုၚ် ဇက်ကၠုၚ်ရုရု၊ ဂၠေါန်ပးၚိတ်သ္ဇၚ် လက်ၚၚ်ထဥ၊ သ္ဍောန်ဇုက်သၞာံ လေံပေန်သ္ဍာံစု၊ ဗတက်ဆေဝ်လုန် ဂဇုန်ကၞတ်ဆု၊ ပတဴဇိုၚ်ဂဲါ လှ်ေတွာဲထဥ၊ ထာၚ်လကေတ်ဗု တူဆုဂဇုန်၊ တုပ်ပမာတုန် ဂစေံဍုန်ဆု၊ ဍုတ်မြာ်တဲၜါ တွာ်ဂါံအာဂၠု၊ စ္ဍောန်ဇုက်သၞာံစု တူဆုသမၠုၚ်၊ နွံကွတ်လအိတ် လ္ၚဵုၚိတ်ဂၠုၚ်၊ လ္ၚဵုအေန်သၞာ် ညးဗာ်အဲဒုၚ်၊ လ္ၚဵုတက်လေံ ပၠေံအာပၠေံကၠုၚ်၊ လက်ဗန်လက်ပၠုဲ တွာ်ဂဟုဲဒုၚ်၊ တက်ကၞက်ကြုၚ် သၠုၚ်သၠုၚ်သဝ်သဝ်၊ အေန်သ္ဇၚ်တဲၜါ ရေၚ်ဗ္ဂာသဝဝ်၊ ညးဗာ်အဲဒုၚ် ဒုၚ်ဒးသ္ဇၚ်ကဝ်၊ ညးဗာ်အဲဗာ် ဆာတ်ဒးတံက္တောဝ်၊ ဆီပြးဍေၚ်ဇွောဝ် က္တောဝ်စာ်အာ၊ လက်ပၠုဲလုပ်ဗ္ဂပ် သ္တပ်သ္တးညဳသာ၊ တုပ်တုဲအေန်ပၠေံ ခြေံကၠုၚ်ခြေံအာ၊ ညးတေံအဲစာဲ ဂဲါတိတ်သီုၜါ၊ လုပ်မွဲဗလး ပြဟ်ဗၠးတိတ်အာ၊ ညးစာဲအဲစာဲ သြာဲတိတ်သာသာ၊ ထုဲဓရုဲအာ ဒေၚ်ၜါပြာ်တံၚ်၊ ဇန်တံတုန်ရော ဗဵုကၠောံဟောကၠံၚ်၊ ဂမှဳသၚ်ကီု အိုတ်သီုပဝံၚ်၊ ဗဵုပေဲါလက်ပၠုဲ ထုဲဓရုဲမံၚ်၊ ထပိုဲလကေဝ် တွာ်ကြေဝ်လုံဂၠံၚ်၊ လုပ်ဗဵုပေဲါဍုၚ် တွာ်ကၠုၚ်ဗြံၚ်ဗြံၚ်၊ ဂၠေဲါကၠုၚ်ဂြုဂြု ရုရုသံၚ်သံၚ်၊ ဇက်လုပ်ဟောကၠံၚ် ဍုၚ်ညံၚ်ဗြံပါ်၊ ဂၠိုၚ်ကဵုဘာသာ ပေဲါစှ်ၜါသာ်၊ သီုပေဲါဂလာ ပေဲါသေံၜါသွာ်၊ သေံဂတိုပ်တာ ဂလာဂၠိုၚ်ဒွါ်၊ သီုဗြဴသေံသၟာ် ခါတ်ဂၠိက်တွာ်ဂဲါ၊ ဂၠေဲါဗဵုပေဲါဍုၚ် တွာ်ကၠုၚ်ဇြာဲဇြာဲ၊ တမံအဲညး ဂြိုၚ်ဒၟံၚ်ဟးဟာဲ၊ ရဲဝုတ်တံဆာဲ ဂၠဲါဗက်ခရေတ်၊ ... »

သေထဳတြုံဗြဴ ရံၚ်တဴဖေက်ဗၠေတ်၊ ဖေက်လောန်အခိၚ် စိၚ်ချေံဂၠဴဂေတ်၊ ကယိုၚ်ကောန်ဗြဴ ဂေါဝ်တဴပၠေဝ်ပၠေတ်၊ လျးထဝ်ဂဵုရေတ် ဗ္ဂေတ်လုံဇကု၊ ဝက်သၞေက်ယျၚ် လျးခၠၚ်တသု၊ မာလေဝ်ကမက် ကွက်ရတ်ဇံမု၊ ကၞတ်သော်ထဝ် သီုပ္ကဴထဝ်ဂၠု၊ သၞေက်မၞိက်သ္ကဲ ရေၚ်ဗၠဲကၞု၊ သၠဇြဲလယှ် ပှော်မံၚ်ရုရု၊ ကၞိၚ်ၜတ်တသု ဇံမုဂကူ၊ ဒၞေၚ်မတ်ဝိုၚ်သာ် ဒမၚ်ဍာ်အူ၊ မတ်လစံက်သ္ဇုၚ် သမုၚ်ဝိဇူ၊ ကၞေၚ်ဂၠးဥပ္ပဵု လျးဂဵုသရူ၊ ဂၞိၚ်ဝန်သြိုဟ်လး စၞိန်စးဒ္ဂူ၊ ဒဳက္ၜံၚ်တံၚ်ယျ ကဒလိအူ၊ တဲညံၚ်လောတ်ဗၠဲ နဲလပှ်ဇၟူ၊ ၚေက်ကိုဟ်ရေၚ်စု မြုဗိုတ်ဂေါဝ်ပၠေဝ်၊ ရမျှာၚ်ခိုဟ်လောန် ဟီုပၠန်အရေဝ်၊ ကြဝိတ်ကျဟေၚ် ခဏေၚ်ဆေဝ်ရေဝ်၊ မိၚ်ဒးဥူမတ် သၟိက်ဂွံကြတ်ဆေဝ်၊ ပံက်ဝါစာလေဝ် အရေဝ်မွဲမွဲ၊ ကောန်ဂကူပ္ညဳ သေထဳမပြဲ၊ ဂါံစှ်ေဍိုက်ဝဝ် မိကသဝ်ဗၠဲ၊ ကမၠောန်တံအဴ ဗက်တဴဝဝ်ဂၠေဲါ၊ တြုံဗြဴသေထဳ ဍိုက်ကွဳမွဲတဲ၊ ပၠတရဴပၠန် ဟွံညန်ဟွံသ္ၚောဲ၊ ကမၠောန်ဗက်ဂၠေဲါ ၝဲဒေံဗိုၚ်ဟော၊ စိုပ်ထာန်ကြကတ် ဇၞော်သွတ်ဂၠိုၚ်အြ၊ ဒုမ္မဝတဳ ကျာ်သြဳအယော၊ တွာ်ဗက်အာမ လဇအာရော၊ ဂါံတွာ်ယောသော ကမၠောန်ဟောတဴ၊ လုပ်ကၞာရတ် ဒုမ္မဍောတ်ဗြဴ၊ တူဗဝဝ်ရတ် မုက်မတ်တ္ၜတ်သြဴ၊ ကမၠောန်ကမြဴ မံၚ်ဖဴမိသၟတ်၊ နန္ဒကိတ္တိ သီုမိဗြဴရတ်၊ ကယျိုၚ်ကောန်ဗၠာဲ စရာဲပြာကတ်၊ သၠိုက်ၝောံကိုတ်ပၠန် ဒက်ခဲါဗန်သၟတ်၊ လက်ကြာပ်ကနှ်ေ ကၠေဟ်လဝ်ဗိုန်ဗတ်၊ သၞေက်ထဝ်စဳရေၚ် မၞိက်ရေၚ်မတ်၊ မာလေကမက် ကွက်ကံလယတ်၊ ပ္ကဴထဝ်လယှ် လတှ်ပြာကတ်၊ ပ္ကဴဗၠဲသီုစုံ ပ္ဍဲဘုံကၞတ်၊ သြီုသြီုလယတ် မတ်ဂဵုဖျဴဖျဴ၊ ဂါံတွာ်လုပ်အာ ပ္ဍဲသၞာပ္ကဴ၊ သၠောံယာတ်ကၟဝ် ကြာထဝ်ဍိုပ်ဍဴ၊ ဗၠာဲတံဗက်ဂၠေဲါ ဗွဲလက္ကရဴ၊ ပ္ဍဲသၞာထဝ် ဗွဝ်ရတ်အဴ၊ တိုန်ဂဇံတဴ ဗြဴထဝ်အလေၚ်၊ ဗော်ဗၠာဲဗြရတ် ဍောတ်ဇၞော်ဒၟံၚ်ရေၚ်၊ ဖဴကမၠောန်ဟေၚ် ဂဇံရေၚ်ဒၟံၚ်၊ ရဲဗြဴကမၠောန် သၟဟ်န်ဟောကၠံၚ်၊ ဗၠာဲတံကျောဝ်ရံၚ် ဂၠံၚ်ပ္ကဴပတ်ဒၟ၊ တဲဍေံဂၠါန်လောန် လီၜန်ဂၠဲါခြ၊ ဂၠဲါဂၠါံချတ်ဂၞိၚ် လဟိၚ်ဂြိုၚ်ခ၊ တဲဍေံတံၚ်ရ ညံၚ်ကဵုမတာ၊ အမာတ်တံအဴ သီုဒဴဗညာ၊ ဗော်သ္ဇၚ်ဝၚ်တံ တမံညးကၠာ၊ သေထဳသမ္ၚေဟ် ညးလွေဟ်ညးဝါ၊ ကောံပ္ဍဲကၞာ ဗညာမုက်သ္ဇုၚ်၊ သေထဳရးကး ဒၟံၚ်မ္ၚးဍုၚ်၊ သေဏာအမာတ် ဗိုက်ယာတ်ဂေါ၀်သ္ဇုၚ်၊ ပိစှော်က္ဍိုၚ်ဗ္တာၚ် ဂစာန်လုပ်ကၠုၚ်၊ ညးရးညးကး ညးလွေဟ်စိၚ်ဂၠုၚ်၊ နဳဂီုညးဍုၚ် လုပ်ကၠုၚ်ပေၚ်က္ဍတ်၊ ပေၚ်ပ္ဍဲရိုၚ်ကၠာ ခန်လွာနန်ကၠတ်၊ ဨကရာတ်စိ ပိစှော်ၜါသၟတ်၊ ဂဇံရေၚ်စူ လၟေၚ်ဘူဝတ်၊ နန္ဒကိတ္တိ ဒှ်မိမသၟတ်၊ စန်လက်အဆတ် ပြဲသၟတ်ဇၟာပ်တၚ်၊ ကညာထပှ် နုက်ကၠဟ်ထဝ်ဒြၚ်၊ ဍာ်လစအဵု ကဵုအာတုက်နၚ်၊ ကဵုအာတုက်ကၠာ မှာရာဇာဝၚ်၊ ကညာထပှ် ကၠဟ်ထဝ်ဂဵုခၠၚ်၊ ထပ်တဲကောန်က္ဍၚ် ပ္ကၚ်ရၚ်နန်မြု၊ ကဵုဒှ်သၟီသၟတ် ဗြရတ်ကောန်ဂၠု၊ ပ္ဍဲရာဇာဝၚ် မၚ်ဂလဝွံ၊ သၟဝ်ဇာထဝ်ပ္ကာန် သၟဝ်ဖ္ဍာန်ကၟု၊ သီုတြဒစာံ မန္ဒြာံလဒု၊ ဒက္ခိဏဝဝ် စဝ်ဍာ်ကၞု၊ မန္ဒြာံလဒု ဗရုဖဍောတ်၊ ဨကမေတ္တာ မန္ဒြာပြာကတ်၊ သဗှမန္ဒြာ ရာဇာဗြရတ်၊ သတြုမန္ဒြာံ ဇဲယာံပြာကတ်၊ ဗြဟ္မဏသၟတ် ဖဍောတ်မန္ဒြာံ၊ ဒသဒိသာ မဟာဇဲယာံ၊ သဗှသတြု ဥပဒ္ဒဝါံ၊ သီုတြဒစာံ မန္ဒြာံဖ္ဍောတ်၊ ခုတ်ယၟုသၟတ် ဗြရတ်ရာဇ၊ ပဒုမ္မပ္ညဳ ဒေဝဳရုပ္ပ၊ ထပ်တဲညးၜါ ကြာပုရိသ၊ တဲသ္တုံတြုံပြဲ ဗြဴတဲဇွိရ၊ သီုၜါထပ်လဝ် ညံၚ်လောတ်ထဝ်ဂျ၊ ဒက်တောဝ်ကၟု ကောန်ဂၠုၜါရ၊ ကဵုပ္ကၚ်ရၚ်ဍုၚ် ဒုၚ်ဘိသေခ၊ ပိစှော်ၜါက္ဍိုၚ် ဗိုၚ်ပြီုရာဇာ၊ တရိုပ်ကဵုရ ရတ်ၜါပြကာ၊ တရိုပ်ကဵုဇဳ ဗၠဲဂွါနဳလာ၊ ညံၚ်ဗြဲရတ်ဂူ သြူသြူဖြာဖြာ၊ သေထဳသမ္ၚေဟ် ဖျေံကဵုလာပ်ကၠာ၊ ဒၞဲါနွံပိုန်ဘိုက် ဍိုက်ပေၚ်ဘောဂါ၊ သ္ကိုဟ်ဖျေံဖြာဖြာ ဂၠိုၚ်ဘာသာဟေၚ်၊ သေထဳရးကး သၠးကဵုဟွံဝေၚ်၊ ညံၚ်ဗြဲရတ်သၟဟ် ပယျာံဂှ်ဟေၚ်၊ ဗြုမံၚ်ခြေၚ်ခြေၚ် သီုပြေၚ်စိၚ်ကွဳ၊ လလောၚ်သဓဵု ဗြုကြဵုတဝဳ၊ ဖံမံၚ်လဒု ဗြုကၠံၚ်တမဳ၊ ခပဵုခရာ ဗြုအာတဝဳ၊ ဗြုမှုဲလလောၚ် တက်မံၚ်ဇိုၚ်ၜဳ၊ ဗရုဂဟဳ ဇိုၚ်ၜဳသဳဒန်၊ ခပဵုဒြၚ်စိၚ် လဟိၚ်စိုတ်ဇန်၊ ခပဵုဒြၚ်ပြေၚ် ဗြုခဏေၚ်လောန်၊ ဒြၚ်တလိၚ်ပၠန် ဒက်ဒေါန်ညံၚ်တွိၚ်၊ ကောန်သၟီစဴသၟီ ဍိုက်စိၚ်စဴဍုၚ်၊ ပိစှော်ၜါက္ဍိုၚ် ရိုၚ်ၚ်ဇက်ကၠုၚ်၊ ကလေၚ်စဴဟာန် ထာန်ဇကုပ္ညုၚ်၊ ဗြရတ်ဂေါ၀်သ္ဇုၚ် ဂွံပိုၚ်ဍုၚ်သၟတ်၊ ကောံဂၞကျာ်ကၠာ ၜါမွဲနန်ကၠတ်၊ ဒေါ၀်ဗြဴကမၠောန် တန်တူဒေန်ရတ်၊ ကောံဂၞကျာ်ရ ပဒုမ္မသၟတ်၊ ပပိုန်ကဵုဒါန် ထာန်ဗုဒ္ဓရတ်၊ ပ္ဍဲပန်ဒိုဟ်ဍုၚ် ဇန်ကၠုၚ်အာထတ်၊ ဗစဲပန်သၟတ် ပုၚ်ဝတ်ရိုဟ်တ္ၚဲ၊ ကမၠၚ်လအာတ် ပိဏ္ဍပါတ်ပြဲ၊ ရုၚ်ဒါန်ပန်က္ဍၚ် ပၟၚ်ပမွဲ၊ ဖေၚ်ယာတ်ထဝ်သြန် ဟွံခၠန်ရိုဟ်တ္ၚဲ၊ ညးၜါစုတ်တဲ မွဲတ္ၚဲဟွံသ္ဂုတ်၊ ဖန်တံတ္ၜန်ထိ ညိဟွံဖလုတ်၊ ဇရာဗျုထဴ ၜတ်သြဴသီုဝုတ်၊ ဒါန်မပြဲပြဲ ရိုဟ်တ္ၚဲသေၚ်ဟာ၊ သဳဒစာံပ္ညဳ သဳဗပေၚ်ကၠာ၊ သဳမသုန်ဒ္ဂိုန် သွိုန်ဘာဝနာ၊ သီုဝဳဝဲတုန် မသုန်ပြကာ၊ သီုမိမၜါ ဟွံခြာဖလုတ်၊ ဒယှ်ပြာထာ ဇၟာပ်ဘာသာခုတ်၊ ဇန်တံကၠုၚ်အာ ဗော်ရာဇာဒုတ်၊ ဗော်ဝါနိဇ္ဇ ဗၞိက်ဟသ္ဂုတ်၊ ဇန်ဟွံဖလုတ် ဟွံသ္ဂုတ်ကၠုၚ်အာ၊ ဒယှ်တမ္ညဝ် အံသဝ်ပြာထာ၊ ဗြရတ်ပ္ကၚ်ရၚ် နန်ဗတၚ်ဇာ၊ ဒယှ်ပြာထာ သၟီနာဲသာဇန်၊ သာဓုဟောဒြာ ဗမာသေံမန်၊ ဒယှ်လောန်လာန် ဒါန်မဇၞော်သန်၊ ဂၞကျာ်ကဵုသၟီ ပ္ဍဲသမၞိၚ်နန်၊ ညံၚ်ထာၚ်ကဵုထိုက် သ္ဍိုက်ပ္ဍဲမတ်ဇန်၊ ပ္ကၚ်ရၚ်ဍုၚ်ပၠန် တန်တဴဒၟံၚ်လံ၊ မွဲအယုက်အဴ ဒၟံၚ်တဴဗိုန်ဇၟံ၊ .. »

စုတိလောန်အာ ၜါမွဲတမံ၊ ကၞတ်အယုက်ဆာဲ ကံနာဲဟွံလံ၊ ဗြရတ်မွဲတၟံ နာဲတံကလၚ်၊ ရုပ်မွဲမံၚ်သၠၚ် နာံဆၚ်ဒဴအာ၊ အာက္တဵုဒှ်ပၠန် ကောန်သၟီပဉ္စာ၊ ဒှ်သုဓနု ယမုပြာထာ၊ ဣဏၚ်ကၚ်ရဳ ဒေဝဳယက္ခာ၊ ကောန်သၟီဒုမ္မ ကာလဂှ်ကၠာ၊ မနောဟာရဳ ဒေဝဳကညာ၊ အာက္တဵုဒှ်ကၠာ ပ္ဍဲကေလာသ၊ လၟေၚ်ဒဒှ် တဝှ်ဂါမ၊ ပုံဗြရတ်ရ အိုတ်ဆဝွံတုန်၊၊ ... ၊၊ ... ၊၊ ... ၊၊

---

ပ္ဍဲသက္ကရာတ်လ္ၚီၜါကၠံထပှ်စှော်တရဴ ဂိတုခ္ဍဲသဳမွဲစွေက် တ္ၚဲဗြဴဗတိ ပယျာံဂယးစှ်နာဍဳ ဇိုၚ်ကၞေဟ်ကှ်ေတုဲရအဴ၊၊
ကှ်ေပ္ဍဲကွာန်ကြေဝ်ဏာ၊၊

ဖဵုအဲကှ်ေလဝ် အ္ခဝ်ပိတကတ် လိက်ဗြရတ်ဂ္ညိ၊
ဂတဝွံစိ တ္ၚဲစုတိအဴ စဴဘဝပလိုက်၊
ပိုန်မၞိဟ်ပိုန်သွဝ် ဗဝဝ်ဘောဂ စနတသိုက်၊
ဖဵုဒုၚ်ဒဒိုက် တသိုက်နဳဗာန် ပ္ကာန်ကြဴတဲညိ၊၊

မၚ်ဗၠာဲဆာံပျာ ပဒကာသၟတ် လိက်ဗြရတ်ဂ္ညိ၊
ဘဴဂတစိ ညိပကဵုသ္ၚောဲ ပ္ဍဲသမၞိၚ်က္ဍိုၚ်၊
ပိုန်မၞိဟ်ပိုန်သွဝ် ဗဝဝ်ယဿ ကဵုဂွံစသိုၚ်၊
ဍုၚ်နိဗှာန်ဂွိုၚ် ကဵုဂွံကျိုၚ်စဴ ဖဴကျာ်တြဲညိ၊၊

ဒကာလိက်ဝွံ ရဲကွာန်ကြေဝ်ဏာရောၚ်၊၊

ဂလာန်ဗစန်...ပ္ဍဲပုံဗြရတ်ဣဏၚ်ကၚ်ရဳဝွံ ဗီုမအခဝ်လ္ၚဵု ကဝိမၚ်ရောဂေါမချူကှ်ေလဝ်တံဂှ် တၞဟ်ခြာနူကဵုမအခဝ်လၟုဟ်ဏံညိည နွံတဴရ၊၊ ပမာတုန် - ( သြ ) အခဝ်ဝွံ ပ္ဍဲလိက်ပတ်ပိုဲမချူကှ်ေဒၟံၚ်လၟုဟ်ဏံ သွဵုလေဝ်ဒှ်မာန်၊ သဗျဉ်လေဝ်ဒှ်မာန်၊ သကၟက်ရ ( ပ္တိတ်ရမျာၚ်-သရ) လေဝ် ဒှ်မာန်၊၊ ( သြ ) အခဝ်ဝွံ ယဝ်ဒှ်သွဵုမ္ဂး ကဝိမၚ်ရောဂေါ ချူကှ်ေလဝ်ဗီုပြၚ်တၞဟ်ခြာဒၟံၚ်ညိကီုရ၊၊ စၞး( သြ ) သွဵုဂှ် ညးချူ ( အြ ) သွဵု မဖှ်သာ်ဝွံ၊၊ ဟိုတ်ဂှ်ရ ပ္ဍဲပုံဏံ တၠဝါသနာလိက်ပတ်မည်ပိုဲတံ ဆက်ဗှ်အာဂတတေံပၠန်မ္ဂး သ္ဂောံဆဵုညာတ်ကေတ် ( အြ ) သွဵု မဖှ်သာ်ဂှ်ရောၚ် အဲ မိက်ဂွံစွံဂလာန်ဗစန်၊၊

သၟီဇၞော်နန္ဒကိတ္တိ အာဒုၚ်ဖျဴနၚ် ဂၞကျာ်ထပှ် ပ္ဍဲထီုဥမၚ်တေံ

---

သၟိၚ်ဇၞော်ညာတ်ရ ဇွဗြဴယက္ခာ၊ ညံၚ်ဇွစိၚ်ဗြဴ တဴလက်လ္ၚာ၊ ညာတ်ဖေက်လောန်က္ဍၚ် ဇွလၞၚ်ဇာ၊ သၟာန်ဗြရတ်ကၠာ ယွံကုမ္မာဍောတ်၊ ယွံလေဝ်ကောန်ဗၠာဲ နာဲဂဍောၚ်မတ်၊ အဲဖေက်လောန်တဲ ကလော်ဝဲသၟတ်၊ သိက်ပိုဲသ္ပပၠန် ဇၞော်လောန်ခေါ်မတ်၊ ဟီုညိကောန်ဍောတ် ဗွဲသၟတ်ဂွံတီ၊ ဗြရတ်ဂွံမိၚ် သွိၚ်မုက်တုဲကအီ၊ ယွံအံက်မရှာတ် ပိုၚ်ပြာသာတ်လ္ၚီ၊ ဂၞကျာ်ဝွံပၠန် ဆာန်လောန်ခပ်သီ၊ ရုပ်မဂေါ၀်မြီ ဖေက်ဒၟံၚ်ဏီဟာ၊ ပဖေက်ညိအဴ ဆာန်ရဴမတ်ၜါ၊ ညံၚ်ဂဍောၚ်မတ် ဗြဴရတ်ဝွံမာ၊ လမုဟ်ဖေက်ရ ယက္ခကန္တာ၊ မတ်ညးထပှ် ထဍဟ်ကဵုဏာ၊ ဆာန်ဍေံသေၚ်ဟာ ဂၠံက်ကဵုဏာရေၚ်၊ ညးထပှ်ကောံ ဒေၚ်ဗျောံဒၟံၚ်ဟေၚ်၊ ပ္ဍဲဥမၚ်စု ဂၠုညိဟွံသေၚ်၊ စက္ခုဟွံညာတ် ကျာ်စွံလဝ်ဟေၚ်၊ ဂၠိုၚ်သၞာံအခါ လ္ၚာပ်လ္ၚာပ္ဍီုသြေၚ်၊ ထပှ်မွဲလၟေၚ် ဇရေၚ်ဥမၚ်၊ ဨကရာတ်မိၚ် မုက်မတ်လိၚ်လှၚ်၊ တုဲသၟာန်တိုန်ကၠာ မှာရာဇာဝၚ်၊ ယွံလေဝ်ဍောတ်ဗၠာဲ စရာဲပြဲက္ဍၚ်၊ နာဲတီမံၚ်ဟာ အရာဥမၚ်၊ ညးထပှ်သၠၚ် ပ္ဍဲဥမၚ်ကၠာ၊ ၀ိုတ်ရထဝ်စှ် ထပှ်မွဲသာ၊ နာဲအာမံၚ်ကီု မိၚ်ညးဟီုဟာ၊ နာဲတွာ်အာဝေၚ် ဂေၚ်ကၠုၚ်ဂေၚ်အာ၊ နာဲတီမံၚ်ဟာ ယွံအပါမိ၊ ဟီုစမွဲတဲ အဲသ္ဂောံတီညိ၊ လံလကာဖာ သပါသ္တုံဇွိ၊ နွံဒၞဲါဂှ်ဟာ ကၠေံအာသအာၚ်စိ၊ ဟီုဗစညိ သ္ဂောံတီညိကောန်၊... »

ယွံမရှာတ်သၟီ ပဒွိၚ်မွဲတန်၊ ညးထပှ်အဴ မိဂၞဴအဲပၠန်၊ ဒှ်မိဂၞဴအဲ အဝဲကၠုၚ်အန်၊ ညးဂၠံက်ထောံမတ် ပ္ဍဲကဵုကၠတ်နန်၊ အဲဍိက်ဒှ်ကောန် ဒှ်ပၠန်ဒမၠိ၊ ဒေံဒဒေံစိ ဒှ်မိအဲဍိက်၊ ဨကရာတ်မိၚ် အြသိၚ်ဃနိက်၊ မိန်ကေတ်ကောန်ဗၠာဲ စိုတ်နာဲဂမ်အိက်၊ တူထဝှဲါမၞိက် ပၠောတ်သ္တိက်သာသာ၊ ဇကုဖြပ်ဖြပ် ဒဇပ်သီုၜါ၊ အမာတ်တံညာတ် ရာတ်သြိုဟ်သပါ၊ ဒြေပ်အာဒြေပ်ကၠုၚ် ပ္ဍဲရုၚ်ဟောဒြာ၊ ကမၠောန်သဓဵု ယာံမံၚ်ကြဵုဇာ၊ ဍာ်မြမောဝ်ၜိုဟ် စရိုဟ်စုတ်ကၠာ၊ သမ္ၚုဟ်တိုန်ဟေၚ် ချိုန်ဂှ်သေၚ်ဟာ၊ မိန်လဝ်ကောန်ဗၠာဲ ဆုၚ်က္ဍိုပ်နာဲကၠာ၊ ယွံသိုက္ခမာ ကောန်လမာဂၞဴ၊ အဲဟွံတီညိ ၀ိုတ်သတိတဴ၊ ဘိုၚ်ဘုဲဒၟံၚ်ကၠာ ကောံယက္ခာဗြဴ၊ လမုဟ်သၟီမ တီရဗွဲကြဴ၊ မိနာဲတံဂှ် ထပှ်မွဲဂၞဴ၊ တလညးဗြဴ နွံတဴဟာဂၠု၊ မတ်ညာတ်မံၚ်ဟာ ကၠုၚ်အာဒမၠု၊ ဂၠါံအာကၠုၚ်ဒး ဆဗၠးဇကု၊ နာဲဒးဒတဲ ပ္ဍဲဂၠံဒမၠု၊ ဟီုညိကောန်ဂၠု မိဇုနာဲဂှ်၊ ဗြရတ်ဂွံမိၚ် ဟီုပၟိၚ်ပြဟ်၊ ယွံမအံက်အဲ နဲတဝ်စရှ်၊ မိဍိက်တဴပၠန် ပ္ဍဲနန်ထီုဂှ်၊ အေၚ်အောတ်ဂြိုဟ်သ္ကဟ် ဒးဒှ်ရအဴ၊ ဍိက်အာဍုၚ်ကလော် မတ်နော်မိဂၞဴ၊ ဣသဳနန္ဒာ ပြၚ်ဏာသီုရဴ၊ ပြၚ်ကဵုကျာပၠန် ဗစိုပ်ကောန်ဗြဴ၊ ကွက်လဝ်ကဵုရဴ ကောန်ဂၞဴဂွံနၚ်၊ ဂွံနၚ်ဇိပ်ကၠိပ် ဂဥုဲဒိပ်ခၠၚ်၊ ဒိဗ္ဗစက္ခု ခုတ်ယမုက္ဍၚ်၊ လမုဟ်ဂွံနၚ် ဂုန်ကျာ်ဓဝ်သၚ်၊ ဂုန်ကၚ်ရဳက္ဍၚ် ဂွံနၚ်ဖအိုတ်၊ လမုဟ်ညာတ်ကၠာ ကၠုၚ်အာညံၚ်စိုတ်၊ ဒဒိုက်ရိၚ်က္တၚ် ကၠၚ်ကၠောန်ညံၚ်ချိုတ်၊ အာဍုၚ်ကလော် နော်နာဲဗၠးအိုတ်၊ ဂွံနၚ်ညံၚ်စိုတ် ဗၠးအိုတ်ရအဴ၊... »

သၟီဇၞော်မိၚ်ရ ဖျဖျယာံတဴ၊ ယွံလေဝ်ကောန်ဗၠာဲ စရာဲဍိုပ်ဍဴ၊ ဥမၚ်မွဲတဲ သ္ၚောဲဟာတရဴ၊ အာရံၚ်မိနာဲ ကောန်ဗၠာဲကြက်သ္ဍဴ၊ သ္ၚောဲဟာတရဴ ကောန်လဴကဵုညိ၊ ဗြရတ်ဂွံမိၚ် ဟီုပမိၚ်စိ၊ ဆိုက်မံၚ်ကီုအဴ တရဴထာန်မိ၊ ယိုက်လဝ်ကောန်ဗၠာဲ ဟွံမိက်သြာဲညိ၊ ကော်အမာတ်ပန် သၟဟ်န်သ္တုံဇွိ၊ ချေံယာန်အဲဂှ် ပြဟ်ကေတ်နၚ်ညိ၊ အမာတ်မိၚ်ရ ပါၚ်တလတိ၊ ကယျိုၚ်ဂေါ၀်လောန် ချေံနာဲနန်လွိ၊ ယွံအမာတ်တံ တမံညးစိ၊ ၀၀်ထဝ်ဒြၚ်စိၚ် ဒလိၚ်သ္တုံဇွိ၊ တွိၚ်ပဉ္စၚ်ဂ သဗ္ဗပြေၚ်ညိ၊ သီုဗဵုသ္တုံဇွိ ထိမြိဂမြိၚ်၊ ပ္ဍဲထာန်ဥမၚ် သီုဝဝ်ဒြၚ်စိၚ်၊ ဂကန်တုဲကွေံ သၟီဍိုက်ချေံဗျိၚ်၊ ဗြရတ်ဍိုက်သြဲ ဟဇ္ဇနဲသွိၚ်၊ တုဲအာဂတ ပၠတရဴသၟီ၊ ညးမွဲမွဲချေံ ပြဟ်ပြေဟ်ဍိုတ်ဆိၚ်၊ ချေံပလှ်ေဂဲါ ဇိုၚ်ပဲါလွိၚ်၊ ဂါံဇိုၚ်ပုၚ်သွိၚ် ထမၠိၚ်မုက်မတ်၊ ချေံဍောတ်ဗၠာဲပြဟ် တဆှ်လျတ်၊ ချေံသၟီနာဲသာ ဒြေပ်ဗက်အာသၟတ်၊ ကြဴချေံဗြရတ် မှတ်တဆှ်အာ၊ မှတ်ပ္ၚောံက္ဍၚ် ဥမၚ်မိကၠာ၊... »

ညးထပှ်သၠၚ် ပ္ဍဲဥမၚ်ဒွါ၊ မၚ်တဴကောန်ဗၠာဲ စရာဲရုပ္ပါ၊ ထောံမတ်ညာတ်ဟေၚ် ကောန်စိုပ်သေၚ်ဟာ၊ ဗြရတ်ဒေါံကွေံ စှ်ေနူချေံကၠာ၊ ဨကရာတ်မာ ဗ္ဒောံချေံခါဂှ်၊ ညးထပှ်ညာတ် သမ္ၚာတ်ဒိုဟ်စှ်၊ လုပ်ဥမၚ်ကီု သီုညးထပှ်၊ လုပ်အာထီုပြဟ် သီုထပှ်ဟေၚ်၊ သၟီဇၞော်ညာတ်စိ မိသမုဲလေၚ်၊ ဗက်လုပ်ထီုဝွံ ဂၠုညိဟွံသေၚ်၊ တုဲကော်ကောန်ဟေၚ် သမုဲလေၚ်ဍောတ်၊ ဥမၚ်ဂၠုလောန် ယွံကောန်ဗြရတ်၊ ဟွံညာတ်မိနာဲ ဟာဲဂဍောၚ်တ်၊ တဴအပ္ဍဲဟာ မာတာနာဲသၟတ်၊ ဟီုညိကောန်ဍောတ် ဂွံညာတ်သၟတ်ညိ၊ ဗြရတ်ဂွံမိၚ် ဟီုပမိၚ်စိ၊ နွံအပ္ဍဲပၠန် ဂၞကျာ်ဂၞဴမိ၊ သၟီဇၞော်ကော်ရ ယွံတလသ္ၚိ၊ ဂၞကျာ်အဲသၟဟ် ထပှ်မွဲမိ၊ နွံဟာစရာဲ နာဲကျာ်သြဳသ္ၚိ၊ ယွံဂၞကျာ်အဲ ထပှ်မွဲမိ၊ နွံဟာနာဲသ္ၚိ ယွံမိကြက်ဗိုတ်၊ ညးထပှ်မိၚ် တွိၚ်ပါၚ်ၝောံကိုတ်၊ ပါၚ်ဨကရာတ် နာဲမန္ဓာတ်အိုတ်၊ တုဲမိဟီုအာ နသုဘာသိုတ်၊ မူပရောအဴ ယွံသ္ဍဴကြက်ဗိုတ်၊ ပိုဲမၞိဟ်ဂၠုမတ် ညးသၟတ်ကေတ်အိုတ်၊ မတ်ကၠက်သီုဖအိုတ် ညံၚ်ချိုတ်အာဟေၚ်၊ မူကော်ပအဴ ယွံသ္ဍဴတ္ကံကြေၚ်၊ ဖဴဂၞကျာ်ပၠန် ပ္ဍဲနန်အိန်ခေၚ်၊ ပိုဲဍိက်အန်ရုပ် ဟွံတုပ်ညးဟေၚ်၊ က္ညသၟီကလေၚ် ဇရေၚ်ဗြဴနာဲ၊ ပိုဲမတ်ကမၠက် ဗက်ရုပ်ဟွံဆာဲ၊ ဂၞကျာ်ဇၞော်ပၠန် ကြဳဝန်စရာဲ၊ က္ညစဴဒိပ်ဒဲါ ကောံနာဲဒေဝဳ၊ ပိုဲမၞိဟ်ဒုဟ်ပ္ညုၚ် ဒးဒုၚ်ဒၟံၚ်ပ္ညဳ၊ မံၚ်ပ္ဍဲဥမၚ် ဆဒးကၠၚ်ဟဳ၊ ညံၚ်သုနက္ခာ ကြာသုန္ဓရဳ၊ သ္တိက်ဒၟံၚ်ပ္ဍဲတိ ညိဟွံဗှ်သ္ၚဳ၊ ဗြဴဂှ်ဒှ်ပ္ညဳ ယက္ခဳကလော်၊ ကလံက်ပကော် ဗော်ဗြဴဟိဏ္ဏ၊ ဒေါံရရာဇ မိဖေက်ရကော၊... »

နန္ဒကိတ္တိ မိၚ်မိဟီုရော၊ ဟီုတိုန်ပၠန်ရ တလအယော၊ ယွံဂၞကျာ်အဲ ထပှ်မွဲဆော၊ ၀ဲနာဲရောၚ်မိ သ္ဇက်ဗျိနွံရော၊ မိပဒက်ဝဲ မပြဲအယော၊ တုဲလုပ်အာရော ဨကောပြဲက္ဍၚ်၊ သၟီရံၚ်လုပ်အဴ သ္ဍဴတမးခၠၚ်၊ ညာတ်ညးထပှ် သြဟ်ဒှ်ဘိၚ်ဘၚ်၊ ရမတ်ဒဇူ ညံၚ်ဇမောဝ်ဂၚ်၊ မိန်ကေတ်ညးထပှ် ဗြဲမတ်ပြဟ်က္ဍၚ်၊ လောတ်သ္ၚဳစှ်ေအာ မှာရာဇာဝၚ်၊ ဇတဝ်ခြံခြံ ပ္ဍဲဂၠံဥမၚ်၊ ဖြပ်ဖြပ်ဒဇပ် ညံၚ်လွပ်မှာတၚ်၊ ဗြရတ်ညာတ်က္ဍၚ် မိမသၠၚ်အာ၊ . . . စ လမုဟ်သာသာ၊ သီုဒစာံကၠာ ဂွံသာရဝါတ်၊ သမ္ၚုဟ်တိုန်ပၠန် သၟီနာဲမန္ဓာတ်၊ သေဏာအမာတ် ဂွံညာတ်သေၚ်ဟာ၊ ပြဟ်ကၠုၚ်စိုပ်က္ဍၚ် ထာန်ဥမၚ်ဂါ၊ ဗရုတမ္ညဝ် ၀၀်စက်ဇရာ၊ စိုပ်ပ္ဍဲဥမၚ် ပါၚ်တရၚ်ဒွါ၊ အမာတ်တံကီု သီုဒဴဗညာ၊ ဟီုပၠာံသဝါ သိုက္ခမာဗြဴ၊ က္ညစဴစသိုၚ် ဇရေၚ်က္ဍိုၚ်ပ္ကဴ၊ သီုညးထပှ် ပြဟ်မိတံစဴ၊ ဗြရတ်ဝန်စဝ် လ္ၚောဝ်မိဂၞဴ၊ ယွံမိမပြဲ နဲဒေဝတဴ၊ ပဒှ်လနီ ဒေါံသ္ၚီဂၠက်သ္ၚဴ၊ မအံက်ဝန်စဝ် အံသဝ်စိုတ်ဇဴ၊ သီုနော်တရဴ မိဂၞဴကောန်ကီု၊ ညးထပှ်မိၚ် တွိၚ်ပါၚ်ကောန်ဟီု၊ တွိၚ်ပါၚ်ကောန်သွံ ဂွံမိၚ်အိုတ်သီု၊ ပဒွိၚ်ကောန်ဗၠာဲ နာဲသဏာဂီု၊ ညံၚ်လဟီုနာဲ ယာဲဗက်အိုတ်သီု၊ နော်နာဲမိကီု သီုထပှ်ပ္တန်၊ ဗြရတ်ဂွံမိၚ် တွိၚ်ပါၚ်မိပၠန်၊ တုဲပ္တီသၟီမ တလကၠတ်နန်၊ ယွံမအံက်အဲ တရဴပြဲလောန်၊ က္ညစဴနန်ထဝ် ဗ္ဒဝ်ကၞက်ဂဒန်၊... »

နန္ဒကိတ္တိ တလသ္ၚိနန်၊ မိၚ်ကောန်မဟီု ကြီုမိစဴပၠန်၊ မိပ်စိုတ်လောန်တဲ ပ္ဍဲစိုတ်သၟီမန်၊ ညံၚ်ဒိုက်ဂတ်စိ ဂွံနိဓိပၠန်၊ ဟီုတိုန်မွဲတန် လဂ္ဂန်ကြုတ်ဏာ၊ ယွံတဝ်စရှ် ထပှ်မွဲသာ၊ က္ညစဴရမိ နာဲသ္ၚိကေလာ၊ ညးထပှ်မိၚ် တွိၚ်ဗိုက်ကြိယျာ၊ ဂၞိန်ယာတ်ပုံစက် ပက်ခါန်ခါသာ၊ တွာ်တိတ်အာပၠန် မွဲတန်ဟွံခြာ၊ နန္ဒကိတ္တိ ဣဓိရာဇာ၊ ထပှ်မွဲဝဝ် ရုပ်ညံၚ်ထဝ်ဏှာ၊ ၀၀်ဇက်ဂမြိၚ် စိၚ်ချေံမွဲသာ၊ မကဵုကောန်ကွေံ ဍိုက်ချေံရေၚ်အာ၊ အမာတ်ဇက်ဂၠေဲါ သီုရဲသေဏာ၊ ကမၠောန်ဂၠေဲါအာ ကြာဝဝ်ဒေဝဳ၊ ဂမြိၚ်ထဥ ဗရုစက်ကွဳ၊ သဗာန်ပေၚ်က္ဍတ် ကွဳရတ်တဝဳ၊ မံၚ်ဆာၚ်သမုၚ် တက်ၜုၚ်အာပ္ညဳ၊ သမ္ၚေဟ်သေထဳ ဇက်သအဳဗက်ဂၠေဲါ၊ ဇက်လုပ်ပ္ဍဲဍုၚ် သမုၚ်ညံၚ်ပေဲါ၊ စိုပ်ပ္ဍဲမုက်ရုၚ် ကောန်ဍုၚ်ကၠံမွဲ၊ စှ်ေနူချေံပၠန် တလနန်ဗၠဲ၊ ယွံအမာတ်အဲ မပြဲကြဳဇှ်၊ ဇွယက္ခဳဗြဴ ရဴစိၚ်မွဲဒှ်၊ ဇက်ဏာထောံညိ ယက္ခိဗြဴဂှ်၊ ပ္ဍဲထီုဂှ်ကၠာ ဇက်ဏာကဵုပြဟ်၊ စွံပ္ဍဲထီုကွေံ ကဵုဍေံသအုဲကှ်၊ ဇွကလော်ဂှ် ပြဟ်မၞးဇက်ဏာ၊ ပကဵုၜက်တ္ၚဲ ဗြဴဝဲယက္ခာ၊ အမာတ်ဂွံမိၚ် ပမိၚ်သေဏာ၊ တက်မံၚ်ဒုၚ်ဒုၚ် ဇက်ကၠုၚ်ဟောဒြာ၊ ဇက်ဇွယက္ခာ ကြဵုဇာသဓဵု၊ ဇက်ညံၚ်ဇက်ဆု ဗရုကွဳကြဵု၊ ဇက်ညံၚ်ဇက်တၟံ ဇန်တံလဟဵု၊ စိုပ်အာဇိုၚ်ဒဵု ကၠဵုဗက်ဂြဲတံၚ်၊ ပၠောပ်စွံလဝ်ကီု ပ္ဍဲထီုဒမံၚ်၊ ဇန်ဂမၠိုၚ်ဟေၚ် ကလေၚ်တာန်ဆံၚ်၊ ဂၠေဲါစဴကၠုၚ်မာ ၜါလပါ်ဂၠံၚ်၊ လုပ်စိုပ်ဒၟံၚ် ဍောတ်ဇၞော်ကၠဵု၊ လုပ်စွံတုဲရ ယက္ခဂှ်အဵု၊ နန္ဒာယက္ခာ ပမာညံၚ်ကၠဵု၊ ပ္ဍဲထီုဂှ်ပၠန် ဂွံတန်တွဵု၊ ဒှ်မယိအဵု ဒဵုကဵုလမုဟ်၊ ပ္ဍဲလှောံဗြၜၚ် ဂနၚ်ဍုၚ်ဂှ်၊ ဗဴဂနၚ်ဍုၚ် ပ္ဍဲဒဵုသၠုၚ်မြဟ်၊ ပိသၞာံမွဲဝါ မဟိၚ်သာသၟဟ်၊ ပိသၞာံဍေံစဴ ကလော်ဗြဴဂှ်၊ ဒဵုကဵုလမှ် ဒှ်ဟဝေၚ်ခြာ၊... »

နန္ဒကိတ္တိ ဘုမ္မိပါလာ၊ ညးထပှ်ပ္ညုၚ် ဒုၚ်နၚ်တုဲကၠာ၊ သီုထပှ်ပၠန် သၟဟ်န်ညဳသာ၊ အဂ္ဂမဟေ ဒေဝဳကညႇာ၊ ဂွံပိုၚ်ကမၠောန် ပ္ဍဲနန်သေၚ်ဟာ၊ ဒှ်ဂၞကျာ်ရ အဂ္ဂမဟာ၊ ၀ဳပက်ဝဲတၟုဲ ဒးဒုၚ်တုဲကၠာ၊ လမုဟ်ဂွံသိုက် ဟွံဒိုက်ၜါ၀ါ၊ ဒါန်နူတမၠာ မိဂွံမြာဟေၚ်၊ ဨကရာတ်ဗၠာဲ နာဲသမုဲလေၚ်၊ တုဲကော်အမာတ် မန္ဓာတ်တ္ကံကြေၚ်၊ ယွံအမာတ်အဲ ပ္ဍဲနန်ဇရေၚ်၊ ဒၞဲါသဳနန္ဒာ ပြာသာတ်ဂှ်ဟေၚ်၊ မၞးတံပဝေၚ် ရံၚ်စဳရေၚ်ညိ၊ အုဲၚးသီသန် နန်ပြာသာတ်မိ၊ သေဏာပတိ တဲဂ္ညိပၚ်ယဵု၊ ကော်ရၚ်သ္ကံအဵု ခဵုလုပ်နန်လွိ၊ စိုပ်တုဲတွံစိ ပ္ဍဲသ္ၚိနန်ကၠတ်၊ ပံက်ရံၚ်ပ္ဍဲဒေန် ပ္ဍေန်စဳပၟတ်၊ ဇုတ်သၟဝ်ဒေန်ယာန် ချေံကြာန်ပေၚ်က္ဍတ်၊ ဇုတ်မၞိဟ်ပေၚ်ဗဝ် အသၟဝ်ဒေန်ရတ်၊ ဇန်တံဍေံညာတ် သမ္ၚာတ်စိုတ်သၟတ်၊ အုဲၚးထောံပၠန် ပန်ကွဳပေၚ်က္ဍတ်၊ ဏာထောံပ္ဍဲထီု သီုပန်ကွဳသၟတ်၊ နန္ဒကိတ္တိ သ္တုံဇွိပေၚ်က္ဍတ်၊ တုဲသၟာန်တိုန်သၟတ် အမာတ်ဍောတ်ဇၞော်၊ ကောန်သေထဳမွဲ ရုပ်ပြဲသော်ရော်၊ တရဴစှော်ပန် လက်သန်ပေၚ်ဗော်၊ ပိုဲဒုၚ်နၚ်ပၠန် လတူနန်ထော်၊ ထပ်ကဵုတဲသၟတ် ဒှ်ဂၞကျာ်ဇၞော်၊ လတူနန်ထော် ပိုၚ်ဗော်ကမၠောန်၊ ခုတ်ယၟုရ နာမမွဲတန်၊ မဒုၚ်နာမ ပဒုမ္မပၠန်၊ ဒှ်ဂကူအဲ ကောန်ဒေံမွဲတန်၊ မအာဒုၚ်ပၠန် ဖျန်ကဵုဒေံအဲ၊ နွံအသံကၠာ အာဟီုမွဲတဲ၊ အမာတ်သေဏာ ဘာသာကၠံမွဲ၊ လ္ၚဵုသြိုၚ်သၟတ် နန်ကၠတ်မိပြဲ၊ လ္ၚဵုကြကတ် ကၞတ်က္ဍိုၚ်ဗၠဲ၊ လ္ၚဵုတွာ်ဂၠေဲါ တိုန်ပ္ဍဲသေထဳ၊ တြုံကဵုဗြဴညာတ် အမာတ်ဍုၚ်ပ္ညဳ၊ ဂိုၚ်လးသၞာ ခေါဇာပၠးညဳ၊ ဗာန်ထဝ်ဗာန်သြန် ဟွံခၠန်နွံဇဳ၊ သၞာကျာ်သြဳ သေထဳသၟာန်တိုန်၊ ယွံသေဏာတံ သီုတ္ကံကွိုန်၊ လံဆဵုညာတ်စိ စိုပ်သ္ၚိပိုဲဗိုန်၊ မူဟိုတ်သံၚ်သိုန် ဟီုတိုန်အမာတ်၊ ဟီုပညႇာတာ ပ္ဍဲကာမန္ဓာတ်၊ သေဏာမိၚ်ပ္ညဳ ပါၚ်သေထဳကၞာတ်၊ တုဲဟီုသှ်အာ ပ္ဍဲကဵုပြာသာတ်၊ နွံအသံကၞာတ် နာဲပြာသာတ်နန်၊ ကဵုစှ်ေပ္တီပ္ညဳ သေထဳဒေံပၠန်၊ ပိုဲသၟဟ်မွဲဂၞဴ တုပ်တဴမွဲတန်၊ သီုရုပ်သီုပိုန် ဍိုက်ပေၚ်ဗိုန်က္ညန်၊ ကောန်တြုံအဲဆာဲ ကောန်ဗြဴနာဲပၠန်၊ ကဵုသၞက်ကရောဲ ကဵုမၚ်မွဲနန်၊ သိက်စိုတ်ဒေံပၠန် ဟီုပလန်ညိ၊ ထပ်တဲဇိုန်ကဵု တွဵုနန်လွိ၊ ကဵုပိုၚ်ဍုၚ်ရး အလုံဂၠးတိ၊ နွံအသံစိ တလတိရောၚ်၊၊

တၚ်တှ်ဝေါဟာရမည်ဂမၠိုၚ်... »»

သာရဝါတ်၊ အသာရဝါတ်

(နာံ) ⇒ comfort, consolation, state of being free from suffering, pain or anxiety; state of physical or mental well-being;

⇒ မိ ဂွံညာတ်ကေတ် ကောန်ဗၠာဲမကလေၚ်စဴကၠုၚ်ဂှ် မိ ဂွံဒှ်အသာရဝါတ်ညိ၊၊

⇒ ဂွံမိၚ်ကေတ်ပရိုၚ်မိစရာဲသြန်မဟွံမွဲကဵုယဲဘဲပရိုက်မွဲမွဲတုဲ မိမဍေံ ဂွံအသာရဝါတ်လောန်၊၊

ဂလာန်ဗစန်...ပ္ဍဲပုံဗြရတ်ဣဏၚ်ကၚ်ရဳဝွံ ဗီုမအခဝ်လ္ၚဵု ကဝိမၚ်ရောဂေါမချူကှ်ေလဝ်တံဂှ် တၞဟ်ခြာနူကဵုမအခဝ်လၟုဟ်ဏံညိည နွံတဴရ၊၊ ပမာတုန် - ( သြ ) အခဝ်ဝွံ ပ္ဍဲလိက်ပတ်ပိုဲမချူကှ်ေဒၟံၚ်လၟုဟ်ဏံ သွဵုလေဝ်ဒှ်မာန်၊ သဗျဉ်လေဝ်ဒှ်မာန်၊ သကၟက်ရ ( ပ္တိတ်ရမျာၚ်-သရ) လေဝ် ဒှ်မာန်၊၊ ( သြ ) အခဝ်ဝွံ ယဝ်ဒှ်သွဵုမ္ဂး ကဝိမၚ်ရောဂေါ ချူကှ်ေလဝ်ဗီုပြၚ်တၞဟ်ခြာဒၟံၚ်ညိကီုရ၊၊ စၞး( သြ ) သွဵုဂှ် ညးချူ ( အြ ) သွဵု မဖှ်သာ်ဝွံ၊၊ ဟိုတ်ဂှ်ရ ပ္ဍဲပုံဏံ တၠဝါသနာလိက်ပတ်မည်ပိုဲတံ ဆက်ဗှ်အာဂတတေံပၠန်မ္ဂး သ္ဂောံဆဵုညာတ်ကေတ် ( အြ ) သွဵု မဖှ်သာ်ဂှ်ရောၚ် အဲ မိက်ဂွံစွံဂလာန်ဗစန်၊၊

ဗြရတ်ကဵုချေဟ် တဝ်စၞေဟ်ကဵုကလော်ဗြဴမိသဳနန္ဒာ

---

ဗြရတ်တေဇ ကောန်တလဍုၚ်၊ ဂါံတွာ်တိုန်ပၠန် ကောန်ဗၠာဲဂေါ၀်သ္ဇုၚ်၊ ဖျန်ကဵုချေဟ်ဗၠာဲ နာဲသတိပ္ညုၚ်၊ တ္ၚဲဏံဒှ်အိုတ် လကိုတ်သီုဍုၚ်၊ အဲၜါကောသွံ ဍေံညာတ်တိတ်ကၠုၚ်၊ ချေဟ်ရတ်မိၚ်ပ္ညုၚ် ယဵုဒုၚ်လဝ်ကၠာ၊ ပဒွိၚ်မွဲတဲ လယိုၚ်အဲမာ၊ လယိုၚ်ဍိက်ပြဲ အဲကဵုယက္ခာ၊ စံဒြဟတ်မွဲ အဲကဵုနန္ဒာ၊ ဍေံကလော်ကွေံ အဲချေဟ်သေၚ်ဟာ၊ စံဂွံတီသၟတ် ဒြဟတ်ဍေံကၠာ၊ က္ညရရာဇာ နာဲသာဘုံပိ၊ ပၠဒြဟတ်ကီု သီုကဵုဣဓိ၊ ကဵုဗြုသမုၚ် ဒဵုဍုၚ်နာ်ဂျိ၊ ဗြရတ်ဍိုက်ကွေံ ချေဟ်နွံဣဓိ၊ ချေဟ်ဒြေပ်ဇိုၚ်ပှ်ေ ပလှ်ေမုက်ဂၠိ၊ ဇိုၚ်ပန်တဆှ် ထဍဟ်အာစိ၊ ဗတလွိၚ်ဆာဲ မုက်ဂဲါသ္တုံဇွိ၊ ကြဵုကြီုလဒု ဗြုသမုၚ်တိ၊ ချေဟ်ဇၞော်ဣဓိ သ္တုံဇွိဍာဲဂဵု၊ ရမျှာၚ်ဂဟှ်ေ ဇိုၚ်ပှ်ေတဲပ္ဍဵု၊ ဇိုၚ်ဂၠံၚ်ပေၚ်က္ဍတ် ဗဵုဗြရတ်အဵု၊ ချေဟ်တဆှ်အာ ၜါလပါ်ဗဵု၊ သမုၚ်သဓဵု ကြဵုကြီုဂမ်အတ်၊ ဍေံဗြုဂဟှ်ေ ပလှ်ေမုက်မတ်၊ လုပ်စိုပ်မုက်ရိုၚ် ကဆံၚ်ဇိုၚ်လျတ်၊ တိဗြုသဓဵု ဓိကဵုလောန်ဗၞတ်၊ အမာတ်ပေၚ်ဍုၚ် မုက်ရုၚ်ဂမ်အတ်၊ ကဆံၚ်လျတ် ဂမ်အတ်ဂဟီ၊ ဣသဳနန္ဒာ မတ်ၜါညံၚ်ဆီ၊ မိၚ်ဗရုလျတ် စိုပ်သၟတ်ဍေံတီ၊ အဲစကာကွေံ ဍေံကၠုၚ်စိုပ်ဏီ၊ လမျီုလၞီ ခပ်သီဂွံအိုတ်၊ အဲဒးတိတ်ရ ပၠဣဓိသ္တိုတ်၊ ဗြရတ်ကဵုအဲ တဝဲကောန်စိုတ်၊ ဟီုတုဲမဂး ထၜးရုပ်အိုတ်၊ ဒှ်ကလော်အဟိုတ် လကိုတ်သီုဍုၚ်၊ ဒှ်လကိုဟ်ဗြဴ ဒတဴဒၟံၚ်သၠုၚ်၊ ေၚက်ကိုဟ်တ္ၚက် က္ဍက်က်သမုၚ်၊ ဂၞေဟ်တိတ်သ္ကေက်သ္ကာ ဇကုတၟာဂၠုၚ်၊ မတ်တၟာသတ်တာ ရံၚ်အာရံၚ်ကၠုၚ်၊ ရမျှာၚ်သမုၚ် သၠုၚ်ဗၞတ်မွဲတာ၊ ဇကုတၟာစိၚ် လွိၚ်မုက္ခဝါ၊ ခဵုတိတ်ကၠုၚ်သၟတ် မၠာ်ရံၚ်မတ်ၜါ၊ သ္ၚေဝ်ဒိုဟ်သ္တုံဇွိ ယက္ခိနန္ဒာ၊ ညာတ်ကေတ်ဗြရတ် ဂမ်အတ်ကြဵုဇာ၊ ကဵုပါၚ်သမုၚ် ရုၚ်ညံၚ်ကယျာ၊ ... »

ကမၠောန်ဍောတ်ဇၞော် ဗော်သၟီစကာ၊ လကိုတ်ယက္ခ ဒြေပ်ထသပါ၊ လ္ၚဵုဂၞိန်လာဲ ဒြေပ်ပဲါတိတ်အာ၊ လ္ၚဵုဂၞိန်လလုဲ ထုဲကြာန်ဇာနာ၊ ယာတ်ညိဟွံမွဲ တဲသၟးကၠာ၊ ဂၞိန်လာဲဒဴဒြေပ် ထဍေပ်ကၠုၚ်အာ၊ လ္ၚဵုဂှ်ဆၚ် ပါၚ်တရၚ်ဒွါ၊ ဒြေပ်ပြးဂစာန် လ္ၚဵုဒွါန်တာ၊ ဒြေပ်ထုဲဓရုဲ ညံၚ်ကၞုဲဒးဇာ၊ ကမၠောန်ကမြဴ ရဴတ္ၜိုၚ်ပြဝါ၊ ဂၞိန်ယာတ်ဟွံမွဲ တုပ်နဲတ္ၜိုၚ်မြာ၊ ယာတ်ပြးဇးအာ ဒြေပ်ဇၟာညံၚ်ပြေၚ်၊ သလာ်လောတ်နး ညံၚ်ညးထဍေၚ်၊ ဒဝုဲလယှ် ညံၚ်ပၞောဟ်ဒြေပ်ရေၚ်၊ ကမၠောန်လကိုတ် ၀ိုတ်ကြိယာဟေၚ်၊ ၀ိုတ်သတိဗၠေၚ် ဖျေၚ်ရံၚ်ယက္ခိ၊ သၟီအမာတ်ဇၞော် သီုဗော်သ္တုံဇွိ၊ ဇတဝ်ဖြပ်ဖြပ် ညံၚ်လွပ်ဒိတှိ၊ ဒြေပ်ဒဴလုံဍုၚ် ထောံရုၚ်ဆၚ်တိ၊ ဒြေပ်လုပ်အောပ်ဗ္ဒာဲ ကဵုနာဲဘုမ္ပိ၊ ဇကုဇတဝ်လောန် ဗန်ဂၞိၚ်ကောစိ၊ စှ်ေနူချေဟ်ဂၠိ မတ်ညိဟွံဝေၚ်၊ ကောပသတိ ညိပကဵုဗၠေၚ်၊ ချေဟ်မိၚ်ပါၚ်ဟေၚ် သမုဲလေၚ်ဗၠာဲ၊ ဂဟက်ပ္တိတ်ထောံ ပစွံညိနာဲ၊ ဍေံရပ်တံၚ်ဂြဲ အဲသ္ပဂဲါ၀ဲါ၊ ပ္ဍဲထာန်စၞေဟ် ပပ္တေဟ်ဒေံဗၠာဲ၊ သှ်ထောံညိနာဲ ကောဗၠာဲဃောထတ်၊ ဒေံသှ်ဂဟက် တံၚ်ဗက်ခလောတ်၊ ချေဟ်ဗၠာဲဒၟံၚ်ဂျ ဂတဗြရတ်၊ ချေဟ်ကြီုဂမ်အတ် ပ္ဍဲလှောတ်မုက်ရုၚ်၊ ဗြရတ်ရပ်တဴ ပၞဴဂေါ၀်သ္ဇုၚ်၊ ပလှ်ေဓရိုက် သတ်ပရိုက်ပ္ညုၚ်၊ သဳနန္ဒာညာတ် ဒြေပ်သလာ်ကၠုၚ်၊ ဂွုလစာတ်သ္ကာ ဂၞေဟ်ၜါတၞုၚ်၊ ဟာပါၚ်ဍာဲဂြောတ် မတ်ဒလန်သ္ဇုၚ်၊ မတ်ဍေံရံၚ်ကၠုၚ် သ္ဇုၚ်ခၠၚ်သီုၜါ၊ ပရိုက်ပၞဴ ဂွံညာတ်တဴကၠာ၊ ယက္ခသ္ၚဳရံၚ် ညံၚ်အိုတ်ဇိ၀ါ၊ ဍေံဒြေပ်ကၠုၚ်ကွေံ ဂၞေဟ်တိတ်သ္ကေက်သ္ကာ၊ လုပ်ဟွံဒည ဍေံဘနၚ်ဏာ၊ ချေဟ်ဓနာဂၠံၚ် ဗက်ပၠံၚ်ဇိုၚ်ၜါ၊ ယက္ခဗလေတ် ဃံက်ကေတ်လ္ၚာ၊ ခြုဟ်ဒလိုက်က္တဵု ခဵုလုပ်မွဲဝါ၊ ချေဟ်လေဝ်သဓဵု ကလော်ကြဵုဇာ၊ လလောၚ်သမုၚ် ညးဍုၚ်အောပ်မာ၊ အသံညးၜါ ကြဵုဇာဒိၚ်ဒၚ်၊ ကလော်ဗလေတ် တေတ်ဒးမတ်ဂၚ်၊ ဇိုၚ်ပှ်ေတဲၜံက် ဃံက်က္ဍဟ်ဆီဂြၚ်၊ ဆီဒဇူပြး ပှ်ေဒးထမှၚ်၊ ဗြရတ်လတိုၚ် ပၞဴဂြိုၚ်က္ဍၚ်၊ ပရိုက်ဂြဴဂှ် ပြဟ်ပါ်ကဵုသ္ဇၚ်၊ ပၞဴပါ်သၟတ် ကလော်လောတ်လၞၚ်၊ က္တိုၚ်ပရိုက် ပြိုက်ကဵုမတ်သ္ဇၚ်၊ ပရိုက်ပၞဴပါ် ချိုတ်လ္ၚာ်သတၚ်၊ ချိုတ်လ္ၚာထရံၚ် ညံၚ်ဇွစိၚ်ဒြၚ်၊ နန္ဒာချိုတ်သ္တၚ် ဂၞေဟ်ညံၚ်ဒြၚ်စိၚ် ... »

ညးဍုၚ်တံရော ဟောကၠံၚ်ဂမြိၚ်၊ ဂၠေဲါကၠုၚ်ဗဵုကၠာ ယက္ခာဗြဴသၟီ၊ မုက်ရုၚ်ပေၚ်က္ဍတ် ဇၞော်သွတ်ဂမြိၚ်၊ တြုံထဴဗြဴဗျု သက္ကုလဟိၚ်၊ ဒစုန်တဲၜါ ဂၠေဲါအာသ္ၚိသၟီ၊ ကလော်ချိုတ်လှိၚ် တမာစိၚ်ဂး၊ ဟိုတ်ဂှ်လုပ်ဗဵု သၟိက်ဆဵုညိမၞး၊ အာအိုတ်စဴတံ တမံအဲညး၊ လုပ်ဗဵုပေၚ်ရုၚ် ၀ုတ်ဗၠာဲကၠုၚ်နး၊ ဂၠေဲါလုပ်ဆက်ဆက် ကောန်စဴဗက်ပြး၊ ပေၚ်ပ္ဍဲမုက်ရုၚ် ဂၠေဲါကၠုၚ်ပြးဇး၊ ဟွံဆဵုမွဲလှ်ေ ပလှ်ေမုက်ကြး၊ ၀ုတ်ဗၠာဲခြးမး တရးကၠုၚ်ဍုတ်၊ ဗၠာဲဗၠာဲခဍုတ် ၀ုတ်တံသီုဖအိုတ်၊ လုပ်ဗဵုညာတ်ရ ကမၠပ္ဍဲစိုတ်၊ ညာတ်ကလော်အိုတ် ပ္ဍဲစိုတ်သိၚ်သာ၊ ... »

တၚ်တှ်ဝေါဟာရမည်ဂမၠိုၚ် ... »»

ဖျန်

(သကမ္မကကြိယာ) ⇒ ဗကန်၊ ဖျန်ဂလာန်၊၊

ဗစန်

(နာံ) ⇒ ဂလာန်ဗစန်၊၊ ဂလာန်ဗကန်၊၊

ပြိုက်

၁၊၊ (သကမ္မကကြိယာ) ⇒ ပြိုက်ပျဲပျာံ၊ ပညးမွဲမွဲ ညံၚ်ဂွံယဲယာံဂိသကေဝ်၊ ပညးမွဲမွဲ ညံၚ်ဂွံဒှ်ဘဲအန္တရာဲ၊ to hurt, to injure, to afflict;

၂၊၊ (သကမ္မကကြိယာ) ⇒ ပြိုက်စုတ်၊ သိက်စုတ်၊ စုတ်၊ to put into; ... ကတိုၚ်ပရိုက် ပြိုက်ကဵုမတ်သ္ဇၚ်၊

ပရိုက်

၁၊၊ (နာံ) ⇒ (မနာံဝွံ စှ်ေကၠုၚ်နူမကြိယာ - ပြိုက် - မုက်ဂၞန် ၁ လတူဂှ်) ဘဲပရိုက်၊ ပရိုက်ပတ်ဒြဴ၊ ပရိုက်ဥပဒြဴ၊ ဒဒိုက်၊ အန္တရာဲ၊ ၀ိ၀ဲ၊ ယဲ၊၊ ... မည်ပိုဲ ဆလံသ္ဂောံဗၠးနူပရိုက်ဗၟာဒမြိုဟ်တံရော၊၊ မည်မကၠောန်စဒၟံၚ် ပ္ဍဲဍုၚ်သေံ ၜိုန်ဒှ်ပရိုက်မဂၠိုၚ်ကဵုဗီုလေဝ် နူပရိုက်ဗၟာဂှ် ပရိုက်သေံ သာညိရောၚ်ဂးတုဲ သ္ဒးမံၚ်အာ သီုဓဝ်လအေၚ်ရ၊၊ ဒၞဲါမသက္ကုပရိုက်၊၊ ဒၞဲါဋ္ဌာန်မဂၠိုၚ်ကဵုပရိုက်၊၊ hardship, misfortune;

၂၊၊ (နာံ) ⇒ (မနာံဝွံ စှ်ေကၠုၚ်နူမကြိယာ - ပြိုက် - မုက်ဂၞန် ၂ လတူဂှ် ) မွဲပရိုက်၊၊ holding capacity as of box, bag, etc;

၃၊၊ (နာံ) ⇒ မနာံဝွံ ဗွဲပက္ကတိဍေံ ဒှ်ဒၟံၚ်မနာံရ၊၊ သတ်ပရိုက်၊ (လဆောဝ်ချူ - သတ်ပြိုက်)၊ သတ်ပရိုက်ထမၞာတ်၊ ပရိုက်ဂအဳ၊ ပရိုက်ကွေံ၊ ပရိုက်ဗုၚ်စိၚ်၊၊

ပြာ်

(သကမ္မကကြိယာ) ⇒ (မကြိယာဝွံ ရမျာၚ်ဍေံ ကြပ်တုပ်ကဵုမကြိယာ-ပြိုက်-တေံရ၊၊ ဆဂး အဓိပ္ပဲါဍေံ တၞဟ်ခြာ၊ ဟွံတုပ်ရၚ်သ္ကံဟေၚ်၊၊) ⇒ ရီု၊ ဟံၚ်၊၊ to save, to help; ပြာ်ဗလး to deliver; ... ကျာ်ပြာ်သတ်နူဒဒိုက်သံၚ်သာ၊၊ ပြာ်ညိ ပြာ်ညိ ... သ္ၚိအဲ တူအာအိုတ်ရ၊၊ အာလုပ်ပြာ် အကြာညးၜါမဒှ်သွေက်ဇဵုဂှ် ဇကုဒးဘဲကီုရ၊၊ ပသာ်သ္ဂောံပြာ်ကောန်မည် နူပရိုက်ဘဲဗၟာသေံတံဂှ်ရော၊၊

ပရာ်

(နာံ) ⇒ safety, security; ဗဒိုပ်ပရာ် refugee camp; ဋ္ဌာန်ပရာ် = ဋ္ဌာန်မသက္ကုဘဲပရိုက်၊၊

ဂလာန်ဗစန်...ပ္ဍဲပုံဗြရတ်ဣဏၚ်ကၚ်ရဳဝွံ ဗီုမအခဝ်လ္ၚဵု ကဝိမၚ်ရောဂေါမချူကှ်ေလဝ်တံဂှ် တၞဟ်ခြာနူကဵုမအခဝ်လၟုဟ်ဏံညိည နွံတဴရ၊၊ ပမာတုန် - ( သြ ) အခဝ်ဝွံ ပ္ဍဲလိက်ပတ်ပိုဲမချူကှ်ေဒၟံၚ်လၟုဟ်ဏံ သွဵုလေဝ်ဒှ်မာန်၊ သဗျဉ်လေဝ်ဒှ်မာန်၊ သကၟက်ရ ( ပ္တိတ်ရမျာၚ်-သရ) လေဝ် ဒှ်မာန်၊၊ ( သြ ) အခဝ်ဝွံ ယဝ်ဒှ်သွဵုမ္ဂး ကဝိမၚ်ရောဂေါ ချူကှ်ေလဝ်ဗီုပြၚ်တၞဟ်ခြာဒၟံၚ်ညိကီုရ၊၊ စၞး( သြ ) သွဵုဂှ် ညးချူ ( အြ ) သွဵု မဖှ်သာ်ဝွံ၊၊ ဟိုတ်ဂှ်ရ ပ္ဍဲပုံဏံ တၠဝါသနာလိက်ပတ်မည်ပိုဲတံ ဆက်ဗှ်အာဂတတေံပၠန်မ္ဂး သ္ဂောံဆဵုညာတ်ကေတ် ( အြ ) သွဵု မဖှ်သာ်ဂှ်ရောၚ် အဲ မိက်ဂွံစွံဂလာန်ဗစန်၊၊

ဗြရတ် စံၚ်ဇွဂြဇုတ်မိဣဏၚ်ကၚ်ရဳတုဲ စဴအာဍုၚ်

---

လၟေၚ်ဒဒှ် တဝှ်အနဳ၊ ဣဏၚ်ကၚ်ရဳ ကျာ်သြဳယက္ခ၊ တြဳဇှ်သစ္စ ယက္ခကညာ၊ ဂုန်ပါရမဳ ကၚ်ရဳယက္ခာ၊ ဒါနတံၚ်ဂြဲ ဒတဲပ္တိုန်ဏာ၊ ဒှ်ကောန်ဒုမ္မ ဂၞကျာ်ကေလာ၊ မနောဟာရဳ ကျာ်သြဳပြဲဖာ၊ သၟီသုဓနု နာဲမြုပဉ္စာ၊ ဒဵုလမုဟ်ကၠာ ဂွံပြာကတ်ဒၟံၚ်၊ ဗြရတ်သ္ၚဳရံၚ် မံၚ်သြၚ်နာဒဳ၊ မုက်နာဲဟွံသ္ဇုၚ် ရံၚ်ကၠုၚ်ဟွံချဳ၊ ဒတဴရံၚ်သၠၚ် ဇိုၚ်ပြၚ်ဗတဳ၊ မုက်မတ်နာဲဗၠး မိဒးဟုံလွဳ၊ ဇိုၚ်တဲသ္တပ်ညဳ ဟွံကသဳဇကု၊ ဗြရတ်ဂွံညာတ် သ္ၚာတ်ဒှ်မတ်ဂၠု၊ ရမတ်ဒဇူ သ္ၚေဝ်လတူဆု၊ ညိဟွံမိၚ်ပါၚ် ရမျှာၚ်နာဲဇု၊ ကော်ဟဇ္ဇနဲ စိုပ်မွဲဗရု၊ ယွံချေဟ်ကောဇု မိစုတိကၠာ၊ က္ညညိချေဟ်ယာန် တလဍာန်ကျာ၊ ချေဟ်နာဲဂွံမိၚ် တွိၚ်ပါၚ်ဗညာ၊ က္ညကၠောံရနာဲ စရာဲရုပ္ပါ၊ တိုန်ဍိုက်စးရ နာဲပဖဳဒွါ၊ ဂါံဍိုက်ချေဟ်ယာန် ကလာၚ်ကၠောံအာ၊ စှ်ေနူချေဟ်ပြဲ သြဲလုပ်ဟွံညှာ၊ ညာတ်မိသ္တိက်တဴ ညံၚ်ရဴရုက္ခာ၊ တုပ်မိလှိၚ်သ္ၚဳ ဒ္ၚဳပံက်ပါၚ်ကၠာ၊ ကသဳရံၚ်စိ မိဂွိုၚ်ကြုတ်ဏာ၊ မိဟွံချဳကၠာ ထသပါသၟတ်၊ တက်သြိုဟ်ဆာံဆာံ ဂၠါံဇွိတ်သပေါတ်၊ မိန်တူထဝှဲါ ဗ္ဒာဲကဵုသြိုဟ်သၟတ်၊ ဂိုၚ်ဇွိတ်သပေါတ် ရမတ်ပြဟ်ဍေၚ်၊ ကံအတိက်ရော ကောကဵုနာဲဟေၚ်၊ ဍေံသ္ဍံၚ်ဗက်ကၠုၚ် ဒးဒုၚ်စဳရေၚ်၊ ကံဗက်တံၚ်ဂြဲ ပ္ဍဲသမုဲလေၚ်၊ ဗက်ကၠုၚ်ပြုပြေၚ် ဟွံဂွံဝေၚ်ခြာ၊ ဂုန်ဗက်ကောမိ မိလီုခန္ဓာ၊ အဵုမိဗြဴရတ် ကၞတ်ရုပ္ပါ၊ နာဲဒးစုတိ လီုဇိ၀ိတာ၊ ယွံနာဲကညႇာ ခြာနူကောမိ၊ နာဲကော်ကဴကဴ ကောဂၞဴစိုပ်မိ၊ ညံၚ်က္တဵုသှ်ဇျှာဲ ကဵုကောဗၠာဲညိ၊ ဏၚ်ကၚ်ရဳမိ က္ညက္တဵုညိနာဲ၊ မၠာ်မတ်ရံၚ်ညိ ယွံမိကျေဝ်လာဲ၊ ဟးဂွိုၚ်စရာဲ နာဲတလသ္ၚိ၊ မူပသ္တိက်ကၞပ် ဟွံက္တဵုချပ်ညိ၊ နာဲဗက်ကောဗၠာဲ သရာဲသ္တုံဇွိ၊ ညးကလေၚ်ဟာန် ဂစာန်ထောံမိ၊ နာဲသ္ၚိနာဲသ္ၚိ ဇိ၀ိကၠုၚ်သ္ကန်၊ နာဲမွဲချိုတ်သ္တၚ် ဇိုၚ်သြၚ်သဳဒန်၊ ဆာန်ဗက်ကၠုၚ်ကော အြမိလဂ္ဂန်၊ ဒးကၠုၚ်အိုတ်သ္ကန် ပ္ဍဲဟေဝဏ္ဏ၊ ဟးသ္ဍိုက်မ ပချပ်မာန်ရော၊ တက်သြိုဟ်ဆာံဆာံ ဂတေဝ်ယာံလော၊ မိန်လဝ်ဇွရော ယက္ခောဗြဴသွဝ်၊ စိုတ်ဟဳဂပဝ် ဗွဝ်ဒုက္ခော၊ ရမတ်သြီုသြီု ညံၚ်ဗီုမေဃော၊ မိန်လဝ်ဇွရော လောလိန်ပ္ဍဲတိ၊ »

ဟဇ္ဇနဲညာတ် မန္ဓာတ်လိုက်ပိ၊ ယွံဗောဓိသတ် ကၞတ်ဣဓိ၊ ပသောသၞာ လလံသွာညိ၊ နာဲဒဴထောံရုပ် တုပ်ဆုသအုဲစိ၊ တုပ်ညံၚ်မတ်ဗြဲ ပ္ဍဲကာသဂၠိ၊ နူကၠာဂေါ၀်ဆာဲ ကြဴသၟာဲသၟစိ၊ ဒှ်တုဲလီုပၠန် ခန္ဓဟွံဂၠိ၊ လှာဲရုပ်တမိ လီုဂတိပန်၊ သတိကဵုဗိုန် ဒှ်ကွိုန်လက်သန်၊ ဒေံယာံကေတ်ဂှ် ဟွံဒှ်ဖဵုပၠန်၊ ရုပ်ရောၚ်လေဝ်နာဲ ဆဂေတ်ဂဲါလန်၊ ကဵုဗ္စာရဏာ သၚ်္ခရာပၠန်၊ ဇွပိစှော်ၜါ ကာယျမွဲတန်၊ ကျာ်တွံလဝ်ပၠန် ညံၚ်ပၞောန်သေၚ်ဟာ၊ ဒေံလမုဟ်ရ ကၠုၚ်ထသပါ၊ အေၚ်ညိရနာဲ ပ္တေဟ်ကောဗၠာဲဟာ၊ ဒးဆာန်အိုတ်သၟဟ် နူဒှ်သမ္ဘာ၊ သတ်တိရစ္ဆာန် သီုစာၚ်အဒါ၊ အဲလေဝ်နဲဂှ် တုပ်သၟဟ်ပိုဲၜါ၊ ကဵုဗ္စာရဏာ သၚ်္ခရာညိ၊ »

ဗြရတ်မိၚ်ပါၚ် ရမျှာၚ်ချေဟ်စိ၊ ဖျေဟ်နူထဝှဲါ ဇွနာဲစိုပ်တိ၊ ဂၠဲါအှော်တုဲစံၚ် ဝေါၚ်သယက္ခိ၊ စံၚ်ဇွကၚ်ရဳ ယက္ခိဏဳမိ၊ စံၚ်တုဲဒှ်စိ ဇွမိရုပ္ပ၊ တုဲတွံတးပ္ကောံ ချောံဇုတ်မှာယျ၊ တၟံဗဝ်စုတ်ပ္ညဳ ဗီုစေတဳရ၊ သလုၚ်ပန်ဟတ် ဒးသၞတ်မူလ၊ ရုပ်စေတဳဟေၚ် စဳရေၚ်လဝ်ရ၊ ယမုခုတ်ပ္ညဳ စေတဳဂှ်ပၠ၊ စေတဳသြၚ်ဂၚ် သြၚ်သာဂရ၊ ဖဍိုက်နာဲဂှ် ဒှ်ကၠိက်ဂြိုပ်ရ၊ ဒဵုလမုဟ်ပၠန် တဴဂြိုပ်ရညႇ၊ ကၠိက်ဂြိုပ်နာမ မူလတမၠာ၊ ဒဵုလမုဟ်ဟေၚ် ကော်တဴသေၚ်ဟာ၊ ဗြရတ်သၟီဗၠာဲ ဂကူနာဲသာ၊ ဗျူပတန်ကာယျ ဇြမုက္ခဝါ၊ ဗန်က္ၜံၚ်ဒေၚ်လ္ၚုၚ် ရံၚ်ကၠုၚ်ရံၚ်အာ၊ ဇြေဟ်ဇြာဲမံၚ်တုန် ဂုန်မိကြုတ်ဏာ၊ ဍာ်ဟွံဒှ်သုၚ် ပုၚ်ဟွံပကာ၊ ချေဟ်ဟီုလာံသာ ယွံမှာဗောဓိ၊ ကောတွံကဵုနာဲ ပြယျာဲဘုမ္ပိ၊ စိုပ်ပကြုပ်ကြး ပ္တန်ကဵုဒးညိ၊ ပ္တန်စိုတ်ကဵုတန် ကောန်တလတိ၊ ပ္ဍဲဂြိုပ်သၞဝဲ ပ္ဍဲသြၚ်ဂၚ်ဂျိ၊ သွာလၞီညိ တလတိမန်၊ က္ညစဴဍုၚ်ရ နာဲပလွောၚ်စန်၊ မံၚ်လံမဂး ဟွံဒးပ္ဍဲဂြန်၊ »

ဗြရတ်မိၚ်ပၠန် ချေဟ်ဝန်စဝ်စိ၊ အာရချေဟ်ရတ် ဟဇ္ဇနဲဂၠိ၊ ဍိုက်ဟဇ္ဇနဲ တြုံပြဲဣဓိ၊ သၞာ်ရတ်ချတ်ဂၞိၚ် သၟီနာဲဘုမ္ပိ၊ လိုန်သဗာန်ကျာ တူဍာန်ကာသိ၊ တ္ၚဲသဝ်ယောန်န် ဗၠန်အမ္ဗာစိ၊ လွဳမာန်စက်ထဝ် ဂေတ်ဂပဝ်ဂၠိ၊ ထောံတ္ကံကြေၚ်စိ ဂေတ်ဂၠိဂစာန်၊ တက်ပရဟ်ဗ္ဒဴ သိန္ဓဴလ္ၚီဟာန်၊ ဗၠန်သိန္နေရု ပျးဇံမုပ္ကာန်၊ ကၠောံပျးတ္ကံသအာၚ် ကၠေံထာန်တ္ကံကြေၚ်၊ မာတ်သၟီတ္ၚဲဟေၚ် ဗၠေၚ်အာတုဲရ၊ ပါန်ခဳချူဗ္ဂောဝ် ပယျောဝ်ကာယ၊ လ္ၚဵုလွံက်ချီု ခၠၚ်ပ္ဍီုခဏ၊ လ္ၚဵုသၠုဲ သာ်ကၠေၚ်ၚုဲက၊ လျးခၠၚ်ခဏ တူကာသဂၚ်၊ လ္ၚဵုဖလီု ညံၚ်ဍီုမာဲက္ၜၚ်၊ လ္ၚဵုလျးဂွု ညံၚ်ကၞုသၚ်၊ မွဲသာ်လျးအာ ညံၚ်နဳလာက္ၜၚ်၊ ညံၚ်သာ်ဗဒါ ဂၠံကာသဂၚ်၊ လ္ၚဵုတုပ်က္ဍၚ် ဂၠုၚ်က္ၜၚ်နာတ်တြ၊ လ္ၚဵုတုပ်တဴ ရဴသၟီသဳဟ၊ ကလိၚ်စိၚ်ရော ဥေဿာဗျက္ဃ၊ အမှဳကၟီဗြန် ဟွံတီနန္တ၊ မာတ်တ္ၚဲမပၠိုတ် အိုတ်လျးဟေၚ်ရ၊ သ္ၚဳတူကာသ လျးခဏရေၚ်၊ ညံၚ်ညးစဳပြေၚ် ဒၟံၚ်ရေၚ်တဝဳ၊ သၞံၚ်ပြေၚ်ဂဵုဍာဲ ကမတ်ဂၠဲါသ္ၚဳ၊ ကောန်စာၚ်မွဲစွံ ဗက်ၝောံတဝဳ၊ သၞံၚ်ကၞုဟ်လၞၚ် ပ္ဍဲဂၚ်ဝိတှဳ၊ ဂၠဴကၟက်ဂၠဴဗြဴ လျးတဴဖျဳဖျဳ၊ ဇြုံကၠန်သေထဳ ဖျဳဖျာညံၚ်သ္ဍဴ၊ ယိုက်ဂၞံက်သဓဵု သိၚ်ဃဵုဇက်စဴ၊ လျးညံၚ်ပ္ဍေန် ကၠဵုကဝေန်တဴ၊ သၞံၚ်ၜါရေၚ်ဆက် သီုကဵုကၟက်ဗြဴ၊ သဳဟရာဇာ သီုၜါဂၠိန်နှဴ၊ ယောဂဳဓနဴ သမ္ၚေဟ်ဗြဴမာ၊ ယက္ခဂှ်သၟတ် ရပ်လေံဗတ်သ္ကာ၊ မတ်ဂဵုသလံၚ် ဒှ်တဴသၞံၚ်ၜါ၊ ဗၜေံမြာ်ထဝ် က္ဍဝ်ဂၠုၚ်လှဴဂါ၊ ဂတာံမဂ္ဂ ပါံၚာၚ်ပၠသ္ကာ၊ သၞံၚ်ချေဟ်တုန်ကၠာ အဿာယမု၊ စိၚ်လပှ်ဂဲါ ဂၠဲါဗိုၚ်သစ္ဆု၊ ကျာံဂၠဲါနာံထံၚ် ဗ္ဒဟ်မံၚ်အမှု၊ ကၞုဲဂၚ်သီုၜါ သ္ဍောန်ရုက္ခာဂၠု၊ သၟီကဵုချေဟ်အဵု ဗဵုစိုတ်လ္ၚု၊ တူဍာန်အမှဲ ဇက်ဂၠေဲါထဥ၊ ရာသဳစှ်ၜါ ဇက်အာဂြုဂြု၊ ပ္ဍဲပထဝဳ ဇက်တဝဳဂၠု၊ ဗဵုအာနကျတ် မှတ်ဍုၚ်ဇကု၊ ဂၠေဲါစှ်ေရုရု ဇံမုဂကူ၊ သူရိယျဟေၚ် ဗၠေၚ်ထာန်ဇနူ၊ ကၠောံပျးတ္ကံကြေၚ် ပၠလျးတၟေၚ်အူ၊ လေံကလးလျတ် မှတ်ဇက်ဟွံဇူ၊ ချေဟ်ရတ်ဇနူ ဂကူအမ္ဗာ၊ လိုန်ယုဂ္ဂန္ဓဝ် ဇက်ဂၠိန်စဝ်အာ၊ ကၠောံပျးတ္ကံကြေၚ် ထဍေၚ်အန္ဓာ၊ အရှိုန်တမး အကးဖျဳဖျာ၊ ဇန်တံကမၠေဝ် အရေဝ်ဟောဒြာ၊ သၚ်ဗျုသၚ်ဗၠာဲ သှ်ဇျှာဲဂါထာ၊ ပ္ဍဲဖဴသမုၚ် သ္ဇုၚ်တွာၚ်သူရာ၊ ရေသူတံကၠာ ကၠောန်ရာမွဲတဲ၊ ဒဇဲဒမာတ် ပုတ်ဒါတ်ပသဲ၊ ဒေါၚ်ပၠဳဇိုၚ်ဍုၚ် ၜုၚ်မံၚ်ရိုဟ်တ္ၚဲ၊ ဗော်သောန်ရပ်မိဟ် စဝ်ဖျေဟ်ဂွံမွဲ၊ ပါန်မုတ်ဃောပုတ် ဗရုပၞုတ်သောဲ၊ ရေသူဃောတောတ် ချူမတ်ဗိုတ်ဗၠဲ၊ ဗြဴဖျာတွာ်ဂၠေဲါ လုပ်ပ္ဍဲဒမံၚ်၊ ဂဍာ်ဟောဒြာ အာဂၠဲါမံၚ်သံၚ်၊ ကမံဂၠဲါကျောဝ် ပ္ဍဲဒေါ၀်နာံထံၚ်၊ စာၚ်ပဝ်စှ်ေဂၠေဲါ ခြးစပ္ဍဲဂၠံၚ်၊ အဒါသမုၚ် တိတ်ကၠုၚ်ဒမံၚ်၊ ရုရုသံၚ်သံၚ် ဗြုမံၚ်ကမြဴ၊ ကွဳပြေၚ်တဆှ် ကြဴဂှ်ကွဳဂၠဴ၊ ဗရုသမုၚ် ကၠုၚ်ၚ်စဴစဴ၊ လလောၚ်ကမြဴ အလုံဂၞဴဍုၚ်၊ တ္ၚဲယးတမး အကးခၠၚ်သ္ဇုၚ်၊ ဗြရတ်စိုပ်ဍုၚ် အကးသ္ဇုၚ်ခၠၚ်၊ ဒျာန်စှ်ေညှာညှာ စိုပ်အာဥမၚ်၊ ချေဟ်ဒတဴဒၟံၚ် ဂွုကိုဟ်ညံၚ်တၚ်၊ တုဲဆၚ်စှ်ေကွေံ နူချေဟ်ပြဲက္ဍၚ်၊ »

မိဂွံညာတ်ကောန် ညန်ပါၚ်ဥမၚ်၊ ညံၚ်ကောန်အိန်ဗၠာဲ နာဲရာဇာဝၚ်၊ လျးတမးခၠၚ် ဗၜၚ်တဴလျး၊ ဒြေပ်လုပ်ယိုက်ကောန် ဗန်ဆုၚ်ဒေါဝ်စး၊ ဟီုပ္တီၝဲသအး ယွံညးမပြဲ၊ လၟာဂၞဴပ္ညုၚ် စိုပ်ကၠုၚ်ရၝဲ၊ ညးတရဴမိၚ် လွိၚ်ကၠုၚ်တဲ၊ ဂၠဲါဂၠါံခြုပ်ခြး ဒးညးဒးအဲ၊ ကံယာဲရောၚ်ကောန် ဒဒိုက်လောန်တဲ၊ ဗြရတ်ဗလဲ ဂၠေဲါသီုသကံ၊ စိုပ်ကၠုၚ်ကၟိန်ဗၠာဲ နာဲမွဲတမံ၊ ညးတရဴပ္ညုၚ် ဆုၚ်က္ဍိုပ်ဆုၚ်ကံ၊ မိစမဳကိုပ် ဒဵုစိုပ်တ္ၚဲဏံ၊ ဒွိၚ်ဒၟံၚ်ဂြိုဟ်ချံ ဒဵုတ္ၚဲဏံပၠန်၊ ကၠုၚ်စိုပ်မွဲတဲ ဒွိၚ်ဟဲရကောန်၊ ဇဝေါ၀်ရမတ် ညံၚ်ဗြဲဝဿန်၊ လမုဟ်ကောန်ဗၠာဲ စိုပ်ကၠုၚ်ယာဲပၠန်၊ စိုတ်ယာဲသ္ဂောံတန် ဗၠးပၠန်သ္ၚောံ၊ ဟွံဒးနုစတ် ဟွံဒးဇတ်ဇောံ၊ ဟွံဒးစံၚ်တူ တ္ၜူမာဲဒေၚ်ဗျောံ၊ ဟွံဒးသ္ၚောံ ဟွံဒးဟောံဇြ၊ ဟွံဒးစံၚ်တူ တ္ၜူမာဲစိတ္တ၊ ယာဲဗၠးဟောံဇြ ရလေဝ်ကောန်ဗၠာဲ၊ ဍာ်ရမတ်စိ ဒမၠိလောန်ကာဲ၊ သ္ကဟ်ဇတ်ရကောန် ယွံထဝ်သောန်ယာဲ၊ မိသ္ဂောံသိုက်လှိၚ် ဟွံဒးဒွိၚ်ဒွဲါ၊ ဂၠုမိစိုပ်မိ ၜိုဟ်စိုတ်ညိနာဲ၊ ဂုန်မကောန်ဗၠာဲ ယာဲသ္ဂောံသိုက်တန်၊ မတ်မိကၠုၚ်ဂၠု မိၚ်ဗရုကောန်၊ ဆရမျှာၚ်ပၠန် ပါၚ်ကောန်စရာဲ၊ ရုပ်ဂၠုကောဗၠာဲ ညိနာဲရောညာတ်၊ ဝဲရောၚ်ကောန်ဗၠာဲ သြိုဟ်ယာဲညံၚ်ပါ်၊ ကြုပ်ကြးဒေါံသ္ၚီ လနီလနာ်၊ မိၚ်ရမျှာၚ်ဆာဲ ရုပ်နာဲရောညာတ်၊ သြိုဟ်မိညံၚ်သ္ပာ် ဂွံညာတ်ညိရော၊ ညးတရဴသ္ပောတ် မုက်မတ်သီုသော၊ »

ဗြရတ်ဂွံမိၚ် ပဒွိၚ်စိတ္တော၊ နော်နာဲတရဴ ပက္တဴစံၚ်တူ၊ နော်တရဴရော အြပဒွိၚ်ညိ၊ ကောန်ဝဳဗလး ညံၚ်ဂွံဗၠးစိ၊ လျိုၚ်ကောန်ရ လ္ပဒွိၚ်ညိ၊ တုဲတုၚ်မတ်ပြဟ် ကဵုဍာ်တှ်စိ၊ မတ်တေၚ်ပေၚ်တိ ရံၚ်ညာတ်စိစောန်၊ ဒိဗ္ဗစက္ခု ဂဥုဲဝွံပၠန်၊ ဖုဲနှဴကုမတ် ဍောတ်ဗၠာဲစုတ်ပၠန်၊ စုတ်မတ်နော်နာဲ သီုယာဲမွဲတန်၊ သီုထပှ်ပၠန် မွဲတန်ညာတ်အိုတ်၊ နော်တရဴဂၠိန် အဵုကၟိန်ပြဲသ္တိုတ်၊ ဂဍောၚ်မတ်ယာဲ နော်နာဲပေၚ်စိုတ်၊ နော်ဂွံညာတ်အိုတ် ပေၚ်စိုတ်ယာဲဇု၊ ရုပ်သာ်ၜတ်သောၚ် မုက်ညံၚ်ဂိတု၊ ဂွံပြာ်လဝ်ယာဲ နော်နာဲမိဇု၊ နူတ္ၚဲဝွံအဵု ဒဵုလီုမစ္စု၊ ကဵုဂွံသိုက်လှိၚ် သမၞိၚ်နန်မြု၊ အယုက်သီုပိုန် ကဵုမောဝ်တိုန်ဂၠု၊ ဖဵုဂွံလွဳရ ဗၠိုၚ်ဗၠဇကု၊ ကဵုနိဗ္ဗု မြုတာဝတိၚ်၊ ကဵုဂွံစသိုၚ် ဂွံပိုၚ်လဟိၚ်၊ ကဵုဂွံပိုၚ်ပၠန် ထာန်နန်ဇမၠိၚ်၊ ကဵုဂွံပိုၚ်က္ဍၚ် တူနန်ဒြၚ်စိၚ်၊ ကဵုဂွံသိုက်လှိၚ် တာဝတိၚ်ညိ၊ ကြဳဇှ်ကောန်ဍောတ် မတ်ဂၠုသ္တုံဇွိ၊ ဂွံယးအာပၠန် ဂွံညာတ်ကောန်မိ၊ ဂွံညာတ်ကောန်ယာဲ နာဲတၠဣဓိ၊ ကဵုဂွံသိုက်ဂၠိ ညိရကောန်အဲ၊ ဗြရတ်ဂေါဝ်သ္ဇုၚ် ယဵုတလုၚ်တဲ၊ ဒုၚ်မောဒနာ နာဲသာနန်ဗၠဲ၊ ကလံနော်ကၠာ သီုမာတာမွဲ၊ ဟီုပ္တီမိအဴ နော်တရဴပြဲ၊ ကောန်တိုန်နန်ဗၠဲ ပ္ဍဲပါသာဒ၊ ပရိုက်ပၞဴ ဂွံဖျဴနၚ်ရ၊ ကောန်တိုန်တွာဲပၠန် ပ္ဍဲကၠတ်နန်မြ၊၊ . . . » »

တၚ်တှ်ဝေါဟာရမည်ဂမၠိုၚ် ... »»

သၟာဲသၟ

(အကမ္မကကြိယာ) » အိုဟ်၊ ဂြုဲ၊ လီုလာ်၊၊

မၠာ်

(သကမ္မကကြိယာ) » မၠာ်မတ်၊၊

(နာံ) » လမၠာ်၊၊ လမၠာ်လၜဲ၊၊

မိဣဏၚ်ကၚ်ရဳ အိုတ်သ္ကန် ချိုတ်အာ ဇိုၚ်သြၚ်ၜဳ

မိကလော်ဗြဴ တဴဇိုၚ်သြၚ်ၜဳ၊ ဣဏၚ်ကၚ်ရဳ ဒ္ၚဳမိၚ်ပါၚ်နာဲ၊ စံၚ်တူဘၚ်တ္ၜိၚ် ဂုန်သၟီကောဗၠာဲ၊ ယွံကောဗြရတ် ကၞတ်စရာဲ၊ ပ္ဍဲစိုတ်ကောသၟတ် နူဍောတ်ကဵုကၟာဲ၊ ဒေံဟွံစဴရ ခန္ဓဇိုန်တွာဲ၊ ကၠောံညိကောဗၠာဲ ဗဵုရုပ်နာဲသၟတ်၊ ဒဒှ်မိဆာန် ဇြဟာန်ကၞတ်၊ ယွံဂဍောၚ်မတ် ကောကၞတ်စိုတ်၊ ကလေၚ်ညိအဴ ယွံသ္ဍဴကြက်ဗိုတ်၊ ဒဵုလမျီုအိုတ် မိဟွံဝိုတ်သၟတ်၊ ယွံဂိုဟ်သြိုဟ်မိ ညိကောဗြရတ်၊ ဒဒှ်ဂၠိန်နှဴ တဴမွဲနန်ကၠတ်၊ ကေၚ်လှိၚ်မွဲဒၞဳ ကေၚ်ကောလွဳလွတ်၊ ကေၚ်ကောဂိုၚ်ၜှ် ဍောၚ်ဒကှ်ရတ်၊ ဟွံဝိုတ်ညိသၟတ် ဗြရတ်ကောအဲ၊ ဒဇန်နာဲသ္ၚိ မွဲတိဟွံမွဲ၊ ဒဇန်တုပ်တဴ ကွဴထောံခပေဲါ၊ ဒဇန်ကၠဗြန် စကောန်မွဲတဲ၊ ဒဇန်တံၚ်ရက် ဂလက်ကောန်ပြဲ၊ တိုပ်ပ္ဍဲတိပၠန် ကောန်ဟွံရံၚ်မွဲ၊ ဒဴထောံဗြဴရော သၞောဝ်ဒါန်ကောအဲ၊ ဒဇန်ပန်ပြဲ နာဲမွဲပေၚ်အိုတ်၊ မူသ္ဂောံစွံစိုတ် ချိုတ်ကွေံရကော၊ ကၚ်ရဳယက္ခ ယာံထလောတ်လော၊ တက်သြိုဟ်ဆာံဆာံ ယာံတဴဂၠိုၚ်အြ၊ မိယာံလောတ်လော ပၠောပ္ဍဲသြၚ်ၜဳ၊ ...

ဗြရတ်ကောမိ နွံသိဒ္ဓိလွဳ၊ ညာတ်မိဗြဴရတ် မိလောတ်စှ်ေသ္ၚဳ၊ ဒြေပ်အာဒြေပ်ကၠုၚ် သြၚ်ကြုၚ်နာဒဳ၊ ရမတ်ဒဇူ ညံၚ်ဇမောဝ်ၜဳ၊ ယာံကၠုၚ်ယာံအာ ကဵုမှာဒေဝဳ၊ ဟီုကဵုချေံပ္ညဳ အရံၚ်နဳလာ၊ ယွံဟဇ္ဇနဲ ကၠောံညိမွဲဝါ၊ မိလောတ်တဴပ္ညဳ သြၚ်ၜဳဂၚ်ဝါ၊ ကၠောံမွဲဝါကွေံ ကောဖျေံမေတ္တာ၊ ဟဇ္ဇနဲမိၚ် တွိၚ်ပါၚ်ဒေံကၠာ၊ ဟဇ္ဇနဲမှာ တုဲဟီုအာပြဟ်၊ ယွံဒေံဍောတ်အဲ နဲတဝ်စရှ်၊ နာဲပသိၚ်သာ ပူဆာဇြာဲသ္ကဟ်၊ ဂကူမၞိဟ်ဟေၚ် ဟွံသေၚ်ထဝ်စှ်၊ ဂကူကလော် ဗော်စမၞိဟ်ဂှ်၊ ယဝ်ကၠောံအာရ ရပ်စလမုဟ်၊ သီုနာဲသီုအဲ ကဝဲကံသၠဟ်၊ နာဲလပဒှ် ဇြသ္ကဟ်ညိနာဲ၊ ဍေံအလေက ဍေံပစနာဲ၊ ဂၠိုၚ်နဲဍေံပ ပဝဥပ္ပဲါ၊ ပပ္တေဟ်ညိနာဲ ဒေံဗၠာဲဗြရတ်၊ မိဍေံမွဲတဲ တဴပ္ဍဲနန်ကၠတ်၊ စမဳဒေံအဲ ရိုဟ်တ္ၚဲအဆတ်၊ ယဝ်ဍေံဂွံကွေံ ဝးကံဆီဇြောတ်၊ မူပကလော် ဗော်ရပ်စသတ်၊ အေၚ်ညိဗြရတ် ဍောတ်သမုဲလေၚ်၊ ဆတုဲလဝ်ဒှ် *ဟုဲဟှ်ဂှ်ဟေၚ်၊ ကောဟီုနာဲပ္တေဟ် ပသလှ်ေတၟေၚ်၊ ဗော်စစိၚ်ပြေၚ် ဝေၚ်ညိမှာဲဒေံ၊ ...

ဗြရတ်ဂွံမိၚ် ချေဟ်ပၟိၚ်လှေံ၊ စိုတ်နာဲဒေၚ်ဗျောံ ကၞပ်လဒံကၠေံ၊ ထောံမတ်သ္ၚဳမံၚ် ရံၚ်မိဍောတ်ဆေံ၊ မတ်ဟွံလၜဲ ပ္ဍဲနာဲညိည၊ ညာတ်မိဍောတ်ဆေံ ဟီုလှေံဒေံဗြဴ၊ ယွံမိကၚ်ရဳ ကျာ်သြဳနန်ပ္ကဴ၊ နာဲပစမဳ သြၚ်ၜဳရအဴ၊ ကောဟွံကၠောံရ က္ညမိပၠန်စဴ၊ ဇြဟာန်ကောဂၞဴ စဴကၠာဗြဴရတ်၊ ကြဴကောကလေၚ် ဇရေၚ်နန်ကၠတ်၊ စဴပတန်သွာ ပ္ဍဲပြာသာတ်ရတ်၊ စဴတိက်သ္ၚဳဒၟံၚ် ပဍောၚ်ဇြဟတ်၊ စဴရဗြဴရတ် ကၞတ်ကျာ်သြဳ၊ ...

ဏၚ်ကၚ်ရဳမိၚ် တွိၚ်ပါၚ်ဂှ်ပ္ညဳ၊ ညံၚ်ရှ်အမြိုတ် မိၚ်စိုတ်ဒးချဳ၊ မိတီကေတ်ဟေၚ် ရိုဟ်ရေၚ်ကဵုဇဳ၊ ဒဒှ်ပလွဳ တွံကဵုဇဳအိုတ်၊ ယွံလေဝ်ကောဗၠာဲ နာဲဗပေၚ်စိုတ်၊ မိတီစနာဲ ကောဗၠာဲကြက်ဗိုတ်၊ နူတိတ်ဝေၚ်ယာန် ဥဒျာန်တေံသ္တိုတ်၊ ကောလဖှ်ဂၠဲါ မိသှ်ပၠာဲအိုတ်၊ ပ္ဍဲဂြိုပ်ပ္ဍဲစိုတ် နာဲဂွံအိုတ်ဆာဲ၊ ဂလာန်ဟုဲဟှ် မိသှ်ဂစာဲ၊ ကောဒေပ်ဥပ္ပဲါ စနာဲကဵုမိ၊ သုၚ်အရက်ဂျိ လမုဟ်မိတီ၊ ခြၚ်စိုတ်အလီ လမုဟ်တီဟေၚ်၊ ညိဟွံဒစေၚ် ညိဟွံဝေၚ်စိ၊ ကသူကၞေၚ်မိ သ္ဇက်ဗျိဟမွဲ၊ တက်သြိုဟ်ဆာံဆာံ မိယာံတူယဲ၊ ပ္ဍဲဂှ်အနဳ ကၚ်ရဳဒက်ဝဲ၊ ဘဝဝွံမွဲ အဲယာံဗက်ကော၊ ဘဴဂတရော ကောယာံဗက်အဲ၊ ယွံဒေဝဇြဲ အဲပတ္တဏာ၊ တိုၚ်ရာဒနာ ပကဵုမှာညိ၊ ပ္ဍဲဘဴဂတ ဂၠိုၚ်ဘဝစိ၊ ကဵုဗြရတ်ဒှ် ညံၚ်အဲဒှ်ညိ၊ ပကဵုမှာသ္ၚောဲ ဒက်ဝဲကောမိ၊ အဲဒးအိုတ်ဒဲ ပ္ဍဲသြၚ်ဂၚ်ဂျိ၊ ကဵုလၞီဇိဝိ ပ္ဍဲဂၚ်ဂျိကီု၊ ဒှ်ဂဂိတ်စဲ အဲနွံလမျီု၊ ဇြောတ်ဆီညံၚ်ဂွံ ပဇွောံအဲကီု၊ ပကောတ်သီုကၠံ မပ္တံအိုတ်သီု၊ ကဵုအဲဂွံဇြောတ် ဆီဗြရတ်ကီု၊ ယွံဒေဝတံ တမံအိုတ်သီု၊ ဍိက်ဗိုန်သစ္စ ညိညဟွံလီု၊ ဝဲအဲအိုတ်သီု ကဵုစိုန်သ္ကီုညိ၊ ကဵုဂွံမြာ ပမှာသတိ၊ ကဵုဂွံစိုန်သ္ကီု ဗိုၚ်ရီုဍိက်ညိ၊ မိယာံတသိ ယူတိဇီုကၞေၚ်၊ ယွံကောတိက္ခ က္ညနာဲကလေၚ်၊ ကၠုၚ်ရံၚ်မုက်ညိ မိစုတိဟေၚ်၊ တက်သြိုဟ်ယူတိ မတ်ညိဟွံဗၠေၚ်၊ ပ္ဍဲဇိုၚ်ဂၚ်ဟေၚ် ရိုဟ်ရေၚ်လဖှ်၊ ကောဟးကောဇု ဂၠုဒဇန်ဒှ်၊ မိတဝ်စရှ် သ္ဗသ္ကဟ်ဂြိုဟ်ချံ၊ စံၚ်တူဆံလံ ဂြိုဟ်ချံဒကး၊ ဇတဝ်ဖြပ်ဖြပ် ဒဇပ်ဂတး၊ မိတလုၚ်တွာဲ သၟီဓဝ်နာဲညး၊ ပ္ဍဲသြၚ်ဂၚ်ဂျိ မိသ္ကန်ဂတး၊ ဗြက်သြိုဟ်ဒကး ၜါလွးသေၚ်ဟာ၊ ယက္ခဗြဴကၠာ အိုတ်သ္ကန်မှာတုန်၊၊

တၚ်တှ်ဝေါဟာရမည်ဂမၠိုၚ် ~~~~~
ဟုဲဟှ် = (နာံ ) private, personal matters, ပရူဒဒှ်ဇကုမပၞုက်ဗ္ဒန်လဝ် ဟွံမိက်ကဵုညးမွဲသအာၚ်တီဂှ် မည်တံဟီုစ - ဟုဲဟှ် ၊၊
------------------------
မြာ = (သကမ္မကကြိယာ) ကလိဂွံ၊ ဂွံ၊၊ မြာတသိုက် = ကလိဂွံတသိုက်၊၊
------------------------
ဇု = (နာံဝိသှ်ေ) မဂလာန်ဝွံ သ္ဒးဗ္ဂပ်ဖျပ် ကုမဂလာန်တၞဟ်မွဲသအာၚ်ပၠန်၊၊ ပမာ ... နာဲဇု၊ မိဇု၊ ကောဇု၊၊ မၞိဟ်ဗြဴ ဍေံသ္ဍိုက်မၠိုက်တဴကောဇြဟာန်ဍေံတုဲ ဍေံကော် - ကောဇု၊၊ မၞိဟ်တြုံလေဝ် သ္ဍိုက်မၠိုက်တဴဒေံဗြဴဇြဟာန်ဍေံတုဲ ဍေံကော် - နာဲဇု၊ မိဇု၊၊ ဟိုတ်ဂှ်ရ မဂလာန် (ဇု) ဏံ နွံအဓိပ္ပဲါမ္ဂး သ္ဍိုက်မၠိုက်၊၊ ဇု ဒၞဲါဏံ ကၠုၚ်နူကဵု ဇုဇဗဴလတေံဟွံသေၚ်၊၊
------------------------
လော = (အကမ္မကကြိယာ) ကြိယာဝွံ ယဝ်သ္ပ သကမ္မကကြိယာမ္ဂး သ္ဒးထပ်စုတ်(ပ)တုဲ ဒှ်(ပလော၊ ပၠော)သကမ္မကကြိယာရ၊၊ ကြိယာသၟေဟ်တံဂှ် တီကေတ်ညိ၊၊ လုပ် = ပၠုပ်၊၊ လောပ် = ပၠောပ်၊၊ လောတ် = ပၠောတ်၊၊ လေတ် = ပၠေတ်၊၊ သောၚ် = ပသောၚ်၊၊ ယဲ = ပျဲ၊၊ ယာံ = ပျာံ၊၊ ယဲယာံ = ပျဲပျာံ၊၊ ယုတ် = ပျုတ်၊ မာ = ပမာ၊၊ ယုတ်မာ = ပျုတ်ပၟာ၊၊ နူအကမ္မကကြိယာ မပြံၚ်လှာဲကၠေံ သကမ္မကကြိယာ နနဲဝွံဟေၚ် စၟတ်ညိ၊၊ မကြိယာမဖှ်သာ်ဝွံ ပ္ဍဲအရေဝ်မည်ပိုဲ နွံတဴဂၠိုၚ်ညိသေၚ်၊၊
------------------------
ဒဲ၊ သ္ကန်၊ လမျီု၊ ဇိဝိ = (နာံ) မဝေါဟာရဂမၠိုၚ်ဝွံ နွံလအာအဓိပ္ပဲါမတုပ်သၟဟ်တဴ၊၊
------------------------
အခြၚ်၊ အခြၚ်ရ = (နာံ) မဂလာန်ဝွံ စွံတမ်ဝါကျလၟိုန်၊၊
ပမာတုန် - အခြၚ်ဒှ်ဨကရာတ် မၚ်ဗၠာဲဂှ်ဟွံတီ၊၊ The young man did not know that it was the King.
အခြၚ်ရဗှ်ေလောဲအာ အဲ ဟွံတီ၊၊ I did not know that you became rich!
အခြၚ်ဗှ်ေလီစအဲဂှ် လမုဟ် ဂွံတီအိုတ်၊၊ Now I know all that you have lied to me.
ခြၚ်စိုတ်အလီ လမုဟ်တီအိုတ်၊၊

မိဣဏၚ်ကၚ်ရဳ လရိုအ်ယာံကရေဝ်ကရောတ်တဴကဵုဗြရတ် ပ္ဍဲဇိုၚ်သြၚ်ၜဳ

အဏံသၟီဗၠာဲ နာဲယာန်အဿ၊ သၟဝ်တၞံဇြဲထဝ် ပ္တန်လဝ်ကာယျ၊ သြၚ်ဂၚ်ဂျိရ ကာလဂှ်ကၠာ၊ ဣဏၚ်ကၚ်ရဳ ဒေဝဳယက္ခာ၊ ဇၞတ်မဗက်အာ ပူဆာကၚ်ဇတ်၊ ထောံဒဵုဆဵုဗၚ် ကြၚ်ဗက်ဗြရတ်၊ စိုပ်ဂြိုပ်ဇီုဒွး မိတ်တမးမတ်၊ ထောံမတ်ညာတ်အာ ကြာဂြိုပ်ဗိုန်ဗတ်၊ ထသပါသၟတ် ဗြဲမတ်ပြဟ်ဏှဳ၊ လနီလောန်ဗၞတ် ဗြဴရတ်ဒေဝဳ၊ ညးၜါကၠိက်ကၞတ် *မှတ်စှ်ေဒ္ၚဳဒ္ၚဳ၊ သီုညးၜါကွေံ မှတ်စှ်ေဇိုၚ်ၜဳ၊ စိုပ်ပ္ဍဲသြၚ်ဂၚ် ဇိုၚ်ပြၚ်ဗတဳ၊ နာဲဂွံသတိ မိဗြဴယက္ခဳ၊ တဲသ္တုံဂိုၚ်ၜှ် သၠဆုဂှ်ပ္ညဳ၊ တဲဇွိထောံပ္တုံ ပ္ဍဲဘုံဍာ်ၜဳ၊ သၠဆုလာဲပ္ညဳ *ဒ္ၚဳဒှ်ဗတ်သၟ၊ တဲဂတီုသြိုဟ် ဗြိုဟ်ဟ်ယာံထ၊ စမဳရံၚ်အာ ညာတ်ကောရာဇ၊ ဂဇံဒၟံၚ်ဗျောံ သၟဝ်တၞံရုက္ခ၊ ညာတ်ရုပ်အရံၚ် တုပ်ညံၚ်ဒေဝ၊ စိတ္တသမြပ် စိုတ်စပ်ပ္ဍဲမ၊ ပၠရမျှာၚ်ကၠာ သုဘာသိတ၊ ယွံကောရာဇ မကဵုကၠၚ်ကၟာဲ၊ ကၠောံကၠုၚ်ညိနာဲ က္ညသှ်ဇျှာဲညိ၊ မူဂှ်မိကီု ဒက်ဒေါန်ဟီုဗျိ၊ မူဂှ်မိပ ပဝဒိတှိ၊ ဟသေၚ်မိဟီု ပလီုက္တောဝ်ဂျိ၊ ပလန်ကဵုမိ ညိမူဒှ်ရော၊၊

တလအယော ကောကၠုၚ်ပညး၊ မိသြိုဟ်မွဲဂၠး ခြုပ်ခြးလောတ်လော၊ ဇိုၚ်ဂၚ်ဂျိရော ဨကောဝစိ၊ ထောံကၠေံမိသွံ ကောဟွံဗှ်ညိ၊ နိဿၚ်စံၚ်တူ တ္ၜူမာဲသုၚ်ဂျိ၊ နာဲဟွံဂိုဟ်ညိ ကောမိဗြရတ်၊ ဟးအတူလံၚ် ကောဂဍောၚ်မတ်၊ ယွံကောဗြရတ် ကၞတ်ဇြဟာန်၊ ဗှ်မိဗက်ကၠုၚ် ထောံဍုၚ်ထောံကွာန်၊ ဗဵုလနီမိ ပ္ဍဲဂြိုပ်ဓိ၀ါန်၊ ပ္ဍဲသြၚ်ဂၚ်ဂျိ မိမွဲမွဲဟာန်၊ ပဟွံဗှ်ဆာန် ဂစာန်ထောံသၟတ်၊ ကော်မံၚ်ကဴကဴ ကောဂၞဴဗြရတ်၊ တက်သြိုဟ်ယာံလော ဗှ်ကောသၞောဝ်မတ်၊ ဒဇဳဒဇောတ် ကၚ်ဇတ်ရရော၊၊

ပ္ဍဲဂှ်ဗြရတ် ကၞတ်အယော၊ မိၚ်ပါၚ်မိရော ဂၠိုၚ်အြကၚ်ဇတ်၊ မုက်နာဲဇြသ္ကဟ် က္ဍဟ်က္ဍဟ်ဗြဲမတ်၊ ရမျှာၚ်ကဴကဴ ပါၚ်မိဗြဴရတ်၊ တုဲကော်ဟီုသၟတ် ကၞတ်ကျာ်သြဳ၊ ယွံထဝ်ဂဥပ် ရုပ်ညံၚ်ညးစဳ၊ က္ညကလေၚ်စဴ ရဗြဴကျာ်သြဳ၊ စဴပ္တန်ကာယျ ညိရဒေဝဳ၊ ပ္ဍဲဂတဵုလွိ မိစဴသ္တိက်သ္ၚဳ၊ ပဒှ်လနီ ဒေါံသ္ၚီကၠၚ်ဟဳ၊ ပ္ဍဲသြၚ်နာဒဳ ဟုံလွဳရောၚ်နာဲ၊၊

ဏၚ်ကၚ်ရဳမိၚ် တွိၚ်ပါၚ်ကောဗၠာဲ၊ ယွံကောဗြရတ် ကၞတ်စရာဲ၊ ပ္ဍဲစိုတ်ကောသၟတ် နူဍောတ်ကဵုကၟာဲ၊ ဒေံဟွံစဴရ ခန္ဓဇိုန်တွာဲ၊ ကၠောံညိကောဗၠာဲ ဗဵုနာဲမွဲမတ်၊ ဒဒှ်မိဆာန် ဇြဟာန်ကၞတ်၊ က္ညဂဍောၚ်မတ် ကောကၞတ်စိုတ်၊ ပၠန်ကၠုၚ်ကဵုမိ ညိရကြက်ဗိုတ်၊ ယွံကၞတ်စိုတ် မိဟဝိုတ်သၟတ်၊ ဟွံဗှ်ကဵုမိ ညိဟာဗြရတ်၊ ဒဒှ်ဂၠိန်နှဴ တဴမွဲနန်ကၠတ်၊ ကေၚ်ကောဂွံဗ္ဒာဲ မိတွာဲမုက်မတ်၊ ကေၚ်ဂွံစေံဏေံ စံက်ထေံလီၜတ်၊ သြိုဟ်မိသ္ကဟ်ဇတ် ဒှ်သၟတ်ရရော၊၊

ဟးလအိတ်ရုပ် တုပ်သြဳစန္ဒော၊ မိပ္တေဟ်ပါၚ်ရော ကောဒေပ်ဥပ္ပဲါ၊
ကဵုမိဇွောဝ်လၚ် ကဵုမိကၠၚ်ကၟာဲ၊ ဟွံဗှ်ဂၠိုက်ဂၠဲါ သိက်စိုတ်နာဲရော၊၊

အဵုကောဗြရတ် ကၞတ်တဲအယော၊ မိပ္တေဟ်ပါၚ်ရော ယွံကောထဝ်စှ်၊
ကၠာတေံဆာန်တဴ ကြဴကၠုၚ်မဇျှဟ်၊ သိက်ဒဇန်ဒှ် ဟွံချပ်ဗှ်ရော၊၊

ဟးထဝ်ဒကောၚ် ဍောၚ်စန္ဒိမော၊ နိဿၚ်ခြာဆော ကောကဵုသြုန်ဂြာံ၊
ကဵုခြာပှ်လှ် ကဵုဒှ်အဒါံ၊ ကဵုကၟာဲၜက်သၞာံ သြုန်ဂြာံရရော၊၊

ပုဗ္ဗဇာဒိ ဂၠဴဒက္ခိဏော၊ ပလိုတ်အေဿာ စိၚ်ရောသၟဝ်ကျာ၊
ဍာ်ပါၚ်သတ်ပန် လေပ်သြာဲခၠန်က္ဍာ၊ ဂၠံစက္ခုဒွါ လေပ်ခၠန်က္ဍာရော၊၊

အနုတတ်ဂၚ် မက္ဍၚ်အယော၊ တသီုဂူရော တညၚ်ဃောဇတ်၊
ဗြဲစက္ခုဒွါ ဂၠံနာဝတတ်၊ အနုတတ်မတ် ရာသ္တီဇတ်ရော၊၊

ပန်သၞူမှာဇန် စှ်သဳဒန္တော၊ ဟေမဝဏ္ဏော တရဴအြသၟတ်၊
ပ္ဍဲတၟံထပှ် သၞူဗြဲဒှ်ဗၞတ်၊ ဗြဲစက္ခုမတ် ရာသ္တီဇတ်ရော၊၊

မွဲမနုေဿ ဆမှာဒေဝေါ၊ ၜါစှော်ဗြဟ္မော ပန်အြအပဲါ၊
ပိစှော်မွဲစွံ ကဵုညးပ္တောံဂၠဲါ၊ ဗဝဝ်လောံလာဲ သ္တုပ်ဍိက်နာဲရော၊၊

ယွံတြုံအသဝ် အံသဝ်ဂၠိုၚ်စွံ၊ နာဲလသာထောံ စွံလဝ်ပ္ဍဲနန်၊
ကဵုမိဘိၚ်ဘၚ် ကဵုမိကၠၚ်ကၠောန်၊ ကောန်တလနန် ဒဇန်သန်သွံ၊၊

ဗြရတ်ကောမိ ဣဓိဂၠိုၚ်စွံ၊ အဲကဵုနာဲသွံ ကေၚ်ဂွံသၟဟ်န်၊
ကေၚ်ဟီုသှ်ဒက် ဖဴနာဲလဂ္ဂန်၊ ဗှ်ကောဒဇန် စံၚ်တူသန်သွံ၊၊

တလအဝဲ မပြဲသ္ဇက်ပ္တောံ၊ အဲကဵုကောသွံ ကေၚ်ဂွံဗဵုဒ္ၚေါ၀်၊
လမုဟ်ကောဂး ဇြဟာန်ဝးပ္ကဝ်၊ ဗှ်ကောသၟီဓဝ် လၚ်ဇွောဝ်သန်သွံ၊၊

ယွံကောသၟီဓဝ် ရုပ်ထဝ်ကလောံ၊ ကောလသာထောံ စွံလဝ်ဒေံမွဲ၊
ကဵုဒးဇွောဝ်လၚ် ကဵုကၠၚ်တူယဲ၊ အဲဂုန်ကောအဲ တူယဲသန်သွံ၊၊

တလက္ဍိုၚ်စက် အံသဝ်သ္ဇက်ပ္တောံ၊ ကောကၠုၚ်ဒဴထောံ စွံစိုတ်ဝိသှ်ေ၊
အဲကဵုကောအဲ ဟွံခြာမွဲလှ်ေ၊ ကောအဲဒေပ်လွေဟ် ကွေံကွေံရသွံ၊၊

ကမၠောန်တံဗျိၚ် ဒၟံၚ်ဂမြိၚ်ကၠောံ၊ ဟွံပေၚ်စိုတ်သွံ နာဲဒဴထောံနန်၊
*ကလၚ်လဝ်မိ ကဵုမိလွောၚ်စန်၊ ကောအဲဒဇန် ကွေံကွေံသန်သွံ၊၊

တလချေံရတ် ဂေါ၀်ၜတ်သ္ဇက်ပ္တောံ၊ နာဲဥပ္ပဲါသွံ ပ္ၚောံဥဒျာန်၊
ကောသၟာန်မိသှ် တၞံဆုဂှ်ပ္ကာန်၊ ၀ၚ်္ကဂလာန် ဟွံဆာန်မိသွံ၊၊

ယက္ခဗြဴရတ် ရေဝ်ရောတ်ဂၠိုၚ်စွံ၊ မိဟီုပျးသွံ ထောံပ္တုံပ္ဍဲတိ၊
လမုဟ်ဝွံဂှ် ကၠုၚ်ဒှ်ဂၚ်ဂျိ၊ ဇိ၀ိတိနြ္ဒိ ဟွံဂၠိရသွံ၊၊

အဵုကောဗြရတ် ... သၞောဝ်မတ်ကြုတ်ဏာ ... မိဗက်အာကီု၊
ကောံကောလမျီု ... ဂွံဟီုသှ်ဇျှာဲ ... ဖဴနာဲပဳတိ၊
ဒိုက်သၟဟ်သိုက်သၟဟ် ... ဒှ်မွဲဂကောံ ... ကရောံနာဲသ္ၚိ၊
ဗြရတ်ကောမိ ... ကလေၚ်ညိကၠာ ... မိဗက်အာကီု၊၊

ယွံဏၚ်ကၚ်ရဳ ... ကျာ်သြဳဂေါ၀်ၜတ် ... ကၞတ်စရာဲ၊
ပဗှ်ကောဗၠာဲ ... လောံလာဲဇွောဝ်လၚ် ... ဇိုၚ်သြၚ်ဂၚ်ဂျိ၊
ပဗှ်ဂၠိုက်ဂၠဲါ ... နာဲကျာ်သြဳဗြဴ ... ပၠန်စဴနန်လွိ၊
ပဗက်ကောမိ ... ထာန်သ္ၚိဒေန်ပ္ကဴ ... ပၠန်စဴညိနာဲ၊၊

အဵုကောဗြရတ် ... ကၞတ်ပဳတိ ... မိဗက်အာကီု၊
ကောံမိတ်လမျီု ... ဂွံဟီုသှ်ဇျှာဲ ... ကောံနာဲကြက်ဒါန်၊
ဟိုတ်ဆာန်ကောစိ ... မိဗက်ကၠုၚ်သွံ ... ထောံလဝ်နန်ယာန်၊
ကောကြက်ဇြဟာန် ... သန်ထာန်ကြုတ်ဏာ ... မိဗက်အာကီု၊၊

ကၚ်ရဳဗြဴရတ် ... ကၞတ်ကျာ်သြဳ ... အိန်ရဳစရာဲ၊
ပဗက်ကောဗၠာဲ ... ဒၞဲါထာန်ဒတန် ... ဒေသနန်ထဝ်၊
ပဗ္ဒေက်ကာယျ ... လ္ၚုၚ်လ္ၚဇြဟောံ ... လောံလာဲလၚ်ဇွောဝ်၊
ဒေသနူကဝ် ... တူဒေန်ထဝ်မြ ... ပၠန်စဴရနာဲ၊၊

အဵုကောဗြရတ် ... ကၞတ်အဝဲ ... မပြဲဣဓိ၊
သန္ထာန်ကၚ်ဂျိ ... ကဵုမိအိုတ်သ္ကန် ... လမျီုခန္ဓ၊
ကောဟွံကၠောံအဴ ... ဒေံဟွံစဴပၠန် ... က္ဍိုၚ်ကိုန်နန်မြ၊
ဟွံဂွံနာဲရ ... မိလီုခန္ဓ ... ဒေသဂၚ်ဂျိ၊၊

တၚ်တှ်ဝေါဟာရမည်ဂမၠိုၚ် ~~~~~
ဒ္ၚဳဒ္ၚဳ = (ကြိယာဝိသှ်ေ) သိုက်သိုက်၊ အိၚ်အိၚ်၊၊
ဗတ်သၟ = (နာံ) ချောံ၊ လှေက်ဒှ်ခၞိက်၊ လှေက်ဍိုတ်အာအဇပတေၚ်၊ ဒှ်ကြကောတ်၊၊
ကလၚ်၊ တလၚ် =

၁၊၊ ကလၚ်၊ တလၚ် (သကမ္မကကြိယာ) bereave, orphan, ကလၚ်လဝ်ဒေံဗြဴ၊ ကလၚ်လဝ်ကောန်ဇာတ်၊
၂၊၊ ကလၚ် (သကမ္မကကြိယာ) hear, listen to, ကလၚ်ဒွက်၊ ကလၚ်ပၚ်မှိၚ်၊ ထံၚ်သောတ၊ ကလၚ်ဓဝ်၊
၃၊၊ တလၚ် (သကမ္မကကြိယာ) make something to be angular,

ကၠၚ်၊ တၠၚ် = (သကမ္မကကြိယာ) to be orphaned, bereaved, ကၠၚ်မိမ - to be destitute of parents,
ကမၠၚ်၊ တမၠၚ် = (နာံ) the bereaved, bereavement, orphan, orphanage, တမၠၚ်ဍုၚ် - people without a country,
ဒ္ၚေါဝ် = (သကမ္မကကြိယာ) မဝေါဟာဝွံ အဓိပ္ပဲါဍေံ တုပ်ကဵုမဝေါဟာ - ဗဵု ၊ ဗဵုဒ္ၚေါဝ် ၊၊ watch, see,
လ္ၚောဝ် = (သကမ္မကကြိယာ) လ္ၚောဝ်ကျာ်၊၊ worship, pay homage to,

မိဣဏၚ်ကၚ်ရဳ ဍိုက်ယာန်ကၠိက်ကၞတ်တုဲ သီုဗဵုလဗး ထဍေၚ်ဗက်ဗြရတ်

ဣဏၚ်ကၚ်ရဳ ဒေဝဳယက္ခ၊ ဗြရတ်ဒဴအာ လသာနန်မြ၊ ဒေဝဳယက္ခ ဟောံဇြစံၚ်တူ၊ သီုမရေဝ်ရောတ် ရမတ်ဒဇူ၊ လၞီဂၠိုၚ်အြ ဂၠိုၚ်သောသၞာ၊ သီုမလ္ၚာပ်လ္ၚာ လတူပြာသာတ်၊ လရိုအ်ယာံဂၠဲါ သၟီနာဲမန္ဓာတ်၊ ကောန်ဨကရာတ် မန္ဓာတ်ပန်တ္ကံ၊ လရိုအ်ယာံကော် ပ္ဍဲနန်ထော်ဏံ၊ ဟွံဒးပြဝ ပသာသ္ပံ၊ ကော်အမာတ်ကၠာ ဒဴဗညာတံ၊ အမာတ်တံကီု အိုတ်သီုသကံ၊ ပၞာန်ပန်ပြကာ ပကဵုခြာလံ၊ ပ္ဍဲကဵုတ္ၚဲဏံ ပလံဗက်အာ၊ ကၠိက်ဖဍိုက်အဲ အဝဲဂေါဝ်ဂါ၊ သလုၚ်ပန်ဟတ် ဒြဟတ်မြက်စာ၊ တၞာဲမွဲရ စဳမြသာံဖြာ၊ စဳရေၚ်ပၞာန်ကွေံ ပြဟ်ပြေဟ်တုဲအာ၊ ကၠိက်ဗတာၚ်ကွေံ ဂၞေဟ်ဍေံတိတ်သ္ကာ၊ ဗဵုလကိုဟ်ဂၠေဲါ သီုရဲဇက်အာ၊ ဣဏၚ်ကၚ်ရဳ ဒေဝဳယက္ခာ၊ ဍိုက်ယာန်ကၠိက်ကၞတ် မိသၟတ်ရံၚ်အာ၊ တၞာဲဒလဝ် ဒဝ်မုက္ခဝါ၊ သၟတ်ဗက်ရာဇာ ယက္ခာဗြဴရတ်၊ ဂွကဵုညးဍုၚ် ဂစိုၚ်မုက်မတ်၊ မှတ်ဗက်တြုံယာန် မိဗတာၚ်ၜတ်၊ ဂမြိၚ်ဂမြံ အသံဂမ်အတ်၊ ညံၚ်ပဝန်ကံ ဂမြံလယတ်၊ ဗက်ကြာဓိဝါန် ဂၠံၚ်ဍာန်အိုတ်သၟတ်၊ ကၠိက်ယာန်ဗြဴရတ် ဒြဟတ်ညံၚ်ပြေၚ်၊ တွာ်ဟွံဒည သုက္ကရဟေၚ်၊ ပထမပၠန် ပ္ဍဲနန်ဇရေၚ်၊ မဍေံလွဳလဝ် ဂေါ၀်ညိဟွံသေၚ်၊ ဍေံပြဟ်ဇိုၚ်ဟေၚ် လောန်နူပြေၚ်ဂၠဴ၊ ဣဏၚ်ကၚ်ရဳ ဒေဝဳနာဲဗြဴ၊ စမှဳရံၚ်မွဲ တူအမှဲအဴ၊ လတေံဗြရတ် တြုံကၞတ်ဘဴ၊ ကြာဂၠံမတ်ဗြဲ ကလာၚ်သြဲဒဴ၊ ရံၚ်ညာတ်စောန်စောန် ဍိုက်ချေဟ်ပၠန်စဴ၊ ဟီုကဵုကၠိက်မိ ဂိုတ်ညိဆဴဆဴ၊ ကၠိက်ဒြေပ်ကမြဴ ညံၚ်ရဴစက်ကျာ၊ ကၠိက်ဒြေပ်တဆဟ် ပြဟ်ညန်လုပ်အာ၊ မိစမဳညာတ် မန္ဓာတ်ရာဇာ၊ မိညာတ်နာဲသၟတ် သၞာ်ရတ်သ္ကေံဏာ၊ ပရှ်ချေဟ်ယာန် လတူဍာန်ကျာ၊ ပ္ဍဲဂှ်ယက္ခ ရုပ္ပကညာ၊ ကော်ဟီုကဵုဗဵု ဆဵုရရာဇာ၊ လတူအမှဲ မၞးရံၚ်မွဲကၠာ၊ ဗဵုဂမၠိုၚ်ညာတ် ခါတ်မာတ်ဗက်အာ၊ ဗက်ညန်လုပ်ကၠာ ရံၚ်ပ္ဍဲကာသ၊ မိကော်ကဴကဴ ကောဂၞဴယွံမ၊ ပၠန်ကၠုၚ်ကဵုမိ မွဲဝါညိရ၊ အဵုကောဗြရတ် ကၞတ်ရုပ္ပ၊ ပၠန်မွဲဝါရ ရုပ္ပလဂ္ဂန်၊ ဒဴထောံမိပၠန် လဂ္ဂန်ကောသၟီ၊ မိကော်ကဴကဴ ကောဂၞဴဟွံမိၚ်၊ ဒဇန်ကောသၟီ ဟွံပမိၚ်ညိ၊ ဂုန်သၟီကောမိ စုတိရရော၊၊

ချေဟ်ရံၚ်စှ်ေပ္ညုၚ် ဗက်ကၠုၚ်ဂၠေဲါဟော၊ ချေဟ်ဟီုတိုန်ပြဟ် ကာလဂှ်ရော၊ ယွံနာဲဗောဓိ ပ္ဍဲတိပေၚ်မြော၊ နာဲသ္ၚေဝ်စှ်ေရော ဗက်ဟောရေၚ်ဂၠု၊ သၟီဂွံညာတ်အိုတ် ပ္ဍဲစိုတ်သမ္ၚု၊ ရပ်ကေတ်သၠဆု ဇကုဒဇပ်၊ သၟီထောံဖျေံရ နတဲသမြပ်၊ ဒှ်ၜဝ်လာံထာ ကြာန်အာထပ်ထပ်၊ ဇလသ္ကေက်သ္ကာ သအဳဗ္ဂာသမြပ်၊ မွဲယောဇနာ လီၜက်အာကြပ်၊ လီၜန်ထပ်ထပ် သီုကွပ်ထုဲကြာန်၊ ဇလကြာန်ထိ လုံဂြိုပ်ဓိ၀ါန်၊ အိုတ်သီုဗဵုပၞာန် ဂစာန်ၚးဟေၚ်၊ ဗဂုပ်ဗက်စိ မိသမုဲလေၚ်၊ လောန်အာဂြိုပ်ၜဝ် ဗြဴသွဝ်အလေၚ်၊ ကၠိက်ဒြေပ်ပြဟ်ပြေဟ် တုပ်နဲချေဟ်ဟေၚ်၊ ကဵုပါၚ်ထဥ ဗရုထဍေၚ်၊ ဗဵုယက္ခကၠံၚ် ရံၚ်ပြဟ်ပြေဟ်ဟေၚ်၊ အသံထဍေၚ် ညံၚ်ပြေၚ်ညံၚ်စိၚ်၊ ဗဵုဂမၠိုၚ်ကၠာ ဒြေပ်အာဂြိၚ်ဂြိၚ်၊ သၟဝ်ဂၠံမတ်ဗြဲ ချေဟ်ရဲကောသၟီ၊ ဟဇ္ဇနဲချေဟ် ပလှ်ေမုက်သွိၚ်၊ ဟွံဖေက်မွဲတဲ ဒြဟတ်နဲစိၚ်၊ ဗပါ်ကျာမာန် ဂစာန်တိၚ်တိၚ်၊ ဗဵုပၞာန်ယက္ခ ဟွံလဇဗျိၚ်၊ ပ္ဍဲပထဝဳ ဇက်သအဳဂမြိၚ်၊ ညာတ်ဍိုက်ကၠိက်ဗျိၚ် ဂမြိၚ်ကမြဴ၊ ချေဟ်ဟီုတိုန်ပၠန် ဍေံဗက်ညန်အဴ၊ တၞးရုက္ခ ထောံရဆဴဆဴ၊ ထောံဖျေံဒေံဂၞဴ ဍေံဗက်တဴညန်၊ ဗြရတ်ရံၚ်ပ္ညုၚ် ဆိုက်ကၠုၚ်မွဲတန်၊ ဗက်ကၠုၚ်ရံၚ်ဂၠု အနုဒိုဟ်ပန်၊ မိဍိုက်ကၠိက်ကၞတ် မှတ်ဗက်တဝန်၊ ဂိုၚ်ရပ်ရဆု ယမုမွဲတန်၊ သၟီလတိုပ်ပၠန် ခုတ်ပ္တန်ယမု၊ မွဲထောံဒှ်ဗၚ် စၚ်ခြၚ်သာ်ဝု၊ ထောံဖျေဟ်မွဲတန် ကောန်နာဲနန်မြု၊ ဒှ်ဗၚ်လတိုပ် စိုပ်တိရံၚ်ဂၠု၊ ဟွံညာတ်ညးအဲ နဲထီုဒမၠု၊ ဗက်ဂၠေဲါသီုစုံ ဒတုံဂြုဂြု၊ ကၚ်ရဳညာတ်ဂၠု သမ္ၚုပ္ဍဲစိုတ်၊ ဗြရတ်ထောံအဵု ဒှ်ဒဵုဇြဟ်အိုတ်၊ ဇြဟ်လေဝ်သ္ဇိုဟ်က္ဍၚ် ဒဵုလၞၚ်သတိုတ်၊ တုဲသၟီမိပ်စိုတ် ချေဟ်ဂိုတ်ကလာၚ်၊ . . .

အဏံဗြဴရတ် မှတ်ဗက်တြုံယာန်၊ ကၠိက်သီုဒြဟတ် မှတ်ဗက်ဂစာန်၊ ဗဵုပၞာန်ညာတ်ဒဵု စဵုလၞၚ်ထာန်၊ လ္ၚဵုဒှ်ဗၚ် လၞၚ်ဂၠံၚ်ဍာန်၊ ဒဵုဇၞော်လဂုၚ် အာကၠုၚ်ဟွံမာန်၊ ပြးဇးလုံဍာန် သန်ထာန်တရဴ၊ ကမၠောန်တံဟေၚ် ပၠန်ကလေၚ်စဴ၊ ကၚ်ရဳဗြဴရတ် မတ်ညံၚ်ကောန်ဂၠဴ၊ ရံၚ်သ္တုံဒှ်တိ ဇွိဟွံမွဲတဴ၊ စိုတ်မိဂြဴဒြဴ ရဴသ္ကန်ကလိ၊ ချိုတ်လဝ်ကဵုချိုတ် ဗတ်အိုတ်ဇိဝိ၊ သၟတ်ဗက်အာကောံ လဂ္ဂန်ပဳတိ၊ ရံၚ်အာသ္တုံဇွိ ညိဟွံညာတ်မွဲ၊ ဣဏၚ်ကၚ်ရဳ ဒေဝဳနန်ဗၠဲ၊ တိုန်ဒဵုစှ်ေဇြဟ် ဗှ်ဇကုမွဲ၊ ဗှ်ကဵုတြုံယာန် ဂစာန်ဒဴသ္ၚောဲ၊ ဍာ်ရမတ်ဂၠေဲါ ညံၚ်ဗြဲတံသၞာံ၊ ထောံမတ်ရံၚ်ညာတ် ဟွံညာတ်ကောမာံ၊ ဂုန်နာဲၝောံကိုတ် စိုတ်ပၠာံဟွံလာံ၊ သၟတ်ဗက်တြုံရတ် မတ်ရံၚ်ဖဍာံ၊ တက်သြိုဟ်ဆာံဆာံ မိယာံရေဝ်ရောတ်၊ အဵုကောဗြရတ် ကၞတ်စရာဲ၊ ကောဟးကောဗၠာဲ နာဲကလေၚ်ညိ၊ ပၠန်ကၠုၚ်ကဵုမိ ညိနာဲဍောၚ်မၠဵု၊ မိဒြေပ်ဂစာန် စှ်ေဇြဟ်ဒွါန်ဒဵု၊ စမဳရံၚ်အာ တူကျာမိဆဵု၊ ဍိုက်ယာန်ချေဟ်ရတ် ဟဇ္ဇနဲအဵု၊ မိရံၚ်ညာတ်အာ တူကျာသဓဵု၊ ဍိုက်ယာန်ကၠိက်အဵု သဓဵုဂမ်အတ်၊ ကော်ကောကဴကဴ ကၚ်ရဳဗြဴရတ်၊ ရမျှာၚ်သြောန်သြောန် ကညန်ဗက်သၟတ်၊ ဗြရတ်သၟီဗၠာဲ မိၚ်နာဲရေဝ်ရောတ်၊ ရံၚ်သ္ၚဳစှ်ေကၠုၚ် မုက်သ္ဇုၚ်လကတ်၊ ရံၚ်ညာတ်စှ်ေသၟတ် ဍိုက်ကၠိက်ကၞတ်ဗၠာဲ၊ ဆိုက်ညန်မွဲတန် လဂ္ဂန်စရာဲ၊ ဗဵုလဗးပြး ဒးဇြဟ်ဒဵုလာဲ၊ ခါဂှ်သၟီဗၠာဲ နာဲဂိုၚ်သၠဆု၊ ထောံပ္တုံဒၞဲါ၀ွံ သၠဆုဂှ်စိ၊ ယဝ်ဒွံတိကၠာ ဒှ်အာဂၚ်ဂျိ၊ သလဲဍေံပၠန် ပိပန်ဂါစိ၊ ဍာ်သ္ဇုၚ်တဴပၠန် ကၠေၚ်ကၠန်အဒိ၊ ချေဟ်နာဲဗြရတ် မှတ်စှ်ေလိုန်တိ၊ ဗျူပတန်လၟောၚ် ဍောၚ်ဟဲအာညိ၊ ရုက္ခမူဏိ ဗောဓိဇြဲသုံ၊ ဇရေၚ်နာဒဳ သြၚ်ၜဳအလုံ၊ ချေဟ်ကဵုနာဲပၠန် ဂွံတန်ဒၟံၚ်အုံ၊ သၟဝ်တၞံဇြဲသုံ ဒၟံၚ်စုံသီုၜါ၊ ပ္တန်ကာယဒွါ ထာဏဂှ်တုန်၊၊ ၊၊

တၚ်တှ်မဝေါဟာရမည်ဂမၠိုၚ် ~~~~~
ဓိ၀ါန် = ဂြိုပ်၊ ဂၞိၚ်၊ ဗြေဟ်၊ (မဝေါဟာရဂမၠိုၚ်ဝွံ မၞုံလအာအဓိပ္ပဲါ သမုၚ်ဆေဝ်ရေဝ်တဴ၊၊)
------------------
ဗျူ = (သကမ္မကကြိယာ) > ဗဇူ (နာံ) ၊၊ ဗျူပတန်လမောၚ်၊၊
ဇူ = (အကမ္မကကြိယာ) > ဇၞူ (နာံ) လမောၚ်သ္ဂောံဟဲ လုပ်ဇူ ပ္ဍဲဇြပ်ဇၞူ၊၊
ပ္ဍဲမကြိယာမၞုံကဵုအက္ခဝ်တၞံ (ဗျ ၊ ဇ ) မပ္တံကဵု - ဗျတ် > ဇတ် ၊၊ ဗျဵု > ဇဵု ၊၊ ဗျး > ဇး ၊၊ ဗျဳ > ဇဳ ၊၊ ဗျာပ် > ဇာပ် တံဂှ်တံဂှ် နဲမသ္ဂောံပြံၚ်လှာဲသကမ္မကကြိယာ အကမ္မကကြိယာဂှ် နနဲဝွံဟေၚ် သမ္တီလဝ်၊၊ နဲမသ္ဂောံပကၠေံမနာံဂှ် ဗွဲမဗဗွဲကဵုနဲဍေံ ချပ်ဗစာတဴညိ၊၊ (ဗျဵု > ဗဇဵု၊၊ ဇဵု > ဇွဵု ) ၊၊
-------------------
ဍောၚ် = (အကမ္မကကြိယာ) > လမောၚ်၊ လၟောၚ် (နာံ)
မကြိယာမၞုံကဵုအက္ခဝ်တၞံ (ဍ)လ္ၚဵုတံဂှ် ခါရမပြံၚ်ပကၠေံမနာံမ္ဂး ဍ ဂှ် ပကၠေံ - လမ - တုဲ ဒှ်မနာံရ၊၊
ပြယိုက်တုန် ---
ဍုဟ် (တ္ဍုဟ်) = (အကမ္မကကြိယာ) > လမုဟ်၊ လၟုဟ် (နာံ) ၊၊ သတ်ဆုလမုဟ် (သတ်ဆုမဍုဟ် မိက်ဂး)

မိဣဏၚ်ကၚ်ရဳ ဟွံဆဵုညာတ်ကေတ် ဗြရတ် ပ္ဍဲနန်ပြာသာတ်တုဲ ယာံကရေဝ်ကရောတ် ဒှ်လၞီစံၚ်တူသောသၞာ ယာံထသပါ သြိုဟ်သ္ပာတ်သ္ဗ

လၟေၚ်ဒဒှ် တဝှ်ဒေသ၊ ဆပုံမဒှ် ပိုဲတွံဂတ၊ လတေံဗြရတ် ကၞတ်တေဇ၊ ဍိုက်ယာန်အဿာ ဒဴအာတုဲရ၊ အဏံတုန်သၟတ် ဗြဴရတ်ယက္ခ၊ ဗၜူဟဲပၠန် ပ္ဍဲဒေါ၀်နန်မြ၊ သူရာဇးရ ယက္ခဗြဴရတ်၊ သူရာဇးညိ မိခြုပ်ခြးမတ်၊ ဘၚ်ဘၚ်ယာယာ တွာ်အာမိလောတ်၊ ညာတ်ကမၠောန်တံ လ္ၚဵုကံဝတ်၊ ထအံတိတ်အာ ကြိယျာခလှောတ်၊ ခရံၚ်ခရဴ ညံၚ်ရဴဒေါံလောတ်၊ ဗၜူလုတ်ဝတ် မတ်တမာခေါ်၊ မိကော်ပ္ၚုဟ်ပၠန် ကမၠောန်ဍောတ်ဇၞော်၊ က္တဵုရၝိုဲတံ တမံညးအဲ၊ ကမၠောန်ၚုဟ်အိုတ် ဂိုတ်က္တဵုၚံက်ၚံက်၊ ကမၠောန်ဍောတ်ဇၞော် ၚံက်ၚာ်ၚုဟ်အိုတ်၊ ဣဏၚ်ကၚ်ရဳ ကျာ်သြဳကြက်ဗိုတ်၊ လုပ်ဂၠဲါပ္ဍဲဒေန် နာဲကဝေန်ဝိုတ်၊ သလှ်ေကြက်ဗိုတ် ဗၜူဝိုတ်အာ၊ မိလုပ်ဂၠဲါပၠန် ပ္ဍဲကၠတ်နန်ကၠာ၊ မိပံက်ဂၠဲါရော သၟီကောဗညာ၊ ဂေတ်ဂၠဲါဂဥုပ် သမ္ၚေဟ်ရုပ္ပါ၊ ပ္ဍဲနန်ဒြေပ်ဂၠေဲါ သြဲကၠုၚ်သြဲအာ၊ မိဂၠဲါလှိၚ်လှောၚ် ဂၠံၚ်ပါသာဒါ၊ ဗၟံက်ဂၠဲါအိုတ် ပလိုတ်ဂၠဲါအာ၊ ဒြေပ်စှ်ေရိုၚ်ကွေံ ချေံဟွံမွဲကၠာ၊ မိလီုစိတ္တာ ထသပါသၟတ်၊ ဇတဝ်ဖြပ်ဖြပ် ဒဇပ်တတ်တတ်၊ မိလောတ်သ္ၚဳအာ ၜါဗဟဳသၟတ်၊ ကမၠောန်တံညာတ် တူပြာသာတ်ရတ်၊ ကၠုၚ်ဗိုၚ်ပတ်ပေါန် ကၠောန်ၜိုတ်အဆတ်၊ ဍာ်မြမောဝ်ၜိုဟ် လဗိုဟ်ကြကောတ်၊ မိဂွံအမြာဲ နာဲဂဍောၚ်မတ်၊ သမ္ၚဟ်တိုန်စိ မိဗတာၚ်ၜတ်၊ မိယာံရေဝ်ရောတ် ဍောတ်ဗြဴခြုပ်ခြး၊ . . .

အဵုသမ္ပာန်ထဝ် ရုပ်ဗဝဝ်လျး၊ လမျီုဇိုန်တွာဲ ကဵုနာဲထဝ်ဂၠး၊ ပလဝ်ပၞာၚ်တိုၚ် ဒဝိုၚ်မိဂး၊ အဵုကောထဝ်ဂၠး သိက်သ္ပဒးရော၊၊ ဟးကောဟးကော ထောံရောဒေံဍောတ်၊ ယွံဂဍောၚ်မတ် ကၞတ်ဇြဟာန်၊ ပကောဟွံဆာန် ဂစာန်ထောံမိ၊ ထောံလဝ်ဒေံမွဲ ပ္ဍဲဒေါ၀်နန်လွိ၊ သိက်စိုတ်ကောမိ ဒဴထောံဒေံရော၊၊ အဵုသမ္ပာန်ရတ် ကၞတ်အယော၊ နာဲဒဴထောံရော ဟးကောသော်က္ဍိုပ်၊ ကောကၠုၚ်ထောံလဝ် ပြာသာတ်ဒေါဝ်ဂြိုပ်၊ ကဵုမိဟိၚ်ဟိုပ် ကြိုပ်သောသၞာ၊ ကဵုမိစံၚ်တူ ကဵုမိပူဆာ၊ ဗှ်နာဲဒဴအာ လသာလဝ်အဲ၊ ကဵုမိဟိၚ်ဟိုပ် ဗဒိုပ်နန်ဗၠဲ၊ ကဵုမိဇြေဟ်ဇြာဲ လောံလာဲရိုဟ်တ္ၚဲ၊ ကဵုမိတူယဲ ပ္ဍဲသြိုဟ်သ္ပာတ်သ္ဗ၊ ကဵုမိသ္ၚောံ ကဵုမိဟောံဇြ၊ ကဵုမိစံၚ်တူ ဂၠိုၚ်ဗဗောဓ၊ ကဵုမိဇြဟိတ် လအိတ်ဟောံဇြ၊ အိုတ်သ္ကန်ဂုန်မ တ္ၚဲဝွံရရော၊၊ . . .

အဵုကောဗြရတ် ကၞတ်အယော၊ ဟွံဆာန်မိရော ကောယိုက်ဇိုၚ်ဒဴ၊
ထောံလဝ်မိမွဲ ပ္ဍဲဒေါ၀်နန်ပ္ကဴ၊ စံၚ်တူဂၠက်သ္ၚဴ သ္ကန်ဇဴရရော၊၊

ဟးလအိတ်ရုပ် တုပ်သြဳစန္ဒော၊ ဍိုက်ယာန်အေဿာ ကောဒဴထောံမိ၊
လၞီတူယဲ ပ္ဍဲဒေါ၀်နန်လွိ၊ ဂုန်သၟီကောမိ သုၚ်ဂျိရရော၊၊

တလအဝဲ မပြဲတေဇော၊ နိဿၚ်စံၚ်တူ တ္ၜူမှာဲလျးပၠိုတ်၊
လၞီတူယဲ စဳလံဟဲအိုတ်၊ ဂုန်ကောကြက်ဗိုတ် သ္ဒးချိုတ်ရရော၊၊

အဵုကျာ်သြဳနန် ညံၚ်သြဳစန္ဒော၊ ဒဴထောံမိရော ဟးကောသော်က္ဍိုပ်၊
ကောလသာလဝ် ပြာသာတ်ဒေါဝ်ဂြိုပ်၊ ဂုန်ကောသော်က္ဍိုပ် ချိုတ်ကြိုပ်ရရော၊၊

အဵုကောဗြရတ် ထတ်သန်တေဇော၊ ထောံလဝ်မိရော ကလောဟွံမွဲ၊
နိဿၚ်ဒေံမ ဟောံဇြတူယဲ၊ ဂုန်သၟီကောအဲ သ္ကန်ဒဲရရော၊၊

အဵုကောယွံကော ကောဟးကောသၟီ၊ ဒဴထောံအနိၚ် ဟးသၟီကောဗၠာဲ၊
မိဒးဇွောဝ်လၚ် ကဵုမိကၠၚ်ကၟာဲ၊ ဂုန်သၟီကောဗၠာဲ သ္ကန်သြာဲရသၟီ၊၊

ပန်သၞူမှာဇန် စှ်သဳဒန်သ္တိၚ်၊ တရဴသၞူဗျိၚ် ဇိုၚ်ဂၞိၚ်ဟေမ၊
ပ္ဍဲတၟံထပှ် သၞူဒှ်မူလ၊ ဗြဲမတ်ဒေံမ ဟွံဟဲရသၟီ၊၊

ပ္ဍဲဂၚ်ဇၞော်ဂှ် လပှ်ဂြိၚ်ဂြိၚ်၊ ကျာဟွံပိုက်လွိၚ် ဂမြိၚ်လေပ်ဟဲ၊
ဂမြိၚ်ဟောံဇြ ဟဒယပ္ဍဲ၊ ဂုန်သၟီကောအဲ သ္ကန်ဒဲရသၟီ၊၊

ဒစာံစှော်လ္ၚီ ကဵုပန်လ္ၚီဗျိၚ်၊ သိန္နရာတ်သ္တိၚ် ဇၞော်ဂၠိၚ်လောန်တဲ၊
ဂှ်ဇမၞော်ဂှ် ပ္တောံဒဒှ်အဲ၊ လၞီတူယဲ သ္တုပ်အဲရောသၟီ၊၊

ဒစာံစှော်လ္ၚီ ကဵုပန်လ္ၚီမံၚ်သ္တိၚ်၊ မှာသၟိတ်ဗျိၚ် ဂမြိၚ်သ္ဇိုဟ်လှဲ၊
ဂှ်လယိုဟ်ဂှ် ပ္တောံဒဒှ်အဲ၊ စံၚ်တူသ္ၚိတ်သ္ၚဲ တုပ်အဲရောသၟီ၊၊

ပြယာဲဝေါဟာမည်ဂမၠိုၚ် မၞုံလအာအဓိပ္ပဲါမသမုၚ်ဆေဝ်ရေဝ်တုပ်သၟဟ်၊ Synonyms ~~~
စံၚ်တူ၊ ပူဆာ၊ ထသပါ၊ သပါထ၊ သ္ပာတ်သ္ဗ၊ သောသၞာ၊ လၞီ၊ လၞီလၞာ်၊ တူယဲ၊ နိဿၚ်၊ ဟောံဇြ၊ ဇြဟောံ၊ သ္ၚိတ်သ္ၚဲ၊ တူစာ်၊ ဒတူဒစာ်၊ တူလာဲ၊ ဒတူဒလာဲ၊ ဇွောဝ်လၚ်၊ လောံလာဲ၊ လၚ်ဇွောဝ်၊ ဂၠက်သ္ၚဴ၊ ဗဗောဓ၊ ဟိၚ်ဟိုပ်၊ ဘိၚ်ဘၚ်၊ လ္ၚာပ်လ္ၚာ၊ လ္ၚာပ်သၠၚ်၊ တူသၠာန်၊ အာန်တၞာန်၊ ဝိဝိၚ်၊
မဝေါဟာမည်ဂမၠိုၚ်ဂှ် ဟီုဂးစ ပ္ဍဲအရာဒဒိုက်ပူမှ်၊၊

ဗြရတ် ဍိုက်လတူစးချေံဟဇ္ဇနဲ ကလာၚ်သာၚ်တိုန်အာ တူသဗာန်အမှဲ

ဗြရတ်ကဵုချေံ ဂြိပ်ဒဴတိတ်အာနူဍုၚ်ကလော်မိဣဏၚ်ကၚ်ရဳ

လၟေၚ်ဒဒှ် တဝှ်ဒေသ၊ သၟီဗြရတ်အဴ ကောံဗြဴယက္ခ၊ စဴနူဥဒျာန် သန်ထာန်လစ၊ တိုၚ်ပၟိက်စိုတ် ဂွံအိုတ်တုဲရ၊ သၟီဒက်စၞာဲ ဥပ္ပဲါ၀ၚ်က၊ သၟိက်ဒဴစဴရ နူယက္ခဗြဴ၊ ချပ်ပ္ဍဲစိုတ်ပြဲ ရိုဟ်တ္ၚဲသြဟ်ပ္တဴ၊ ပ္ဍဲစိုတ်ဒမြဴ သၟိက်ဒဴစဴကၠုၚ်၊ ကလေၚ်နူဂြိုပ် ဃောမစိုပ်ဍုၚ်၊ သၟီဒက်စဏာဲ ဥပ္ပဲါသမုၚ်၊ ယွံနာဲဒေဝဳ မိကျာ်သြဳဍုၚ်၊ နူဂြိုပ်စဴကၠုၚ် စိုပ်ဍုၚ်သဘဴ၊ သုၚ်စဒြုဒြု ဗျုသီုလထဴ၊ အရက်သိဇာ ဍာ်တာသတ်ဗြဴ၊ သူရာလအိတ် သုၚ်ပ္တိတ်ဂမ္တဴ၊ အဟာရတုန် ဖျုန်တ္ၜိုၚ်ဖျုန်ဂၠဴ၊ *ကုက္ကတပၠန် ဖျုန်ကၠိက်ဖုဲနှဴ၊ သုၚ်ပ္တိတ်ဂမ္တဴ စဴနူဂြိုပ်ဝါ၊ ဣဏၚ်ကၚ်ရဳ ဒေဝဳယက္ခာ၊ ဂွံမိၚ်လဟီု အကြီုသိဇာ၊ ကော်သဏာဲဒဴ စကာတဴကၠာ၊ မၞးတံဂၠဲါနၚ် ဒြာဲမၚ်ဂၠဴဝါ၊ ဖျုန်စာၚ်တုန်ကီု သီုကဵုအဒါ၊ အရက်သိဟေၚ် စဳရေၚ်နၚ်ကၠာ၊ မၞးအာကေတ်နၚ် သီုပလၚ်ကာ၊ အရက်တုန်ပ္ညဳ ဓရဳဍာ်တာ၊ အမာတ်သေဏာ အာဂၠဲါနၚ်ဇဳ၊ စှ်ေကဵုစှ်ေကီု သီုနုၚ်ဓရဳ၊ စွံလဝ်မုက်ရုၚ် နုၚ်ကဵုနုၚ်ဖဳ၊ ကၠိက်သီုထၜေါံ ဂၠဴတောံပြေၚ်ဖျဳ၊ စာၚ်အဒါအြဝ် မြမောဝ်တဝဳ၊ ဗၠာဲတံသက်က် ဆန်အရက်ပ္ညဳ၊ အမာတ်သေဏာ *ညးမွဲၜါဗဳ၊ ညးစှ်အနဳ ဒဳကၠိက်မွဲဟေၚ်၊ ဖျုန်ဂၠဴသီုပြေၚ် ကဵုဂွံနၚ်ဇဳ၊ ပိသၞောဝ်ပြေၚ်ဖျဳ ညဳသာသၟဟ်သ္တး၊ ပြေၚ်လဝ်ညဳညပ် ပိထပ်ဆဒး၊ ကမၠောန်တံပၠန် ပိပန်မွဲထး၊ ဍာ်တာသီုဍေၚ် အရက်ပေၚ်ဟး၊ ပြေၚ်လဝ်ဒးရး လးသၞာတမိ၊ ဗြရတ်ကဵုနာဲ အမာဲသ္တုံဇွိ၊ တက်မံၚ်သမုၚ် ကၠုၚ်ကောံပေၚ်သ္ၚိ၊ ဝုတ်ဗၠာဲတြုံဗြဴ သီုထဴဗျုစိ၊ ကောံမံၚ်ပေၚ်တိ ပ္ဍဲသ္ၚိနန်မြု၊ သုၚ်စဂမြိၚ် မိၚ်ဆဗရု၊ ဗြဴအသာဗြဴ သုၚ်တဴထဥ၊ လ္ၚဵုဗၜူ ဒလူတိတ်ဂၠု၊ ကိတ်ဖျုန်ပြက်ပြက် ၚေက်တၚက်ဗု၊ သီုသုၚ်သီုသြောတ် မတ်ညံၚ်ကၞု၊ မတ်ညံၚ်မတ်ဂၠဴ ဗၜူတဴဂၠု၊ သ္တိက်လှိၚ်ညံၚ်ဆု ဇကုဟွံချဳ၊ လ္ၚာဗကပ် သ္တိက်တပ်သဍဳ၊ ကိတ်ေၚက်ကြေတ်ကြေတ် ပၠေတ်ဍေံဂအဳ၊ လ္ၚဵုကံချဳ ဟွံကသဳသက်က်၊ မိကဵုတြုံရတ် မှတ်သုၚ်အရက်၊ ဗြရတ်စဝ်ပ္ညုၚ် ဗ္ဒုၚ်ကဵုဗြဴဘက်၊ ဗ္ဒုၚ်ကဵုမိပ္ညုၚ် မိသုၚ်ဆက်ဆက်၊ မိဗၜူအရက် မတ်ဂၠက်သ္တၚ်လောတ်၊ သုၚ်ဗၜူဂၠိုၚ် ပခိုၚ်ဟွံမာန်သၟတ်၊ ညးဂမၠိုၚ်ကီု ယီုမံၚ်ဂမ်အတ်၊ လ္ၚဵုဂဟီ ဟွံတီမၞိဟ်သၟတ်၊ လ္ၚဵုဂှ်လောတ် မတ်ဒလန်သ္ဒ၊ လောတ်ဗၜူကြံ သီုထအံတ၊ ဗၜူသ္တိက်ခၠေါတ် လောတ်ညံၚ်ကဵုဇွ၊ .....

ဗြရတ်သၟီဗၠာဲ နာဲချေံအဿ၊ ညာတ်ကလော်ဒ္ဂူ သုၚ်ဗၜူသ္ဒ၊ ချေံတဆံၚ်ဇိုၚ် ပ္ဍဲရိုၚ်တလ၊ ပကိုၚ်ဗတ သၠောၚ်ပၠလတိုၚ်၊ လလောၚ်ကမြဴ ဒေါဝ်စးပ္တဴကိုၚ်၊ ရမျှာၚ်ဂဟှ်ေ ချေံနာဲနန်ဂွိုၚ်၊ ကဆံၚ်ဇိုၚ်ပြဲ ဂြိၚ်ဂြိၚ်ပ္ဍဲရိုၚ်၊ သလာ်လတိုၚ် ချေံနာဲက္ဍိုၚ်ဗၠဲ၊ သၟီလေဝ်စိုတ်က္တဴ ရဴမတ်တံၚ်ဂြဲ၊ ရဴမတ်ဂွဳစိုက် သီုပရိုက်ပြဲ၊ ပၞဴလေဝ်ကီု သီုသၠဆုသ္ကဲ၊ ယက္ခကၠံမွဲ လှိၚ်တဴနဲဇွ၊ ညာတ်မိကျာ်သြဳ ဏၚ်ကၚ်ရဳပၠ၊ ဗၜူသူရာ သ္တိက်လ္ၚာသ္ဒ၊ ပၠးလဝ်ဇိုၚ်တဲ နဲအိုတ်ဇိဝ၊ တုဲယောန်တိတ်အာ ကြာပုရိသ၊ တွာ်လုပ်ပ္ဍဲရိုၚ် ဂိုၚ်ဂဟက်ဂျ၊ ဗြရတ်သၟာန်ရ ယွံမချေံယာန်၊ အာရကောဗၠာဲ နာဲတလဇျှာန်၊ အာဟာကောအဲ ဟဇ္ဇနဲယာန်၊ ချေံမိၚ်နာဲသၟာန် ဂလာန်ပြဲဟေၚ်၊ ယွံညးမပြဲ ရုပ်နဲအိန်ခေၚ်၊ ပလီုစိုတ်ညိ မိသမုဲလေၚ်၊ ဒေံပတ္ၜူမာဲ နာဲမှတ်စဳရေၚ်၊ ပ္ဍဲထာန်ဒေသ ပိုဲရကလေၚ်၊ ဍုၚ်ကလော်ဟေၚ် ကလေၚ်ရာဇာ၊ ဗြရတ်ဂွံမိၚ် တွိၚ်ပါၚ်အဿာ၊ ချေံဂွံမိၚ်ကၠာ အာကလေၚ်ပြဟ်၊ နာဲယောန်လုပ်အာ မုက္ခဝါမြဟ်၊ ညာတ်မိသ္တိက်ဂၠဝ် ဒေါ၀်နန်မိဂှ်၊ သၟိက်လုပ်ဟောဝ်ၜှ် ဍောၚ်ဒကှ်ရတ်၊ ၜှ်ဖေက်ၚုဟ်အာ ဆေဝ်တာစိုတ်သၟတ်၊ ယဝ်နာဲၚုဟ်အဴ ညာတ်စုတ်ရဴမတ်၊ ဒှ်တြုံစနာဲ ဥပ္ပဲါဒဇောတ်၊ ဂွကဵုစိုတ်သၟတ် ဗြရတ်အလေၚ်၊ ဇိုၚ်ဂါံအာဟေၚ် မတ်ကလေၚ်သ္ၚဳ၊ တြုံပါရမဳ ဒ္ၚဳဂါံကလေၚ်၊ တွာ်စှ်ေအာဟေၚ် ဇရေၚ်ချေံယာန်၊ သၟီဂါံဍိုက်ယာန် ချေံယာန်နဳလာ၊ ချေံရတ်ကလာၚ် သာၚ်သောဝ်တူကျာ၊ တူဂၠံမတ်ဗြဲ ကလာၚ်သြဲအာ၊ ပိသလာ်အဵု ရမျှာၚ်ကြဵုဇာ၊ လလောၚ်ကမြဴ ကလာၚ်ဒဴအာ၊ သၟီကဵုချေံကၠာ ကလာၚ်အာတုန်၊၊ ၊၊

တၚ်တှ်ဝေါဟာရဂမၠိုၚ်~~~~~~~~~

ကုက္ကုတ =

(ပါဠိ၊ နာံ) စာၚ်၊
-----------------------------------------------------------

ဗဳ =

(နာံ) ပလၚ်၊ A small bottle. ညးၜါမွဲဗဳ = ညးၜါမွဲပလၚ်၊၊
-----------------------------------------------------------

ချဳ =

(အကမ္မကကြိယာ) သ္တိက်လှိၚ်ညံၚ်ဆု ဇကုဟွံချဳ၊၊
-----------------------------------------------------------

ကသဳ =

(သကမ္မကကြိယာ) ရုပ်မိဂှ် လေပ်ကသဳကၠေံ စိုတ်ဗၠာဲတံ၊၊
-----------------------------------------------------------

ကသဳ =

(နာံ) ကသဳတိ စမၠိုက်ၜဳ၊၊ ဝါကျ - တိချဳ ၜဳစလိုက်၊၊
-----------------------------------------------------------

သ္ဒ =

(ကြိယာဝိသှ်ေ) လောတ်လ္ၚာသ္ဒ၊ မတ်ဒလန်သ္ဒ၊၊ ချူ - သ္ဒ၊ ဟီု - ဒ၊၊ မဝေါဟာမၞုံပြယာဲမတုပ်ကဵု-သ္ဒ-ဝွံ = ထရံၚ်၊ ထြံၚ်၊၊ လောတ်လ္ၚာထြံၚ်၊ ချိုတ်ထြံၚ်၊

ဗြရတ်ကဵုမိဣဏၚ်ကၚ်ရဳ အာဝေၚ်ဂြိုပ်ဥဒျာန်

လတူစးစိၚ် သၟီကဵုဗညာ၊ ကၚ်ရဳလဟိၚ် ဆာန်သၟီက္ဍၚ်အာ၊ စိၚ်ဂါံမွဲမွဲ နဲခေသရာ၊ ဂမြိၚ်သဓဵု ဗြုကြီုကြဵုဇာ၊ လလောၚ်တမ္ညဝ် ဒေါဝ်ဂြိုပ်ဒေါဝ်ဝါ၊ ပ္ၚောံထာန်အဟံ ဂြိုပ်တၞံတမၠာ၊ ညန်ဆိုက်ဥဒျာန် ပၞာန်ယက္ခာ၊ ရံၚ်ဆုဍိုပ်ဍဴ ဇဝ်ပ္ကဴပေၚ်ဗ္ဂာ၊ ပၞဴခတိုက် သတ်ပရိုက်ကၠာ၊ တၞးကဵုတၞး လဗးရေၚ်ဗ္ဂာ၊ ဗကေတ်စောန်ပြံက် လစံက်မွဲသာ၊ ဍေံဒညံက်ဒညာ် ညံၚ်တွာ်ကၠုၚ်အာ၊ လ္ၚဵုကော်မာ ဒေါံကၠာရုပ်ထဝ်၊ လ္ၚဵုဂြိုၚ်ပလှ်ေ ခအှ်ေသီုဇဝ်၊ လ္ၚဵုဇက်ကံ ပၠံရမျှာၚ်ကျဝ်၊ လ္ၚဵုဂြဴကြဵု သဓဵုတမ္ညဝ်၊ ဥဒျာန်လလောၚ် ဂြဴညံၚ်မြာ်ထဝ်၊ ညံၚ်ညးဇက်ဒြဝ် တမ္ညဝ်ဂမြိၚ်၊ လ္ၚဵုဇက်ဂၠိၚ် တွိၚ်ကၞာၚ်တၞး၊ လ္ၚဵုကြဵုကြီု သီုဂြိုၚ်တဟး၊ ကၞာၚ်ဂဟုဲဗျာၚ် တွာဲပါၚ်ဟးဟး၊ ပၞဴဂြိုၚ်သဓဵု ညံၚ်ကဵုထၜး၊ ဂြိုၚ်ကြီုကဵုညး ဟးဟာဲသဓဵု၊ ပရိုက်ဂြဴလ္တိုၚ် ပြိုၚ်ကံလဟဵု၊ ညံၚ်မြာ်ထဝ်ဂြဴ ၚဴဝှံက်ဗြုကြဵု၊ ကလာၚ်လဟိၚ် မိၚ်ဍေံသေက်ဇဵု၊ လုံဥဒျာန်ဇၞော် ဗြုကော်သဓဵု၊ ဂြဴတိုန်သြေဲသြေဲ ညံၚ်ရဴဝုတ်အဵု၊ သီုဥဒျာန်မွဲ ကရောဲလက်ကြဵု၊ မိၚ်ဍေံသေက်ဇဵု ကြဵုဇာမှောၚ်မှဴ၊ ဗဵုတွာ်ဂတ ပၠဍာန်တရဴ၊ ကမၠောန်ကြဴစိၚ် ဂမြိၚ်တွာ်တဴ၊ သၟီၜါတြုံဗြဴ လဇကြဴအိုတ်၊ သၟီဗၠာဲဍိုက်စး ဗၠးဒုဟ်ပေၚ်စိုတ်၊ မိဍိုက်ကံစိၚ် လွိၚ်ကရာၚ်ဗိုတ်၊ ညံၚ်အဆေဝ်သွဝ် ဒလဝ်ၝောံကိုတ်၊ စိၚ်ဂါံတွာ်ဍိုတ် ဗိုတ်ဒြၚ်လဝိၚ်၊ ဂါံအာမွဲမွဲ ညံၚ်နဲတဆိၚ်၊ လပှ်ဂၠါံလာဲ ဒၞဲါဗိုၚ်မဂၠိၚ်၊ ဗော်ဆုသၠသၠိၚ် လဝိၚ်ပိ၀ါ၊ ပ္တုံဖျေံကၞာၚ်ထိ တံဇိုၚ်မိကၠာ၊ . . . . .

သၟီသၟာန်ယက္ခိ ယွံမိကြုတ်ဏာ၊ မူဆုညးကော် ဇၞော်သန်အဒ္ညာ၊ ၚံက်ၚာ်ဒညံက် ညံၚ်မကော်ကၠာ၊ ဆူဆုကြုတ်ဏာ တီနာမညိ၊ ဏၚ်ကၚ်ရဳမိၚ် ဟီုပၟိၚ်စိ၊ ယွံသၟီကောဗၠာဲ နာဲတလသ္ၚိ၊ ဆုမၚ်ဂလ နာမကောမိ၊ ယဝ်နာဲထောံပ္တုံ စှ်ေပ္ဍဲဘုံတိ၊ ဒှ်ၜဝ်လာံထာ ကြာန်အာထိမြိ၊ အာကၠုၚ်ဟွံမာန် ထုဲကြာန်ပေၚ်ထိ၊ ရုက္ခဝွံစိ နွံဣဒ္ဓိက္ဍၚ်၊ မိဍိုက်ကံစိၚ် သၟီဍေက်ကေတ်နၚ်၊ လရိုအ်တိုန်ရော အြကျာ်ဓဝ်သၚ်၊ သၟီပြိုက်ထိုၚ်အဵု ပလောံဂဵုခၠၚ်၊ ဏၚ်ကၚ်ရဳမိၚ် သွိၚ်မုက်လိၚ်လှၚ်၊ ယွံလေဝ်ကောမၚ် လက်ကၠၚ်လရိုအ်၊ မူဍေံဒှ်အဵု ဟီုကဵုညိသွံ၊ တဲအဲလုက်ဒး ဟးထဝ်ကလောံ၊ ကောလုတ်ရမိ ညးဂိမံၚ်သွံ၊ သလှ်ေလုက်ဂွံ ယွံမိကောန်သၟီ၊ ကၚ်ရဳလက်ဆေတ် ၝိုဲကေတ်ညးဂၞိၚ်၊ သၟီလုက်ဒးညိ စံက်ဂးဂိသွိၚ်၊ မိဒေါန်ဂမြိၚ် ဍိုက်စိၚ်လဴအာ၊ . . . . .

ဆဵုဆုမွဲပၠန် ရုက္ခကညှာ၊ ကၞာၚ်ဂဟုဲဒၟံၚ် ညံၚ်ပံက်ဝါစာ၊ ညံၚ်ကော်ဒိုဟ်မိ ဂဟုဲကၞာၚ်ပိ၀ါ၊ တုဲသၟာန်တိုန်စိ ယွံမိကညှာ၊ တၞံဆုဂှ်မွဲ အဝဲဂေါဝ်ဂါ၊ နာမဍေံဂှ် တွံညိကြုတ်ဏာ၊ ဟီုဗွဲယုတ္တိ မိပမုသာ၊ ဂၞကျာ်ဂွံမိၚ် သွိၚ်မုက်တွံအာ၊ ယွံသၟီဗညာ နာဲသာကောမိ၊ နာမညးကော် ဆုဇၞော်ဣဒ္ဓိ၊ ရုက္ခဝွံက္ဍၚ် ထောံဒှ်ဗၚ်စိ၊ ဆုမၚ်ဂလ မူလအဒိ၊ နာမတုန်စိ အဒိညးကော်၊ ဍောတ်ဗၠာဲပလှ် ၜှ်ကေတ်သၠဇၞော်၊ ကြဵုဇာစလာၚ် ရမျှာၚ်ပြာထော်၊ မိကလေၚ်သ္ၚဳ ပၠေဝ်ရမျှာၚ်ဗော်၊ အြမူဒှ်ကွေံ ဍေံလရိုအ်ကော်၊ အြဗတာၚ်ဗော် လုက်ဒးစံက်ဂိ၊ တဲဒိဒးသွိၚ် စိၚ်အာဗၠးစိ၊ မိဍိုက်ဗလေတ် ကဵုဗၠေတ်တိတ်ိ၊ ကၚ်ရဳလက်တ္ၜေဟ် ဟာဲဗှ်ေဒိတှိ၊ လုက်ဒးဟွံဂွံ ဒေါံကောပဒိ၊ ဆုညံၚ်ကဵုဂျိ ဂိဒၟံၚ်တတ်တတ်၊ . . . . .

မိဗ္ဂေတ်က္ဍိုပ်စိၚ် ဗ္ဂေတ်ဂၞိၚ်ဗယောတ်၊ စိၚ်ဂါံမွဲမွဲ ပ္ဍဲဥဒျာန်ရတ်၊ ဆုနွံတဴကၠေတ် ဒးၜေတ်အာသၟတ်၊ ဆုဂြိုပ်ဂရာၚ် ရမျှာၚ်ဂမ်အတ်၊ ဂေတ်ဓဝုဲဒၟံၚ် ဍာဲညံၚ်ပၟတ်၊ လွိၚ်ကၞာၚ်သၠ ပိ၀ါပဝတ်၊ သၟီဗၠာဲညာတ်သၟတ် သၟာန်မိဍောတ်ဗြဴ၊ သ္ဍိုက်ကောမိ နာဲသ္ၚိၜတ်သြဴ၊ တၞံဆုဂှ်မွဲ အဝဲဍိုပ်ဍဴ၊ ဟီုကဵုကောညိ မိပဝဴပဴ၊ ဟီုညိဒေံဗြဴ ဍိုပ်ဍဴဂေါ၀်သ္ဇုၚ်၊ ဏၚ်ကၚ်ရဳမိၚ် မုက်လွိၚ်ကၠုၚ်၊ ယွံသော်က္ဍိုပ်မိ နွံဣဓိသၠုၚ်၊ ရုက္ခဝွံရ ပထမပ္ညုၚ်၊ နာမမူလ သုဝဏ္ဏဒၟုၚ်၊ မူလကော်ကၠုၚ် နူဍုၚ်တန်ရ၊ ဣဓိဇၞော်လောန် ၜှ်ကေတ်ပၠန်သၠ၊ ထောံပ္တုံပ္ဍဲတိ စံညိမွဲရ၊ ဒှ်ဗၚ်သီုဇြဟ် သၠဂှ်မူလ၊ ဂးသုဝဏ္ဏ နာမဍောၚ်မ္ၚဵု၊ နွံဆရးဏံ နာဲတံဂွံဆဵု၊ မိဆာန်နာဲလောန် ဟီုပျးပၠန်အဵု၊ ဗြရတ်ဍောၚ်မၠဵု က္တဵုတုဲၜှ်ကေတ်၊ ဂွံတုဲပြိုက်ထိုၚ် သၟီဂိုၚ်ဗလေတ်၊ အြယာဲဂိလောန် ကၞာၚ်ဗၠန်သၠဂေတ်၊ ဍောတ်ဗြဴသ္ၚဳမံၚ် ရံၚ်ဟွံညာတ်ပၠေတ်၊ လရိုအ်သွေတ်တ် ကၞာၚ်ဂေတ်ဗြုကြဵု၊ မူဍေံဒှ်ရော အြနာဲဍောၚ်မၠဵု၊ ဗြရတ်မိၚ်ကီု တုဲဟီုခၠေဝ်ကဵု၊ ယွံလေဝ်နာဲသ္ၚိ တဲဒိဒးအဵု၊ တဲအဲလုက်ဒး ဍေံဗြုသဓဵု၊ သၟီဗၠာဲဟီုအဵု ကဵုဗတာၚ်ဗော်၊ ကၚ်ရဳမိၚ်ကၠာ ဟွံထေဲမာသော်၊ ဟာဲဣၜတ်ၜတ် ခလောတ်ထောံသၞော်၊ ၝိုဲတံၜတ်လောန် ကောန်ဣဂြိုပ်ဇၞော်၊ သၟီလုက်ဒးညိ ဂိလရိုအ်ကော်၊ ဒးကဵုမုဲဇၞော် သၞော်ခလောတ်အိုတ်၊ . . . . .

တုဲဍိုက်အာဗျိၚ် စိၚ်မိတွာ်ဍိုတ်၊ စိုပ်ဥဒျာန်မွဲ လှဲလးပေၚ်စိုတ်၊ တၞံဆုဒှ်ဘုံ သီုစုံပြဲသ္တိုတ်၊ မိပ်သ္ၚိပ်လောန်တဲ ၜိုဟ်သြိုဟ်ပ္ဍဲစိုတ်၊ မိပ်ပ္ဍဲစရိုတ် အဵုဇိုတ်မှောဝ်ဇဴ၊ ညာတ်ဆုၜါသၞူ ဂကူဗၠးတဴ၊ မွဲဍေံဂွုသအး လစံက်လျးသ္ဍဴ၊ လစံက်ညံၚ်ချး လျးညံၚ်ပါၚ်ဂၠဴ၊ ဍေံဂရိုက်ဂရာၚ် ကဵုပါၚ်ကမြဴ၊ ကၞာၚ်ၜါဒညံက် ညံၚ်ညးကော်ခဴ၊ လရိုအ်ညံၚ်ကွဴ ကံဂြဴလတိုၚ်၊ လ္ၚဵုဍေံတအး ဟးဟာဲဍေံဂြိုၚ်၊ လ္ၚဵုဍေံထအှ်ေ ပလှ်ေကံလတိုၚ်၊ ဍေံလကဲဆက် ထညက်ကံဂြိုၚ်၊ လရိုအ်ညံၚ်က္ၜိုၚ် ပြိုၚ်ပါၚ်လဒု၊ ယမုဍေံအဵု ဟီုညိနာဲဇု၊ ကောမိၚ်စိုတ်သ္ဍိုက် ခတိုက်သစ္ဆု၊ နာမဍေံဝွံ ကောဇုသၟိက်တီ၊ ဟီုညိကျေဝ်လာဲ ယွံနာဲဂေါ၀်မြီ၊ ဟီုကဵုကောနာဲ ပြယျာဲခပ်သီ၊ ကောဂွံသမ္တီ ဂေါ၀်မြီစရာဲ၊ ဂၞကျာ်ဂွံမိၚ် ဟီုပၟိၚ်ကွာဲ၊ ဆုမွဲဒှ်ဂြိုပ် လတိုပ်ဂၠုဆာဲ၊ ဒဵုထပှ်ထပ် ကွပ်ကွပ်ဒၟံၚ်ဗ္ဒာဲ၊ အာကၠုၚ်ဟွံမာန် ဂၠံၚ်ဍာန်မဂၠဲါ၊ ဆုဝွံလေဝ်နာဲ လောန်ကာဲဂုန်တၟေၚ်၊ ကိတ္တိၚ်သၟီဆု ယမုဍေံဟေၚ်၊ ဆုဒယှ်ပၠန် တန်ပ္ဍဲတ္ကံကြေၚ်၊ ဆုမွဲဂးရ နာမဍေံတၟေၚ်၊ ဒိပ္ဗစက္ခု ယမုတွံပြေၚ်၊ မတ်ဂၠုယးဟေၚ် ကလေၚ်မွဲတဲ၊ ကၠက်ဗၠးညံၚ်ဇိုတ် အိုတ်ညးအိုတ်အဲ၊ ဗၠးဂၠိုၚ်တုဲရ ကၠံလ္ၚီဆပြဲ၊ စက္ခုဒိပ္ဗ ရုက္ခဝွံမွဲ၊ သမ္တီကောအဲ ဆုပြဲနွံဂုန်၊ သၟီဗၠာဲၜှ်ထေတ် ကေတ်ချံထိုၚ်တုန်၊ ဂွံသီုၜါဗော် ဆုဇၞော်နွံဂုန်၊ ဍေံလရိုအ်ကရေဲ သြေဲသြေဲဗြုန်ဗြုန်၊ ကၚ်ရဳမိၚ်တုန် သၟာန်ပ္ဍုန်သၟီဗၠာဲ၊ ယွံလေဝ်ကောအဲ မပြဲစရာဲ၊ မူကောပကီု ဟီုညိကောဗၠာဲ၊ သၟီဓဝ်စရာဲ ဒၞဲါဂှ်ခၠေဝ်ဏာ၊ ကောဗၠာဲဇွိတ်ဝေၚ် ဗဂေၚ်တဲၜါ၊ သၟိက်တီမွဲတဲ နဲဂှ်ဝေၚ်ကၠာ၊ မိလက်ဟီုဆေတ် ကွေတ်ညးဂြိုပ်ဝါ၊ သၟီဗၠာဲကမှ်ေ ဟွံကြိုက်ဗှ်ေဟာ၊ ဨကရာတ်ဗမက် ဂြဲဂြက်သာသာ၊ ဗှ်ေလရိုအ်ကြဵု ညံၚ်ကၠဵုဒေါဝ်ဖျာ၊ . . . .

ဍိုက်စိၚ်ဂေတ်အာ ကြာတၞံပရိုက်၊ ပၞဴမံၚ်ဗျောံ ကောံမွဲခတိုက်၊ သီုဂြဴသီုဂြိုၚ် ပြိုၚ်ရၚ်သ္ကံစိုက်၊ လ္ၚဵုဍေံထအး ဗၠးမံၚ်အခိုက်၊ လ္ၚဵုဍေံဂြဴ ညံၚ်ကွဴဂြဴရိုက်၊ ဂြဴညံၚ်ကဵုစာၚ် ရမျှာၚ်စလိုက်၊ နွံသီုဖအိုက် ဒှ်သ္ဍိုက်ယက္ခ၊ တုဲသၟာန်မိကၠာ ကၚ်ရဳမှာယျ၊ မူသတ်ဍုဟ်စိုက် ဂတိုက်သလှ၊ ဂေါ၀်ဂပ်က္ဍၚ်သန် ယွံနာဲနန်မြ၊ ဟီုကဵုကောရ ပကနှိက်မ၊ မိသ္ဍိုက်ဗြရတ် ဂဍောၚ်မတ်ကျ၊ ဒှ်တြုံသ္ဍိုက်ညး မိပျးကဵုရ၊ ဟွံတီဂးဘဴ ဗြဴစနာဲပၠ၊ ဒှ်ဗြဴဟိဏ္ဏ ပ္ဍဲလောကအဵု၊ ချပ်ပ္ဍဲစိုတ်ရောၚ် ကၚ်ရဳဍောၚ်မၠဵု၊ နာဲဒှ်တြုံသ္ၚိ သၟာန်မိသှ်ကဵု၊ နွံနာမကွေံ ယမုဍေံအဵု၊ ပၞဴဍောၚ်မၠဵု သီုကဵုပရိုက်၊ ဍေံသတ်ဗတိုက် ပရိုက်ဇိုၚ်ကြုၚ်၊ ဒှ်လမျီုဇၞော် ကလော်သီုဍုၚ်၊ ပရိုက်ဂြဴပြိုၚ် ပၞဴဂြိုၚ်သၠုၚ်၊ ပၞဴဂြိုၚ်သမုၚ် ဗော်ဍုၚ်ယက္ခ၊ ပ္ဍဲဍုၚ်ပိုဲပၠန် ထာန်ဂြိုပ်ရညှ၊ ညးဍုၚ်ဝွံရ ယက္ခသီုဖအိုတ်၊ ညးဂွံသစ္ဆု ကလော်ဂွံချိုတ်၊ ဒးလီုဇိဝ ဟဒးဍောၚ်စိုတ်၊ မိဟီုပျးသၟတ် ဗြဴရတ်ကြက်ဗိုတ်၊ ဗဵုကဵုဖဲမတ် ကောကၞတ်စိုတ်၊ မိပျးကဵုဇဳ ဗနဳဂြိုပ်အိုတ်၊ . . . .

ဂၟါ်စိၚ်ကလေၚ် သမုဲလေၚ်ဗိုတ်၊ ညးၜါမွဲစိၚ် လဗိၚ်စဴသ္တိုတ်၊ ဟီုအာဂြိုၚ်အာ ၜါမိကြက်ဗိုတ်၊ ညးၜါမိပ်စိုတ် ၜိုတ်ဂွံလွဳမာန်၊ ညးၜါမွဲစိၚ် သၟီကဵုသၞောဝ်ဒါန်၊ ကောသၟာန်လဖှ် မိသှ်ဂလာန်၊ လတူစးဇၟူ ပရူဥဒျာန်၊ မိသှ်ကောသၟာန် နဳဒါန်ပြယျာဲ၊ ပၞးကဵုပၞးဗ္ဒာဲ နာဲညးယာန်ဇၟူ၊ တေတ်တဲပလှ် ဒကှ်ရာၚ်အူ၊ မိတးဖရာဲ နာဲကောန်ဂကူ၊ မိတုပ်စမၠံၚ် အရံၚ်ဝိဇူ၊ စမၠံၚ်ထဝ်အူ ဇၟူတုပ်သၟီဗၠာဲ၊ သၟဟ်န်တူစး ဒလာဲပၞးနာဲ၊ ဂဍုတ်ဗမက် ဂြဲဂြက်ဒလာဲ၊ ကအီဂြိုၚ်စေံဏေံ လှေံစိုတ်သၟီဗၠာဲ၊ ဒလိန်ဒလာဲ နာဲကဵုမှာယျ၊ ဖံမံၚ်လဒု ဗရုကြံကြ၊ ပုက်တလုက်မံၚ် တက်ညံၚ်ဒေါၚ်ဗ္ၚ၊ ဂဟုဲသမုၚ် ဇက်စဴဍုၚ်ရ၊ စိၚ်တွာ်ယောန်ယောန် ဗၠန်တိုန်ဂတ၊ ကောကဵုမှာယျ စိုပ်ရမုက်ရုၚ်၊ ဗ္ဒေံစိၚ်ဗက် ပ္ဍဲတမၞက်သၠုၚ်၊ ညးၜါဂါံကၞာတ် ဒေါဝ်အမာတ်ဍုၚ်၊ ဒေါ၀်သေဏာသအဳ သဳကၠဳဒၟံၚ်ပ္ညုၚ်၊ သၟီကဵုဗြဴသွဝ် စိုပ်နန်ထဝ်သၠုၚ်၊ မိကဵုသၟီဍုၚ် သ္ဍိုက်သ္ဇုၚ်တဝ်ဂၠဝ်၊ တူဒေန်မၞိက် ပိုက်ပၞိက်ကၟဝ်၊ ရေၚ်ကာန်တဝ်ဂၠဝ် မွဲနန်ထဝ်တုန်၊၊ ၊၊

တၚ်တှ်ဝေါဟာရမည်ဂမၠိုၚ် ~~~~~
စေံဏေံ = (ကြိယာ) ဂဍုတ်ဗမက်၊ ဟီုဂဍုတ်ဗမက်ဂြိုၚ်ထအှ်ေ၊၊ to be jocular, sportive.
တမၞက် = (နာံ) တာဲတမၞက်၊ a halting place, a camp, a pavillion.
ကနိက်၊ ကနှိက်၊ ကၞိက် = (ကြိယာ) ပၞုက်၊ ဂြောပ်ဗ္ဒန်၊ to conceal, to keep back.
ဝဴပဴ = (ကြိယာ) ဟီုတမုန်တလန်၊ ဟီုမုသာ ဟွံလဴထၜး ဗွဲမပြာကတ်၊၊ မဂလာန် - ဝဴပဴ - ဝွံ လဟီုလဂး မစပ်ကဵုမၞိဟ်ဗြဴတံဟေၚ် ဟီုဂးတဴရ၊၊ ပၟာတုန် = ဗြဴဝဴပဴ၊ ဣဝဴပဴ (နာံ)၊၊ ဗှ်ေ လ္ပဝဴပဴ၊ (ဝါကျ)၊၊

ဗြရတ် လှေံလှန်မိဣဏၚ်ကၚ်ရဳ သၟိက်ဂွံအာဗဵုဝေၚ်ဂြိုပ်ဥဒျာန်

ဂလာန်ဝွံပၠန် တန်လဝ်ကၠာရ၊ လၟေၚ်ပုံကီု ဟီုအာဂတ၊ ဗြရတ်ရာဇ ဒေသနန်ဗၠဲ၊ မိကဵုသၟီဓဝ် ဒေါဝ်ကမၠောန်ဂၠေဲါ၊ ဗြရတ်ဂၠိုက်ဂၠဲါ ပြယျာဲနဲကဲ၊ ဗြရတ်စေံဏေံ လှေံလှန်မွဲတဲ၊ ယွံနာဲသၞောဝ်ဒါန် ပၞာန်ဂြိုပ်ဇမ္ၚောဲ၊ ဍုၚ်ပိုဲဝွံဗျိၚ် ဂြိုပ်ဂၞိၚ်တ္ၜန်တ္ၜောဲ၊ ဃောဂွါံဟေမန် မိပ်လောန်မွဲတဲ၊ ပ္ဍဲဂြိုပ်လလောၚ် ဆာၚ်မံၚ်သဏောဲ၊ ဝေၚ်ဂြိုပ်ထဥ ဗရုညံၚ်ပေဲါ၊ အခါဝွံပြဲ ဂၠေဲါတိတ်ဥဒျာန်၊ ဏၚ်ကၚ်ရဳဗျိၚ် ဂွံမိၚ်ဂလာန်၊ မိမိၚ်တြုံရတ် ရေဝ်ရောတ်ဟီုပါန်၊ ပဒွိၚ်စရာဲ ယွံနာဲကြက်ဒါန်၊ ဂြိုပ်ပိုဲမိပ်သန် ဒတန်ဥဒျာန်၊ ဃောဍေံဍိုပ်ဍဴ ဍောၚ်ပ္ကဴရေၚ်ကာန်၊ ဃောပ္ကဴဃောရာၚ် ဃောပြာၚ်ဍောၚ်ဇဝ်၊ ဃောဂြိုၚ်ကမြဴ ဃောဂြဴတမ္ညဝ်၊ အခိၚ်ဍေံကြံၚ် ဂြဴညံၚ်မြာ်ထဝ်၊ တ္ၚဲယးဗဵုဒ္ၚေါဝ် ဥဒျာန်ဒေါဝ်ဂြိုပ်၊ ဗြရတ်မိၚ်ဆာဲ ဟီုတွာဲသော်က္ဍိုပ်၊ ဂၠိုၚ်ကဵုဗဒိုပ် ညံၚ်ဂြိုပ်ညးသွဝ်၊ လှေံလှန်ယက္ခာ ကညှာရုပ်ထဝ်၊ ပ္ဍဲဂြိုပ်အသဝ် ဗွဝ်ဥဒျာန်၊ ယးမိၚ်ကလာၚ် ရမျှာၚ်ကြဵုဇာ၊ ညးၜါစၚ်ခြၚ် တေၚ်ဗၚ်စန်စာ၊ ကော်အမာတ်ပန် ဖန်ဖက်သေဏာ၊ ကဵုစဳရေၚ်ပၞာန် ယာန်သေဏၚ်ဂါ၊ စိၚ်ချေံတဝဳ တိုက်ကွဳမွဲသာ၊ သီုသ္တုံဇွိပၠန် ပၞာန်ပန်ပြကာ၊ ဗၞုဟ်မိၚ်သ္ဇၚ်ဝပ် သီုခြပ်မဟာ၊ သေဏာတ်ဒေါန်အံၚ် သၞာ်ဂဒံၚ်သ္ကာ၊ ပၞာန်ချေံမွဲသာ သအဳဗ္ဂာရေၚ်ဗဝ်၊ ကောံမံၚ်သက်လက် သီုဂဟက်ထဝ်၊ ပၞာန်စိၚ်သအဳဗဝ် ဇၞော်အံသဝ်လောန်၊ သီုမဒက်လဝ် ဂဟးထဝ်သြန်၊ သအဳဗ္ဂာရေၚ်တဴ ရဴသၞံၚ်သၟန်၊ ပၞာန်တိုက်တုပ်တဴ ရဴသၟတ်ဒြုန်၊ သအဳဂၠက်တသုန် ဇိုၚ်နန်ပုည၊ ဗဵုပၞာန်ယက္ခ အဇပၞာန်မာ၊ စိၚ်ဖ္ဍိုက်ကၠာ ကောန်ရာဇာဝၚ်၊ ဇိုၚ်ပန်လပှ် ဗတမြဟ်ခၠၚ်၊ ကၟံၚ်ကတောဝ်ဒြၚ် လျးရတ်ခၠၚ်ဂဵု၊ ပၞာန်ပန်ပြကာ သအဳဗ္ဂာတသဵု၊ လုံဗနဳဗဵု ဂၠိုၚ်ကဵုတေဇ၊ ဗဵုပၞာန်ယက္ခ ကာလဂှ်ကၠာ၊ . . . . .

လတူစးစိၚ် ကောန်သၟီရာဇာ၊ ကယျိုၚ်လဝ်ခုတ် သၞာံဂြောပ်စုတ်ကၠာ၊ တုဲဂြောပ်စုတ်ပြဲ ပုံစက်မွဲသာ၊ ဒက်ဇုက်စရိုတ် ဗိုတ်မြသာံဖြာ၊ ကမၠံသၠဇြဲ ကွက်ပ္ဍဲက္တောဝ်ၜါ၊ ပ္ဍဲကၟံၚ်ဂေါ၀်ဂပ် ဂြောပ်လဝ်ဓဇာ၊ သီုဂတေဝ်ပး လးပြက်စုတ်ဏာ၊ ကမၠံဇာထဝ် ကွက်လဝ်က္တောဝ်ၜါ၊ က္ဍိုၚ်ဗ္တာၚ်သြံက် လဇံက်တဵုဏာ၊ သီုပေဝ်သဏောဲ တလောတ်မွဲသာ၊ ဒြဝ်ကျာံလဒု ကၞုသၚ်ခါ၊ ခပဵုခရာ သီုၜါမွဲရဲ၊ ပိၚ်မှၚ်ဒဗိုန် တလိုန်ဗက်ဂၠေဲါ၊ လေၚာဲတဆာံ ဗာတ်သၞာံသဏောဲ၊ ခပဵုဗြုထဲ ဒြၚ်စိၚ်မွဲသာ၊ ခပဵုဒြၚ်ပြေၚ် ဗြုတရေၚ်အာ၊ လလောၚ်ပြာထာ သအဳဗ္ဂာဂၠိုၚ်ဗော်၊ လလောၚ်ပြာထော် ဖံဇၞော်ဗြုမှုဲ၊ ထၜးကြာဇဵု ဗြုကြဵုဂဟုဲ၊ ဖံကြေပ်ဇတိုၚ် မန်ဒိုၚ်ဖံကၞုဲ၊ ဖံကၠေဝ်ဖံကြုက် မုက်ပန်ဂဟုဲ၊ မိၚ်ဗရုရောၚ် သလှောၚ်စိုတ်တုဲ၊ မံၚ်ဗြုဂဟုဲ ရမျှာၚ်မှုဲကၠုၚ်၊ ပြေၚ်လဝ်ဒးရး လဗးပေၚ်ဍုၚ်၊ ဝုတ်ဝုတ်ဗၠာဲဗၠာဲ တွာ်ဆာဲလ္ဂုၚ်၊ အမာတ်သေဏာ ဗညာမုက်သၠုၚ်၊ သေထဳသမ္ၚေဟ် တွာ်ပလှ်ေကၠုၚ်၊ ပေၚ်ပ္ဍဲမုက်ရုၚ် ဒုၚ်ဨကရာတ်၊ စိၚ်ဖဍိုက်နာဲ လုပ်ဗ္ဒာဲလဝ်ကၞာတ်၊ ဗဒဲါဟဝ်သၠုၚ် တွာ်ကၠုၚ်ဟွံညာတ်၊ ဂွံဍိုက်စိၚ်လောဲ စိၚ်ပြဲဂၞကျာ်၊ အမာတ်ပ္တီကၠာ သီုၜါလပါ်၊ ယွံလေဝ်ဂၞကျာ် ဨကရာတ်ဗြဴ၊ စဳရေၚ်တုဲသွံ က္ညဂွံရအဴ၊ ဂၞကျာ်မိၚ်ကၞာတ် ပါၚ်အမာတ်ဒဴ၊ ဂၞကျာ်မပၠေ ဨကရာတ်ဗြဴ၊ ဟီုပ္တီဗြရတ် တြုံကၞတ်ဘဴ၊ ယွံကောသ္ဍိုက်မိ က္ညညိရအဴ၊ . . . . .

ဗြရတ်မိၚ်ပါၚ် တွိၚ်ရမျှာၚ်ဗြဴ၊ ကြိယာတ္ၜတ်သြဴ တွိၚ်ဗိုက်တဴဟေၚ်၊ သၠိုက်ၝောံကိုတ်အဵု သီုကဵုဗြကၞေၚ်၊ သီုကဵုသၞာ်လွပ် ဒနပ်ထဝ်ဟေၚ်၊ တုပ်ညံၚ်အိန်ဗၠာဲ နာဲသမုဲလေၚ်၊ တူစးစိၚ်ရတ် ကၞတ်အိန်ခေၚ်၊ တုဲမိဟီုပြဟ် ကာလဂှ်ဟေၚ်၊ ကောယိုက်ဏာနာဲ ဗၠာဲသမုဲလေၚ်၊ ဏၚ်ကၚ်ရဳဟေၚ် ဇရေၚ်သၟီဗၠာဲ၊ တဲညံၚ်လောတ်ထဝ် ဟောဝ်မိန်ကေတ်နာဲ၊ ဒကှ်ၜါဍောၚ် မောဝ်လှောၚ်အမြာဲ၊ စက်ရံၚ်သြဳကၠာ ယက္ခာဗြဴဆာဲ၊ သၟီထိုၚ်ဃာန ဇိုန်ပတမှာဲ၊ သၟီဓဝ်ကဵုနာဲ မှတ်ပြယျာဲဂၞိၚ်၊ ယိုက်ဏာဂၞကျာ် ဃာနညာတ်ကၞိၚ်၊ ဃာနသၟီဗၠာဲ ဗ္ဒာဲမုက်ဍိုတ်ဆိၚ်၊ ကၚ်ရဳလဟိၚ် ဗန်ဂၞိၚ်ကောဇု၊ ကမၠောန်ဗက်ဂၠေဲါ ရှောဲဂြိုပ်လ္ၚု၊ တွာ်စှ်ေုမုက်ရၚ် ပၚ်ယဵုတဲဗု၊ ဂိုၚ်ဖျေံနူဂၞိၚ် လဟိၚ်ဒေံဇု၊ ဂါံတိုန်ဟဝ်သၠုၚ် အမာတ်ဍုၚ်စု၊ သေဏာသွတ်ဗျု စုသီုသ္တုံဇွိ၊ ပ္ဍဲတမၞက်သၠုၚ် စးစိၚ်ဒုၚ်မိ၊ စးစိၚ်ကဵုဟဝ် ကဵုတဝ်ဒၟံၚ်စိ၊ သၟီဗၠာဲဍိုက်ကၠာ စးမှာဟတ္ထိ၊ ကၚ်ရဳဍိုက်ကံ ဗၠာဲတံတွာ်တိ၊ ကမၠောန်ဗက်ဂၠေဲါ သီုရဲသ္တုံဇွိ၊ အမာတ်ပေၚ်တိ ဇက်ထိတမ္ညဝ်၊ ဗဵုပၞာန်ဇက်ဂၠေဲါ တဴမွဲသန်တဝ်၊ ဇက်ဂၠေဲါတသဵု ကြဵုဇာဖံထဝ်၊ ဗရုတမ္ညဝ် အံသဝ်ဂၞဴဂၚ်၊ ပိၚ်မှၚ်တလိုန် ဒဗိုန်ဒၚ်ဒၚ်၊ လုံအသံဗဵု သဓဵုခမၞၚ်၊ လလောၚ်ဂြိုပ်က္ဍၚ် ဒိၚ်ဒၚ်အသံ၊ လေၚာဲတလောတ် ဗြုတောတ်တဆံ၊ ပေဝ်ဒြဝ်လဒု ခဏောဲဗြုကြံ၊ ဖံဗြုဂြိၚ်ဂြိၚ် ဂမြိၚ်ညံၚ်ကံ၊ လလောၚ်ဂြိုပ်ဇၞော် ပြာထော်ဂမြံ၊ ဗြုကြဵုအသံ ညံၚ်ကံဂတး၊ ညးၜါတြုံဗြဴ တဴတူဂဟး၊ ဗဵုဂြိုပ်ဗဵုဂၞိၚ် သြိတ်စိၚ်ဒြေပ်ပြး၊ မိကဵုသၟီဗၠာဲ ဗ္ဒာဲစးကဵုစး၊ ကောသၟာန်မိသှ် ဟီုလဖှ်ပျး၊ ဗ္ဒာဲပၞးဆဒး ပၠန်ဂတးသွိၚ်၊ သၟီထိုၚ်ဃာန ဇာပ်ပၠလွိၚ်၊ ဂၞကျာ်ကဵုသၟီ ဇက်လဗိၚ်အာ၊ . . . . .

ဝေါဟာရမည်ဂမၠိုၚ် >~~~~~
ဂတေဝ်ပး = (နာံ) velvet (ဗၟာဟီု = ကတ္တီပါ၊) ယာတ်ဂတေဝ်ပး၊ ယာတ်ဗြေဝ်ဂတေဝ်ပး၊၊
လဗး = (နာံ) ကောန်ပၞာန် ညးဟွံသေၚ်ကဵုဗဵုပၞာန်ဂှ် ညးကော်စ လဗး၊၊ ဗဵုလဗး၊၊
လွပ်၊ ဝပ် = (နာံ) ပိုဒ်ကြိယာ - ရပ် - ဂှ် မဒှ်တၞံပိုဒ်နာံ - လွပ်၊ ၀ပ် - ဂှ်ရ၊၊ ကြိယာ - ရပ် - ဂှ် ပပိုဒ်နာံမ္ဂး ချတ်စုတ်အက္ခဝ်ဝ၊ ကၟက်ဝ အကြာအက္ခဝ်ရ ကဵုဂစိုပ်ကပ်ဂှ်တုဲ ဍေံဒှ်ပိုဒ်နာံ - ရဝပ် - မိက်ဂး၊၊ ရအက္ခဝ် နူ-ရဝပ်-ဂှ် ခါမဟီုအရေဝ်တေံ ရမျှာၚ်-လ-ရောၚ် မကလိတ်ကလောတ်တဴ ပ္ဍဲပါၚ်တုဲ ပ္ဍဲမချူကှ်ေကီုလေဝ် ဒှ်အာ-လ-အက္ခဝ်၊၊ ရဝပ် > လဝပ်၊ လွပ် > ဝပ် ၊၊
သၞာ်လွပ်၊ - သၞာ်မဂွံရပ် ပသ္ကံတဲဂှ် မည်တံဟီုစ = သၞာ်လွပ်၊၊
လေံလွပ်၊ - လေံမဂွံရပ်နၚ်ဏာ ပသ္ကံတဲဂှ် မည်တံဟီုစ = လေံလွပ်၊၊
ဍာ်လွပ်၊ - ဍာ်မဂွံရပ်စပ်သုၚ်စဂှ် မည်တံဟီု = ဍာ်လွပ်၊ဍာ်သွုၚ်၊၊
ဒးလွပ်ကလော်၊ - ယြဴညးမွဲ ကလော် ရပ်ရ၊ ကုညး ကလော်မရပ်ဂှ် မည်တံဟီုစ = ညး ဒးလွပ်ကလော်၊၊
သၟိၚ်ဂိတု ဒးလွပ်ရာဟု၊ - ယြဴကာလမွဲ သၟိၚ်ရာဟု ရပ်ၚိတ်သၟိၚ်ဂိတုရ၊၊ ကာလဂှ် သၟိၚ်ဂိတု ဒးလွပ်ရာဟု ၊ မည်တံဟီု၊၊ ( ကလေၚ်ၚဳရံၚ် ဒၞဲါ = မကြိယာ ပြံၚ်ဗဒှ်မနာံ (၁) = အဲမချူထၜးလဝ်ကဵုသၟဝ်တေံတုဲရ၊၊ )

ဗြရတ် ဂွံဆဵုညာတ်ကေတ် ဂဍောၚ်မတ်နော်မိယာဲ မစုတ်လဝ်ပ္ဍဲရဴတုဲ ဒှ်လၞီစံၚ်တူဂၠိုၚ်သောသၞာ

ကြိုက်သၟိက်ကဵုဒှ် တဝှ်စလာဲ၊ တိုၚ်ဒဒှ်ကီု ပိုဲဒးဟီုဂၠဲါ၊ လၟေၚ်စလာဲ ပိုဲဂၠဲါတွံနၚ်၊ ဗြရတ်တုန်စိ ကောံမိနန်ဒြၚ်၊ ၜါမွဲနန်ဗၠဲ ပ္ဍဲမပ္ကၚ်ရၚ်၊ ကောံဗြဴယက္ခဳ ဏၚ်ကၚ်ရဳက္ဍၚ်၊ ပ္ဍဲမဒၟံၚ်တဴ ဒကဴနန်ဒြၚ်၊ ဗြရတ်သၟီဗၠာဲ ဂေတ်ဂဲါပ္ဍဲဝၚ်၊ ဂေၚၚ်ဝေၚ်ပၠန် ၀ုတ်ဒိုဟ်ပန်ကၠၚ်၊ ဂေၚၚ်အာကိုပ် စိုပ်ပါၚ်တရၚ်၊ သၟီဒတဴသၠၚ် ပ္ဍဲတရၚ်ဗၠဲ၊ ထောံဏာမတ်ကွေံ ဆဵုဒးရဴမွဲ၊ ဍေံကွက်လဝ်က္ဍၚ် ပါၚ်တရၚ်ပြဲ၊ ဗြရတ်ညာတ်သ္ကဲ ပ္ဍဲစိုတ်သၚ်ကာ၊ သၟာန်တိုန်အနဳ ဏၚ်ကၚ်ရဳကၠာ၊ မူရဴဂှ်မွဲ ပ္ဍဲတရၚ်ဒွါ၊ ဟီုညိဒေံမ နာဲပမုသာ၊ ရဴစွံလဝ်ကၠာ ပ္ဍဲဒွါတရၚ်၊ ဟီုကဵုကောညိ ယွံမိပ္ကဴတၚ်၊ ဏၚ်ကၚ်ရဳမိၚ် မုက်မတ်လှိၚ်လှၚ်၊ နာဲယာန်ချေံရတ် ကောသၟတ်ကလၚ်၊ မတ်ညးထပှ် ဒှ်ရာဇာဝၚ်၊ မိပပရၚ် ပြၚ်နၚ်ကဵုအဲ၊ တေံဗြဴထပှ် ဒှ်ဒၟံၚ်ဝဳဝဲ၊ ပြၚ်နၚ်ကဵုကျာ ယွံကြုတ်ဏာအဲ၊ ဟိုတ်ဂှ်မိသ္ကဲ စွံပ္ဍဲတရၚ်၊ မိအံက်ဗြဴက္ဍၚ် ပြၚ်နၚ်ကဵုကျာ၊ ဗြရတ်ဂွံမိၚ် သွိၚ်မုက္ခဝါ၊ မုက်မတ်ဇြသ္ကဟ် မိၚ်ဒှ်ပူဆာ၊ ပ္ဍဲရဴဝွံဟေၚ် မတ်မိသေၚ်ဟာ၊ ချပ်တုဲဗြရတ် တြုံကၞတ်သာ၊ ဗြဲမတ်ဒတုံ ဘုံစက္ခုဒွါ၊ ဗှ်သၞာယာဲ လောံလာဲပူဆာ၊ လၞီစံၚ်တူ ဂၠိုၚ်သောသၞာ၊ ဗြရတ်ကုမ္မာ ကာလဂှ်သၟတ်၊ . . .

ဏၚ်ကၚ်ရဳဆာဲ ညာတ်နာဲဗြရတ်၊ မိသၟာန်တိုန်ရောၚ် ယွံဂဍောၚ်မတ်၊ မူဒှ်ကောဗၠာဲ ယွံနာဲဗြရတ်၊ ဍာ်ရမတ်နာဲ ဇွောဝ်ချာဲလယတ်၊ ပေၚ်ဂၠးသြိုဟ်နာဲ နူဗလာဲမတ်၊ မူဒှ်ပြဟ်သၟတ် ဍောတ်စိုတ်ကဵုမိ၊ ဟသေၚ်မိပ ပဝဒိတှိ၊ ဟွံရှ်ေသှ်ေသအး အိုတ်ညးသ္တုံဇွိ၊ ဟသေၚ်မိဟီု လီုစိုတ်ကောမိ၊ ဍိက်သ္ကံဆတ္တဝ် သၠုၚ်သဝ်ဍေံဗျိ၊ ဒေံဟွံလးလေၚ် တၟေၚ်စိုတ်နာဲသ္ၚိ၊ မိကြိုၚ်ဂၠဲါအာ သမ္ဘာတမိ၊ ဒေပ်ဗၠာဲအဟံ ပၠံစှ်ေပ္ဍဲတိ၊ ကောညာတ်ဒုဟ်မိ နာဲသ္ၚိယာံဟာ၊ ဟသေၚ်မိကီု ဓရီုစန်စာ၊ မိဟွံပ္တေက်ပုၚ် ဟွံပ္ဍုၚ်သွကၠာ၊ ဟသေၚ်မိဟီု ပလီုက္တောဝ်ၜါ၊ ဟိုတ်ဗညာ ကောယာံဟာနာဲ၊ သၟာန်လေဝ်ဟွံဗြု ဒဒုသြိုဟ်နာဲ၊ ဟသေၚ်ဥပ္ပဲါ မိစနာဲဟာ၊ ဟီုတ္ၜေဟ်ရာဲသာတ် ကဵုအမာတ်စာ၊ နာဲညာတ်ပဝ စိုတ်မသၚ်ကာ၊ ဟိုတ်ဂှ်ကြုတ်ဏာ မယာံဟာနာဲ၊ ဟသေၚ်မိပ ပဝစဏာဲ၊ ဟွံမွဲပ္ဍဲဂၠံ ဗတံကြေဝ်ဂဲါ၊ နာဲညာတ်ခါတ်မှာတ် ဂၞိန်ယာတ်ပြးချာဲ၊ ညာတ်ပတိပတ် ၀တ်ဗြဴသရာဲ၊ ဗြဴဝွံဟွံဆာဲ ဝေၚ်ကဵုဗၠာဲဘာ၊ ညာတ်သာ်ဂှ်ကၠာ နာဲသၚ်ကာစိ၊ ဟီုညိနာဲသ္ၚိ စိုတ်မိဟွံတန်၊ ဟီုကဵုညိကော အြနာဲလဂ္ဂန်၊ ဣဏၚ်ကၚ်ရဳ ဒ္ၚဳသၟာန်ဒက်ဒေါန်၊ လၞီဂၠိုၚ်တန် ၀န်စဝ်ဂၠိုၚ်အြ၊ တဲညံၚ်လောတ်ထဝ် မိဗန်လဝ်ကော၊ ယက္ခစံၚ်တူ လတူသြိုဟ်လော၊ ယီုမံၚ်ဟူဟူ လတူသြိုဟ်နာဲ၊ . . .

တုဲဗြရတ်ဂၠိန် ဗက်မိန်စရာဲ၊ ယွံမိကၚ်ရဳ ကျာ်သြဳကောဗၠာဲ၊ စိုတ်ပ္ဍဲမိဂှ် ဟွံဒှ်မာရာဲ၊ စိုတ်ဟွံစောန်ကၠိ ပ္ဍဲမိကျေဝ်လာဲ၊ ကောသ္ဍိုက်လအိတ် မိတ်ပရေၚ်ယာဲ၊ လာံသာစိုတ်နာဲ သၟီဗၠာဲဂၠါံဇွိတ်၊ ပဒဇပ်ညိ မိထဝ်ကလိတ်၊ လမၠံလုပ်မတ် ဍာ်ရမတ်တိတ်၊ နူစက္ခုဒွါ သီုၜါရမိတ်၊ ဒးလမၠံလအိတ် ဇွောဝ်တိတ်ရောၚ်နာဲ၊ ဏၚ်ကၚ်ရဳမိၚ် ကဵုသၟီကအီတွာဲ၊ မိပ်ပ္ဍဲစရိုတ် စိုတ်မိမြံမြာဲ၊ ကော်ကမၠောန်နာဲ ယာဲထေဲဂမ်အတ်၊ ဟာဲအကြဳဝန် ကမၠောန်ဍောတ်ဍောတ်၊ ဟွံပမၞိဟ်ကွေံ ပလှ်ေမုက်မတ်၊ စတုဲဆဝေၚ် ဗ္ဂေၚ်ဍုတ်လျတ်၊ ဗှ်ေဟွံမန လေပ်ဆကြကောတ်၊ စတုဲပလှ်ေ ညံၚ်ဗီုချေံသၟတ်၊ ဒးကဵုလေံဗတ် ဍောတ်ဍောတ်တံဏံ၊ ရပ်ဂွံလေံဒန် တက်ကမၠောန်တံ၊ ထဍေၚ်ကမၠောန် ဒေါဝ်နန်ထော်ဏံ၊ ကမၠောန်ဒြေပ်ဂဲါ ဂၞိန်လာဲဂြိုဟ်ချံ၊ ဗက်တက်ကမြဴ ဒြေပ်ဒဴဆံလံ၊ ဂၞိန်လာဲဂြိုဟ်ချံ ဍေံတံဒုၚ်ဂုန်၊ တလပိုန်ဗြဴ ကြဴယဝ်ဒှ်တုန်၊ လမျီုပိုဲဆာဲ တွာဲနာဲသီုဖျုန်၊ ဖေက်ၜိုၚ်ဖရံက် ညံၚ်ပံက်စးကုန်၊ ဒိုအ်တလဂုန် လ္တုန်ဝွံမွဲဝါ၊ ဏၚ်ကၚ်ရဳမိၚ် သွိၚ်ပါၚ်ဟီုအာ၊ ဗှ်ေတံတွံၚး ညံၚ်သအးညဳသာ၊ ကမၠောန်တွံၚး လးသီုသၞာ၊ တွံသီုပြာသာတ် ကြဴကြာတ်နာနာ၊ မိကဵုဗညာ မွဲသၞာထဝ်၊ ဆာန်လီဗတဲ မွဲဖုန်ကၟဝ်၊ ရေၚ်ကာန်နှဴရဴ တဴပ္ဍဲနန်ထဝ်၊ သၟီဗၠာဲဂိုၚ်ၜှ် ဍောၚ်ဒကှ်ကျဝ်၊ ကၞိၚ်ကဵုဃာန အဇထိုၚ်ထဝ်၊ ၜါမွဲသဝါန် ရေၚ်ကာန်တဝ်ဂၠဝ်၊ ဇြဟာန်တမိုဟ် ဖျုန်ဂြိုဟ်ဇတဝ်၊ သၟီကဵုဗြဴသွဝ် တဝ်ဂၠဝ်တဴတုန်၊၊

ဝေါဟာရမည်ဂမၠိုၚ် >~~~~~
သာ =
၁၊၊ (အကမ္မကကြိယာ)to be light, not heavy:
၂၊၊ (နာံ) borax: (ဗၟာဟီု = လက်ချား၊) သာ၊ သာအရိုၚ်၊၊
၃၊၊ (နာံ) a company, a following, a follower: ကျာ်တြဲကၞတ်သာ = the exalted Buddha the highest of all leaders: တြုံကၞတ်သာ = a man the highest of all leaders: နာဲသာ = the leader: ရဲသာ = the followers: သီုသာစှ်သုန် = with fifteen followers:
လာံသာ =
၁၊၊ (သကမ္မကကြိယာ) ပၠာံဗဇး၊ လှေံ၊ ပညးညံၚ်ဂွံမိပ်စိုတ်၊၊
၂၊၊ (အကမ္မကကြိယာ) သာယျာ၊ ရာၚ်ဆာဲ၊၊
ပတေက်၊ ပ္ဍုၚ် =
ပတေက်၊ ပ္ဍုၚ် မၞုံပ္ဍဲပိုဒ် - မိဟွံပ္တေက်ပုၚ် ဟွံပ္ဍုၚ်သွကၠာ - ဂှ် ဒှ်မကြိယာ(သကမ္မကကြိယာ)ရောၚ်၊၊ ဖျိန်ပုၚ် သီုမစုတ်တဴၜဵုဂှ် ဟွံပ္တေက်ပုၚ်၊ ဖျိန်သွ သီုဟွံစုတ်ၜဵုဂှ် ဟွံပ္ဍုၚ်သွ သၟိက်ဂး၊၊ ပုၚ်ဂှ် နွံရှ်ပ္ဍုၚ်၊ သွဂှ် ရှ်သာ၊၊
သဝါန် = (နာံ) ဒေန်၊ ဇံၚ်၊ ခါတ်၊၊
ထိုၚ် = (နာံ) သတ်သၠသၞေၚ် မတုပ်ညံၚ်ရဴသာဲ အဒဲါ၊၊ ထိုၚ်ဝွံ ဒမံၚ်ဍေံ နွံပ္ဍဲထၟောၚ်ဒုန်ရောၚ်၊၊

ဗြရတ်ကဵုကလော်ဗြဴမိဣဏၚ်ကၚ်ရဳ ရေၚ်ကာန်တဝ်ဂၠဝ် ပ္ဍဲကဵုနန်ထဝ်

ကြိုက်သၟိက်ကဵုဒှ် ကာလဂှ်အဴ၊ ရေၚ်ကာန်တုန်ဆန် ၜါမွဲနန်ပ္ကဴ၊ ဇြဟာန်တမိုဟ် ဖျုန်ဂြိုဟ်ဒမြဴ၊ စက်ရံၚ်သြဳလျး ခၠၚ်တမးတဴ၊ ဃောပုဏ္ဏမဳ လျးညံၚ်စဳသ္ဍဴ၊ တွာဲထိုၚ်ဃာန မိအဂ္ဂဗြဴ၊ ကောကနုဒ ပတ်ဒၟၜါအဴ၊ ပ္ဍဲလစသြိုဟ် ရာၚ်တမိုဟ်တဴ၊ ဗြရတ်ကုမ္မာ ကာလဂှ်အဴ၊ လပုဟ်တုပ်တဴ ရဴလပှ်ဇၟူ၊ ပ္ဍဲလစသြိုဟ် ရာၚ်တမိုဟ်အူ၊ တဲလပှ်ဇၟူ လၜက်ပူလဝ်၊ ပ္ဍဲဒၚ်ပၞးရော လောတ်ပဝူထဝ်၊ ညံၚ်ရဴပူလဝ် ပ္ဍဲဗြဴသွဝ်ကီု၊ သၟီကဵုမှာယျ ပမာဏဗီု၊ သၟဟ်သၟန်တဴကီု သီုၜါတြုံဗြဴ၊ ဇၟူကဵုစမၠံၚ် ၜတ်ညံၚ်ဍောၚ်ပ္ကဴ၊ မိစမၠံၚ်ဗြဴ လဟိၚ်တဴစိုတ်၊ တဲၜါမိန်လဝ် ဗဵုဒ္ၚေါ၀်လျးပၠိုတ်၊ မိတ်တူထဝှဲါ ကၞိၚ်နာဲကြက်ဗိုတ်၊ သၟီထိုၚ်ဃာန ဇာပ်ထသီုဖအိုတ်၊ ညးၜါပေၚ်စိုတ် အိုတ်ပ္ဍဲနန်ထဝ်၊ ကမၠောန်ပေၚ်က္ဍတ် လွဳလွတ်သၟီဓဝ်၊ ပိုက်ပၞိက်လွိၚ် ဖလှိၚ်ဗြဴသွဝ်၊ ကမၠောန်ယက္ခ အဇဂန္ဓဝ်၊ သီုလှ်ေဒယှ်ေ ပလှ်ေမုက်ဂေါဝ်၊ ညံၚ်ညးကေလှာ ၜါမွဲလ္ၚောဝ်၊ လှ်ေသီုကျာ်သြဳ ဗနဳနန်ထဝ်၊ ဗဗဵုဗြဴသွဝ် စက္ကဝဝ်ဗၠာဲ၊ ဒြဝ်ကျာံသပေါတ် တလောတ်လေၚာဲ၊ ဒြဝ်ဗြုလလောၚ် ဖံမံၚ်တလာဲ၊ ခဍေဝ်ကဵုကျာံ ရာဂါံဂၠိုၚ်ဒၞဲါ၊ သဏောဲကဵုဆေၚ် ဗပေၚ်စိုတ်နာဲ၊ ရမျှာၚ်ဂမ်အတ် စိုတ်လျတ်ဆာဲ၊ ဗာတ်ဗြုဂြိုဟ်လာဲ ညံၚ်သာဲလလောၚ်၊ ဒဗိုန်ဒိၚ်ဒိၚ် ပိၚ်မှၚ်ပေါၚ်ပေါၚ်၊ ဗာတ်တလာဗြု ဗရုဏောၚ်ဏောၚ်၊ ကမၠောန်လှ်ေဒျာန် ရမျှာၚ်ၜတ်သောၚ်၊ ပ္ဍဲဒေါ၀်နန်ဂၠေါၚ် ညံၚ်သဘၚ်ပေဲါ၊ လဟိၚ်သောတ တလနန်ဗၠဲ၊ မိၚ်ပေဝ်သဏောဲ ဝေၚ်ပေဲါသဘၚ်၊ ပ္ဍဲဒေါ၀်နန်ဒြၚ် ညံၚ်သဘၚ်သွဝ်၊ စသိုၚ်လဟိၚ် သၟီကဵုရုပ်ထဝ်၊ ရေၚ်ကာန်တဝ်ဂၠဝ် မွဲနန်ထဝ်တုန်၊၊

ဝေါဟာရမည်ဂမၠိုၚ် >~~~~~~
ဇၟူ = စိၚ်တြုံ၊ စိၚ်ကၟက်
စမၠံၚ် = စိၚ်ဗြဴ၊ စိၚ်ၝောံ
ပတ်ဒၟ = ဖျုန်တှ်ပ္ဍဲဂၠးသြိုဟ်မၞိဟ်ဗြဴ
အဇ = ညံၚ်ရဴ၊
ကေလှာ = ကောန်ခၞေါ၀်၊ ဍုၚ်ဇမၞော်ကောန်ခၞေါ၀်ဂှ် နွံယၟုကေလာသ၊
လှ်ေ (ကြိယာမသက္ကုပိုဒ်ကမ်) = ပလှ်ေ (ကြိယာမၞုံပိုဒ်ကမ်)
ဒဗိုန် = ရမျှာၚ်ဍေံ ဗြုဒိၚ်ဒိၚ်
ပိၚ်မှၚ် = ရမျှာၚ်ဍေံ ဗြုပေါၚ်ပေါၚ်
ဗာတ်တလာ = ရမျှာၚ်ဍေံ ဗြုဏောၚ်ဏောၚ်
ရေၚ်ကာန် + တဝ်ဂၠဝ် = ဝေါဟာရၜါမဝွံ ဆပြယာဲရတၟေၚ်၊ အဓိပဲါတုပ် >~~~~~~

ဗြရတ် ဍိုက်လတူစးချေံဟဇ္ဇနဲ ကလာၚ်သာၚ်တိုန်အာ တူသဗာန်အမှဲ

ဗြရတ် စိုပ်အာ ထာန်ဒမံၚ်ကလော်ဗြဴမိဣဏၚ်ကၚ်ရဳ

ကာလသၟိက်ဒှ် တဝှ်သံၚ်သာ၊ သၟီတာပဿ တလပညာ၊ ကွက်လိက်တုဲပၠန် စဴပန္နသာ၊ ဗြရတ်ကုမ္မာ ပြဟ်ၚုဟ်အာရ၊ လာၚ်မုက္ခဝါ လၜိုဟ်ကာယျ၊ မြဳသာဲနာဍူ ပုၚ်မူသဗ္ဗ၊ တုဲကလံကၠာ ပန္နသာရ၊ ဗောဓိသတ္တ တလစရာဲ၊ ကျိုၚ်ကျဝ်ဂ္ညိဂ္ညာတ် ဨကရာတ်ဗၠာဲ၊ သၞာ်ရတ်ချတ်ဂၞိၚ် တွိၚ်ပ္တိုန်စရာဲ၊ ဂါံဍိုက်ချေံပြဲ ဟဇ္ဇနဲဗၠာဲ၊ လိုန်သဗာန်ကျာ မူပမာဗ္ဒာဲ၊ ညံၚ်ၜိုပ်ၜၚ်ဗၠာဲ ဆာဲတူကာသ၊ ပဝ်ပ္ၚောံခုတ် စိတ္တကုတ်ရ၊ ညံၚ်အိန်မာဃ တလသွဝ်ၜါ၊ မဍိုက်ယာန်ကၠာ ဨရာဝဏ္ဏ၊ မတိတ်ဝေၚ်ထာန် ဥဒျာန်လစ၊ ညံၚ်သူရိယျ ဍိုပ်ၜိုပ်ဒျအာ၊ ပ္ၚောံဍုၚ်ကၠာ ဒွါရဝတဳ၊ ကောံမိတ်လဂ္ဂန် ဂွံညန်မွဲဒ္ၚဳ၊ ပမာသာ်ဂှ် တုပ်အိုတ်သၟဟ်ညဳ၊ ဗြရတ်ဍောတ်ဗၠာဲ စရာဲကျာ်သြဳ၊ ဍိုက်ယာန်အဿ သၟီပယာယဳ၊ ပ္ၚောံနန်ဒြၚ် ဣဏၚ်ကၚ်ရဳ၊ ဒေါဝ်ဂြိုပ်ကျာ်သြဳ ဗနဳပုပ္ဖ၊ ဍိုက်ယာန်အဿ သၟီပယာကြာ၊ ကလာၚ်သာၚ်ဟာန် လိုန်သဗာန်ကျာ၊ ချေံကဵုဗညာ အာတဴလျလျ၊ ကြာဟေမဝန် ထာန်အရညှ၊ အာတဴလျလျ ကာလဂှ်ပၠန်၊ သၟီရာဇာမန် ညံၚ်ကောန်ၜိုပ်ၜၚ်၊ ပရှ်ညံၚ်ကျာ နဲပါကဟၚ်၊ ပရှ်လောန်က္ဍၚ် ဒေါ၀်ဂၚ်ၜိၚ်ဒၟံၚ်၊ တူဂၠံအမှဲ ရံၚ်ညာတ်နဲသၞံၚ်၊ ကြာဂၠံမတ်ဗြဲ ပ္ဍဲစးအဿံၚ်၊ ညာတ်ညံၚ်ရဴသၞံၚ် အရံၚ်ဖျေဲဖျဴ၊ ညာတ်အာစောန်စောန် ပြာသာတ်နန်ပ္ကဴ၊ ဓုပ်ပြကာအဵု လျးဂဵုညံၚ်သ္ဍဴ၊ ကရိုန်တဏာဲ ဂဵုဍာဲဖျေဲဖျဴ၊ သ္ၚိကၠတ်နန်ဒြၚ် ဂဵုခၠၚ်ညံၚ်သ္ဍဴ၊ ဗတၚ်ဇာထဝ် ရုပ်သပဝ်နှဴ၊ သပဝ်ဗိုတ်နာ် ဂၠိုၚ်သာ်တ္ၜတ်သြဴ၊ ညးၜါရံၚ်ဗဵု ခၠၚ်လဟဵုတဴ၊ ပြာသာတ်ဒေံဗြဴ ရဴဒမၚ်ဍာ်၊ ဂေၚ်တဴပြာသာတ် ဂွံညာတ်ရုပ်ရဴ၊ ပ္ဍဲမုက်ရုၚ်ပ္ကဴ ယက္ခဗြဴအုံ၊ ပၠဣဓိပၠန် ရပ်ဒန်တဲသ္တုံ၊ ယက္ခဟောကၠံၚ် ဒတဴဒၟံၚ်အုံ၊ ကဵုပါၚ်ဟဟ ပၠရမျှာၚ်ကောံ၊ ထောံဇိုၚ်တဲစုံ သီုသ္တုံသီုဇွိ၊ တၚက်ေၚက်ဂွု ကိုဟ်တသုစိ၊ သလာ်ရံၚ်လ္ၚာ် တက်ဍာ်ယူတိ၊ ကလော်ဒိတှိ ပၠဣဓိလောန်၊ ဂွံညာတ်တဴကၠာ သီုညးၜါပၠန်၊ ချေံဟီုဂၠိုက်ဂၠဲါ ကဵုနာဲသာဇန်၊ လိက်ပ္ဍဲကံချေံ ထောံကဵုဍေံပၠန်၊ ဍေံဂွံညာတ်ကၠာ အက္ခရာဗျန်၊ ဂွံတီသ္ဇိုၚ်သာ တူကျာပိုဲတန်၊ ဂွံမိၚ်ရမျှာၚ် ပါၚ်ချေံပြဲလောန်၊ ဗြရတ်ထောံပၠန် လိက်ဇမန်ဗၠဲ၊ ယက္ခဂွံညာတ် ပါတ်တိုန်စိုတ်ပ္ဍဲ၊ ပံက်ညာတ်လိက်ကၠာ အက္ခရာနဲ၊ ဇၟန်ညဳသတပ် ပၠောပ်ဏာအပ္ဍဲ၊ ပၚ်ခၠံယဵုတဲ ပ္ဍဲကောန်ကျာ်သြဳ၊ ဣဏၚ်ကၚ်ရဳ ကျာ်သြဳနန်မြ၊ ဂွံမိၚ်လိက်ရ ယက္ခဒေဝဳ၊ တီပ္ဍဲလိက်ကိုပ် မိတ်အဲစိုပ်ပ္ညဳ၊ တွာ်တိတ်မုက်ရုၚ် တိတ်ဒုၚ်သဳကၠဳ၊ ယက္ခဒေဝဳ ကျာ်သြဳဗြဴရတ်၊ မိၚ်လိက်တုဲကၠာ သ္ၚဳအာမုက်မတ်၊ တုဲကော်ဗိန္ဒော ဟောရာကိုန်ဗတ်၊ ဟောရာကၠုၚ်စိုပ် ဖျေံက္ဍိုပ်ပဝတ်၊ ယွံနာဲနန်သ္ဍဴ ပိုၚ်တဴနန်ကၠတ်၊ မူပမိက်စိ ဟီုညိဗ္တာၚ်ၜတ်၊ ဂွံတီဗွဲစၟတ် အဇ္ၛတ်ညိနာဲ၊ . . .

ဏၚ်ကၚ်ရဳမိၚ် ဟီုပမိၚ်ဆာဲ၊ ယွံလေဝ်အစာ ဟောရာစရာဲ၊ လိက်မိအဲပ္ညုၚ် ကဵုကၠုၚ်ဆက်ကွာဲ၊ လိက်တွဵုတဲယာဲ လိက်နာဲဗှ်ရံၚ်၊ စုတ်တဲဍောတ်ဗၠာဲ ယာဲကဵုပလံၚ်၊ ယမုဗြရတ် ပြာကတ်ဒါန်ကြံၚ်၊ ထပ်တဲပ္ဍဲလိက် အဲသၟိက်ကဵုရံၚ်၊ ဂွံတီညိကွေံ ကော်ဖျေံဒမံၚ်၊ က္ညဗိန္ဒောရံၚ် ညံၚ်ဗၠးသၚ်ကာ၊ ဟောရာမိၚ်ဗက် ဖန်စက်ဇာတာ၊ ပိပန်ဒစာံ သက်ဖဍာံကာ၊ လိက်ဝွံအဒိ လှာဲတမိကၠာ၊ ခယျဝိဒ္ဒဳ ပ္ညဳယၟုအစာ၊ တုဲသ္ၚဳပၠန်မွဲ ပ္ဍဲစက်ဇာတာ၊ တန်အယုက်ဆံၚ် ဂြိုဟ်ပံၚ်ဟုဲဏာ၊ ပၟဝ်တရဴ ကြဴစစှ်ၜါ၊ ကိုန်ဇိုက်ဟွံတိတ် လအိတ်ဇာတာ၊ ပ္ဍဲမိဟ်သောရာ ပ္ဍဲဗြိုဟ်ရာဟု၊ ကြကတ်အၚာ သိုက်ကြာကန်စု၊ အဒိုတ်တူဝွံ စန်မြုဗိစ္ဆာ၊ ဂုရုမကဝ် ကုံလဝ်ဗုဒ္ဓါ၊ ဝွံသ္ၚိကၞေပ်ရ ဒစာံပြကာ၊ ဂြိုဟ်ဒစာံတုဲ ဒးကၞုဲရာဇာ၊ ကၞုဲအနုမာန် နွံညာန်သ္ကေက်သ္ကာ၊ ရသိဆက်ကွာဲ ပသရာဲကၠာ၊ ကြဴဝွံကၞုဲဝါ ဂွံဏာကောန်စိုတ်၊ ခိုၚ်ကဵုဇာတာ တိတ်နူကာဗိုတ်၊ လိက်ဝွံလှာဲအဴ ဘာ်တရဴအိုတ်၊ လိက်တၞံဟသေၚ် ဒးဟေၚ်ဂၞဲရိုတ်၊ ကာကာပ်မြိတ္တျု အမှုဂစိုတ်၊ လိက်ဝွံလှာဲအိုတ် ပ္ဍဲစိုတ်ဍိက်အဴ၊ လိက်ဝွံဟသေၚ် တၟေၚ်ရောၚ်နာဲဗြဴ၊ ပိုတ်ဗျန်ဟွံဆာဲ လွာ်ဘာ်တရဴ၊ ထာန်ဇိုၚ်လှာအဴ နာဲဗြဴယွံမိ၊ ညးလှာဲတုဲရ ဗြဴတလတိ၊ ဟွံစှ်ေပိုတ်ဗျန် ချူကၠောန်တမိ၊ ပပ္တေဟ်ညိယာဲ စရာဲနန်လွိ၊ လိက်လှာဲတမိ ယုတ္တိဟွံဝေၚ်၊ . . .

ဏၚ်ကၚ်ရဳမိၚ် သွိၚ်မုက်ကလေၚ်၊ မိဟီုတ္ၜေဟ်ကၠာ ဟောရာဂှ်ဟေၚ်၊ ဟာဲအဒိတှိ ဗှ်ေညိဟွံသေၚ်၊ ဗှ်ေပလီလှေံ ညံၚ်ပြေံကျာဟေၚ်၊ ဗှ်ေဗ္ဂေတ်တံၚ်ဂြဲ နဲညးဍိုက်ပြေၚ်၊ ဗှ်ေတံၚ်ကလေၚ် တုပ်ညံၚ်ပြေၚ်ဂၠဴ၊ ဟာဲအမုက်ဗၠး အဲဂဗးတဴ၊ ဟာဲအမုက်ဗာ် သ္ၚိဍာ်ပသြဴ၊ အဲဒလုက်ပၠန် ဇပန်ဍေံက္တဴ၊ အာကၠေံအဂၠဴ လထဴလုတ်ဝတ်၊ မံၚ်လံမဂး ဒးဂွမုက်မတ်၊ အာထောံကဵုပြဟ် ဗြံက်က္ဍဟ်ခလောတ်၊ ဟောရာခညောတ် သၟတ်ပၠန်စဴသ္ၚိ၊ . . .

ဣဏၚ်ကၚ်ရဳ ဒေဝဳယက္ခိ၊ တိတ်အာမုက်ရုၚ် ကၠုၚ်ဗိုၚ်သ္တုံဇွိ၊ ကမၠောန်ဗိုၚ်ဂၠေဲါ ပ္ဍဲတံဇိုၚ်မိ၊ သဘာ်တဲၜါ နာဲသာနန်လွိ၊ တုဲသ္ၚေဝ်တိုန်အာ တူအကာသိ၊ ညံၚ်မှာတလိ မိညာတ်ဒဇပ်၊ အတိက်ပ္တုဲလဝ် ဇတဝ်ဖြပ်ဖြပ်၊ ပ္ဍဲစိုတ်သမြပ် ဖြပ်ပ်ဇတဝ်၊ ရုပ်ညံၚ်မာဃ အိန်တလသွဝ်၊ ဍိုက်ယာန်ချေံပၠန် တဲသၞာ်သ္ဂန်လဝ်၊ စိုတ်မိဖြပ်ဖြပ် ဇတပ်ဇတဝ်၊ ဇြဟာန်တမိုဟ် ဖျုန်ဂြိုဟ်သ္ဗသအဝ်၊ ယက္ခဗြဴသွဝ် စိုတ်လၟောဝ်အာ၊ ပ္ဍဲဂွိုၚ်ကြုတ်ဏာ ဗျာပ်အာဇြဟာန်၊ ဘဝၚ်ပိတန် အဝဇ္ဇန်ထာန်၊ သမ္ပတိစ္ဆိုန် လဴတိုန်ဂစာန်၊ ဍောၚ်ဓဝ်ဝိညာန် ထုဲကြာန်ဗနှ်၊ သန္တဳဝတှဴ ဇၞော်တဴက္တဵုဒှ်၊ ဇဴတဒါရီု သီုစှ်ထပှ်၊ လညာတ်သ္ဇိုၚ်ညာတ် ဂွံညာတ်တုဲဂှ်၊ ဇဴသောဗနှ် မူဂှ်ပမာ၊ တမ္ၚာမွဲကၠာ ပ္ဍဲခန်လွာၜဳ၊ သဏန်ဒက်ဗျာၚ် ပ္ဍဲသၞေၚ်စာၚ်ဖဳ၊ ဍိုက်ဂၠုၚ်ဂၠဲါၚဳ ပလွဳပရာ၊ ဂရော်နာံထံၚ် ဒၞဲါခဏံၚ်ကၠာ၊ ကညာတ်သၞေၚ်စာၚ် သာၚ်တိုန်ညှာညှာ၊ ထမက်ကိတ်ပၠန် ဒးသဏန်ကၠာ၊ ကၠာတ်ပၠန်ဟွံတိတ် ၚိတ်ဗိုန်က္ဍၚ်အာ၊ တုဲဒးမံၚ်ဘဲ လုပ်တဲညးဖျာ၊ သၞေၚ်စာၚ်တုပ်ရုပ် ဂၚ်တုပ်သံၚ်သာ၊ သဏန်တုပ်ကီု အရီုတဏှာ၊ ကယျိုၚ်ဂညိ အပေါတ်ကြိယျာ၊ အကုသဵုဂှ် တွံဂးတမ္ၚာ၊ ဗြဴရတ်ယက္ခာ တုပ်ပမာပၠန်၊ . . .

နူမိညာတ်ဒး ပးရုပ်လဂ္ဂန်၊ ဇာပ်ပ္ဍဲသန္ထာန် ဇြဟာန်တန်တန်၊ လ္ၚာ်ရံၚ်ပၠန် လတူနန်လွိ၊ မိကော်တိုန်အာ ဖဳဒွါတသိ၊ အဵုသ္ဍိုက်မိ စှ်ေညိမူဒှ်၊ စှ်ေရကောဗၠာဲ နာဲယာန်ချေံပြဟ်၊ ဒေံတိတ်ဝါၚ်ဒုၚ် စှ်ေကၠုၚ်ထဝ်စှ်၊ က္ညစှ်ေကဵုပြဟ် လမုဟ်ညိနာဲ၊ မိကော်ကဴကဴ ရံၚ်တဴကောဗၠာဲ၊ ညာတ်ရုပ်စိုတ်ချဳ ဏၚ်ကၚ်ရဳဆာဲ၊ မတ်ကသဳစိုတ် စိုတ်ဒြေပ်ဂေတ်ဂဲါ၊ စှ်ေရကောဗၠာဲ နာဲဂဍောၚ်မတ်၊ ဗြရတ်ဂွံမိၚ် တွိၚ်ပါၚ်ဗြဴရတ်၊ ဟီုပ္တီချေံရော ယွံကောဗ္တာၚ်ၜတ်၊ ကောရံၚ်စှ်ေအဴ တေံမိဗြဴရတ်၊ ကော်ဒၟံၚ်ကောဂၞဴ ဒကဴနန်ကၠတ်၊ စှ်ေရဟာနာဲ ကောဗၠာဲချေံရတ်၊ ချေံဟီုတိုန်သၟတ် ယွံဒေံဍောတ်အဲ၊ ကောဒျာန်စှ်ေရ မတ်ပလၜဲ၊ ဒျာန်စှ်ေလျလျ ဒေသနန်ဗၠဲ၊ ဗ္ဒက်သိုန်ပိဝါ တူကျာအမှဲ၊ ဂေတ်ဍုၚ်မိအဵု ဗဵုဝေၚ်နန်ဗၠဲ၊ စိုပ်မုက်ရၚ်ကၞာတ် အမာတ်ရေၚ်ဂၠေဲါ၊ ဏၚ်ကၚ်ရဳပၠန် တလနန်ဗၠဲ၊ မိဗက်ထၜ တလအဝဲ၊ သဘာ်ဖျေံပြဲ နူချေံမွဲတန်၊ ဗြရတ်ညာတ်စိ ရုပ်မိတြဳဝန်၊ ညးၜါစိုပ်စပ် သ္တပ်သ္တးမွဲပၞောန်၊ ဂဇံမုက်ရုၚ် ဒုၚ်စမုက်ပၠန်၊ ချေံရတ်ဒးရး ဗလးမွဲတန်၊ အဟာရဗျန် ဂၠိုၚ်သန်ပြာကတ်၊ တရိုပ်ဗစ သၟီဗၠာဲဗြရတ်၊ တူနန်ထဝ်သၟတ် ကောံဗြဴတ္ၜတ်သြဴ၊ ဣဏၚ်ကၚ်ရဳ ကျာ်သြဳနန်ပ္ကဴ၊ ညးၜါမွဲဖုန် စိန်ဝုန်နှဴရဴ၊ ပ္ဍဲနန်ဇမၠိၚ် သၟီကဵုဒေံဗြဴ၊ တူနန်ထဝ်ပ္ကဴ ရေၚ်ကာန်တဴတုန်၊၊

ချေံကလာၚ် မၚ်ဗၠာဲဗြရတ်ဍိုက်အာ လတူသဗာန်အမှဲ

ဗြရတ် မဂွံဆဵုညာတ်ကေတ် ရသိမကေၚ်ဒှ်လဝ်လဲဇွာနူဘဴတမၠာ ပ္ဍဲဂြိုပ်ဟေမဝန်

ဗြရတ်ကုမ္မာ ကောန်ရာဇာဝၚ်၊ ညံၚ်မှာလီဗၠာဲ ချေံနာဲတုပ်က္ၜၚ်၊ ပ္ဍိုက်ဗၞိက်လွဳ ပဳတိအရၚ်၊ နုဘဴအဒ္ညာ တုပ်သၠယာက္ၜၚ်၊ ရပ်သၠသၞေဝ်စိုတ် ဟွံဖိုတ်ဘဝၚ်၊ ထာၚ်ပ္ကဴပညာ ဗ္ကေတ်ဏာဇၟာပ်ကၠၚ်၊ ဇက်တဝန်ရှောဲ ပ္ဍဲကာသဂၚ်၊ ဇက်တဝန်ခိုဟ် ဒိုဟ်မိတ်အရၚ်၊ တ္ကံတၟံတရၚ် ဟွံလၞၚ်ဂၠိန်၊ ညံၚ်တြဳဇှ်အိန် နာဲသိန္နရာတ်၊ သတြုတမ ဟဂံၚ်ပဝါတ်၊ ကောန်ဨကရာတ် နာဲပြာသာတ်ထဝ်၊ လျးရတ်ပြီုရုပ် လျးရုပ်ဆက်တ္ၜဝ်၊ ညံၚ်တ္ၚဲတိုန်သၟုက် က္ဍိုပ်ယုဂ္ဂန္ဓဝ်၊ ချေံကဵုသၟီဓဝ် အံသဝ်လောန်သန်၊ ဒေါဝ်ဟေမဝန် ကလာၚ်လန်ဂြး၊ မဒါန်အတိက် သၟိက်ပ္ညုၚ်ထၜး၊ ဒါန်အတိက်သၟတ် ပြာကတ်ဇၟာပ်ညး၊ မိတ်တၞံတမၠာ ကဵုခြာသ္ၚောဲသ္ဍး၊ ကဵုသ္ၚောဲတဝဵု တိကဵုအကး၊ ဂွံဒ္ၚေါ၀်လေၚ်လး သ္တးလးသာဓာ၊ ယဝ်ဒါန်ဟွံမွဲ ပ္ဍဲဘဴတမၠာ၊ စးကဵုစးဗ္ဒာဲ ဒလာဲလဝ်ကၠာ၊ ဟဂွံလးလေၚ် ရောၚ်ဟသေၚ်ဟာ၊ တဝှ်ကျာ်တြဲ နာဲဇြဲသာခါ၊ ဟီုတွံလဝ်ဟေၚ် ရောၚ်ဟသေၚ်ဟာ၊ နာဲက္ဍိုၚ်ထာၚ်သွာ ကောန်ရာဇာဝၚ်၊ ဍိုက်ချေံပြဲက္ဍၚ် ဒေါဝ်ဂၚ်ဟေမန်၊ သ္ၚဳမၠာ်ရံၚ်အာ ကြာဟေမဝန်၊ နွံဣသိမွဲ သဳလပြဲလောန်၊ အသၟာပိုတ် ဂွံညာတ်အိုတ်ပၠန်၊ ဒ္ၚဳဒျာန်စှ်ေအာ ခါဂှ်မွဲတန်၊ ချေံဂါံဟွံပြဟ် ဂါံတဆှ်အန်၊ ဒ္ၚဳလုပ်စိုပ်ပၠန် ထာန်ပဏ္ဏသာ၊ ***ဗျူပတန်လၟောၚ် ဒၟံၚ်ဇိုၚ်ကၟာ၊ . . .

ချေံအာဂၠဲါစ ဒေသဇိုၚ်လှာ၊ ဗြရတ်ရာဇ ဒါနတမၠာ၊ ဘဝနူတၞံ ပတံဝါသၞာ၊ ဗြရတ်တုန်စိ ကဵုဣသိကၠာ၊ ညးၜါဂှ်ပြဲ ဒှ်ဒၟံၚ်လဲဇွာ၊ ညးဗၠာဲအဲဗၠာဲ ကြဴတဲသြာဲအာ၊ နာမဣသိ အဒိကိုပ်ကၠာ၊ မၚ်ဗၠာဲသောတ နာမတမၠာ၊ တိတ်လန်ဝေၚ်ဂြိုပ် စိုပ်ဇြဲသာခါ၊ သမၞိၚ်ၜိုဟ်လောန် ပ္တန်ကာယဒွါ၊ သ္တိက်ဒလာဲပၠန် မွဲတန်လှိၚ်အာ၊ နွံကလော်မွဲ သစ္စပြဲဖာ၊ ခစဗဳသြဴ တရဴအခါ၊ ဂွံအဝဵုကၠာ ကန္တာကလော်၊ ဂွံပိုၚ်တံဇြဲ ပ္ဍဲဂှ်မွဲဗော်၊ ယြဴညးမွဲ လုပ်ဇူဇြဲဇၞော်၊ ဒးဒုၚ်စဏ ယက္ခမွဲဗော်၊ ယဝ်တီဓဝ်ဇၞော် ကလော်ဒေဝ၊ ဒေဝဓဝ်အဵု တွံကဵုဒးရ၊ ဂွံဗၠးဘဲကၠာ ကန္တာယက္ခ၊ ကလော်လုပ်ပြဲ ဇြဲနိဂြောဓ၊ ဂွံညာတ်ကေတ်ပၠန် ကောန်မနုဿ၊ နာဲလုပ်သ္တိက်လှိၚ် သမၞိၚ်ရုက္ခ၊ ဒှ်စဏပိုဲ ဟိုဲမနုဿ၊ ဒးဒုၚ်စဏ ရသၟုဲလေၚ်၊ ယဝ်နာဲတီရ ဒေဝဓဝ်ဟေၚ်၊ ပါၚ်ကျာ်တွံလဝ် ဒေဝဓဝ်တၟေၚ်၊ ယဝ်မတွံဒး ဂွံဗၠးဗွဲလွေၚ်၊ မသောတမိၚ် ဒွိၚ်တဴပ္ဍီုသြေၚ်၊ တုဲဟီုကလေၚ် ဒုၚ်ဂုန်သေၚ်ဟာ၊ ယွံသၟီကလော် မဇၞော်အဒ္ညာ၊ တွံဟွံဒးရ ဆနာဲမေတ္တာ၊ အာတ်အခေါၚ်စိ ကဵုညိမွဲဝါ၊ ဗၞတ်ထပှ်တ္ၚဲ အဲဂၠဲါအစာ၊ ယဝ်ဟွံဂွံရ အဲဒုၚ်စကၠာ၊ မဖျေံမေတ္တာ မွဲဝါညိနာဲ၊ ယက္ခဂွံမိၚ် တွိၚ်ပါၚ်မၚ်ဗၠာဲ၊ ကဵုအခေါၚ်ကၠာ ဗလးဏာဆာဲ၊ . . .

ကာလသၟိက်ဒှ် တဝှ်စလာဲ၊ ဗြရတ်ဝွံဂှ် က္တဵုဒှ်မၚ်ဗၠာဲ၊ မပဏ္ဍိတ နာမစရာဲ၊ ဂေၚၚ်တိတ်ကွေံ ဆဵုဒးသဟာဲ၊ ညာတ်မုက်သဟာဲ ဟွံဆာဲဂြိုၚ်ကအီ၊ မူဒှ်သဟာဲ နာဲဒှ်လၞီ၊ မူဒှ်ဇြသ္ကဟ် တွံညိသ္ဂောံတီ၊ ဟွံဂြိုၚ်ဟွံကအီ ဂွံတီညိဇွာ၊ မသောတမိၚ် ဟီုပၟိၚ်ကၠာ၊ ယွံလေဝ်သဟာဲ အဲဂၠဲါအစာ၊ ဒေဝဓဝ်ပြဲ နွံပ္ဍဲဂါထာ၊ ပဂုန်မွဲဝါ ညိရဇွာလဲ၊ မတီညိဟာ ယွံလေဝ်ဇွာအဲ၊ ယဝ်မတီဂုန် ဂုန်ဓဝ်မပြဲ၊ ပ္ကတ်ကဵုညိလဲ အဲဂွံဗၠးချိုတ်၊ တၞံဇြဲကလော် ဒှ်ဗော်အဟိုတ်၊ အဲလုပ်ဒးသ္ကဲ တံဇြဲဍေံသ္တိုတ်၊ ဍေံရပ်စပြဲ အဲပါန်သီုစိုတ်၊ မွဲသတ္တဟ တလစရိုတ်၊ ဗလးနၚ်အဲ ဂၠဲါဓဝ်ပြဲသ္တိုတ်၊ ယဝ်ဇွာတီသၟတ် ပ္ကတ်အဲဒဵုအိုတ်၊ အဲဂွံဗၠးချိုတ် ကၠေံစိုတ်ညိဇွာ၊ ပဏ္ဍိတမိၚ် တွိၚ်ပါၚ်ဂှ်မာ၊ အဲပ္ကတ်ကဵုဏာ ဒေဝါဓဝ်ဆာဲ၊ တုဲပကတ်ကဵုပၠန် လက်သန်ပြယျာဲ၊ သီုကဵုပါလိ သီုအဓိပဲါ၊ ဂွံဓဝ်ဂေါဝ်ဆာဲ ပၠန်ဒၞဲါကလော်၊ ယက္ခညာတ်ကီု သၟာန်သီုခဏော်၊ ဂွံဓဝ်ဟာနာဲ သီုပြယျာဲဗော်၊ ဂွံနၚ်ရအဴ သ္ဍဴသၟီကလော်၊ ယက္ခမိၚ်အိုတ် မိပ်စိုတ်သော်ရော်၊ ပ္ဍဲဂှ်ကလော် ဗော်သၟီယက္ခာ၊ ဍေံသြိုၚ်ပၞၚ် ဂေါ၀်က္ဍၚ်ပြဲဖာ၊ ဂညိလလဴ ပ္ကဴသြဴနာနာ၊ မၚ်ဗၠာဲသောတ ပဒှ်သာ်လွာ၊ ဂါံတိုန်ပၞၚ် ဂေါ၀်ခၠၚ်ရုပ္ပါ၊ ဒေဝဓဝ်ကၠာ လအာယောသော၊ အဲတွံကဵုစိ ပၚ်မှိၚ်ညိကော၊ ဟိရိအြတ္တပ္ပ သမ္ပန္နော၊ သုက္ကဓမ္မာ သမာဟိတော၊ သန္တောသပ္ပေါ ရိသောလောကေ၊ ဒေဝဓမ္မာ တိ၀ုစ္စရေ၊ ယွံကောယက္ခ ဒေဝဓဝ်ပၠေ၊ အဲတွံကဵုလေ သုတေပၚ်မှိၚ်၊ ကလော်ဂွံမိၚ် လဟိၚ်သောတ၊ ဒေဝဓဝ်ဂှ် ကြဳဇှ်ပြာထာ၊ ကလော်ဇြဲကွေံ စိုတ်ဍေံမေတ္တာ၊ ဖျုန်မနုဿ ဟဂံၚ်စကၠာ၊ တုဲဗလးဏာ ယက္ခာဂွံဓဝ်၊ တုဲဂွံဗၠးချိုတ် မိပ်စိုတ်မုက်ဂေါဝ်၊ ဂွံဗၠးဂစိုတ် ၜိုတ်ဂွံတိုန်သွဝ်၊ ဟိုတ်ဇွာပြာ်လဝ် ဂွံဓဝ်ဗၠးချိုတ်၊ ညးၜါဂှ်ပြဲ လသာဒဲအိုတ်၊ ဟိုတ်ဝါသနာ တမၠာဂၠိုၚ်ဂိုတ်၊ ကေၚ်ဂွံပတုဲလဝ် ဓဝ်သူစရိုတ်၊ မသောတချိုတ် အိုတ်ဇိဝိတာ၊ ဒှ်ဣသိဟေၚ် လမုဟ်သေၚ်ဟာ၊ နာဲပဏ္ဍိတ ဘဝတမၠာ၊ ကၠုၚ်ဒှ်ဗြရတ် သၟတ်ဨကန္တာ၊ . . .

ကၠုၚ်စိုပ်ဇရေၚ် ဣသိသေၚ်ဟာ၊ ကၠာတေံမွဲတဲ ဟိုတ်ဒှ်လဲဇွာ၊ ဣသိညာတ်ပြဟ် က္တဵုဒှ်မေတ္တာ၊ ဘဴလမုဟ်ဟေၚ် လှာဲလိက်သေၚ်ဟာ၊ ဣသိဂေၚၚ် ဂေၚ်အရှာံဘာ၊ ရပ်ဂွံကမှ် တုဲဂၠဲါတွံအာ၊ ထောံမတ်ရံၚ်ကၠာ ညာတ်အဿာဂ္ညိ၊ လိက်ကွက်ကံချေံ ညာတ်ဒးတၟေၚ်စိ၊ လုပ်သှ်ရံၚ်ပၠန် လိက်နန္ဒာမိ၊ ကဵုပလံၚ်ဏာ ပုတ္တာယက္ခိ၊ ဗစိုပ်ကောန်ပ္ညဳ ဏၚ်ကၚ်ရဳညိ၊ စိုပ်ရဗတံ ပ္ဍဲဂၠံနန်လွိ၊ စဗတံကွေံ ပကဵုသှ်ေညိ၊ စိုပ်ရတၚဲ ကောန်ပ္ဍဲစိုတ်မိ၊ စသီုဇုတ်ကၞာတ် ပကဵုညာတ်ညိ၊ သီုချေံဍေံမွဲ စဖဲကောန်မိ၊ ဒီုဗတံဂှ် ပကဵုဒှ်ညိ၊ ညံၚ်ကဵုအိုတ်စိ စညိကောန်အဲ၊ သာ်ဝွံဗစန် ဂကန်မိပြဲ၊ စညိကောန်အဲ မွဲပကဵုဗၠး၊ သာ်ဝွံဍေံဂး ပ္ဍဲဂၠးသၠတာ၊ . . .

ရသိဗှ်ကၠာ ပ္ဍဲသၠတာအဴ၊ က္တဵုဒှ်မေတ္တာ ကရုဏာဇဴ၊ လိက်တရေံဂှ် ကၠဟ်ထောံဆဴဆဴ၊ လိက်တမိအဴ ထဴကှ်ေစုတ်ရ၊ သာ်ဝွံလိက်ခုတ် အဲပ္တီပုတ္တ၊ အဲသဳနန္ဒာ မဒုၚ်နာမ၊ ဒှ်မိနာဲရ နာမအနဳ၊ ပ္တီကောန်ဗြဴအဲ ပ္ဍဲနန်ကျာ်သြဳ၊ ဒုၚ်ယမုက္ဍၚ် ဣဏၚ်ကၚ်ရဳ၊ ***စိုပ်ကုံပရေၚ် မိဒးပြေၚ်ဖျဳ၊ ဍောတ်ဗၠာဲဗြရတ် ကၞတ်ကျာ်သြဳ၊ တၞောဝ်ရာဇာဝၚ် မိပြၚ်နၚ်ပ္ညဳ၊ ကဵုကၠုၚ်စိုပ်ကောန် ပ္ဍဲနန်ကျာ်သြဳ၊ ဍေံစိုပ်တၚဲ ဗွဲမဍိုန်ဒ္ၚဳ၊ ဝါၚ်ဒုၚ်တလုၚ် အမာတ်ဍုၚ်ဇဳ၊ မိထပ်နၚ်တဲ ကောန်ပြဲကျာ်သြဳ၊ ပဗ္ဒေက်ဖျဝ်ညိ မိကၠေံစိုတ်လွဳ၊ ဍေံစိုပ်ဗတံ ပ္ဍဲဂၠံကျာ်သြဳ၊ မိလွဳပရာ မွဲသၞာဒၞဳ၊ မိကၠေံစိုတ်လွဳ ကျာ်သြဳနန်လွိ၊ ကဵုပိုၚ်နန်ဒြၚ် ပ္ကၚ်ရၚ်ဖဴမိ၊ တြုံနွံဣဓိ မိတုပ်စိုတ်လောန်၊ ပြၚ်နၚ်ကဵုကောန် အသဝ်နန်ဗြဴ၊ တိုၚ်ဂလာန်ယာဲ မိပပဲါဒဴ၊ မိဂိုၚ်သြဟ်ပ္တဴ တြုံသ္ဍဴဘုမ္မိ၊ တိုၚ်ဂကန်မိ ဂိုၚ်လဝ်ညိကောန်၊ သာ်ဝွံလိက်ဒွက် အက္ခရဗျန်၊ ဣသိတုန်ပၠန် ခဏံကၠောန်ကဵု၊ ကွက်စုတ်ကံသၟတ် ချေံရတ်မ္ၚဵု၊ ကွက်စုတ်တုဲအဵု ဣသိက္တဵုစဴ၊ သန်ထာန်ဘာအဴ ပၠန်စဴအာတုန်၊၊

***ပြဝံက်မဝေါဟာရဂမၠိုၚ်
မဝေါဟာရ	ပြဝံက်အဓိပ္ပဲါ
ကုံပရေၚ်	(နာံဝိသှ်ေ) မလိုက်ကၠုၚ်အဝဲမစှ်ေဒၞဲါဝဲါ၊၊ (adj) marriageable
ကုံပရေၚ်	(ကြိယာ) စှ်ေဒၞဲါဝဲါဂွံ၊ စိုပ်အခိၚ်မစှ်ေဒၞဲါဝဲါ၊ လိုက်ကၠုၚ်အဝဲမစှ်ေဒၞဲါဝဲါ၊ စိုပ်အဝဲသၞက်ကရောဲ၊ စိုပ်အဝဲပရေၚ်အိန်ထံၚ်၊ စိုပ်ကၠုၚ်အဝဲမကေတ်တြုံ-ဗြဴ၊၊ (v) to be marriageable.
ကုံပရေၚ်= ကုံပြေၚ်၊ ကုံဗြေၚ် ရဴသာ်ဝွံ အခိုက်မချူ တၞဟ်ခြာတဴလေဝ် နွံကီုရ၊၊ အဓိပဲါတုပ် ဟွံတၟေၚ်၊ ဗၞတ်မချူဟေၚ် တၟေၚ်ညိရ၊၊
ဇူ=(အကမ္မကကြိယာ)၊ ဗျူ=(သကမ္မကကြိယ)၊ ဇၞူ=(နာံ)
ဍောၚ်=(အကမ္မကကြိယာ)၊ လမောၚ်၊ လၟောၚ်=(နာံ)၊၊
တန်=(အကမ္မကကြိယာ)၊ ပတန်=(သကမ္မကကြိယာ)၊၊ မကြိယာ - တန် -ဝွံ နွံအဓိပ္ပဲါမတုပ်သၟဟ်ကဵုမကြိယာ - တန်ကြန်၊ တေဝ်ကြေဝ်၊၊ ဟွံတုပ်သၟဟ်ကဵုမကြိယာ - တန်တဴ၊၊
ဇိုၚ်	(နာံ) ဇိုၚ်မဒှ်အဝဲဇကု၊၊
ဇိုၚ်	(ဝေါဟာမည်ခေတ်လၟုဟ် ကော်စ - ၀ိဘတ်၊ ဝေါဟာသေံ ဍေံတံ ကော်စ - ပုဗ္ဗပဒ ပိုဒ်ဂတ၊၊ ဝေါဟာအေၚ်ကလိတ် ဍေံတံ ကော်စ - Preposition ပိုဒ်တဴဂတ) ဇိုၚ်ကၟာ၊ ဇိုၚ်သြၚ်၊ ဇိုၚ်ဍုၚ်၊ ဇိုၚ်ဒဵု၊၊ ပြယာဲဝေါဟာရမတုပ်သၟဟ်ကဵုဍေံဂှ် ဇရေၚ်၊ ဗဒဲါ၊ ကရပ်၊ ညန်၊ ဆိုက်၊၊

ဗြရတ်ကဵုချေံကလာၚ် သတိက်ဗတံပ္ဍဲဂြိုပ်ဇမၞော်

သ္တိက်ဗတံဗြရတ်ကဵုချေံ ပ္ဍဲဂြိုပ်ဇမၞော်

ပ္ဍဲတံဆုအဵု ချေံကဵုဗညာ၊ ယွံကောချေံရတ် ဂၠဲါကၟတ်လှာ၊ ဂၠဲါစကၟတ် ပထတ်ကာယျဒွါ၊ ဟဇ္ဇနဲကၠာ ကောအာဂၠဲါၚဳ၊ အာရချေံရတ် ကောသၟတ်ပလွဳ၊ ဂၠဲါစချောဲရ ပထတ်ကာယျဇဳ၊ စဖဲတုဲပ္ညဳ ချေံကျာ်သြဳဗၠာဲ၊ ဒၟံၚ်ဒၞဲါ၀ွံဟေၚ် တၟေၚ်ပအာဂၠဲါ၊ ဂေတ်မံၚ်ဇိုၚ်လှာ ကြာလစဆာဲ၊ အဏံဗြရတ် ဗောဓိသတ်ဗၠာဲ၊ တ္ၚဲသဝ်စှ်ေဆာဲ ဒလာဲက္ဍိုပ်ဒဵု၊ ဗၠန်ထောံတ္ကံကြေၚ် ဇက်ဗၠေၚ်တသဵု၊ ဒရေပ်ကွဳရတ် ချေံအဿတဵု၊ ထဍဟ်လေံသၟေတ် စက်ဂေတ်သဓဵု၊ သိန္ဓဴတဆှ် ပရှ်ဇိုၚ်အဵု၊ ကၠောံပျးအမ္ဗာ စက်ၜါဗြုကြဵု၊ ထောံလဝ်တ္ကံကြေၚ် ကလေၚ်က္ဍိုပ်ဒဵု၊ စက်တ္ၚဲဍာဲဂဵု ဗၠန်ဒဵုသိန္န၊ လျးသၟီစနြ္ဒာ ဍိုန်အာသ္ၚိတ်ဇြ၊ ဂဍာ်ပဝ်စဴ ကွဴသီုကဝှ၊ မှတ်ဒၞဲါဓနီ ဟွံတီနန္တ၊ ဒိုၚ်ပံက်ပဝ်ဂၠေဲါ မှတ်ခပေဲါဂျ၊ အကၠဟ်အဘဴ စဴတိတ်သ္ၚိဇြ၊ လနေၚ်ထောံဇွောံ ကမံထောံက၊ ပဝ်ပ္ၚောံဟေၚ် ဇရေၚ်ရုက္ခ၊ တေဝ်တောတ်ဇိုၚ်ကွိုၚ် သ္တိက်ဇိုၚ်ပ္တဴသ္ဒ၊ ဇၚ်မှံၚ်သမုၚ် ကၠုၚ်သီုမသ၊ ပဝ်ပ္ၚောံဂၠေဲါ ဒက်ခပေဲါသၠ၊ ဒမြီုရုက္ခ ဍုန်ဂြကြဵုဇာ၊ အလိၚ်ကလၚ် ဇိုၚ်သြၚ်အောပ်မာ၊ ပ္ဍဲရာပ်ပ္ဍဲဗိုၚ် ဂၠိုၚ်ကဵုပြဝါ၊ သေက်ဇဵုကြံကြ ၜါဆမတာ၊ ကရေဲရမျှာၚ် ကဵုပါၚ်ဟောဒြာ၊ ပ္ဍဲဗိုၚ်ကြဵုဇာ ကြာတၞံကလိ၊ လျးတ္ၚဲလေဝ်အိုတ် ပၠိုတ်ဒတုံတိ၊ မၚ်ဂၠန်တလုဲ လဗုဲလှိၚ်ထိ၊ လပေါဝ်ခဍောပ် သၠဂြောပ်ပသ္ၚိ၊ ဓိတာန်ကလိ သြိုၚ်သ္ၚိဇိုၚ်လှာ၊ သီုစုံပြဝါ ဇိုၚ်လှာနာဒဳ၊ သ္တိက်သၠခဍောပ် ဂြောပ်ပကမှဳ၊ ပ္ကဴပြာၚ်ဍောၚ်ညဳ ဟွံကသဳဇကု၊ သြိုဟ်သြေၚ်သ္တိက်လှိၚ် ဟွံမိၚ်ဗရု၊ သြိုၚ်နန်သမၠုၚ် ဒုၚ်ကျာတူဆု၊ လှိၚ်ထာန်လ္ၚု တူဆုတိုန်ဇူ၊ တလုဲမိန်ကောန် ဒကုဲပၠန်တဆူ၊ ကောန်ကောံဒၟံၚ်ရေၚ် သၠဟေၚ်ဂြောပ်ဖူ၊ မိယာန်ထဝ်အူ တူကၞတ်ဆု၊ ကရၚ်နွံယၟု ဒက်မြုဇိုၚ်ဂၠံၚ်၊ ထကုဲဇိုၚ်သြၚ် သၠဂြောပ်အၚ်မံၚ်၊ လံဂွခမှက် လီၜက်လှိၚ်ခြံၚ်၊ တက်ဆောပ္ဍဲလှာ ပတ်ဒၟသ္ကာမံၚ်၊ တက်ဆောပ္ဍဲဂၠံၚ် ဒၟံၚ်တဴဟွံခြာ၊ စာၚ်တိုန်ဓနီ ဂြဴပတီအခါ၊ မြာ်ဍုန်တူဆု နန်မြုဟေမာ၊ သှ်ဒက်ဂၠိုက်ဂၠဲါ ပြယျာဲဂါထာ၊ ကလော်ကဵုပါၚ် ရမျှာၚ်ဟောဒြာ၊ ရဲဂြိုပ်ဂၠဲါဇြောတ် ဇိုၚ်မနုဿာ၊ တလကွာန်ပံက် ခြပ်လွံက်စှ်ၜါ၊ ကောံလုပ်ဂြၚ်ဍာဲ ဂၠဲါဇာပ်ဓုမာ၊ နွံကဵုရှ်သာ ပအဟာဂၞဴ၊ ဍိုက်္ၚှာန်ဝါတး တၟးညံၚ်သ္ဍဴ၊ ကိုတ်အကာသ ပၠလျးဂဵုတဴ၊ ဒေဝဒရေပ် ပၞာၚ်ဒြေပ်ညံၚ်သ္ဍဴ၊ ဒြေပ်ညံၚ်လလဳ ဖျဳဖျဳဖျဴဖျဴ၊ ဗၞဲက္ဍိုပ်သြဴ ပ္ဍေန်သ္ဍဴစဳပျး၊ ကြေဟ်ဇက်ယာယဳ ပထဝဳပြး၊ တ္ၚဲယးညာတ်ဍာန် ဂၠံၚ်ထာန်လဗး၊ ဂၠဲါစအဟာ ဇက်အာသၞး၊ ပေၚ်လုံဍာန်ပြး သဏးဂြိုပ်ယာန်၊ ကၠဗြန်ကၠသၠာ ဂၠဲါအဟာကြာန်၊ ဂၠဲါစအဟာ ၜါမွဲဆောဟာန်၊ ကၠဇၞော်သဓဵု ဗြုကြဵုဒေါ၀်ဍာန်၊ ဗၜဵုလဇ္ဇဳ ဂၠဲါသ္ၚဳဇိုၚ်ကွာန်၊ ဂၠဲါရပ်စစာၚ် ဒွါန်တိုန်ကၟဳ၊ . . .

***ဂိတုပၠလျး ပျးမတ်ဗစဳ၊ နက်သတ်တွာ်ဂၠေဲါ အမှဲဝိတှဳ၊ ဗိုၚ်သၟီစန္ဒြာ ဖျာဖျာဖျဳဖျဳ၊ တူဍာန်ဝိတှဳ ဗစဳခဏ၊ တေံရာသဳမိဟ် သၞေဟ်ပထမ၊ ရုပ်ဗၜေံထဝ် ဒြၚ်စဝ်ဓဂြ၊ တေံရာသဳဗြိုဟ် ဒိုဟ်အကာသ၊ ရုပ်ဂၠဴမူလ ဥဿဘထဝ်၊ တေံပ္ဍဲမေထုန် ရာသဳပ္ဍုန်လဝ်၊ ရုပ်ဗြဴဒမၠိ သီုသန္ဓိဂဝ်၊ တေံပ္ဍဲကြကတ် နက်သတ်နူကဝ်၊ ရုပ်ဂတာံထဝ် ဒေါဝ်သာဂရ၊ တေံရာသဳသိၚ် ရုပ်သၟီသဳဟ၊ တေတေံမွဲပၠန် ရာသဳကန်ရ၊ ရုပ်ကညာဏ ခၠၚ်ခဏတဴ၊ တေံရာသဳတူ ရုပ်ကြာဇူပ္ကဴ၊ တေံပ္ဍဲဗိစ္ဆာ ရာသဳဂ္ညိဂၠဴ၊ ပ္တုပ်ရုပ်အယဴ ခၠၚ်တဴခဏှ်၊ တေံပ္ဍဲဓနု ရာသဳဝွံဂှ်၊ ခၠၚ်ခဏပ္ဍီု တ္ၚဒြၚ်သီုလွဟ်၊ တေံပ္ဍဲမကဝ် ကမၚ်ဂဝ်မြဟ်၊ ဒွါကုံခါဂှ် ဒှ်နုၚ်ဂရဲ၊ တေံရာသဳမိန် သုဇ္ဇဒိန်တ္ၚဲ၊ ရုပ်ကကြၚ်ထဝ် ၜိၚ်သဝဝ်ဂၠေဲါ၊ သီုရုပ်စှ်ၜါ ဇၞော်သန်ၛာသြဲ၊ ပျးတဴမတ်ညး ရးဍုၚ်ကၠံမွဲ၊ ဇက်တဝဳဂၠေဲါ ရှောဲဒိုဟ်ပလိုတ်၊ . . .

မာတ်တ္ၚဲမဂၠု ဒမၠုဂၠိုၚ်ဂိုတ်၊ ပၞာန်သၟီဒမၠု သြံက်မြုဗိုၚ်သ္တိုတ်၊ အကြာဂြိုပ်ဇၞော် ဗော်သတ်အဟိုတ်၊ ပယျာံပန်သြိုတ် အိုတ်ဂွါံတဝဵု၊ သၟန်လျးဂဵု တွဵုဍာန်အမှဲ၊ လောန်ကၠုၚ်ပိယျာံ တိုၚ်ဂွါံမွဲတဲ၊ သၟန်လျးဂဵု တဝဵုအမှဲ၊ ဗၜေံကဵုပါၚ် စာၚ်လုပ်ခပေဲါ၊ ကောန်စာၚ်မွဲစွံ ဗက်ၝောံတွာ်ဂၠေဲါ၊ သၞံၚ်ရိဗလောဲ ကရောဲကဵုဇိုၚ်၊ သဳဟစဴပၠိုဟ် ဂိုဟ်တၟံထဝ်ဂွိုၚ်၊ မိကညာသ္တိက် စဵုဇနိက်ကျိုၚ်၊ သၠဒကေဝ်ဂွိုၚ် လုပ်ထိုၚ်ကၞပ်၊ အယဴလုပ်ခြပ် ကၞပ်လဒံသ္ၚဳ၊ တူတလိုဟ်ဗၞာ် ပၠံဇုက်ကျာ်သြဳ၊ ကၠမၚ်ဂဝ်သ္ဍောန် ယောန်အာဒ္ၚဳဒ္ၚဳ၊ နုၚ်ဂရဲဗၠေၚ် ဗြံဒစေၚ်နှဳ၊ ကကြၚ်စှ်ေအာ ဂၚ်ဂတာၜဳ၊ နက်သတ်ကၠံလ္ၚီ ဇက်ဂၠေဲါမြီဖဳ၊ တူကာသဍာန် သဗာန်ဝိတှဳ၊ အရှိုန်တိုန်ပျး အကးယာယဳ၊ နူတက်မွဲကၠာ စိုပ်ၜါဗဟဳ၊ လောန်တက်ၜါစိ တက်ပိအနဳ၊ လောန်တက်ပိပၠန် တက်ပန်ယာယဳ၊ အရှိုန်တိုန်ခၠၚ် ဗၜၚ်ဗစဳ၊ တူဍာန်ဝိတှဳ ဗစဳခဏ၊ . . .

သၟီသူရိယ တလကွဳထဝ်၊ သၟဟ်ကဵုက္ဍိုပ်ပၠန် တၟံယုဂ္ဂန္ဓဝ်၊ သီုစရိတ်ပန် သြန်သၠာ်သၠုဲထဝ်၊ ဗလးသံဒဝ် ဇက်စဝ်တိုန်ဟေၚ်၊ မှတ်ပျးတ္ကံကြေၚ် ထဍေၚ်အန္ဓာ၊ ဗၠန်သိန္နေရု ကၠောံဇံမုနာ၊ ထောံကၠေံအမ္ဗာ ဇက်အာတ္ကံကြေၚ်၊ စာၚ်ဗြဴဓဗက် ဗရုတက်သၞေၚ်၊ လိုက်ထောဝ်တေဝ်တောတ် ဂမ်အတ်ရိုဟ်ရေၚ်၊ ဖဝ်ရဂုတ်လ္ဗာၚ် စာၚ်ဍာ်ဂြဴဟေၚ်၊ ဍုန်ဆုတက်သၞေၚ် ဖျေၚ်ကံလတိုၚ်၊ ကွဴဗြုကြဵုဇာ ဇြုံဇၟာလုပ်သိုၚ်၊ ဒုတ်ဒူအဟုက် အောပ်ဂၠုက်ပ္ဍဲဗိုၚ်၊ သတြုဂဍာ် သအဵုသအာ်ပဝ်ကြိုၚ်၊ တတ္တောဟွံကော် လုပ်ခမှံက်ဂွိုၚ်၊ ဗော်ကွဴဂမၠိုၚ် လုပ်ဂွိုၚ်ဥမၚ်၊ သၞဂဍာ်အုံ လုပ်ဘုံလကၚ်၊ အောပ်ဗ္ဒးမံၚ်ကၞပ် ဂဒပ်မတ်ဂၚ်၊ ပ္ဍဲရာပ်လကၚ် ဍုန်ပၚ်မုက်ကၞပ်၊ ကမၠတ်အၚ်ဂဒပ် သမြပ်ဂမ်အတ်၊ ဂဍာ်ကွဴကီု ကော်ဟီုကောန်ဍောတ်၊ အက်အဴအက်အဴ ဂၠဲါစတဴသၟတ်၊ ဒၟံၚ်ကၠာကောန်ဍောတ် ဂွံသတ်ကလေၚ်၊ ကၠဗြုသဓဵု ခဵုကဵုဂၠဴပြေၚ်၊ ကၠသၠာကၠဗြန် ကော်ကောန်ဇရေၚ်၊ ကမံဂေတ်ဂဲါ ပဝ်ဂၠဲါကွိက်ဟေၚ်၊ သတ်တလသၞေၚ် ပဝ်ရေၚ်ဂြီုဂြီု၊ ဗရုသၞေၚ်ကီု ဗီုဟဝ်ကၠိုၚ်ဗြု၊ ကဝှပဝ်ကြၚ် မှတ်ဥမၚ်ဂၠု၊ လတူအမှဲ ပဝ်ဂၠေဲါရုရု၊ လျးခၠၚ်တသု သၟီသုရိယျ၊ . . .

ဗြရတ်ကုမ္မာ ပညာစဳခၠ၊ ထောံမတ်ညာတ်အာ နူအကာသ၊ နူတ္ၚဲပၠိုတ်ဗိုန် အရှိုန်တိုန်ပၠ၊ ဂွံတီကေတ်ဟေၚ် လၟေၚ်နာမ၊ ပ္ဍဲစိုတ်သ္ဇုၚ်ခၠၚ် ဗၜၚ်စိတ္တ၊ တ္ၚဲတိုန်တမး ပျးဇံမုန၊ ဂွံညာတ်ခိုဟ် ဒိုဟ်ကၠၚ်မူလ၊ ခၠၚ်စိုပ်လအိတ် ပ္ဍဲဂၠံစိတ္တ၊ ချိုန်ခဏဂှ် ပဒှ်ဒေသ၊ ချေံသိန္ဓဴဟေၚ် ကလေၚ်ကဵုမ၊ လုပ်ကၠုၚ်ကဵုနာဲ စရာဲရုပ္ပ၊ အဟာနာဍူ ပုၚ်မူစဏ၊ ဂိုၚ်ပပြဘိုက် ဆကြိုက်တန်ရ၊ သုၚ်ဍာ်ကြဴတဲ မွဲသက္ခဏ၊ တုဲဒးကာလ ကောန်ရာဇမၚ်၊ ဟီုကဵုချေံရတ် ဇြဟတ်ပြဲက္ဍၚ်၊ အာရအာရ က္ညညိကောမၚ်၊ က္ညရဒေံအဲ မွဲသတ္တပြၚ်၊ ယးဂတကိုပ် ဂွံစိုပ်နန်ဒြၚ်၊ ဂါံဍိုက်ချေံပြဲ သြဲတိုန်လၞၚ်၊ ကလာၚ်တိုန်အာ တူကာသဝၚ်၊၊ . . .

***ရုပ်ရာသဳစှ်ၜါ၊ The Zodiacal Signs
ရာသဳစှ်ၜါ	ရုပ်	ဂိတု	English	Latin
မိဟ်	ဗၜေံ	စဲ	Ram	Aries
ဗြိုဟ်	ဂၠဴဥဿဘ	ပသာ်	Bull	Taurus
မေထုန်	ဗြဴဂမၞဴ	ဇှ်ေ	Twins	Gemini
ကြကတ်	ဂတာံထဝ်	ဒဂိုန် (အသာတ်)	Crabs	Cancer
သိၚ်	ဇာဒိသိုၚ်	ခ္ဍဲသဳ (သဝဏ်)	Lion	Leo
ကန်	ဗြဴကညာ	ဘတ်	Virgin	Virgo
တူ	ကြာဇူ	၀ှ်	Scales	Libra
ဗိစ္ဆာ	အယဴ	ကထိုန် (ကထိုက်)	Scorpion	Scorpio
ဓနု	တ္ၚဒြၚ်	မြေက္ကသဵု	Archer	Sagittarius
မကဝ်	ကၠမၚ်ဂဝ်	ပုဟ်	He-goat	Capricorn
ကုံ	နုၚ်ဂရဲ	မာ်	Waterpot	Aquarius
မိန်	ကကြၚ်ထဝ်	ဖဝ်ရဂိုန်	Fishes	Pisces