ကောန်မန်အဲဒှ်	ကတ်ဗှ်ဝေါဟာ၊
နူလိက်သၠပတ်	ဗတ်မန်ဘာသာ၊
ဟွံသြုၚ်မွဲမ	တၟံအက္ခရာ၊
စမဳစဳစတ်	မတ်ဟွံလ္ၜဲကၠာ၊
ၜိုန်ပသာ်ဂှ်	စိုတ်ဒှ်သောသၞာ၊
ဝေါဟာလ္ၚဵုသွံ	ဂွံတီကေတ်မှာ၊
လ္ၚဵုဂှ်ပၠန်စိ	ညိဟွံတီကၠာ၊
သိက်ဒှ်ကုအဲ	ပ္ဍဲစိုတ်ဗစာ၊
ဗှ်လိက်မန်ကွေံ	နွံသၠေဟ်ပမာ၊
ဟိုတ်တၞံဍေံဂှ်	ဟွံဗှ်လ္ၚတ်အာ၊
မန်ဟွံလေပ်မန်	တန်ဒှ်အဲကၠာ၊
သာ်ဂှ်အဲချပ်	ဒဇပ်စိတ္တာ၊၊
ဝေါဟာပိုဲမန်	နွံဂၠိုၚ်သန်ကၠာ၊
ကဝိမန်အဵု	ဂဵုမြဟ်ပညာ၊
ညးတံချူကှ်ေ	ဟွံသှ်ေဝါစာ၊
ဗှ်က္ဍၚ်တီက္ဍၚ်	လောန်က္ဍၚ်ရသာ၊
တဳဇှ်ကွတ်တဲ	နဲကွိတမၠာ၊
ဗှ်တုဲဗှ်ပၠန်	ဟွံခၠန်ခြာတုန်၊၊
ဗှ်ဝါတ်ကွေံရ	ကာပ်ဗျတမၠာ၊
ဗှ်ဟွံစှ်ေဟေၚ်	ဖျေၚ်မုက္ခဝါ၊
လိက်မန်စိစောန်	နဲဇၟန်ပ္ကဴကၠာ၊
အဇမဒှ်	သက်ကုရှ်သာ၊
ဟိုတ်ဂှ်သေၚ်ဟာ	ဝေါဟာပိုဲမန်၊
ညးမန်တံရ	ပမွဲသွတ်သန်၊
လိက်ညးဗှ်ခိုဟ်	တီကၠိုဟ်ဟွံခၠန်၊
ခါလိက်ဇကု	ဗြုဂးဝါတ်သန်၊၊
ညးလ္ၚဵုဂးတဴ	မရဴဝွံရ၊
ဝေါဟာလ္ၚဵုသ္တိုတ်	ခေတ်အိုတ်အာတြ၊
ချူဗတ်မန်ဂး	ညးဟွံတီရ၊
ယဝ်သ္ဂောံချူဏာ	ဘာသာညးရ၊
မန်ဂမၠိုၚ်အဵု	တီတွဵုကာလ၊
သမ္ၚာတ်ကွေံရ	မနောဒွါအဲ၊
သိက်လဵုဒှ်ပၠန်	မန်လ္ၚဵုမွဲရဲ၊၊
လိက်ကၞပ်မပြဲ	နဲမန်တမၠာ၊
ဟွံပံက်ဟွံဗှ်	ဂှ်ရောၚ်ခိုဟ်ဟာ၊
ချူစွံလဝ်ရ	ပ္ဍဲသၠရိုတ်တာ၊
ၜိုန်အဲဟွံကတ်	ဗတ်မန်ဝေါဟာ၊
လိက်မန်ဟွံကၠေံ	ပ္တေဟ်စဂွံဟာ၊၊
လိက်ညးဗှ်အီ	ခပ်သီဒၞဲါရာ၊
ဗှ်ကလိတ်ပါၚ်	ရမျာၚ်သာက္ဍာ၊
ခိုဟ်ကွေံထိုၚ်သး	ဂးပ္ဍဲစိုတ်ကၠာ၊
ခါဗှ်လိက်ရ	မညဘာသာ၊
လတာ်ဂၠဟ်ေၚက်	ယဝီုဂြေက်အာ၊
ဟွံကလိတ်ပၠန်	ပ္ဍဲသၟန်ပါၚ်ကၠာ၊
ဗှ်ဝါတ်ကွေံဏး	ဟးလိက်မညာ၊
ဟီုဗျိဍိတ်ဍိတ်	ပ္ဍဲစိတ္တဒွါ၊
သိက်လဵုဒှ်ရော	ကလောမန်ဟိုဲ၊၊

သၟီနန္ဒကိတ္တိ ဒုၚ်ဖျဴနၚ်မိသဳနန္ဒာ
လၟေၚ်ဒဒှ် တဝှ်စလာဲ၊ ကြီုဒဒှ်ရ ယက္ခဗြဴကၟာဲ၊ ပၠေၚ်ပ္တုပ်သက်သၟိဟ် ရုပ်မၞိဟ်ဂေါဝ်ဆာဲ၊ ပ္ဍဲဇမ္မုဒိတ် လအိတ်ကဵုဂၠဲါ၊ ကဵုတုပ်ရုပ်ညဳ ယက္ခဳဗြဴကၟာဲ၊ ကၠံဍုၚ်ကဵုဂၠဲါ ရုပ်စရာဲတ္ၚဲ၊ ကေတ်နၚ်ဂိုၚ်ပ္တုပ် ရုပ်ဟွံတုပ်မွဲ၊ ပဒတဴပြဲ ပ္ဍဲဇြဲသာခ၊ ဂဇံဒၟံၚ်သၠၚ် ဇိုၚ်သြၚ်လစ၊ ထာန်ပေါက္ခရ ဒေသကမာ၊ ကာလသၟိက်ဒှ် တဝှ်သံၚ်သာ၊ ပဒေသရး ပ္ဍဲဍုၚ်ဂးမာ၊ နန္ဒကိတ္တိ သိဒ္ဓိရာဇာ၊ ဂွံဗြဴထပှ် ဒှ်သြၚ်ကမာ၊ ရေၚ်ကာန်သၟဟ်န် တန်မွဲသၞာ၊ ဃောမစသိုၚ် ကၟိန်က္ဍိုၚ်သွာ၊ စိုပ်ဃောသန်ဇျှာ ကာလစဏု၊ ဂဟောဂွါံရ ဂိမှဥတု၊ ဂမ္တဴလောန်တဲ ပ္ဍဲတ္ကံဇံမု၊ ဗြဴထပှ်ခိုဟ် မိက်လၜိုဟ်ဇကု၊ ကော်ဗြဴဣလု ဍိက်ဇကုဂှ်၊ ကဵုတုက်ဍာ်ကၠာ ကမာဒကှ်၊ ဗြဴဣလုဂှ် လေၚ်နုၚ်ကၠဟ်ထဝ်၊ ဇကုမွဲကၠာ တွာ်အာဆတ္တဝ်၊ ဃောသန်ဇျှာဟေၚ် ပယာံစေၚ်သဝ်၊ ဣလုဗြဴသွဝ် တွာ်စဝ်စှ်ေအာ၊ တွာ်စှ်ေရိုၚ်ရိုၚ် စိုပ်ဇိုၚ်ကမာ၊ ဟောဝ်နုၚ်ဍာ်ဆက် ညာတ်ရုပ်ယက္ခာ၊ သၟဝ်ဍာ်တေံဟေၚ် ဂွံညာတ်သေၚ်ဟာ၊ ဣလုအိက်အာ် စိုတ်သၟာ်ဣိဿာ၊ သလှ်ေရုပ်ဍေံ စှ်ေပ္ဍဲကၟာ၊ ရုပ်ညံၚ်ကျာ်သၠာ် ဒးတုက်ဍာ်ကၠာ၊ ဇီုထောံနုၚ်ဟေၚ် ကလေၚ်စဴအာ၊ နူမွဲဝါပၠန် စိုပ်ပိပန်ဝါ၊ ဇီုနုၚ်ဇီုဍေၚ် တရေၚ်စဴအာ၊ ဂွံထိုၚ်သၞာံအဴ ကြဴဝွံမွဲဝါ၊ ရုပ်သာ်အဲကၠာ ဂေါ၀်ဂါက္ဍၚ်ပြ၊ ကဵုထိုၚ်သၞာံအဵု ကဵုတုက်ဍာ်ရ၊ ဟွံကြိုက်ကဵုအဲ တ္ၚဲဝွံမူလ၊ ဟွံထေက်ကဵုအဲ ကော်တံၚ်လှောဲရ၊ အဵုဣတံၚ်လှောဲ ဗှ်ေကၠုၚ်ဂြဲစ၊ ဗြဴဣလုပြဲ ဣတံၚ်လှောဲပၠ၊ ညးဂြဲအဲဂြဲ ပ္ဍဲသြၚ်လစ၊ သဳနန္ဒာရ ယက္ခဗြဴကၟာဲ၊ ဍေံဂွံညာတ်အဴ ဂြိုၚ်တဴဟးဟာဲ၊ ဗြဴဣလုဆံၚ် လ္ၚာ်ရံၚ်နာဲ၊ ဂွံညာတ်ရ ကာလဂှ်ဆာဲ၊ ရုပ်ဂေါဝ်လောန်တဲ အဝဲစရာဲ၊ နူတိဒဵုသွဝ် ကဵုအာဒ္ၚေါဝ်ဂၠဲါ၊ ညံၚ်ကဵုရုပ်နာဲ ဂၠဲါဟွံတိတ်ရ၊ ဣလုဗြဴလွုဲ သုဲစဴထာဏ၊ တွာ်စဴတရေၚ် ဗိုတ်ထောံဍေၚ်ဒြ၊ ပြဟ်စဴစိုပ်ရ ဒေသနန်ထဝ်၊ ပ္တီသၟီမဟာ နာဲသာသၟီဓဝ်၊ ယွံတလတိ ဣဓိဇၞော်မောဝ်၊ ဍိက်ဗြဴတိတ်အာ ဇိုၚ်ကမာထဝ်၊ ဂွံညာတ်ကေတ်သၟတ် ဗြဴရတ်အသဝ်၊ ရုပ်သာ်ဂေါဝ်ပၠေဝ် ညံၚ်အဆေဝ်သွဝ်၊ စရာဲသ္ဇက်ပ္တုပ် ရုပ်ကောန်ခနှောဝ်၊ ထိုက်ကဵုပ္ကၚ်ရၚ် နန်ဗတၚ်ထဝ်၊ ဍိက်ဗြဴပ္တီလဝ် နာဲနန်ထဝ်ရောၚ်၊၊ ၊၊

ခဏဂွံမိၚ် သၟီနာဲနန်ဂၠေါၚ်၊ ပ္ဍဲစိုတ်သလှောၚ် အသောၚ်ပမာ၊ ညံၚ်စက္ကဝဝ် ဂေၚ်တ္ကံသၟဝ်ကျာ၊ တြဳဇှ်ဂုန်ရတ် စက္ကရတ္တာ၊ ဂေၚၚ်လန်အာ ဇၟာပ်ရာဒေသ၊ တုဲအာစိုပ်ခုတ် တ္ကံဥတ္တရ၊ ဂွံနၚ်ဗြဴရတ် သၟတ်ဨကန္တ၊ ရေၚ်ကာန်လုံလ ခယသာဓာ၊ နဲဂှ်ဂိုၚ်ပ္တုပ် ဗီုဥပ္ပမာ၊ မိၚ်ဣလုဟီု သီုကရုတ်ဏာ၊ စရိုတ်သၟီဓဝ် ဟဳဂပဝ်အာ၊ ချိုန်ခဏဂှ် ဗဒှ်သာ်လွာ၊ ကော်အမာတ်စာ သေဏာပတိ၊ မကမွဲလ္ၚီ ဗဵုပၞာန်မြီဂၠိ၊ မၞးတိတ်ဒုၚ်ညိ မိသုက္ခမာ၊ အခေၚ်ပၞာန်ပန် စဳရေၚ်ဖန်ဏာ၊ အမာတ်တိက္ခ တလပညာ၊ ယဵုအသံနာဲ သၟီဗၠာဲဗညာ၊ ပၞာန်ပန်ပြကာ ညံၚ်လအာသွဝ်၊ တိုက်ကွဳချေံစိၚ် ဂမြိၚ်တမ္ညဝ်၊ အလာံဍုတ်မြာ် ယာတ်ဗြေဝ်သာ်ထဝ်၊ ဗၞုဟ်ဒေါန်ဇမၠိၚ် လွိၚ်ဗဝ်သအဝ်၊ သေဏာတ်ဒေါန်အံၚ် တ္ၚဂဒံၚ်ထဝ်၊ ဇၞော်သန်အံသဝ် သအဳဗဝ်တၞၚ်၊ သရာဲဒြိုဟ်စာ တဲၜါရပ်သ္ဇၚ်၊ အေန်ဇာလဒု သဏးတုရၚ်၊ ဂြိၚ်ဂြိၚ်ဂြံဂြံ အသံၜဳဂၚ်၊ ပၞာန်ပန်ပြကာ ဇက်အာခမၞၚ်၊ ဖံစိန်ဖံဟဝ် ဖံထဝ်ခမြၚ်၊ ဖံကၠေဝ်ဖံမန် ဗြုဇရန်က္ဍၚ်၊ ဖံကြေပ်ဇတိုၚ် မန်ဒိုၚ်ခမၞၚ်၊ ဖံဒုတြဘိ တိတမ္ညတ်က္ဍၚ်၊ ခရာလဒု သြေဲကၞုသၚ်၊ သြဳသြဳဂြိၚ်ဂြိၚ် ဒဗိုန်ပိၚ်မၚ်၊ ဂၠိုၚ်ကဵုအဆၚ် အခြၚ်နာနာ၊ ပ္ၚောံဥဒျာန် ထာန်ပဉ္စမာ၊ မြီမြီညှာညှာ ဇက်အာလျလျ၊ ပ္ၚောံဥဒျာန် သန်ထာန်လစ၊ ပြဟ်အာစိုပ်ရ ကာလဂှ်ကၠာ၊ ဗဵုပၞာန်တဝဳ သၟဟ်န်ညဳသာ၊ ဗ္ဒောံဗဵုပၞာန် ထာန်ပဥ္စမာ၊ သအဳဂၠက်တဴကၠာ ကာလဂှ်တုန်၊၊

ပ္ဍဲတ္ၚဲဝွံ သၟိက်ဂွံပသောၚ်ကလး မဂလာန်ဝေါဟာရမည်တုဲ လၟေၚ်ပုံဗြရတ်ဣဏၚ်ကၚ်ရဳဂှ် ဟွံချူထၜးဏီရ၊၊ စပ်ကဵုမဂလာန် ဝေါဟာရမည် ( ဗတိုက် ) တုဲ ဇၞတ်အဲမတီဂှ် အဲ ချူကလးဏာညိ၊၊ မဂလာန်ဝွံ အ္စာကၞေဟ် အ္စာကသူလိက်ပိုဲမည် ခေတ်လၟုဟ်ဏံ မကှ်ေမချူတဴ ပ္ဍဲကဵုလိက်ကၞပ် လိက်မဂ္ဂဇြေန် လိက်ပရိုၚ် ပ္ဍဲမပ္တံ Website, Blogger, တံဂှ်တံဂှ် ဂွံဆဵုညာတ်ကေတ်ကီုရ၊၊ ပ္ဍဲကဵုဝါကျမမိက်သ္ဂးအဓိပ္ပဲါ(ဗတိုက်)ဟွံသေၚ်ကီုလေဝ် မဂလာန်(ဗတိုက်)ဝွံ မွဲမဓဝ်ဟေၚ် ချူဒၟံၚ်အိုတ်ရ၊၊ ပၟာတုန်၊

ပ္ဍဲရးမန်တေံ ဒမၠဗၟာတံ ဗတိုက်ဒၟံၚ်ကွာန်မန် အရိုဟ်တ္ၚဲ၊၊

၀ါကျသာ်ဂှ် အ္စာလိက်ပိုဲမည်တံခေတ်လၟုဟ် ချူရောၚ်ဂှ် ဒှ်ဗိုန်၊၊

မကြိယာမၞုံရမျာၚ်စမုၚ်ကဵုမကြိယာ(ဗတိုက်)ဂှ် နွံတဴမွဲမ၊၊ ကြိယာဂှ် ( ဂတာ် ) မဒှ်တဴ၊၊ မကြိယာ(ဂတာ်)၀ွံ လဆောဝ်ညးချူကှ်ေ (သတာ်၊ ဗတာ်)ကီု၊၊ အဓိပ္ပဲါဍေံဂှ်

ဂတာ်ပၠံၚ်ၜးကေတ် ဗွဲအနိၚ်၊ ကေတ်ဏာအနိၚ်အထက် သၟိက်ဂး၊၊

ဟိုတ်ဂှ်ရ ၀ါကျလတူဂှ် ကြိုက်ကဵုသ္ဒးချူတဴသာ်ဝွံ၊

ပ္ဍဲရးမန်တေံ ဒမၠဗၟာတံ ဂတာ်ဒၟံၚ်ကွာန်မန် အရိုဟ်တ္ၚဲ၊၊

သာ်ဂှ် ယဝ်သချူမ္ဂး ခိုဟ်သန်၊ အဓိပ္ပဲါမကြိယာမမိက်သ္ဂးလေဝ် တၞဟ်ခြာ၊ ဟွံတ္ၜန်တ္ၜောဲတဴရ၊၊ မကြိယာညံၚ်သ္ဂောံတၞဟ်ခြာတဴမဖှ်သာ်ဂှ် အဲ ဖန်ဗဒှ်ကေတ်ရ ဟွံသေၚ်၊၊ ပ္ဍဲလိက်သၠပတ် လိက်ကၞပ် အ္စာလိက်ပိုဲမည်တမၠာတံ မပ္တံကျာ်ဇၞော်အ္စာအသွောံ မချူလဝ်တံဂှ်တံဂှ် ဗှ်လ္ၚတ်ရံၚ်မ္ဂး သ္ဂောံတီကေတ်ဟေၚ်ရ၊၊

ကြိယာၜါမဝွံ ၜတ်ကၞာတ်စမ်ညိ၊၊ ဒဒှ်မၞုံအဓိပ္ပဲါဟွံတုပ်ရေၚ်သ္ကံဂှ် မဂွံတီကေတ်ရောၚ်၊၊

(၁) ဂတာ် [ သတာ် ၊ ဗတာ် ]

(၂) ဗတိုက်

ပ္ဍဲကြိယာၜါသာ်ဂှ် ကြိယာမုက်ဂၞန် (၁) ဂှ် နွံပြဝံက်သာ်ဝွံ၊၊ ပၠံၚ်ၜးကေတ် ဗွဲအနိၚ်၊ ကေတ်ဏာအနိၚ်အထက်၊ ၜိုတ်ဂၠံက်ကေတ်ဏာအနိၚ် သီုတၠဒြပ်ဟွံတီ၊၊
၀ါကျတုန်၊

ဒမၠ ဂတာ်စ၊ ( ဒမၠ ဒလစဒြပ်ညး )၊၊

ထၜးကဵုအသက်သဳမွဲရ၊၊ ပ္ဍဲကဵုလိက်ပုံသာရဝါန်တေံ မိကပဴဂဴကဵုမိကပဴထံၚ် ညးၜါၝဲကဵုဒေံ ၜိၚ်ဝေၚ်ဒၟံၚ်ဍာ်ၜဳတုဲ ကျာံသာရဝါန် ကၠုၚ်ကၠတ်ကေတ်ဏာမိကပဴဂဴ ညးမွဲသအာၚ်တံသီုဟဂွံတီကေတ်၊ ခါမတီကေတ်ဂှ်တုဲ ဗီုမိအံက်ကပဴဂဴ ကပဴထံၚ် မလရိုအ်ယာံကရေဝ်ကရောတ်ဂှ် အ္စာကဝိ ဇန်လဝ်ကဝိသာ်ဝွံ၊

၀ိပက်တမၠာ ကၠုၚ်ဒးဟာကောန်၊ သ္ဍးကၠေံနန်ထဝ် တ္ၚဲသဝ်သောန်သောန်၊ သြၚ်ဗတဳသြန် သၟန်ဂၚ်္ဂါ၊ ကောန်စှ်ေဝေၚ်ဍာ် ကျာံဂတာ်ဏာ၊ မိယာံပူဆာ လ္ၚာပ်လ္ၚာသန်ကောန်၊ အဵုဂဍောၚ်ယာဲ အဵုနာဲဂေါဝ်လောန်၊ တိုၚ်မိအိုတ်သ္ကန် ဂုဏ်ကောန်သော်က္ဍိုပ်၊ ရမတ်ညံၚ်ဗြဲ တူယဲဟိၚ်ဟိုပ်၊ ဍာ်ရမတ်ကြိုပ် ဟိၚ်ဟိုပ်သန်ကောန်၊၊

သအာၚ်နူဂှ်ပၠန်၊

လဆောဝ်ဒှ်ဗၠာဲ စရာဲဂေါဝ်ဂါ၊ သၟီယီုသတာ် တံၚ်သဘာ်ဏာ၊ လဆောဝ်ရေၚ်ကာန် မွဲဟာန်သမ္ဘာ၊ ယီုဟွံသ္ၚဳမွဲ ဒဇက်ဂြဲဏာ၊၊

ဇၟန်ကဝိမဖှ်သာ်ဂှ်သာ်ဂှ် နွံတဴဂၠိုၚ်ဂၠၚ်၊၊

ကြိယာမုက်ဂၞန် (၂) ဂှ် အဓိပ္ပဲါဍေံ တိတ်ဒှ်ၜါသာ်ပၠန်၊

(က) တဝ်စၞေဟ်၊ ဗတိုက်ပၞာန်၊ တ္ၚီုဗတိုက်ရေၚ်သ္ကံ၊

(ခ) ဆဝ်ပ္ၚုဟ်၊

ပ္ဍဲၜါသာ်ဂှ် (က)ဂှ် သာ်ဝွံ သ္ဒးဇန်ဝါကျ၊

သၟိၚ်ဗၟာအံၚ်ဇေယျ တသိုၚ်ကၠုၚ်ဗတိုက်ကေတ်ဍုၚ်မန်၊၊

ပၞာန်မန်ကဵုပၞာန်ဗၟာ တဝ်စၞေဟ်ဗတိုက်ဒၟံၚ်တၟာလံ၊ ကေတ်ဇၞးညးသ္ကံဟွံဂွံဏီ၊၊

မန်ပိုဲ ညံၚ်သ္ဂောံစၟိန်ပြမာန်ကၟိန်ဍုၚ်ဟံသာဝတဳပၠန်ဂှ် သ္ဒးတဝ်စၞေဟ် သ္ဒးဗတိုက်ပတိတ်ထောံသၞတံ နူကဵုတိဍာ်မန်ပိုဲ၊၊

(ခ)ဂှ် သာ်ဝွံ သ္ဒးဇန်ဝါကျ၊

အဲ ညာတ်ဒးရုပ်မိဂေါ၀်တ္ၜတ်သဴဒၟံၚ်တုဲ ဇြဟာန်ဗတိုက်စိုတ် ၜိုတ်ရပ်ကေတ်ကၞေဟ် ချူကှ်ေလိက်မွဲတၞး ဗစိုပ်ဏာမိဂွိုၚ်လဂ္ဂန်ရ၊၊

မာံထဝ်အး ညာတ်ခမဳသၚ်ဂမၠိုၚ်မဂေၚၚ်စဴပိဏ္ဍပါတ်၊ သဒ္ဓါဗတိုက်စိုတ်တုဲ လံၚ်ဏာပိဏ္ဍပါတ် ပတုဲသရၚ်ဓဝ်ကုသဵုရ၊၊

***ယွံတၠပညာလိက်ပတ်မည်ပိုဲဂမၠိုၚ် လဟီုအဲမဟီုပသောၚ်ကလးဏာကဵုအတိုၚ်လတူဂှ် ဗၠေတ်ကီု ဒွးကီု တော်ဆဂြၚ်တီကေတ်ရ၊၊

ဂွံမိၚ်ကေတ်ပရိုၚ်သၟတ်ဗြဴဝုတ်ထပှ် ဒှ်ဂၞကျာ်သၟီနန္ဒကိတ္တိတုဲ ကလော်ဗြဴမိသဳနန္ဒာ လ္ၚုၚ်လ္ၚသြေၚ်ဇှ်၊ ပၠေၚ်ဗဒှ်ရုပ်သၟတ်ဝုတ်ကညာတုဲ အာတန်ဒၟံၚ် ပ္ဍဲတၞံဇြဲလၟေၚ်ဒဒှ် တဝှ်လက်သန်၊ ဂၞကျာ်ထပှ် သီုမသၟဟ်သၟန်၊ ဂကောံသၟီဗၠာဲ နာဲညးက္ဍိုၚ်သြန်၊ ဝဳပက်ဗက်ဂြဲ ပ္ဍဲပစ္စုပ္ပန်၊ အကုသဵုကံ ခနှံလဝ်ပၠန်၊ ဝဳဝဲမသုန် ဗက်ကၠုၚ်တုန်ဆန်၊ ကံပြုပြေၚ်ပၠန် ဇၟာပ်ဇန်လိုက်ဗာ၊ ကဵုဒးပရိုက် ဒဒိုက်သနာ၊ ပါၚ်ကျာ်နာဲညး ဇမၞးပၞာန်မာ၊ ဂြၚ်တွံလဝ်ဟေၚ် ရောၚ်ဟသေၚ်ဟာ၊ ဟိုတ်ဂှ်မၞးတံ တမံလိုက်ဗာ၊ ပ္ဍဲဝဳဝဲတုန် မသုန်ပြကာ၊ မှတ်ဝေၚ်အိုတ်ကၠာ ပမှာသတိ၊ ဂွံဗၠးဝဳဝဲ ဗွဲကြဴဒမၠိ၊ သမ္တီအိုတ်ညိ ယုတ္တိဂါမ၊.....

ပိုဲဟီုထၜး ပျးဏာဂတ၊ တေံကလော်ဝဲ ပ္ဍဲဂြိုပ်ဟေမ၊ မိသဳနန္ဒာ ချပ်အာလ္ၚုၚ်လ္ၚ၊ ညးထပှ်သ္ကဲ ကဵုအဲမူလ၊ ဍေံတံကဵုအဲ ဒက်လဝ်ဝဲသၞ၊ ဍေံမိၚ်ပရိုၚ် ဂၠိုၚ်ကဵုဘောဂ၊ ဂွံဒှ်ဂၞကျာ် တူနန်သာ်မြ၊ သီုညးထပှ် သၟဟ်န်ခယျ၊ အဲသအာခၠေဝ်တုန် ဂုန်ဣပါပ၊ ဍေံပျဲလဝ်အဲ ဂျိက္တာန်ယဲသြ၊ အဲခၠေဝ်ဂုန်အဴ မိဗြဴဣတ၊ တုဲဍေံချပ်ရ မိယက္ခဗြဴ၊ တုဲဍေံဂကန် ကဵုမိကောန်ဂၞဴ၊ ယွံလေဝ်ကောန်ဍောတ် ထတ်သန်နုဘဴ၊ မိအာဗက်အဴ ဣဗြဴထပှ်၊ မိဏၚ်ကၚ်ရဳ ကျာ်သြဳဒိုဟ်စှ်၊ တုဲသၟာန်မိဟေၚ် လမေၚ်ဒဒှ်၊ မိအာတုဲအဵု ကလေၚ်ကဵုပြဟ်၊ မိပမံၚ်လံ ကောန်ဏံဗနှ်၊ ကလေၚ်ကဵုပြဟ် ကောန်ဒးဗှ်ဒွိၚ်၊ သဳနန္ဒာပၠန် ဂကန်လဝ်အိၚ်၊ ယွံသေဏာတံ မၞးတံပၚ်မှိၚ်၊ ကောန်ဗြဴအဲရ ဒ္ၚဳကဵုပသၟီ၊ ကဵုပိုၚ်နန်ကၠတ် သ္ၚိရတ်ဒြၚ်စိၚ်၊ ဒှ်ဨကရာတ် ပိုၚ်ပြာတ်နန်သွိၚ်၊ ပိုၚ်နန်ဇမၠိၚ် ဂွံဒှ်သၟီအဴ၊ ဒှ်ဨကဗြဴ ပိုၚ်တဴသေဏာ၊ အမာတ်ပန်စိ သ္တုံဇွိသေၚ်ဟာ၊ သီုအမာတ်ဒ္စါံ ဗိန္ဒောသ္ဍာံကာ၊ သရာဲဂံၚ်က္ဍၚ် ရပ်သ္ဇၚ်တဲၜါ၊ အပ္ဍဲမ္ၚးကီု သီုရုၚ်ဗစာ၊ ကောန်အဲဟီုဝေတ် ကဵုကေစ္စကၠာ၊ ယဝ်စးပါၚ်သ္ကဲ ပ္ကီုဘဲနာနာ၊ ပအပ်စုတ်တဲကၞာတ် ဗာဇ္ဇခါတ်ကၠာ၊ စးပါၚ်ကောန်သွံ ဗာ်ထောံပညှာ၊ မိၚ်ဟာသေဏာ သီုၜါသ္တုံဇွိ၊ သေဏာမိၚ်ကီု လဟီုနာဲစိ၊ ပဒွိၚ်ရအဴ ဗြဴတလတိ၊ လယိုၚ်ပိုဲရ လပဒွိၚ်ညိ၊ ပိုဲဍိက်မၚ်မွဲ ရိုဟ်တ္ၚဲဒမၠိ၊ လပဒွိၚ်ညိ ယွံမိကျာ်သြဳ၊ ပိုဲမၚ်မွဲက္ဍၚ် ဣဏၚ်ကၚ်ရဳ၊ တဝဳဗဝိုၚ် ပိုဲဍိက်ဗိုၚ်သအဳ၊ ဣဏၚ်ကၚ်ရဳ ကျာ်သြဳနန်လွိ၊ လပဒွိၚ်ညိ မိသဳနန္ဒာ၊ ပအပ်ဍုၚ်တုဲကၠာ ကာလဂှ်ရ၊ တုဲမိကျိုၚ်ကျဝ် ဗဝဝ်ယဿ၊ ပက္ခာန်ခါသာ နာနာသဗှ၊ စှ်ေနူနန်ကၠတ် သုဒဿဏ၊ တွာ်ပ္ၚောံရ ပုဗှဒိေဿ၊ မွဲသတ္တဟ ထာဏဝနေ၊ ညန်ထာန်ဝွံလေ ပဒေသရး၊ စိုပ်ထာန်ဂှ်သအး တ္ၚဲယးဗၜၚ်၊ အရှိုန်ထမး အကးလျးခၠၚ်၊ စိုပ်ဒေသက္ဍၚ် သြၚ်လစဗၠဲ၊ ဒကှ်သီုၜါ သွာမသုန်ဂၠေဲါ၊ မစ္ဆဂၠိုၚ်နဲ ၜိၚ်ဂၠေဲါတက်ဆော၊ ဍာ်သ္ဇုၚ်ညံၚ်ကၠေၚ် ကၜိၚ်ဝေၚ်ဟော၊ ယက္ခိဏဳရော ဒွိယောဘာဝ၊ တုဲဍေံပၠေၚ်ပ္တုပ် ရုပ်မနုဿ၊ ခနှောဝ်ဒေဝ ကျရုပ်ဍေံအဴ၊ တမိက်မသုန် နွံဂုန်တရဴ၊ ပေၚ်လက်သန်ဗြဴ တရဴစှော်ပန်၊ ရုပ်မဒးကၞာတ် ညံၚ်ပြာသာတ်သြန်၊ ကလိရုပ်ညး လုံရးတ္ကံပန်၊ ဗစဳသရန် လက်သန်ပြာထာ၊ ဃောစှ်သုန်သၞာံ ဒးဂွါံအခါ၊ သ္ဍိုက်မၠိုက်သာဓာ သ္ဂေဟ်ရုပ္ပါရီု၊ လျးရုပ်အိုတ်သီု ခၠၚ်ပ္ဍီုခဏ၊ တောဝ်ချဵုသာ်လွာ ဂၠးဇိုၚ်ပါဒ၊ သၞေံဂွုခၠၚ် ကၞုသၚ်ခ၊ ဂဒံဗြာတ်ရ အဇအၚဝ်၊ ညံၚ်ညးတက်ဒါတ် ဂဒံဗြာတ်ထဝ်၊ တၚ်က္ၜံၚ်ဨရာ သာ်လွာသောန်လဝ်၊ ဒဳက္ၜံၚ်တံၚ်ယျ ကဒလိထဝ်၊ ဂၞိၚ်ဂတ်သၞာၚ် ခၠၚ်သာၚ်ဂပဝ်၊ ဒကှ်ၜါဍောၚ် ရာၚ်ပေါၚ်ကသဝ်၊ ညံၚ်ခဍေဝ်ထဝ် ဂပ်ဝ်ဒးရး၊ ကၞၚ်ကံၜါကီု ခၠၚ်ပ္ဍီုလစး၊ ညံၚ်ဇဵုတ္ၚရာံ ၀ိုၚ်သ္ဍာံဒးရး၊ သြိုဟ်ဂတဵုပး စၞိန်စးဒဂူ၊ သပါတဲဂှ် ညံၚ်လပှ်ဇၟူ၊ သၟန်ပါၚ်အူ ဇာၚ်ၚုချူပြီု၊ ထမိပ်ထမၚ် လျးခၠၚ်သာ်ပ္ဍီု၊ ကောန်မတ်ဗစဳ ဒြာဲဨကၠုၚ်ပြီု၊ သၟန်ပါၚ်ကီု ညံၚ်ဗီုကြောတ်ထဝ်၊ က္တောဝ်ဝိုၚ်ဒးရး သၟးအၚဝ်၊ ကၞေၚ်ဂၠးဥပ္ပဵု လျးဂဵုသဝဝ်၊ ရုပ်ညံၚ်ကောန်ဗြီု ကုသဵုပြီုလဝ်၊ လျးဂဵုသဝဝ် အၚဝ်ပမာ၊ မွဲသာ်ဂ္ညိလဝ် အၚဝ်နဳလာ၊ မွဲသာ်အဇ သာ်မြသာံဖြာ၊ ဗၜၚ်ခဏ လုံကာယဒွါ၊ ဒျိုၚ်ညံၚ်သာ်ယန် ဗ္တာၚ်ကဏ္ဏကာ၊ သမြီသာ်ထဝ် လျးဆက်ၜဝ်အာ၊ နူဇိုၚ်ဒဵုသော် ဗော်လက္ခဏာ၊ ဒုဟ်ကဵုဂၠဲါအာ အလုံကာယ၊ သ္ကဵုဒှ်ဗယိ ဟွံမွဲညိည၊ ဍေံပၠေၚ်ဗ္ဒဟ်ရ ယက္ခနန္ဒာ၊ ပဒတဴပၠန် သြၚ်ပဉ္စမာ၊ ပ္ဍဲနိဂြောဓ ထာဏသာခါ၊ တိုန်တန်ဒၟံၚ်ကၠာ ဗြဴယက္ခာတုန်၊၊ ၊၊

သၟတ်ဗြဴဝုတ်ထပှ် စဴစိုပ်နန်၊ သ္ဂောံဒှ်ဂၞကျာ်ဇမၞော်
ဗြဴရတ်မိပါၚ် ရမျာၚ်ရာဇ၊ ပၞာန်သၟီဟောံဇြ ကာကပမာ၊ ညံၚ်ပၞာန်ဂဍာ် လမာ်တူကျာ၊ ဆမိၚ်အသံ ပၞောတ်ကံမာံလာ၊ ဗြူပေက်ဒဴအာ ဗွဲမသွာရ၊ ဗြဴရတ်အဂ္ဂ တော်ဆဗစာ၊ ပ္ဍဲမဗစာ သဒၚ်ဂြာဒါန်၊ ပၠောပ်ရာဇာဒုတ် ကလုတ်ဇြဟာန်၊ ပဳတိမှောၚ်မှဴ လိုက်လဴဂစာန်၊ မိၚ်ရာဇာသာန် ဂလာန်ဍိုန်ညံ၊ မယိရုပ်မ ဂၠိုၚ်ပဝနွံ၊ ဒိုက်စိုတ်အဝိက် ဂမ်အိက်ဂမြံ၊ သၟီဗညာသ္ၚံ လဒံသဝါ၊ ပိယေဟိဒၞဲါ မိက်ဆာန်သြာဲခြာ၊ ဒဒိုက်ဇၞော်ဟေၚ် ကျာ်တွံသေၚ်ဟာ၊ ကၠုၚ်မိၚ်ကလုတ် သၟုတ်ဒါန်စကာ၊ မယိရုပ်မ ဍုန်ကာယဒွါ၊ ဘဝၚ်ဟွံသွာ ဖအောဝ်ဏာဝဇ္ဇန်၊ ပညာလေမန် တီလက်သန်ဗိုန်၊ သမ္ပတိတ်ဆိုန် လဗိုန်ပညပ်၊ ပဳတိအလိုန် ဇိုန်တိုန်ထပ်ထပ်၊ သန္တဳဝတှဴ ဇဴတိုန်သမြပ်၊ ဥူမတ်ပညပ် ကသပ်ပိုၚ်ခြာ၊ သောဗနုဟ်ဗျာပ် သၠောံဂွံလ္ၚာပ်လ္ၚာ၊...

မောဟသၠာန်န် ဆဳလဗာန်ဏာ၊ လှန်ပၠောပ်ခပ်ပၠုတ် နန်ထဝ်ကြုတ်ဏာ၊ တံၚ်လေဝ်ဇွောဝ်လၚ် သၠဗတၚ်ဇာ၊ လောဘဒမြိုဟ် ခြံတလိုဟ်အာ၊ ဒလူသၞောဝ်ခိုၚ် စဵုဗိုၚ်ဒနာ၊ လောံလာဲမှဝ်ဒွက် ဂြေန်ဒက်ကယာ၊ ဒွက်မသုန်တန် အရီုဗန္ဓာ၊ လ္ၚီမသုန်ကၠံ တၞံကိလေသာ၊ ကၠံဒစာံတန် ဇရှ်ေတဏှာ၊ ဒေါသစိၚ်ဒွက် မဆိုက်ဗ္ဒက်ကၠာ၊ ဂြေန်ပၠောပ်ပလံၚ် ရိုၚ်ဇၞော်သံၚ်သာ၊ မူညံၚ်မတုပ် ဗီုဥပ္ပမာ၊ တလယာန်ဒြိၚ် သၟီဘိမ္မရာ၊ သၟဳသြဳစနြ္ဒ ကောန်ဝုတ်ညးလှာ၊ ပံက်ထာၚ်တရၚ် သၟုက်ဗတၚ်ဇာ၊ သ္ဂေဟ်ထိုက်စရန် မောဝ်သ္တိုဟ်ဂန္ဓာ၊ ၀ါယောဗတုန် ကၠတ်ပၠံပ္တုန်ပအာ၊ ထာၚ်ဗတာၚ်ဂြောပ် တလိုဟ်လောပ်အာ၊ တိတ်ဟမာန်ဟေၚ် ယာန်သြိုဟ်သၞေၚ်ၜါ၊ ဒဒိုက်ဇၞော်ဟေၚ် က္တဵုဒှ်သေၚ်ဟာ၊ သိရိအဂ္ဂ ရုပ္ပဓရာ၊ ဂုန်ရုပ်သၟီဗၠာဲ နာဲယာန်ပါသာ၊ ဒွံဒးထဏီ မတ်ဘိမ္မရာ၊ တိတ်ဟွံဂတာပ် တူယဲလ္ၚာပ်လ္ၚာ၊ မူတုပ်ပမာ နဲဝိကာရ၊ သၟီနာဲသာၚ်ဒြၚ် ဇၟူမှာတၚ်ဂ၊ ဂုန်ရုပ်ဒေၚ်ဗျောံ သ္ၚိတ်သ္ၚဲဟောံဇြ၊ ဂုန်မပလွဳ သ္ဂုတ်ဓဝ်သဳလ၊ မိသိုက္ခမာ ရုပ္ပါဓရ၊ ဘက်သွက်နာဲကၠာ မဟာရာဇ၊ နန္ဒကိတ္တိ ဣဓိမူလ၊ ဗိုတ်ပးသ္ဍာံပြ ဟွံပၠဇကု၊ သၟဝ်တၞံအသုက် ကှ်ေပြာန်ဇုက်အဂၞု၊ ဒးမွဲဗရု စိၚ်စက္ခုဒွါ၊ ဂြေန်လဝ်ဗိုန်က္ညန် ပဥ္စဗန္ဓာ၊ စိၚ်ဓဝ်ပဳတိ ဇၞော်သိဒ္ဓိကာ၊ တူဗိုၚ်လာဲတုန် တိုန်ပ္ဍုန်သၞာ၊ လွောၚ်စန်စရာၚ် ဂၟါ်လဗာၚ်တာ၊ သတိသရီု ဗတဲလီုမှာ၊ ဓဝ်ဟိရိရောၚ် ဟွံလီုယောၚ်ယာ၊ အကုသလာ စိုတ်စှ်ၜါသြပ်၊ ပၞာန်စိၚ်မွဲဒပ် ဇက်တိုန်ထပ်ပ္ဍဵု၊ အဟိုတ်စိုတ်ကၠုၚ် ဒုၚ်လဝ်ဒစဵု၊ ပၞာန်ချေံသီုဗဵု ဇက်တသဵုလန်၊ ကာမစိုတ်ရ စမြဒညန်၊ ပၞာန်စိၚ်မွဲဒွန် ဇက်ဗ္ဂန်တသဵု၊ အရုပ္ပါ၀ စှ်ၜါသ္ဍဗဵု၊ ပၞာန်ကွဳထပ်ပ္ဍဵု ဇၞော်တၚ်ဃဵုသန်၊ စတုရၚ်ဂ သေဏၚ်ဂဗ္ဂန်၊ သရုပ်စိုတ်ပၠန် စှ်သုန်လန်ဂၠဲါ၊ ကၠဂြိုပ်တွာ်သြာဲ ဂၠဲါတွာ်စနုတ်၊ ပန်စှော်ခပ်ပၠုတ် စိုတ်လောကုတ္တဵု၊ ဒပ်ဇၞော်သီုဗဵု ဇက်တသဵုဂၠေဲါ၊ ကၠံၜါစှော်မွဲ စိုတ်မွဲဒမြိပ်၊ မှတ်ဟုပ်ဒွါန်သိပ် မွဲသမြိပ်မတ်၊ စမြေံဖဍတ် တူလှေက်ဗတ်သ္မာ၊ ဗတိုက်ဗစိုတ် ဗြူလကိုတ်အာ၊ သၟီဍုၚ်ပညာ ယာံပေက်အာတုဲ၊ လဇုဲတလုဲ ဒှ်ဂၠုဲလၞီ၊ ကၠုၚ်လကိုတ်တီ စိုတ်သီဟဇဴ၊ ဇကၠိုက်လမော ဂြိုပ်မနောဇဴ၊ ဂဇံသ္တိက်သ္တၚ် စၚ်ကြံဒတဴ၊ ဂုန်သၟီကောဂၞဴ ဒှ်တဴနရာတ်၊ ရုပ်မသ္ဇက်တောံ နူမဂွံညာတ်၊ ဒွိၚ်ဘၚ်သၠၚ်ဒြာတ် ဂြိုဟ်ညံၚ်ခွါတ်ထောံ၊ ဗြဴထပှ်ကောံ သၠၚ်ဗျောံထၜေါံ၊ အိန်ယာပန်စွံ ဂၠဲါဟွံဂွံမွဲ၊ ပဟဲဟွံဟဲ ဂၠေဲါသက္ခဏ၊ ဒ္ၚဳသၞာန်အာ အလုံကာယျ၊ ဗြဴရတ်အဂ္ဂ တလစရာဲ၊ ပ္ဍဲစိုတ်လဟိၚ် ဂွံညာတ်သၟီဗၠာဲ၊ စံၚ်တူလောံလာဲ ဂွံဗၠးသြာဲအာ၊ ပဳတိသ္ဍိုက်ဆာန် ဇြဟာန်မေတ္တာ၊ ထပှ်မွဲသာ ရုပ်သာပြာကတ်၊ ဂကောံသၟီဇၞော် ဗော်ရာဇာဝတ်၊ သ္ဍိုက်ဆာန်တဴသၟတ် ဗြဴရတ်သေၚ်ဟာ၊...
သၟီဇၞော်ရာဇာ ကာလဂှ်ပၠန်၊ ကော်အမာတ်ပန် သၟီနာဲနန်ဒြၚ်၊ ကဵုစဳရေၚ်လဝ် ၀၀်ထဝ်သြန်ဟေၚ်၊ တုဲကဵုစွံပြေၚ် လမေၚ်အတာ၊ ကွဳကဵုကွဳဟေၚ် ဒၟံၚ်တရေၚ်ဗ္ဂာ၊ စိၚ်ကဵုစိၚ်ဂၠေဲါ စဳရေၚ်မွဲသာ၊ ချေံအသာချေံ ပလှ်ေကၠုၚ်အာ၊ ပၞာန်တိုက်မွဲသာ သ္အဳဗ္ဂာရေၚ်ဗဝ်၊ အလာံဍုတ်မြာ် ယာတ်ဗြေဝ်သာ်ထဝ်၊ လွိၚ်သၞာ်ရတ် ဂမ်အတ်တမ္ညဝ်၊ ပၞာန်ပန်ပြကာ သအဳဗ္ဂာရေၚ်ဗဝ်၊ ဗၞုဟ်ဒေါန်ဇမၠိၚ် လွိၚ်သဝဝ်၊ ကံတ္ၚသွက်လဝ် အၚဝ်ပန်ဖျာ်၊ ဝဝ်ထဝ်ပက်ဍာ် သာ်သူရိယျ၊ သီုထပှ်ဟေၚ် စွံပြေၚ်လဝ်ရ၊ ဗြဴရတ်ထပှ် သၟဟ်လက္ခ၊ ပ္တိုန်ပ္ဍိုက်ဝဝ်ရ ခဏဂှ်ကၠာ၊ သၟီဇၞော်မဟာ ရာဇာကိတ္တိ၊ ဂိုၚ်မိန်ယိုက်အဴ ဗြဴမမြီဂၠိ၊ ပ္တိုန်ပ္ဍိုက်ဝဝ်ထဝ် အံသဝ်ဣဓိ၊ သၟီတလတိ မဂ္ညိစရာဲ၊ တိုန်ဍိုက်ဝဝ်ကောံ ဖဴကရောံနာဲ၊ ဒေါဝ်ဗဵုဗနဳ ကျာ်သြဳစရာဲ၊ မွဲဝဝ်ဖဴနာဲ သၟီဗၠာဲဍိုက်အာ၊ ပိုက်ဒပ်ဇက်စဴ တရဴခန်လွာ၊ အခေၚ်ပၞာန်ပန် ကြာဂြိုပ်ရညာ၊ မြီမြီညှာညှာ ဝေၚ်အာသဘၚ်၊ သီုဗဵုကၠံၚ်သ္ကိုပ် ကြာဂြိုပ်ဂၞိၚ်ဂၚ်၊ ဗဵုကၠံၚ်ထဥ သဏးတုရၚ်၊ ခရာလဒု သြေဲကၞုသၚ်၊ သြဳသြဳဂြိၚ်ဂြိၚ် ဒဗိုန်ပိၚ်မၚ်၊ လလောၚ်ကမြဴ အသံဂၞဴဂၚ်၊ ဂၠိုၚ်ကဵုအဆၚ် အခြၚ်နာနာ၊ တဆိၚ်စဴမေ ဒွက်ဨသဒ္ဒါ၊ ပေဝ်သဏောဲဗြု လဒုဟောဒြာ၊ မြီမြီညှာညှာ ဗဵုဗက်အာတဴ၊ ကြာဂြိုပ်ဂၞိၚ်ဇီု ဒမြီုဂြိုပ်ပ္ကဴ၊ အၚ်ရေၚ်အသုက် ဇုက်ဂၞုပြာန်ပြဴ၊ ဓိတာန်ကၞဴ ပ္ကဴရီုဓနဳ၊ ပ္ကဴနန်ထေဝ်ဝဝ် တဝ်သွဝ်ရာၚ်ဖဳ၊ ပ္ကဴကြက်စလန် ပ္ကဴဗန္ဓဇဳ၊ ဍောၚ်ပ္ကဴမာလဳ ပ္ကဴပေါပ်ဇဳသွာ၊ အသုက်ပ္ကဴချီု ပ္ကဴရီုသဂါ၊ ဒဇေၚ်အၚ်ရေၚ် ပ္ကဴကြေၚ်စမ္ၚာ၊ ဍောၚ်ပ္ကဴစမ္ပာ ပြာၚ်ဍောၚ်ကြာဇီု၊ ကၞာၚ်ဗျာၚ်တယျောဝ် ပြာၚ်ဍောၚ်မောဝ်ထီု၊ တလာဲလၜက် ညံၚ်ညးဒက်ပြီု၊ လစောတ်လမောဝ် တွာဲမိတၞောဝ်ဗြီု၊ အကြာဂြိုပ်ဇီု ကြာဒမြီုဆု၊ ကြာအရှာံပ္ကဴ ဇက်စဴထဥ၊ သံၚ်သံၚ်ရုရု ထဥဟောဒြာ၊ ညန်တဝဵုရ ဗော်သွးရာဇာ၊ ဒ္ၚဳအာစိုပ်ကၠာ ကာလဂှ်ရ၊...
သၟီဇၞော်မဟာ နာဲသာလောက၊ ကော်အမာတ်ရ ကာလဂှ်ကၠာ၊ ကဵုသတးတုန် တိသုန္ဓရာ၊ ဍာ်လဗာၚ်ထဲ ပက်ဗရဲဏာ၊ တက်ရာဲဇမာတ် စဵုသွာတ်ဒနာ၊ တၞံဗြာတ်တၞံက္ၜဴ သတ်ဗြဴသတ်တာ၊ ဍောၚ်ပ္ကဴမဂေါ၀် မြမောဝ်ပုပ္ဖါ၊ ကဵုဂညိဏာ ပ္ကဴနာနာစိ၊ ဒၞဲါပ္ကဴမဂေါ၀် မြမောဝ်ဂန္ဓိ၊ တလာဲလၜက် ကဵုကွက်ဂညိ၊ ဍာ်မြမောဝ်ပၠန် ဒသဂန္ဓိ၊ ကဵုရေၚ်လဝ်စိ ညိပကဵုခြာ၊ ၜါလပါ်ဍာန် သဗာန်သေၚ်ဟာ၊ ကဵုပြေၚ်လဝ်ကၠာ ကာလဂှ်ပၠန်၊ တက်ကၞာရတ် ဇၞော်ဒြဟတ်သန်၊ ဗဳသ္ကဝ်မဇၞော် ကောန်တွးကော်ပ္ညန်၊ ကၞာရတ်ဂှ် ပြဟ်ခဏံကၠောန်၊ ဗွဲပရဟ်ကၠာ ပြဟ်တုဲအာပၠန်၊ အမာတ်တံမာ ပညှာပြဲလောန်၊ သၞာတုန်ပၠန် တန်ကဵုအမာတ်၊ ဒ္ဂူဨကရာတ် ဆအမာတ်တံ၊ စဳရေၚ်လဝ်ကၠာ ဟွံသာသပံ၊ ဆဗမၞးတံ ဂဇံမွဲသာ၊ ဆသေထဳဟေၚ် မွဲစွံသေၚ်ဟာ၊ ဂတဂှ်ကၠာ ဗြဴကုမ္မာရဳ၊ မွဲသာဍေံတံ ဂဇံရေၚ်ဖဳ၊ သၟာဒွက်ကီု ရုပ်သီုကျာ်သြဳ၊ မွဲသာဍေံပ္ညဳ ဒ္ၚဳဂဇံတန်၊ သမာတွိၚ်တွိုက် အခိုက်ဂၠိုၚ်သန်၊ ဗာတ်သၠာ်ဗာတ်သၞာံ သြေဲကျာံသဂြန်၊ စံၚ်ဒြဝ်လဒု ဗြုတဴသြောန်န်၊ လုံကၞာပၠန် တသောန်တသဝ်၊ မွဲစွံတန်ဒၟံၚ် တွိၚ်တွိုက်စံၚ်ဒြဝ်၊ အခိုက်ဇၟာပ်တၚ် အခြၚ်တမ္ညဝ်၊ သဘၚ်သၟီဓဝ် တမ္ညဝ်တဴရ၊ ဘောဇိုန်ပုၚ်သွ သဗှနာနာ၊ ဗြာတ်တ္ၜဴကဝ်ဗ္ဒဝ် ဗွဝ်ရသာ၊ စဳရေၚ်လဝ်ကၠာ သအဳဗ္ဂာသလ၊ ဗဵုဂမၠိုၚ်သွံ သွက်ဂွံဟာပ်စ၊ စဳရေၚ်လဝ်ရ ကာလဂှ်ကၠာ၊ ခေါဇဴကၟဝ် လးလဝ်ပေၚ်ဗ္ဂာ၊ အမာတ်တိက္ခ တလပညာ၊ ကလေၚ်စှ်ေအာ ကဵုမှာရာဇ၊ လပုဟ်တဲစှ် သၟဟ်ဍောၚ်ပတ်ဒၟ၊ လ္ၚောဝ်ပတီတွာဲ နာဲက္ဍိုၚ်သေတ၊ တုဲဒှ်ရအဴ ယွံသ္ဍဴနန်မြ၊ တိုၚ်အသံနာဲ ဍိက်ကၠောန်တွာဲရ၊ က္ညဇက်စဴအာ ခန်လွာနန်မြ၊ နန္ဒကိတ္တိ ဣဓိက္ဍၚ်ပြ၊ မိၚ်ပါၚ်အမာတ် နာဲပြာသာတ်မြ၊ ရိုက်ဖံဒုတြ ဇက်ဂတစဴ၊ မြီမြီညှာညှာ ဗဵုဇက်အာတဴ၊ သၟီတလတိ မဂ္ညိနုဘဴ၊ ကောံဗြဴထပှ် သၟဟ်န်နှဴရဴ၊ လတူဝဝ်ထဝ် သ္ဍိုက်ဗဵုဒ္ၚေါဝ်တဴ၊ ညံၚ်ထာၚ်ကဵုထိုက် ကြိုက်လ္ၚောဝ်ဂ္ညိဂၠဴ၊ မြီမြီဇက်စဴ တရဴနန်မြ၊ သီုဗဵုဂမၠိုၚ် ရိုၚ်ရိုၚ်လျလျ၊ သန်ထာန်ဒေသ စဴစိုပ်ရတုန်။ ။

သဘၚ်မဒုၚ်ဖျဴသၟတ်ဗြဴဝုတ်ထပှ်
ပ္ဍဲကာလဂှ် ပဒှ်သာ်လွာ၊ ညးဍုၚ်ဂမၠိုၚ် ရိုၚ်ရိုၚ်သအဳဗ္ဂာ၊ ဂွံမိၚ်ပရိုၚ် သၟီနာဲက္ဍိုၚ်သွာ၊ ဂွံနၚ်ဗြဴရတ် တြုံကၞတ်သာ၊ ထပှ်မွဲရဲ ၝဲကဵုဒေံကၠာ၊ ရုပ်သာ်အဝဲ ပြဲလက္ခဏာ၊ ညးဂမၠိုၚ်ကၠာ ကာလဂှ်ပၠန်၊ သၟဟ်န်ရၚ်သ္ကံ ဗွဲမလံသန်၊ ကာလဂှ်ပၠန် ဒတဲကောန်စဴ၊ ဇက်တိုန်ရိုၚ်ရိုၚ် ဒဵုဇိုၚ်နန်ပ္ကဴ၊ သဗှတမာဲ တိုန်တွာဲပူဇဴ၊ ဗဒှ်သ္ဘၚ်ပေဲါ ဂၠိုၚ်နဲသဘဴ၊ ဂွံညာတ်ဂၞကျာ် ရုပ်ညံၚ်သာ်ပ္ကဴ၊ ရုပ်သာ်အဝဲ နဲဒေဝတဴ၊ ဗဵုဟွံတီဖဲ အဲညးတြုံဗြဴ၊ လုံကၞာအဴ ဒၟံၚ်တဴပေၚ်က္ဍတ်၊ ကျာ်သြဳဂေါ၀်သ္ဇုၚ် ညံၚ်စမုၚ်ရတ်၊ ထိုက်ကဵုပ္ကၚ်ရၚ် နန်ဒြၚ်သ္ၚိကၠတ်၊ ထိုက်ကဵုပိုၚ်တုန် ကုန်ကွဇၞော်သွတ်၊ ထိုက်ပိုၚ်ကမၠောန် ပ္ဍဲဒေါ၀်နန်ရတ်၊ ဇန်တံတုန်သၟတ် ဂမ်အတ်ကမြဴ၊ ပၚ်တဲကလဵု ယဵုတဲပူဇဴ၊ ဇၟာပ်ဇန်တြုံဗြဴ ပတဴအံသဝ်၊ ကဵုသာဓုကာ သအဳဗ္ဂာတမ္ညဝ်၊ သီုဖအိုတ်ဟေၚ် ဂဇံရေၚ်ဗဝ်၊ ...

ပ္ဍဲကာလဂှ် ပဒှ်အသဝ်၊ ကိတ္တိရာဇာ မှာစက္ကဝဝ်၊ ကညှာထပှ် လေၚ်နုၚ်ကၠဟ်ထဝ်၊ ဒေါ၀်ကၞာဟေၚ် ကဵုစွံပြေၚ်လဝ်၊ ဍာ်ဒိပ်မြမောဝ် ဗဝဝ်ဂန္ဓ၊ စဳရေၚ်လဝ်ရ ခဏဂှ်ကၠာ၊ ချောဝ်စလန်ၜါ သီုကလှာမှက်၊ ဂေါရာဲဇိုန်ကျဝ် ထီုလဝ်သက်လက်၊ ဒေဝဒါသ္ၚဴ အဂၠဴချူဖက်၊ သီုမြမောဝ်စှ် သၟဟ်ပ္ကောံဆက်၊ ကြကောတ်သက်သက် ပေၚ်မှၚ်ဏက်ဗ္ဂာ၊ ဗမၞးမပ ဘာရဒွဇာ၊ အခဝ်မသုန် ဂုန်ဒစိတ်မြာ၊ နွံသိတ်ထပှ် ဓုတၚ်စှ်ၜါ၊ သီုတြဒစာံ ပြဲဗာံသဳလာ၊ ကဵုဖဍောတ်ကၠာ မှာမၚ်္ဂလာံ၊ ကိတ္တိရာဇာ မဟာရာဇာံ၊ သတ္တဒေဝဳ သြဳပဝရာံ၊ သဗှလာဘာ မဟာသုခါံ၊ ဘဝန္တုတေ မေမၚ်္ဂလာံ၊ အယုဒိဃာ သုခလာဘာံ၊ သဗှဒိဿာ မဟာဇဲယာံ၊ သိဒ္ဓိသိဒ္ဓါံ ဇဲယာံဟောတု၊ ဖဍောတ်ဟောဒြာ ဒုၚ်ပါၚ်သာဓု၊ သတုံရပ်ကၞု သၚ်ဂွုသဝဝ်၊ လတူတဲကၠာ နာဲသာနန်ထဝ်၊ ဇာထဝ်ဂေါ၀်မြီ ထမှောၚ်လ္ၚီဓဝ်၊ ကၞုသၚ်ခ ဒက္ခိဏဝဝ်၊ လတူဇာထဝ် သ္ကိုဟ်ဇဝေါဝ်ဏာ၊ ဒွံထမှောၚ်ဇာ ပြိုဟ်အာသြီုသြီု၊ ဒုၚ်ဍာ်မ္ၚဵု တွဵုတဲမှာဗြီု၊ ဖဍောတ်သြီုသြီု ဂြီုဂြီုဂါထာ၊ ဗလိုပ်ဖုံတုဲ ဗြဴလွုဲနာဲသာ၊ သဘၚ်သၟီဇၞော် ဗော်ဇန်တံကၠာ၊ ပေၚ်ထပှ်တ္ၚဲ သဘၚ်ဟဲအာ၊ ညးဂမၠိုၚ်အဴ တြုံဗြဴသေၚ်ဟာ၊ သဘၚ်ဟဲဗြဟ် ကာလဂှ်ကၠာ၊ တုဲပၠန်စဴအာ ခန်လွာဒေသ၊ သန်ထာန်ဒေသ အာစိုပ်ရတုန်။ ။

သၟတ်ဗြဴဝုတ်ထပှ် ဒှ်ဂၞကျာ်သၟီဇၞော်နန္ဒကိတ္တိ
လတေံမှာဇန် ပၠန်စဴတုဲရ၊ အဏံတုန်စိ ကိတ္တိရာဇာ၊ ထပှ်မွဲဂၞဴ ဗြဴအနက္ဃ၊ ကောံသၟီရာဇ တလက္ဍိုၚ်သွာ၊ တိုန်စိုပ်နန်ကၠတ် သုဒဿဏာ၊ တူဒေန်ဒြၚ်စိၚ် သၟီဇၞော်ရာဇာ၊ သၟဟ်န်ညဳသာ သၟီကဵုမှာယျ၊ သီုညးထပှ် သၟဟ်န်စိတ္တ၊ စသိုၚ်သုခ ကာလဂှ်ကၠာ၊ ညံၚ်အိန်နာဲမြု ကဵုသုဇာတာ၊ မဂွံဒ္ၚေါ၀်လှိၚ် သမၞိၚ်သွဝ်ၜါ၊ ညံၚ်ကုသကၠာ ပြဘာဝတဳ၊ သီုညးထပှ် သၟဟ်န်မွဲဒၞဳ၊ စသိုၚ်အရီု သီုထပှ်ညဳ၊ တူနန်ကျာ်သြဳ ညံၚ်ဗနဳသွဝ်၊ ဗြဴကမၠောန်ဍိက် ပိုက်ပၞိက်ကမဝ်၊ သၟီဇၞော်ကိတ္တိ နာဲသ္ၚိနန်ထဝ်၊ ကောံဗြဴထပှ် သၟဟ်န်တဝ်ဂၠဝ်၊ လတူဒေန်ထဝ် တဝ်ဂၠဝ်တဴတုန်၊၊

လၟေၚ်ဒဒှ် တဝှ်ဖဵုဂုန်၊ ပိုဲဟီုပျးတုန် တိုၚ်ဂုန်သံၚ်သာ၊ ကုသဵုကံတၟုဲ ပ္တုဲလဝ်ကိုပ်ကၠာ၊ ကုသဵုကံဟေၚ် စဳရေၚ်ကဵုမှာ၊ ဒဵုဂွံဒှ်ဟေၚ် ဂၞကျာ်သေၚ်ဟာ၊ ကံဂှ်ဇိုန်ကဵု ဖဵုဇၞော်ဂွံမြာ၊ တူဒေန်ဒြၚ်စိၚ် သမၞိၚ်က္ဍိုၚ်သွာ၊ ဂွံစသိုၚ်ဟေၚ် ရောၚ်ဟသေၚ်ဟာ၊ သမ္တီမၞးတံ တမံလိုက်ဗာ၊ ဂၞကျာ်ကဵုသၟီ သမၞိၚ်ပါသာ၊ စသိုၚ်အရီု ဍီုဍီုဟာန်ဇာ၊ သၟဟ်န်တဴကၠာ ကာလဂှ်ပၠန်၊ ပ္ဍဲနန်အတှ် မံၚ်တဴသၟဟ်န်၊ ဇၞတ်မမံၚ်တဴ ပ္ဍဲလကဴနန်၊ ပိဂိတုပၠန် စိုပ်ပ္ဍဲနန်ထဝ်၊ ဆာန်ကၟိန်ရေၚ်ကာန် မွဲဟာန်တဝ်ဂၠဝ်၊ မိညးထပှ် သၟဟ်အဆေဝ်သွဝ်၊ ဂွံသဇိုၚ်ဂဝ် ဗြဴတဝ်ပဏာဲ၊ တန်ဂပ္ဘယဲ ပ္ဍဲနန်ထဝ်ဆာဲ၊ ရုပ်ထဝ်ပဏာဲ နာဲညးထပှ်၊ ဗြဴတဝ်စရှ် သၟဟ်သၟန်သက်လက်၊ ဒေါ၀်ကမၠောန်တံ သ္ကံသွးမၞုံဘက်၊ ဒဒှ်ဂွံလဝ် သဇိုၚ်ဂဝ်ဗက်၊ လ္ၚောဝ်ပတီကွာဲ သၟီနာဲက္ဍိုၚ်စက်၊ တြုံကၞတ်ဘက် ပြမလက်သန်၊ ကော်ပ္ကောံနၚ်သအး ဗော်သွးကမၠောန်၊ ကဵုကၠုၚ်လွဳလွတ် ကဵုဗိုၚ်ပတ်ပေါန်၊ အိုတ်ဗော်ကမၠောန် ပ္ဍဲဒေါ၀်နန်မြ၊ သဝ်ဗြဴနွံလွဳ နွံညာန်စဳခၠ၊ ကဵုကၠုၚ်လွဳလွတ် သိရိဒဇ္ဇ၊ ညးလေပ်ဟီုရ မၚ်္ဂလဇိုက်၊ ကမြဴတဴရ နကဵုတသိုက်၊ ပုံကၞက်အဂီု ဟီုဝေၚ်ဗြိုက်ဗြိုက်၊ နကဵုတသိုက် သ္ဍိုက်စိုတ်ဗြဴသွဝ်၊ မွဲစွံတန်မံၚ် တွိၚ်တွိုက်စံၚ်ဒြဝ်၊ လှ်ေဒယှ်ေကီု ဗီုကောန်ခနှောဝ်၊ လဟိၚ်ကဵုစိုတ် ဗြဴၝောံကိုတ်ထဝ်၊ လတူနန်လွိ သ္ၚိရတ်အသဝ်၊ သၟုက်ဗတၚ်ထဝ် ရာၚ်ဆာဲမှောဝ်ဇာ၊ ဂကောံသၟီဗၠာဲ နာဲက္ဍိုၚ်ထာၚ်သွာ၊ စသိုၚ်အရီု သီုထပှ်ကၠာ၊ ရာၚ်ဆာဲပြာထာ ကာလဂှ်တုန်၊၊

ပရူဒဒှ်သၟီနန္ဒကိတ္တိ
နွံဍုၚ်မွဲပၠန် ဇၞော်သန်အံသဝ်၊ ပဒေသရး ညးဟီုခုတ်လဝ်၊ ထပှ်ထပ်ကျဝ် ကၟာၚ်ဗဝ်သအဳ၊ ပြာသာတ်သ္ၚိရတ် နန်ကၠတ်တဝဳ၊ ဂၠိုၚ်ကဵုဘာသာ ဝေါဟာပန်ဇဳ၊ ပန်သာ်ဗရု စတုဓနဳ၊ ဗဵုကၠံၚ်တမဳ ရးတဝဳဗဝ်၊ ပဒေသရး ညးဟီုခုတ်လဝ်၊ ဂၠိုၚ်ရတ်ဗွဝ် အံသဝ်ဘောဂ၊ သၟီမပ္ကၚ်ရၚ် နန်မၚ်္ဂလ၊ နန္ဒကိတ္တိ မဂ္ညိနာမ၊ ဂၞကျာ်ဇၞော်ရ အဂ္ဂဟေသဳ၊ ဓဝ်စှ်ပ္ကၚ်ရၚ် မၚ်မွဲအနဳ၊ ရိုဟ်တ္ၚဲလမိုန် သွိုန်ပဉ္စသဳ၊ စှ်တရဴလ္ၚီ မှောၚ်မှမြီသအဳ၊ သၟီတလလွဳ သြဳအတူလ၊ ပ္ကၚ်ရၚ်မၚ်မွဲ ဗဗွဲဓမ္မ၊ တူပြာသာတ်ပိ သ္ၚိဘိသေခ၊ ပ္ကၚ်ရၚ်တဴရ ကာလဂှ်ပၠန်၊ သၟီဇၞော်ကိတ္တိ ပ္ကၚ်ရၚ်သ္ၚိနန်၊ ဂၠိုၚ်သၞာံအခါ ကာလဂှ်ပၠန်၊...

ပ္ဍဲကာလဂှ် ပဒှ်လက်သန်၊ ဂၞကျာ်ကဵုသၟီ ပ္ဍဲသမၞိၚ်နန်၊ ကံနူတမၠာ သၟိက်ကဵုခြာခၠန်၊ က္တဵုဒှ်ယဲပၠန် ပ္ဍဲနန်ဂေဟာ၊ ဇၞော်ကဵုဒြဟတ် ထတ်သောသၞာ၊ သဝ်လေပ်ဗိန္ဒော နဳဒါန်ရောဂါ၊ ကဵုကော်နၚ်ကၠာ ပ္ဍဲကာလဂှ်၊ ကဵုလွဳပရာ နာဲသာဒိုဟ်စှ်၊ ဂၠိုၚ်တ္ၚဲစမှ် ယဲဂှ်ဟွံသာ၊ ဂၞကျာ်ဇၞော်ဝွံ မစ္စုတံၚ်ဏာ၊ သၟီဒးဒေၚ်ဗျောံ ဟောံဇြလ္ၚာပ်လ္ၚာ၊ သ္တိက်ရောဟွံလှိၚ် စံၚ်တူသိၚ်သာ၊ ဗှ်မိတ်ဇြဟာန် ဆာန်တုဲသြာဲအာ၊ ဒေၚ်ဗျောံတူယဲ ပ္ဍဲမနောဒွါ၊ ဂၠိုၚ်သောသၞာ သၟီဇၞော်ရာဇာန်၊ မှောၚ်မှကမၠောန် အိုတ်ပ္ဍဲသန္ထာန်၊ ညံၚ်ဇွမတဴ လကဴသုသာန်၊ က္ဍုဟ်ဇအိုန်သန် ပ္ဍဲဂၠံသန္ထာန်၊ သၟီတလဒါန် အာန်တၞာန်စိုတ်၊ ဗှ်မိတ်အလေၚ် ဟွံကေၚ်ခြာဂိုတ်၊ ရိုဟ်ဒဒှ်တ္ၚဲ မွဲတ္ၚဲဟွံပိုတ်၊ ဇြဟောံဂၠိုၚ်ဂိုတ် ပ္ဍဲစိုတ်သၟီဗၠာဲ၊ ရိုဟ်ဒဒှ်တ္ၚဲ တူယဲဇြေဟ်ဇြာဲ၊ ဗှ်မိတ်ဇြဟာတ် ဆာန်တုဲဒးသြာဲ၊ ဗှ်ဒးခြာဒိုဟ် ဖျုန်ဂြိုဟ်ညံၚ်လာဲ၊ လ္ၚစိုတ်ဂဵုဍာဲ နာဲညးနန်ထဝ်၊ သက္ကုလဟိၚ် ပ္ဍဲဂှ်သၟီဓဝ်၊ ဒဒိုက်လောံလာဲ လၞီကာဲကဝ်၊ ပဝိုတ်ဟွံဝိုတ် ပ္ဍဲစိုတ်သၟီဓဝ်၊ သီုမလၚ်ဇွောဝ် တူနန်ထဝ်တုန်။

လၟေၚ်ဒဒှ် တဝှ်လက်သန်၊ ဒေဝတဴၜါ နူကၠာတေံဂှ်၊ ဗ္ဒဟ်ရုပ်စာၚ်ပြဲ ရုပ်စိၚ်မွဲတန်၊ ဒေဝတဴၜါ ညဳသာသၟဟ်န်၊ ဗှ်သဏာပၠန် ကောန်ဗြဴထပှ်၊ ဒဒှ်ပြာ်လဝ် ရုပ်ထဝ်စရှ်၊ ဒိုက်သိုက်ခပ်သီ ဟွံတီဒဒှ်၊ ဒေဝၜါဂှ် ပြဟ်ဗ္စာရဏာ၊ ဂွံညာတ်ကေတ်သၟဟ် ကောန်ထပှ်ကၠာ၊ ကောံဒေဝဇြဲ ပ္ဍဲသြၚ်ကမာ၊ ဂွံညာတ်ကေတ်ကၠာ ပ္ဍဲကာလဂှ်၊ ကၠုၚ်ပၠောပ်စိုတ်ဆာဲ သၟီနာဲဒိုဟ်စှ်၊ နန္ဒကိတ္တိ ဣဓိတြဳဇှ်၊ ကၠုၚ်ပၠောပ်စိုတ်ပြဟ် ခါဂှ်ဒွေတဴ၊ ပၠောပ်စိုတ်တုဲဟေၚ် ပြဟ်ကလေၚ်စဴ၊ သန်ထာန်ဒွေတဴ ပၠန်စဴအာတုန်။

ဍိက်ဗြဴမွဲမၞုံယၟုဣလု သၟီနန္ဒကိတ္တိ စကာကဵုတုက်ဍာ်လ္စတုဲ မဂွံဆဵုအာသၟတ်ဗြဴဝုတ်ထပှ် ပ္ဍဲလ္တူကၞာၚ်ဇြဲ
အဏံသၟီဗၠာဲ နာဲညးမညှ၊ ဒေဝတဴၜါ ပၠောပ်စိုတ်ရာဇ၊ ချိုန်ပၠောပ်စိုတ်တုဲ တြုံလွုဲအဂ္ဂ၊ ကြံသလှောၚ်ဖူ ဥူမတ်စိတ္တ၊ ပ္ဍဲစိုတ်ပူဆာ စံၚ်နှာဂြံဂြ၊ သၟီဓဝ်ရာဇ ကာလဂှ်ကၠာ၊ ညံၚ်မဒးပ္ညဳ ရာဲသဳကၠေၚ်ဖာ၊ ပ္တန်စိုတ်ဟွံမာန် ဍာန်မနောဒွါ၊ စံၚ်တူပူဆာ မဟာရာဇ၊ နွံဍိက်ဗြဴမွဲ ပ္ဍဲနန်ဂေဟ၊ မဒုၚ်ယမု ဣလုနာမ၊ ကဵုတုက်ဍာ်ရ ပြဟ်သၟီစကာ၊ ကဵုတုက်ဍာ်ဟေၚ် လစသေၚ်ဟာ၊ လေၚ်နုၚ်ကၠဟ်ထဝ် ဒ္ၚဳတွာ်စဝ်အာ၊...

ပ္ဍဲကာလဂှ် ပဒှ်သာ်လွာ၊ တေံဗြဴထပှ် သၟဟ်န်ညဳသာ၊ တိတ်နူဂွိုၚ်ဇြဲ သကဲကမာ၊ လတူကၞာၚ်ဇြဲ ပ္ဍဲဘုံသာခါ၊ ဂဇံတဴကၠာ ညဳသာသၟဟ်န်၊ ကၞပ်သ္ၚဳတဴရ ကာလဂှ်ပၠန်၊ ဗြဴဣလုမာ တွာ်အာယောန်န်၊ စိုပ်လစပၠန် ယောန်စှ်ေတုက်ဍာ်၊ ဂွံညာတ်ရုပ်သၟဟ် ညးထပှ်ဖျာ်၊ ဍေံမစဳရံၚ် ရုပ်ညံၚ်ကျာ်သၠာ်၊ စိုတ်ဣလုရောၚ် သလှောၚ်လံက်လာ်၊ သလှ်ေရုပ်ဍေံ ညာတ်ကွေံပ္ဍဲဍာ်၊ ရုပ်ညံၚ်ကျာ်သၠာ် တုက်ဍာ်ကဵုနုၚ်၊ ဟွံကြိုက်ကဵုအဲ ဒှ်ပ္ဍဲစိုတ်ပ္ညုၚ်၊ ဣလုသအဵုသအာ် ဇီုထောံဍာ်နုၚ်၊ ကလေၚ်စဴကၠုၚ် ပညုၚ်သန်ထာန်၊ ဟွံညာတ်ဍာ်နုၚ် တွာ်ကၠုၚ်ဒေါ၀်ဍာန်၊ တၟေၚ်ပ္ဍဲစိုတ်ပၠန် ကမၠောန်တံသၟာန်၊ ယွံလေဝ်ဣလု တ္ၚဲဝွံကွေံကြာန်၊ ကဵုတုက်ဍာ်သွံ ဟွံဂွံသာန်သာန်၊ တဲသၟးပကာန် ဗှ်ေတွာ်ဟာန်စဴ၊ ဟွံဖေက်ဘဲဒန် သၟီနာဲနန်ပ္ကဴ၊ ဣလုမိၚ်အဴ စိုတ်ကမြဴသန်၊ ဂွံဍာ်နုၚ်ပြဲ အာမွဲဝါပၠန်၊ ဂွံညာတ်ရုပ်မာ နဲကၠာမွဲတန်၊ ပ္ဍဲစိုတ်လ္ၚုလ္ၚန် ကလေၚ်ပၠန်ရ၊ ဗွဲပရှ်ကၠာ စိုပ်ပါသာဒ၊ ဂွံနုၚ်မွဲတန် ဍေံအာပၠန်ရ၊ ညံၚ်ကြဴတေံကီု ဍေံဇီုထောံဂၠ၊ နုၚ်ပါ်ပၠန်ရ ဒေသကမာ၊ ဣလုဂှ်ဟေၚ် ကလေၚ်စဴအာ၊ ကမၠောန်တံအဵု ကဵုဍေၚ်မွဲကၠာ၊ ဍေံပ္ၚောံအာ ဍာ်ကမာပၠန်၊ ရုပ်ညံၚ်ကျာ်သၠာ် ဍေံဂွံညာတ်ပၠန်၊ ဇီုထောံဍာ်ဍေၚ် တွာ်တရေၚ်လန်၊ ဍေၚ်ဒကးဂၠိုၚ် ဟွံခိုၚ်မွဲတန်၊ ကဵုထိုၚ်သၞာံပၠန် မွဲတန်တွာ်အာ၊ ကၠဵုဍေံနွံမွဲ ဣတံၚ်လောဲကၠာ၊ စှ်ေဍာ်ကမာ ဇၟာလာဂဗက်၊ ဍေံညာတ်ရုပ်ပၠန် မွဲတန်သက်လက်၊ သလှ်ေရုပ်ဍေံ စိုတ်ဍေံဒှ်ဗက်၊ ဍေံတံၚ်ဒဇက် ဗြက်ထိုၚ်ဒကး၊ ဍေံကဵုကၠဵုသွံ တံၚ်ဟွံဗလး၊ တေံတူကၞာၚ်ဇြဲ အဝဲပၠေဝ်သအး၊ ညးထပှ်အဴ ဂြိုၚ်တဴဟးဟး၊ ဣလုဂွံမိၚ် လွိၚ်မုက်ဂတး၊ ဍေံမၠာ်ရံၚ်မွဲ တူဇြဲသာခး၊ ညးထပှ်ပြဲ အဝဲပၠေဝ်သအး၊ ဣလုညာတ်ဒး ပြဟ်ဂတးစဴ၊ စဴပ္တီရာဇ တလနန်ပ္ကဴ၊ ယွံနာဲနန်သ္ဍဴ ဒကဴလစ၊ ဍိက်ဂွံညာတ်ကၠာ တူဇြဲသာခ၊ ရုပ်အဆေဝ်သွဝ် ကောန်ခနှောဝ်ကျ၊ ဂစိုတ်ဒးချိုတ် ဒးအိုတ်ဇိ၀ိ၊ ဍိက်ဟွံတလန် ကဵုနာဲနန်မြ၊ မဟာရာဇ တလနန်ထဝ်၊ ရုပ်သာ်အဝဲ နဲကောန်ခနှောဝ်၊ သီုထပှ်ဟေၚ် ဂဇံရေၚ်ကျဝ်၊ ဇိုၚ်လစဗျာၚ် ပ္ဍဲကၞာၚ်ဇြဲထဝ်၊ ဍိက်စဴပ္တီလဝ် နာဲနန်ထဝ်ရောၚ်။ ။

သၟီနန္ဒကိတ္တိ သီုပၞာန်ပန်ကၞိပ် အာဒုၚ်ဖျဴသၟတ်ဗြဴဝုတ်ထပှ်
နန္ဒကိတ္တိ နာဲသ္ၚိနန်ထဝ်၊ မိၚ်ဣလုဟီု အကြီုရုပ်ထဝ်၊ ပ္ဍဲစိုတ်သၟီဓဝ် ချဳလၟောဝ်အာ၊ မိၚ်ဣလုဟီု သီုကရုတ်ဏာ၊ ပ္ဍဲစိုတ်သၟီကၠာ မူပမာဗီု၊ ညံၚ်ရဴဒိုက်ဂတ် မြာဂွံရတ်ကီု၊ သီုတ္ကံပန်ဟာန် အိုတ်ထာန်မဇျှီု၊ ညံၚ်ဂွံပိုၚ်အာ စက္ကဝါကီု၊ သၟီဓဝ်တၞောဝ်ဗြီု ပ္ကီုနၚ်ပမာ၊ သၟီကဵုကော်ကၠာ သေဏာဒိပ္ပ၊ ဒကိုပ်ပၞာန်ဇၞော် အမာတ်ဇၞော်ရ၊ သၟီကဵုစဳရေၚ် ပၞာန်ပန်အၚ်္ဂ၊ အမာတ်တိက္ခ တလပညာ၊ တဲစှ်ပၚ်ပ္ကောံ ညံၚ်ခမှောံသွာ၊ ဗွဲပြဟ်စှ်ေအာ လသာနန်မ္ၚဵု၊ ပၞာန်ပန်ကၞိပ် မွဲဒမြိပ်အဵု၊ ပၞာန်ပန်တွဵု ဂၠိုၚ်ဗဵုထိတ္ၜန်၊ ပၞာန်စိၚ်ဗျိၚ်ဒၟံၚ် ညံၚ်သၞံၚ်သမန်၊ သီုမဒက်လဝ် ဂဟးထဝ်သြန်၊ ပၞာန်ချေံမွဲဗော် အံသဝ်ဇၞော်လောန်၊ ညံၚ်လလဳဇုက် တူက္ဍိုပ်ယုဂ္ဂန်၊ မဒက်လဝ်ဂၠိ ဂဒံၚ်သြန်ထဝ်၊...

ပၞာန်ကွဳမွဲသာ သအဳဗ္ဂာရေၚ်ဗဝ်၊ အလာံဍုတ်မြာ် ယာတ်ဗြေဝ်ကြာထဝ်၊ သီုမဗ္ဂန်လဝ် ချေံတၞောဝ်သိန္ဓဴ၊ ပၞာန်တိုက်တုပ်တဴ ရဴသၟန်ဒြုန်၊ သအဳဂၠက်တသုန် ဇိုၚ်နန်ပုည၊ အမာတ်တိက္ခ တလပညာ၊ ဗွဲပြဟ်တိုန်အာ နန်ပါသာဒ၊ ပ္တီဨကရာတ် နာဲပြာသာတ်မြ၊ ယွံတလတိ ဘုမ္မိပါလ၊ ပၞာန်ပန်ပြကာ မှာသေဏၚ်္ဂ၊ တုဲဒှ်အိုတ်ရ ယွံတလနန်၊ သၟီကော်ဟောရာ ကာလဂှ်ပၠန်၊ ဟောရာမိၚ်ဗိုန် ပြဟ်တိုန်စိုပ်နန်၊ ပၚ်တဲယဵုတွာဲ ကဵုသၟီနာဲမန်၊ ယွံတလနန် အဂ္ဂပညာ၊ မူနွံပၟိက် ကော်ပိုဲဍိက်ကၠာ၊ သၟီဇၞော်ဂွံမိၚ် တွိၚ်ပါၚ်ဟောရာ၊ ယွံဟောရာအဲ မပြဲသာ်လွာ၊ အဲသၟိက်ဂေတ်ဂေၚ် ဂေၚၚ်ဂြိုပ်ဝါ၊ တိတ်ဝေၚ်ဥဒျာန် ထာန်ပဥ္စမာ၊ လၟေၚ်ဒဒှ် တွံညိဟောရာ၊ ပ္ဍဲဂှ်အစာ ဟောရာကိုန်စက်၊ တုဲဖျေံဂနန် တန်လဝ်က္ဍက်က္ဍက်၊ ဥတ်သြိုဟ်ဂိုတ်နး စ္ဍးစန်လက်၊ ဂွံညာတ်ကေတ်ဗက် ပ္ဍဲစက်ဇာတာ၊ အဒိုတ်မိဟ်တန် စန်ပ္ဍဲဗြိုဟ်ကၠာ၊ အ္ၚာသိၚ်သၟတ် ကန်ဗုဒ္ဓဝါ၊ ရာဟုနာံစိၚ် ကုံပသၟီကၠာ၊ ဂုရုမကဝ် သ္ၚိသဝ်ဗိစ္ဆာ၊ ကြကတ်သိုက်ကြာ တိုၚ်လအာဗျိၚ်၊ ကိုန်လအာဇိုက် ညးဒိုက်ဒှ်သၟီ၊ ကြိကုန်ကိုန်ဒြ ညိလပဒွိၚ်၊ တဝါ်ယာကြာ တိုၚ်လအာသၟီ၊ မရှာတ်ပဒွိၚ် လဟိၚ်လာဘ၊ ဂွံသတ်ဇိုၚ်ၜါ နာဲသာနန်မြ၊ က္ညအာပြဟ်ရ လပသၚ်ကာ၊ နန္ဒကိတ္တိ ဣဓိရာဇာ၊ မိၚ်ပါၚ်ဟောရာ ပ္ဍဲကာလဂှ်၊ ညံၚ်ဂွံလမုဟ် ဒှ်ပ္ဍဲစိုတ်မ၊ တုဲသၟီကျိုၚ်ကျဝ် ဗွဝ်ယဿ၊ သၠိုက်ၝောံကိုတ်သၟတ် ရတ်အနက္ဃ၊ သၞာဲခဏံၚ်ဟေၚ် ဗြကၞေၚ်ထဝ်ဂျ၊ ဂၞပ်ရေၚ်မတ် သၞာ်ရတ်အဂ္ဂ၊ ကၠေံပါသာဒ သၟီဂါံက္ညအာ၊ ဂါံဍိုက်ကွိုတ်ဇၟူ တြုံအတူလာ၊ ပ္ၚောံဥဒျာန် ထာန်ပဥ္စမာ၊ မြီမြီညှာညှာ ပၞာန်ဇက်အာရ၊ အမာတ်သေဏာ သအဳဗ္ဂာရေၚ်ဂျ၊ ပၞာန်ပန်ကၞိပ် မွဲဒမြိပ်ပၠ၊ ဗဵုဂမၠိုၚ်အဴ ဗွဲကြဴဂတ၊ ၜါလ္ပာ်လဂူ သ္တုံဇွိမူလ၊ ဍိုန်ဍိုန်လျလျ ဇက်ဂတအာ၊ ပါၚ်အသံဗဵု ဗရုကြဵုဇာ၊ ညံၚ်ရဴလအိတ် မှာသၟိတ်ဒြာ၊ ဖံစိတ်ဖံဟဝ် ဖံထဝ်ဂလာ၊ ဖံပုက်ကလုက် မန်ဒိုၚ်မုက်ၜါ၊ ဖံကၠေဝ်မုက်ပန် ဇရန်ဇရာ၊ ဖံကြေဝ်ဇတိုၚ် မန်ဒိုၚ်မုက်ၜါ၊ ဖံပဏံၚ်ခၠၚ် အခြၚ်နာနာ၊ ဖံဒုတြဘိ တိညံၚ်ကယျာ၊ ထၜးကြာဇဵု ခပဵုခရာ၊ မြီမြီညှာညှာ ဝေၚ်အာသဘၚ်၊ သြဳသြဳဂြိၚ်ဂြိၚ် ဒဗိုန်ပိၚ်မၚ်၊ လလောၚ်ကမြဴ အသံဂၞဴဂၚ်၊ သၟီရာဇာဝၚ် သဘၚ်နာနာ၊ ဗရုဂမြံ အသံကြဵုဇာ၊ မြီမြီဇက်အာ အကြာဂြိုပ်က္ဍိုၚ်၊ ဂြီုဂြီုကာန်ကာန် ဗဵုပၞာန်ဂမၠိုၚ်၊ အကြာဂြိုပ်ဆု ဖံဗြုလတိုၚ်၊ ဟုပ်ဟုပ်ရိုၚ်ရိုၚ် ဒ္ၚဳဇက်ကြိုၚ်အာ၊ စမဳညာတ်ပၠန် ဥဒျာန်နန္ဒာ၊ ဗဵုဂမၠိုၚ်ကၠာ ဇက်အာကမြဴ၊ ဗရုဖံမံၚ် ဗဵုဇက်ကၠံၚ်တဴ၊ ဗြုကၠံၚ်တမှဴ အပၠဴဟေမ၊ အာစိုပ်ဥဒျာန် သန်ထာန်လစ၊ သၟီဇၞော်ဂေတ်ဂေၚ် ဂေၚၚ်ဒေသ၊ စမဳညာတ်အာ တၞံဇြဲသာခ၊ ထောံမတ်ညာတ်ရ ပ္ဍဲခဏဂှ်၊ သီုစုံပြဝါ ကညာထပှ်၊ သၟဝ်တၞံဇြဲဂှ် သၟဟ်န်တဴရ၊ ရုပ်သာ်အဝဲ ပြဲလက္ခဏ၊ သီုထပှ်ဂေါဝ် အဆေဝ်သွဝ်ကျ၊ မဟာရာဇ သၟီတလနန်၊ ဗ္ဒောံလဝ်ဗဵုပၞာန် ထာန်လစသြန်၊ သၟိက်တီမွဲတန် သၟီနာဲနန်မြ၊ ပြဟ်ဂါံလုပ်အာ ထာန်ကညှာဏ၊ စိုပ်ဗွဲပရှ် ကာလဂှ်ရ၊ သၟာန်ဂွံတီစိ ယုတ္တိဂါမ၊ ယွံမိအဂ္ဂ ရုပ္ပဂေါဝ်လောန်၊ ဟးအဆေဝ်သွဝ် ဗွဝ်လက်သန်၊ သီုထပှ်ပၠန် သၟဟ်န်ရုပ္ပါ၊ ဟွံသေၚ်ကောန်အိန် နာဲဒေဝိန္ဒာ၊ ဟသေၚ်ခနဴ တဴလတူကျာ၊ ဟသေၚ်ခနှောဝ် ဂန္ဓဝ်ကေလာ၊ ဟသေၚ်ကောန်နာ် လတာ်ဒှ်ၜါ၊ ဟီုကဵုအဲညိ ယွံမိကညာ၊ မူဍုၚ်မူကွာန် သန်ထာတ်အရာ၊ မိမနာဲရောၚ် တၞောဝ်လှောၚ်ဝေါၚ်သာ၊ ဟီုမိၚ်ညိကၠာ ယွံကညှာဍောတ်၊ ဂွံမိၚ်ကေတ်အဴ ပ္ဍဲဂှ်ဗြဴရတ်၊ မိၚ်သၟီမသၟာန် ဂလာန်မစၟတ်၊ ဟီုတိုန်အဆတ် ဗွဲသၟတ်ယုတ္တိ၊ ယွံဨကရာတ် နာဲပြာသာတ်ပိ၊ ဂးကောန်အိန်စိ ညိပိုဲဟွံဒှ်၊ ဂးကောန်ဓနဴ ဝေၚ်တဴဒိုဟ်စှ်၊ ဂးသာ်ဂှ်ဟေၚ် ဟွံသေၚ်ဒဒှ်၊ ဂန္ဓဝ်တံဂှ် ပိုဲဟွံဒှ်ပၠန်၊ ကောန်ခနှောဝ်ဗြဴ တဴပ္ဍဲတၟံသြန်၊ နာဲဂးကောန်နာ် လတာ်ပိပန်၊ သ္ၚောဲသ္ဍးခြာခၠန် လဂ္ဂန်ကောမိ၊ ပိုဲဍိက်တုန်ပၠန် ကောန်မၞိဟ်ဇာတိ၊ မိပိုဲဍိက်ဂှ် ခြာပှ်လှ်စိ၊ ယီုတံၚ်ဂြဲဏာ ဒးမှာဇိ၀ိ၊ မပိုဲပၠေဲထောံ စွံပ္ဍဲဂြိုပ်ဂျိ၊ ထပှ်မွဲမိ သုၚ်ဂျိလောတ်လော၊ ဇၞတ်မကြၚ်ကၠုၚ် ဒေါ၀်ဓုၚ်ဟေမှော၊ ညးထပှ်ပ္ညုၚ် တွာ်ကၠုၚ်သီုဆော၊ စိုပ်လစဝွံ လ္ၚုစိတ္တော၊ ကၠုၚ်ဂဇံကောံ သၟဝ်တၞံရုက္ခော၊ ဟွံမွဲကလော ကၠၚ်ဨကောဝ၊ သီုမဒေၚ်ဗျောံ စံၚ်တူဟောံဇြ၊ ဟိုတ်ဂှ်ပိုဲကောံ သၟဝ်တၞံရုက္ခ၊ သီုမဒေၚ်ဗျောံ စံၚ်တူဟောံဇြ၊ ဂဇံဒေၚ်သၠၚ် ဇိုၚ်သြၚ်လစ၊ ကၠၚ်ဨကောဝ ရကောရာဇာ၊ နန္ဒကိတ္တိ ရာဇာဓိရာ၊ မိၚ်လဟီုမိ မိသိုက္ခမာ၊ သၟီစိုတ်စပ်အာ ကာလဂှ်ဗိုန်၊ မိၚ်လဟီုမိ ပါၚ်သိဒ္ဓိကွိုန်၊ ပ္ဍဲစိုတ်က္တဵုဒှ် လပှ်အလိုန်၊ ဘဝၚ်ပိတန် အဝဇ္ဇန်တိုန်၊ သက္ကုသ္ဍဝ် ၀ိညာန်တဝ်ဇြိုန်၊ သမ္ပတိတ်ဆိုန် တိုန်ဒုၚ်လဝ်ရဟ်၊ သန္တဳဝတှဴ နွံသဘဴသၟဟ်၊ ဇဴတဒါရီု သီုစှ်ထပှ်၊ လဟီုသ္ဇိုၚ်မိၚ် ဂွံမိၚ်တုဲဂှ်၊ ဓဝ်သောမနုဟ် မူဂှ်တုပ်ဗီု၊ ညံၚ်ၚဴတညၚ် ပ္ဍဲဥမၚ်ထီု၊ ကဵုရမျာၚ်ကီု ဗြုတဴကြဵုဇာ၊ သၟီနာဲဒိုဟ်စှ် နဲဂှ်ပမာ၊ ပ္ဍဲစိုတ်သၟီအဴ သၟိက်ဒုၚ်ဖျဴဏာ၊ တုဲဟီုတိုန်ရ ခဏဂှ်ကၠာ၊ ယွံမိကညာ သာ်လွာဂဵုမြဟ်၊ မိတ်ဂွိုၚ်ထဝ်စှ် ထပှ်မွဲမိ၊ ကောသၟိက်ဒုၚ်ဖျဴ ဒကဴနန်လွိ၊ သီုထပှ်ညဳ ပကျာ်သြဳသ္ၚိ၊ ကဵုပိုၚ်ကမၠောန် ပ္ဍဲဒေါဝ်နန်လွိ၊ ကောကဵုဒှ်ဇၞော် ပိုၚ်ဗော်သ္တုံဇွိ၊ ကဵုစဳရေၚ်စိ သ္ၚိဘိသေခ၊ တူဂတဵုလွိ ဒမၠိကာလ၊ ပသာ်စိုတ်နာဲ မိတ်သဟာဲယျ၊ တုပ်စိုတ်ညိဟာ မိကညာဏ၊ ပသာ်စိုတ်ရ နာဲမှာဲယျရော။ ။

သၟတ်ဗြဴဝုတ်ထပှ် ဒဴတိတ်နူနန်ကလော်ဗြဴမိသဳနန္ဒာ
လၟေၚ်ဒဒှ် တဝှ်လက်သန်၊ အဏံပ္ဍဲနန် တန်ပ္ဍဲဂေဟ၊ ညးထပှ်ကၠာ စန်စာတဴရ၊ ယွံလေဝ်ဒေံတံ မဇၟံရုပ္ပ၊ ၝဲရောၚ်ဇၞော်အိုတ် စိုတ်ၝဲဒည၊ သိက်စိုတ်ဒေံတံ ၝဲချံဂန္ဓ၊ မိပိုဲဝွံဂှ် ဒှ်ဗြဴယက္ခ၊ စမၞိဟ်ရိုဟ်တ္ၚဲ ပ္ဍဲစာတ်ပေၚ်သ္ဒ၊ ရိုဟ်တ္ၚဲမွဲမွဲ ဝးကံနဲက၊ ဖေက်စပိုဲပၠန် ဒးသ္ကန်ဇိဝိ၊ လမုဟ်မွဲတဲ စိုတ်ပြဲဏီရ၊ ကြဴပိုဲဒးဘဲ တဝဲသြာ်စ၊ ပိုဲဒၟံၚ်လံလ တီရနဲကဲ၊ အာရဒေံတံ တမံညးအဲ၊ လဟီုမိဂှ် ကၠုၚ်ပြဟ်မွဲတဲ၊ ဒဵုထပှ်တ္ၚဲ နဲဂှ်စိုပ်သ္ၚိ၊ ထပှ်တ္ၚဲကၠာ အာဂးဒမၠိ၊ ဗွဲပြဟ်တုန်အဵု စိုပ်ဂတဵုလွိ၊ အာလမုဟ်ရ မွဲသတ္တစိ၊ ပိုဲဒဴကဵုပြဟ် ထပှ်မွဲမိ၊ တီထမုန်စိ မိယက္ခဗြဴ၊ ဂၞိန်ယာတ်ပၠးဂၠး ဒၞဲါဒးမတ်အဴ၊ လဗိုန်ဇကု ၝဲဂၠုစိုတ်က္တဴ၊ စှ်ေနူသ္ၚိကၠတ် မှတ်ဂြိုပ်အပၠဴ၊ ဇိုၚ်တဲပရှ် ဒြေပ်ထအှ်ဒဴ၊ တွာ်အာဆဴဆဴ တရဴသ္ၚောဲလောန်၊ ထပှ်တ္ၚဲဖျာ် တဝါ်မၞိဟ်ပၠန်၊ တွာ်အာမွဲမွဲ ပ္ဍဲဟေမဝန်၊ ညိဟွံထၜိုပ် အာစိုပ်ပြဟ်သန်၊ စိုပ်ဂြိုပ်မွဲပၠန် မိပ်သ္ၚိပ်လောန်အာ၊ စိုပ်ဂြိုပ်ဓိဝါန် ဗၠးထာန်ယက္ခာ၊ ဂွံပိုက်လမောၚ် ထောၚ်ပ္ဍဲခန္ဓာ၊ ဗၠးတဝဵုကၠာ ဗြဴယက္ခာတုန်။ ။

လၟေၚ်ဒဒှ် တဝှ်ဖဵုဂုန်၊ လၟေၚ်ပုံတုန် ပိုဲဟီုပ္ဍုန်ဏာ၊ အကြီုယက္ခာ သဳနန္ဒာဆာဲ၊ မိသ္တိက်ပ္ဍဲဂြိုပ် ဖျေံက္ဍိုပ်ဒလာဲ၊ ဒ္ၚဳမိလှိၚ်အာ ယက္ခာဗြဴကၟာဲ၊ ညာတ်နိမတ်သွပ် ဒဇပ်လောန်ကာဲ၊ ဒန္တာဗြဴရတ် ခလောတ်ပြဟ်ချာဲ၊ ထပှ်တၞုၚ် ကၠုၚ်ပြဟ်ဂစာဲ၊ ညံၚ်ၚေက်သအုဲလာဲ ပြဟ်ချာဲဒုဒု၊ ဂၠဲါလေဝ်ဟွံဂွံ ဂိုဟ်ၚေက်ကိုဟ်ဗု၊ မိၚုဟ်တိုန်အဵု က္တဵုမွဲဗရု၊ ဒွိၚ်ကဵုကောန်ဂှ် ထပှ်ဇကု၊ ပ္ဍဲစိုတ်သမ္ၚု ဇကုဒြဴဒြဴ၊ တွာ်စဴယံယံ ဟွံပၠံတရဴ၊ ပရှ်ဇိုၚ်ဂါံ လာံပါံတွာ်စဴ၊ မိတွာ်ဆဴဆဴ ပ္ၚောံစဴသ္ၚိ၊ ဂါံဇိုၚ်သ္တုံကၠာ ကၠောံအာဇိုၚ်ဇွိ၊ စမဳညာတ်စိ နန်လွိဂေါဝ်ဆာဲ၊ ယက္ခလီၜန် ပ္ဍဲနန်ဗက်ဂၠဲါ၊ သဳနန္ဒာဆာဲ နာဲစိုပ်နန်လွိ၊ ညးထပှ်အဴ ဒြေပ်ဒဴထောံမိ၊ ယက္ခဂိုဟ်သၟတ် ညံၚ်မတ်သ္တုံဇွိ၊ ဒေၚ်ဗျောံလ္ၚုၚ်လ္ၚ စိုတ်ၜါဆဂျိ၊ ဒှ်အဲလွဳတဴ တရဴသၞာံစိ၊ ဟွံလက်ဟွံဒေါန် စိုတ်ဟွံစောန်ကၠိ၊ ဂြိုပ်စှ်သၞာံညဳ လွဳမံၚ်ပ္ဍဲသ္ၚိ၊ ယာဲဟွံပျဲပျာံ ဟွံကဵုယာံညိ၊ လေံလဂုၚ်စး ဟွံကဵုဒးညိ၊ ညံၚ်သပါသြိုဟ် ကောန်ဖျုန်ဂြိုဟ်မိ၊ ညံၚ်ဗီုကောန်ဂၞဴ လလဴတသိ၊ စှ်တရဴသၞာံ ဂွါံအယုက်စိ၊ နာဲဟွံဗှ်ညိ ကဵုမိဨကော၊ ယက္ခသ္ၚဳကၞပ် ဖြပ်ဖြပ်ယာံလော၊ ၀ိုတ်သတိဗၠေၚ် ပ္ဍီုသြေၚ်စိတ္တော၊ တက်သြိုဟ်ဆာံဆာံ ဂတေဝ်ယာံလော၊ သဳနန္ဒာရော လောတ်လောပ္ဍဲသ္ၚိ၊ သမ္ၚဟ်တိုန်သွံ မိဂွံသတိ၊ ဟဝ်ဒမုၚ်ဍုၚ် ကၠုၚ်နူအဒိ၊ သၠုၚ်ပိတာ နူတမၠာစိ၊ ဒှ်တိုန်ဘုံထိ ပိဘုံသေၚ်ဟာ၊ မွဲဘုံဖံမွဲ စွံပ္ဍဲဟဝ်ကၠာ၊ ဘုံဒေါဝ်တုန်သၟဟ် ဘုံကၞတ်မာ၊ စွံဖံမွဲမွဲ ပ္ဍဲဘုံအကြာ၊ မိသဳနန္ဒာ ဒြေပ်ဇၟာတိုန်ဂျ၊ စိုပ်ဘုံကၞတ် ဖျေၚ်မတ်သ္ၚဳရ၊ သ္ၚဳပန်ဒိုဟ်သ္ဍာံ ဒစာံဒိုဟ်ပၠ၊ ဒိုဟ်ဗမံက်ဆက် ဗွဲဒက္ခိဏ၊ ဒိုဟ်ပလိုတ်ခုတ် ကၠောံဥတ္တရ၊ ဍေံညာတ်ကေတ်ကၠာ မွဲသာဘာဂ၊ လောန်ပွိုၚ်ဍေံကွေံ ဍေံဖေက်ဒည၊ ညာတ်တွာ်အာကောံ ကြာတၞံရုက္ခ၊ ဍေံစှ်ေနူဟဝ် ဟွံလဝ်မန၊ ပၠဣဓိရ ယက္ခထဍေၚ်၊ နဣဓိကၠာ ညန်အာဗွဲလွေၚ်၊ ယက္ခစိုတ်ဗၠေၚ် ထဍေၚ်ဗက်တုန်။ ။

ဒေဝတဴၜါ ပၞုက်သၟတ်ဗြဴဝုတ်ထပှ် တၞဟ်နသ္ဂောံဗၠးပရိုက်လွပ်ကလော်ဗြဴမိသဳနန္ဒာ

ပ္ဍဲကာလဂှ် ပဒှ်သာ်လွာ၊ နွံတၞံဇြဲမွဲ ပ္ဍဲထာန်ဂှ်ကၠာ၊ ဒေဝတဴမာ ၜါမွဲလၟေၚ်၊ ဂွံအဝဵုပြဲ ပ္ဍဲဇြဲဇရေၚ်၊ ညာတ်ယက္ခဟေၚ် ထဍေၚ်ညးထပှ်၊ က္တဵုဒှ်မေတ္တာ ဒေဝၜါဂှ်၊ ပိုဲဒးသ္ဍံၚ်သွာ အာပြာ်လမှ်၊ ပၠေၚ်ဗ္ဒဟ်ရုပ်ၜါ ပိုဲအာကဵုသၟဟ်၊ မွဲရုပ်စာၚ်ဗြဴ ရဴဝွံက္တဵုဒှ်၊ မွဲရုပ်စိၚ်အဵု ဇၞော်ကဵုကြဳဇှ်၊ ပၠေၚ်ဗ္ဒဟ်ရုပ်ဟာန် နာဲယာန်သၞေဟ်ပြဟ်၊ ဗ္ဒဟ်ရုပ်စာၚ်ဗြဴ ရဴနွံကောန်တှ်၊ ဇကုဇၞော်လောန် ဒေါန်ဗြုက္ဍဟ်ဟ်၊ ခရာသၞေၚ်ဂှ် ဒှ်တၟာစက်ကွဳ၊ မွဲရုပ်စိၚ်ဗိုန် သီုကွိုန်အိန်ရဳ၊ ဟတှိစိၚ်ဗြဴ တဴဇိုၚ်ဂၠံၚ်ပ္ညဳ၊ ပ္ဍဲဍာန်ဒၟံၚ်ကၞပ် ဂဒပ်သ္ၚဳ၊ ထပှ်မွဲဂၞဴ ညာတ်ဗြဴယက္ခဳ၊ ပရှ်ဇိုၚ်အဴ ဒြေပ်ဒဴတဝဳ၊ ညာတ်ဍေံစိုတ်ချဳ ဒ္ၚဳညာတ်စာၚ်ဗြဴ၊ ဒြေပ်လုပ်သီုသ္ကံ တဲခၠံပူဇဴ၊ .....

ယွံမိစာၚ်ဟိုဲ ပြာ်ပိုဲညိအဴ၊ ကလော်ဗြဴဟေၚ် ထဍေၚ်ညံၚ်ဂၠဴ၊ ပြာ်လဝ်ကောန်ဂၞဴ စာၚ်ဗြဴယွံမိ၊ စာၚ်ဗြဴမိၚ်ဟေၚ် ပြဟ်ကေတ်နၚ်စိ၊ ယွံလေဝ်ကောန်အဲ ထပှ်မွဲမိ၊ လုပ်ဗ္ဒသြိုဟ်ယာဲ ပဒွိၚ်ဒွဲါစိ၊ ပြဟ်လုပ်ကၠုၚ်ညိ မိဂဒပ်နာဲ၊ ညးထပှ်ကောံ ပ္ဍဲဂၠံသၞေၚ်ယာဲ၊ ညံၚ်စာၚ်ဂ္ဒပ်ကောန် ဃောဟန်ခမှာဲ၊ လရိုအ်ကံက်ကံက် ၜံက်ချောဲဂစာဲ၊ ဂဒပ်လဝ်နာဲ ကောန်ယာဲထပှ်၊ ယက္ခဗြဴဟေၚ် ထဍေၚ်ဗက်ပြဟ်၊ မတ်ဍေံဟွံပေၚ် ဒြေပ်ဟေၚ်တဆှ်၊ ကၠေံအာပ္ဍဲမတ် ကောန်ဍောတ်ထပှ်၊ ယက္ခသ္ၚဳမွဲ ပ္ဍဲထာဏဂှ်၊ ဟွံညာတ်ကောန်သၟဟ် ထပှ်မွဲမ၊ ညာတ်ဆစာၚ်ဗြဴ ဗြုတဴကြံကြ၊ ဓဂြလဝ်သၞေၚ် တၟာပြေၚ်ဟွံက၊ လရိုအ်ကံက်ကံက် ညံၚ်ဗီုၜံက်စ၊ နန္ဒာယက္ခ ဖေက်ရစာၚ်ၜံက်၊ ဒတဴတုဲသၟာန် စာၚ်ထမှဴတ္ၚံက်၊ ယွံစာၚ်ၝောံဇၞော် ဗော်စာၚ်ပစံက်၊ ညံၚ်ဂဒပ်ကောန် ဇၞော်လောန်ဖေက်ဂၟံက်၊ စမှဴခြးၜံက် ဒညံက်ဒၟံၚ်တဴ၊ ကောန်အဲထပှ် ဒြေပ်တဆှ်ဒဴ၊ ညာတ်ညိကီုဟာ ကုက္ကတာဗြဴ၊ ဟီုစညိအဴ နာဲတဴဇိုၚ်ဂၠံၚ်၊ စာၚ်ၝောံတေံမိၚ် ဟွံဂွံသွိၚ်ရံၚ်၊ ဟာဲဗြဴယက္ခ ပကၠုၚ်သၟာန်စံ၊ ဟွံဆဵုဟွံညာတ် ဒတဴနှာတ်မံၚ်၊ ဒးကဵုတၚ်က္ၜံၚ် ထပက်သြံၚ်ဂြိုဟ်၊ ဟွံတီတဲဟာ က္လေၚ်အာဗြိုဟ်ဟ်၊ တက်ကဵုဓရဟ် က္ဍဟ်ကဵုတလိုဟ်၊ စဴအာဗြိုဟ်ဟ် ယဝ်ဂိုဟ်လမျီု၊ ဗှ်ေပကၠုၚ်သၟာန် ဂလာန်အိုဿီု၊ စဴအာကဵုပြဟ် က္ဍဟ်လသာလီု၊ ကောန်မဣဓီု ပဟီုကရောတ်၊ သဳနန္ဒာမိၚ် တွိၚ်စာၚ်ဗြဴသၟတ်၊ လီုတဴမုက်မတ် ဗြဴရတ်ယက္ခာ၊ ရမတ်ဒဇူ နူစက္ခုဒွါ၊ မူညံၚ်မတုပ် ဗီုဥပ္ပမာ၊ စာၚ်ဗြဴတုပ်ရ သဳဟရာဇာ၊ ဟွံစမုက်အဵု ကဵုသုနက္ခာ၊ မိသဳနန္ဒာ ဖေက်အာစာၚ်ဂှ်၊ ညံၚ်သုနက္ခ ဖေက်သဳဟသၟဟ်၊ ပမာသာ်ဂှ် တုပ်သၟဟ်ညဳသာ၊ မိကလော်အဴ ဖေက်စာၚ်ဗြဴကၠာ၊ ကလေၚ်စဴအာ၊ ပ္ဍဲကာလဂှ်၊ ဗွဲပရှ်သ္ဍာံ ဇိုၚ်ဂါံတဆှ်၊ သဳနန္ဒာဂှ် ပြဟ်စိုပ်နန်ကၠတ်၊ တိုန်တူဟဝ်သၠုၚ် ရံၚ်ကၠုၚ်အိုတ်မတ်၊ ဍေံဟွံညာတ်သၟတ် ပၠောတ်ဇကုဂၠဝ်၊ လတူဒေန်ထဝ် သ္တိက်ဂၠဝ်တဴတုန်။ ။

စာၚ်ဗြဴမဒှ်ဒေဝတဴ ထဍေၚ်ကၠေံကလော်ဗြဴတုဲ သၟတ်ဗြဴဝုတ်ထပှ် မဂွံဗၠးပရိုက်ဘဲလွပ်။ ကလော်ဗြဴမိသဳနန္ဒာ ဆံၚ်ဗက်ရပ် သၟတ်ဗြဴဝုတ်ထပှ်ပၠန်တုဲ ဆဵုဂဗဒး စိၚ်ဒေဝတဴ။
တေံကလော်ဗြဴ စဴအာတုဲရ၊ အဏံတုန်အဴ စာၚ်ဗြဴဒေဝ၊ ပၠးကၠေံသၞေၚ်ရ ကာလဂှ်ကျဝ်၊ ညာတ်ညးထပှ် ရုပ်သၟဟ်ထဝ်၊ အာရရုပ်ထဝ် မိတဝ်စရှ်၊ နာဲညးထပှ် ခါဂှ်ဂွံမိၚ်၊ လပှ်ဨရာ သပါတဲဗျိၚ်၊ တူဒလာၚ်ကၞေၚ် စွံပြေၚ်လဝ်သွိၚ်၊ ကလံမိဂၞဴ ကောန်ဗြဴဗၠးဒွိၚ်၊ ကောန်ဂွံသိုက်လှိၚ် ဗၠးဒွိၚ်ရမိ၊ ဂးသာ်ဂှ်ဟေၚ် ပ္ဍဵုကၞေၚ်ဒဵုတိ၊ သာဓုသာဓု သတြုပဲါညိ၊ အန္တရာဲယေ ၀ိနာသေတိ၊ ဇၟာပ်သတြုကၠာ ပကဵုပါမြိ၊ တိုၚ်ဂနပ်စိုတ် ကဵုဒှ်အိုတ်ညိ၊ သတြုသ္တုံဇွိ ကဵုပဲါညိကောန်၊ ဗြဴကုက္ကတာ မောဒနာပၠန်၊ မောဒနာတုဲ ဟွံသဏုဲခၠန်၊ ညးထပှ်မာ တွာ်အာယောန်ယောန်၊ မိစာၚ်ဗြဴပၠန် ကၠေံဗဒန်အာ၊ .....

ညးထပှ်ကၠာ ကြာဟေမဝန်၊ ကြိုၚ်ဂနိၚ်အာ ကာလဂှ်ပၠန်၊ ဆဵုအၚ်ဆဵုလှာ ဆဵုဝါဇခန်၊ ဆဵုဂြိုပ်ဆဵုဂၞိၚ် ဂမြိၚ်တန်တန်၊ ဆဵုတၟံသမၠုၚ် ဒဵုလဂုၚ်ညန်၊ ဆဵုဇီုလဂေါ၀် ကြၚ်ကြောဝ်အာပၠန်၊ ဇခန်ဇခန် ဂၠိုၚ်သန်ပြကာ၊ ဇၞတ်အာတဴသၟဟ် ညးထပှ်ကၠာ၊ ထပှ်တ္ၚဲမာ ခြာနူစာၚ်ဗြဴ၊ အာတဴဒေါ၀်ဂြိုပ် ဗဒိုပ်တရဴ၊ ဍောၚ်ၜိုတ်ဇူတဴ တရဴဂှ်ပၠန်၊ ဇူဖဲက္တဵုအာ ကြာဟေမဝန်၊ ဂါံတွာ်မွဲတဲ နဲကောန်ၜိုပ်ၜၚ်၊ တွာ်အာသိုက်က် ဒဒိုက်ရိၚ်က္တၚ်၊ လဆောဝ်ပေၚ်ဂၞဴ လဆောဝ်လဴကြၚ်၊ လဆောဝ်အေၚ်အောတ် သစ္ဆုဂွံနၚ်၊ ဂွံပပြဘိုက် ဒဒိုက်ကောန်ကၠၚ်၊ ဆဒးဂေၚ်ကြၚ် ကောန်ကမၠၚ်ယာဲ၊ တွာ်ဍောၚ်တုဲဇူ ဇနူဗိုၚ်လာဲ၊ သၟဝ်တၞံဆုရ ရုက္ခမိဗ္ဒာဲ၊ လပုဟ်တဲယဵု တူကၞေၚ်ယဵုကွာဲ၊ သီုထပှ်ဗ္ဒာဲ တံဒၞဲါရုက္ခ၊ ညံၚ်က္ၜၚ်မအာ ဂၚ်ဗာလဝ၊ ဟွံတီဒိုဟ်ကၠၚ် ဒေါဝ်ဂၚ်ဟေမ၊ ညးထပှ်ရ ဂတအာတဴ၊ ...
သဳနန္ဒာဂှ် သမ္ၚဟ်တိုန်အဴ၊ တူဟဝ်တိုန်မံၚ် ဍေံရံၚ်ဗက်တဴ၊ သီုပန်ဒိုဟ်သ္ဍာံ ဒစာံဒိုဟ်နှဴ၊ တုဲဍေံညာတ်အာ မိကညာဗြဴ၊ သဳနန္ဒာအဴ စှ်ေတဴနူဟဝ်၊ ပၠဣဓိသာၚ် ညံၚ်ကလာၚ်ပဝ်၊ ပရှ်ညံၚ်စက် ဍေံဗက်ကြတ်သ္ဂဝ်၊ စောန်စောန်ညာတ်တဴ ဗြဴထပှ်ကျဝ်၊ ညးထပှ်ဟေၚ် ကလေၚ်ရံၚ်ကျောဝ်၊ ညာတ်ဍေံဒြေပ်ဗက် ပလက်ဍေၚ်ဇွောဝ်၊ ဗြဴထပှ်ကျဝ် လၚ်ဇွောဝ်ဒြေပ်ပြး၊ ဂွံညာတ်စိၚ်ဗြဴ ဒဴလုပ်အောပ်ဗ္ဒး၊ ရီုဍိက်ညိအဴ စိၚ်ဗြဴယွံမၞး၊ ယွံမိဟတှိ သိဒ္ဓိပြဲသအး၊ ပြာ်ပိုဲမွဲဝါ ယက္ခာဗက်ပြး၊ ယဝ်မိဟွံရီု လမျီုဂတး၊ လမျီုပိုဲပြဲ ဟွံမွဲလှာဲၜး၊ ဍောၚ်လပဂး ပြာ်ဗလးညိ၊ စိၚ်မိၚ်ပါၚ်ပြဲ ထပှ်မွဲမိ၊ ပြာ်ညးထပှ် ဗ္ဒဟ်ကြုတ်ဏာညိ၊ ဟွံပြာ်မဂး သ္ဒးလီုဇိဝိ၊ ဒှ်အရှန်မွဲ ဂွံဇြဲဗောဓိ၊ ပစၞးမိ ပြာ်ညိမွဲဝါ၊ ဒေဝစိၚ်ဗြဴ မိၚ်တဴသေၚ်ဟာ၊ ယွံမိကောန်ဂၞဴ ဗြဴသိုက္ခမာ၊ လပဒွိၚ်ဒွဲါ ယာဲဟီုဆေဝ်တာ၊ လုပ်မံၚ်ဂၠံသာၚ် ပ္ဍဲပါၚ်ပြဲဖာ၊ မိခၜံလဝ် ကောန်ဗြဴထဝ်ဏှာ၊ ပ္ဍဲပါၚ်လုပ်သ္တိက် စဵုဇနိက်ဇာ၊ ညံၚ်လုပ်ရကောန် ဍေံညန်စိုပ်ကၠုၚ်၊ စိၚ်ဗြဴပံက်ဟာ ပါၚ်တၟာန၊ ညးထပှ်ပ္ညပ် ဒြေပ်လုပ်အောပ်ဗ္ဒ၊ ပ္ဍဲဂၞဴစိၚ်အဴ ဒၟံၚ်တဴသ္ၚိတ်ဇြ၊ ...
ဒေံဒဒေံမွဲ ယာတ်ဍောတ်ပြဲဂၠ၊ လကဲတိတ်ဒၟံၚ် ရံၚ်ဒှ်မွဲသ္ဍ၊ ကလော်ဗြဴပၠန် နန္ဒာယက္ခ၊ ဍေံညာတ်ရ ကာလဂှ်ကၠာ၊ ဒၞဲါ၀ွံတုန်ကွေံ ကောန်ဍေံကၠေံအာ၊ သီုထပှ်မာ ကၠေံအာပ္ဍဲမတ်၊ ဗက်ဂၠဲါအဆတ် ကောန်ဍောတ်ရုပ္ပ၊ ဗြဴမှာယက္ခ မိညာတ်ဆစိၚ်ၚ်၊ ကၠေံအာမွဲတဲ ပ္ဍဲဒၞဲါဝွံအိၚ်၊ သ္ၚဳရံၚ်နမတ် မုဟ်ယာတ်ဍောတ်ဂၠိၚ်၊ တိတ်ဂၠိၚ်လကဲ အပ္ဍဲပါၚ်စိၚ်၊ ဂါံတွာ်လုပ်သၟာန် နာဲယာန်ဂြိုပ်ဂၞိၚ်၊ နာဲတဴဇိုၚ်ဂၠံၚ် ဒှ်ဒၟံၚ်လဟိၚ်၊ နာဲတံဒှ်သၟီ စိၚ်ဗြဴဆဒ္ဒန်၊ အဲညာတ်ညိရ နာဲပထလန်၊ ကောန်အဲထပှ် ရုပ်သာ်သၟဟ်န်၊ ဆဵုညာတ်ကီုဟာ ဗြဴမှာဆဒ္ဒန်၊ ဟီုစညိပၠန် မိဆဒ္ဒန်ဗြဴ၊ စိၚ်ဗြဴဂွံမိၚ် သွိၚ်လက္ကရဴ၊ ကတောဝ်ခ္ဍေါပ်ကၠေံ ဇိုၚ်ထေံတိအဴ၊ ပါၚ်လပှ်ဂၠံက် တဲထံက်လက္ကရဴ၊ မုက်ပလှ်ေတဴ စိၚ်ဗြဴဟတှိ၊ လပှ်ဂၠါံဂဲါ ဂၠဲါရပ်တၟံတိ၊ အဇဗိုတ်ကၠဟ် လေံတနှ်ဂ္ညိ၊ အုဲတိလယှ် က္ဍိုပ်က္ဍဟ်ကၠိုက်ကၠိ၊ ကရေဲရမျာၚ် ကဵုပါၚ်ညံၚ်ဂျိ၊ ဟိုဲဗြဴယက္ခိ ညိဟွံတီဟေၚ်၊ ဂၠံၚ်အဲဝွံအဵု သီုကဵုဂၠဴပြေၚ်၊ မၞိဟ်ကဵုဒှ်ပြဲ ဆဵုအဲထဍေၚ်၊ အဲဟွံဆဵုဟေၚ် ပကလေၚ်သၟာန်၊ ဗှ်ေပကၠုၚ်ဒြဟ် ပဗ္ဒဟ်ဂလာန်၊ ဗှ်ေပကၠုၚ်ပၠေဝ် အရေဝ်ဟီုကြာန်၊ ပဗ္ဒဟ်ဂလာန် ဗှ်ေပသၟာန်ညိ၊ ဟာဲဣပါပ ယက္ခဗြဴဂျိ၊ ကလေၚ်ကၠေံပၠန် ဗှ်ေသ္ကန်ဇိဝိ၊ အဲသြာ်ဒဳၜါ ချိုတ်ဗၠိုက်ကြာတိ၊ စိၚ်ဗြဴထဍေၚ် ဝးကၞာၚ်ကြေၚ်စိ၊ ကလော်ယက္ခိ ဖေက်ညိဟသေၚ်၊ ဟာဲမိစိၚ်ဗြဴ တဴပ္ဍဲဂြိုပ်ကြေၚ်၊ မုသာစဏာဲ ဂၠဲါဟီုတၟေၚ်တၟေၚ်၊ ဗှ်ေမုသာဟေၚ် ပါၚ်ညံၚ်ပြေၚ်ဂၠဴ၊ ယာတ်ဍောတ်လကဲ ဗှ်ေလဝ်ပ္ဍဲဂၞဴ၊ ယာတ်လကဲဒၟံၚ် ရံၚ်ရစိၚ်ဗြဴ၊ ဗှ်ေဟီုဟွံဓဝ် ဒေပ်လဝ်ဝဴပဴ၊ နူဝွံဆတ္တဝ် အဲလဝ်ကသဴ၊ ပါၚ်ကဵုလကဲ ဂတဗွဲကြဴ၊ ကလော်ဗြဴချဴ ညံၚ်ရဴသာ်ဂှ်၊ ကဵုပါၚ်လကဲ နဲဂှ်ကဵုဒှ်၊ ဇၟာပ်ဘဝဂှ် ကဵုဗှ်ေဒှ်ညိ၊ ကဵုလဝ်ကသဴ ဗြဴမှာယက္ခိ၊ ဒဵုလၟုဟ်စိ ညိဟွံမှာဆာဲ၊ ဒးကသဴဗျိၚ် ပါၚ်စိၚ်တလာဲ၊ တိတ်လကဲဒၟံၚ် ညံၚ်ကဵုသ္ၚိသာဲ၊ ကောန်ဗြဴထပှ် ဒဒှ်ပျဲယာဲ၊ ဒဒှ်အဲလွဳ ကျာ်သြဳဂေါဝ်ဆာဲ၊ အဲကဵုကောန်ဂှ် ဒှ်ဝဲရနာဲ၊ ဍေံဒတောဝ်ဝဲ ပ္ဍဲစိၚ်ဂှ်ဆာဲ၊ ဒဒှ်လွဳနာဲ ယာဲဒးကၚ်ဇတ်၊ ကဵုဂွံဂၠံက်သၟတ် မတ်ညးထပှ်၊ ကဵုဂွံဂၠံက်ပြဟ် ဘဴလၟုဟ်ညိ၊ တုဲကလေၚ်စဴ ဗြဴမှာယက္ခိ၊ ဍေံတ္ၜေဟ်ဟီုဗျိ ဟတှိစိၚ်ဂှ်၊ အဲကလေၚ်စဴ ရဗြဴတၚ်စှ်၊ မုဟ်ယာတ်ဍောတ်ဂှ် ကဵုဒှ်ပါၚ်စိၚ်၊ အဲစဴရၝာဲ ဟာဲမုဟ်ပါၚ်ဂၠိၚ်၊ စိၚ်ဗြဴမိၚ်ဟေၚ် ထဍေၚ်ဂြိၚ်ၚ်၊ ဍေံဒြေပ်တဆှ် ပြဟ်လောန်နူစိၚ်၊ နန္ဒာဟိၚ်ဟိုပ် စိုပ်နန်ဇမၠိၚ်၊ ဒေါဝ်ကမၠောန်ဍိက် ပိုက်ပၞိက်လွိၚ်၊ တူနန်ဒြၚ်စိၚ် သိုက်လှိၚ်တဴတုန်။ ။

သၟတ်ဗြဴဝုတ်ထပှ် ကြိုၚ်ကြၚ်အာစိုပ် ဇရေၚ်ဍုၚ်ဗြၜၚ်တုဲ သတိက်ဗတံ ပ္ဍဲဂွိုၚ်ဇြဲမွဲတၞံ။
လၟေၚ်ဒဒှ် တဝှ်သဘဴ၊ အဏံစိၚ်ဗြဴ ဒၟံၚ်တဴဇိုၚ်ဂၞိၚ်၊ ကလော်ဒြေပ်ဒဴ ကမြဴဂမြိၚ်၊ ကၠာတ်ပ္တိတ်ဗွဲပြဟ် ကာလဂှ်ဗျိၚ်၊ ဗြဴရတ်ထပှ် ဂွံဒှ်လဟိၚ်၊ ၜိုဟ်စိုတ်လှဲလး ညိဟွံဒးဂွိၚ်၊ ကြၚ်ပ္ဍဲဂြိုပ်ဂၞိၚ် ဗၠးဒဝိၚ်ဇၞော်၊ ဗွဲဒိုဟ်ပုဗ္ဗ ဂတဗမံက်၊ နွံဍုၚ်မွဲရ ဗြၜၚ်ညးကော်၊ ဗဒေသရး ဂၠိုၚ်ကဵုသွးဗော်၊ စိုပ်ထာန်ဂှ်ပၠန် တန်ဂွံဒှ်ဇၞော်၊ ထပှ်မွဲဗော် ဍောတ်ဇၞော်ညဳသာ၊ အာရပဒွိၚ် ယာဲစိၚ်ပ္ညုၚ်ဏာ၊ ဗက်ပါၚ်ယာဲစိၚ် ပဒွိၚ်ဒွဲါကၠာ၊ ပၚ်တဲယဵုပ္ကောံ ညံၚ်ခမှောံသွာ၊ ယွံမိကျာ်ဂန် ဂုန်အနန္တာ၊ ကောန်ကလံရ ပါၚ်ပဍောၚ်သွာ၊ လပုဟ်တဲစှ် နဲဒကှ်ၜါ၊ ကလံရမိ ဖျေံက္ဍိုပ်ပိ၀ါ၊ ယာဲစိၚ်မိၚ်ဗိုန် ဟီုတိုန်ဟွံညှာ၊ သာဓုသာဓု နုမောဒနာ၊ တိုၚ်ပၟိက်သွံ ကဵုနာဲဂွံမြာ၊ တိုၚ်ပတ္တဏာ ကဵုဂွံမြာညိ၊.....

ညးထပှ်ဟေၚ် ဖျေၚ်ရံၚ်ဟတှိ၊ ကၠေံဗဒန်အာ သၚ်ကာစိုတ်မိ၊ စိၚ်ဟွံသေၚ်မာ ဒေဝါရုက္ခိ၊ ဒေဝတဴဂှ် တန်ဒှ်ဒမၠိ၊ ကၠုၚ်ပြာ်ပိုဲစိ ယွံလေဝ်ဒေံတံ၊ ပၚ်တဲတယျောဝ် လ္ၚောဝ်တမံ၊ တဲၜါယဵုခၠံ ကလံတုဲအာ၊ ပ္ဍဲဒေါ၀်ဂြိုပ်ဂၞိၚ် ဗရိၚ်ဇိုၚ်ဝါ၊ ဗဵုဆုဒုန်အဴ ဗဵုပ္ကဴနာနာ၊ ဂမုၚ်ဓိတာန် ပ္ကဴပြာန်စမ္ၚာ၊ မိဂါံတွာ်အာ အကြာဂြိုပ်ဆု၊ ဍောၚ်ပ္ကဴရာၚ်ဗွဝ် တဝ်သွဝ်ဇုက်ဂၞု၊ ဒဇေၚ်ဍိုက်္ၚာန် ထာန်ဂြိုပ်လမ္ၚု၊ ပ္ကဴကြေၚ်ဇမ္မု အဂၞုရာၚ်ဗ္ဂာ၊ အနာၚ်ရာၚ်ပြီု ပ္ကဴရီုမွဲသာ၊ အၚ်ရေၚ်သ္ဇၚ်ထောဲ လပေဲါစမ္ပာ၊ ညးထပှ်ကၠာ တွာ်အာဟွံဇူ၊ ပ္ဍးတမှာဲပိုဟ် ဖျုန်ဂြိုဟ်ဒတူ၊ ပ္ကဴကလံနန် ခၠန်ထောံဇနူ၊ ပ္ကဴသ္ဍိုက်အိန် ကမိန်လတူ၊ ဗပေၚ်ဇာတ်ကၠံၚ် ရာၚ်ညံၚ်သိန်လှူ၊ ပ္ကဴညးပုဗှ လှောၚ်ပၠရာၚ်အူ၊ ပ္ကဴညးဇံမု ရာၚ်ဂၠုသရူ၊ ထိုၚ်သာဲဇၟာပ်ဖူ ဂၠိုၚ်အြဇရေၚ်၊ ပ္ကဴညးအမ္ဗာ ရာၚ်ဗ္ဂာတရေၚ်၊ ညးဥတ္တရ စိတ္တကၠိုက်လ္ၚေၚ်၊ ဍောၚ်ပ္ကဴဂှ်အဵု ဟွံကၠုၚ်တဵုပြေၚ်၊ ညးထပှ်ဟေၚ် ရေၚ်ရေၚ်တွာ်တဴ၊ ဂွံအရီုကျဝ် မြမောဝ်ဍောၚ်ပ္ကဴ၊ သီုစိုတ်လိုက်လဴ တွာ်တရဴပၠန်၊.....
တုဲမိအာစိုပ် ဂြိုပ်ဟေမဝန်၊ ဗဵုသတ်ဇိုၚ်ပန်လီၜန်သီုဆော၊ တ္ၜိုၚ်ဒြာဲကလိၚ် စိၚ်သြိတ်လမော၊ ဇက်ဂၠေဲါခမၞၚ် စိၚ်ဒြၚ်သီုဆော၊ ဂြဲစဗိုၚ်လာဲ ပယာဲဟေမော၊ ညးထပှ်ရော ဂၠိုၚ်အြစိုတ်က္တဴ၊ ပြေၚ်ပြဝါအဴ ဂၠဴဥဿဘ၊ ဗဵုသြိတ်ကလိၚ် ဗဵုစိၚ်ဗဵုကၠ၊ ဗၜေံဒြာဲဝါ ဒြာဲသာရဒ၊ ဗဝါမၚ်ဂဝ် ဗက်ကျောဝ်သတ်ချ၊ ဒြာဲဨဒြာဲကျာ လုံဝါသလ၊ ဒေါ၀်ဂြိုပ်စိၚ်ကၠ တွာ်ဂတအာ၊ သီုညးထပှ် သၟဟ်န်ညဳသာ၊ သတ်တလသၞေၚ် ဍုန်တဴရေၚ်ဗ္ဂာ၊ တ္ၚေက်ထဝ်တ္ၚေက်ဒြၚ် ဂနၚ်ဂြိုပ်ဖြာ၊ စာၚ်ကၠိုက်လိုက်ထောဝ် ဗြုတဴမှောဝ်ဇာ၊ တက်သၞေၚ်ဂြဴကြီု ပ္ဍဲလဂီုဖြာ၊ လလောၚ်ထဥ ဗော်သကုဏာ၊ ညးထပှ်ကၠာ ဗဵုအာလဟိၚ်၊ တွာ်အာဗဵုအာ ခန်လွာဂြိုပ်ဂၞိၚ်၊ စိုပ်အရှာံတုန် ဆုဒုန်ဂမြိၚ်၊ သၟဟ်ကဵုဥဒျာန် ဂြိုပ်ထာန်လဟိၚ်၊ သတ်ဆုရေၚ်သ္တိၚ် ဍုဟ်ဗျိၚ်သီုတၞံ၊ ပၞဟ်မိန်ကျာဲ တမာဲလဝ်ဗံ၊ ဓရေဲဍုဟ်ဆက် သတ်ကွက်ကမၠံ၊ ဒူရေန်ဍုဟ်ဂျ ဇလဗိုၚ်ခြံ၊ ကွိတ်သီုဗဳဗၠတ် သတ်ညံၚ်မကံ၊ သဳလောလဳမှဴ ပၞဴဍုဟ်ဗြံ၊ ဗဗုၚ်ဒဟာ် ပဏာ်ပေၚ်တၞံ၊ လကီုလကံ ကသံဗဝး၊ ပၞဟ်ပဏး ဗဝးကြုက်ဖာ၊ မေံကၞုဲဗဗုၚ် သတ်ပ္ဍုၚ်မွဲသာ၊ သတ်ဇူဟွံဖဲ သတ်ပသဲမာ၊......
သတ်မွဲပါၚ်ဂၠုၚ် သရုၚ်ဂၚ်ဂါ၊ သတ်ဒးနရက် သတ်ပၠက်ညးကၠာ၊ သတ်ၜိုဟ်လောန်ပ္ညုၚ် သတ်သၠုၚ်လောန်အာ၊ သတ်မွဲတုန်သၟတ် ထတ်သန်ရဟ်သာ၊ ကြံၚ်ဖျိုတ်ဍုဟ်ဖျး ညးညာတ်ဟောဒြာ၊ သုက်ဍာ်က္ဍာတ်ကျဝ် တုပ်နဲသ္ကဝ်တာ၊ သစ္ဆုနာနာ ထာဏအဟံ၊ သစ္ဆုဂၠိုၚ်တၞံ ဍုဟ်ဗြံဖလ၊ ကၞုဲဂၚ်ဟောဝ်ၜှ် ပြဟ်နူသာခ၊ ညးထပှ်ရ လပှ်စအာ၊ ၚးကၞုဲဂၚ်သွံ ဂွံပအဟာ၊ ဍောၚ်တုဲဇူကောံ သီုရောံပြဝါ၊ ပပြဘိုက်ဖဲ ဍောၚ်ဟဲတုဲအာ၊ ညးထပှ်ကၠာ ကာလဂှ်ရ၊.....
စက်တ္ၚဲထဲစှ်ေ ဒိုဟ်တ္ကံအမ္ဗ၊ ကၠေံလဝ်တ္ကံဝွံ ဇမ္မုဒိပ္ပ၊ ပါန်ခဳချူဗ္ဂောဝ် ပယျောဝ်ကာသ၊ ဂစေံပဝ်သၟတ် နန်ကၠတ်ရုက္ခ၊ ကဝှပဝ်တိတ် ဂမိတ်ဂၠဲါစ၊ ဗြဴဖံက်သေဝ်ပန် ပၠန်စဴသ္ၚိရ၊ ဂၠဴသ္ကံဂမၠိုၚ် လုပ်ခြိုၚ်တလ၊ သရက်ဒက်ထိုၚ် ဂိုၚ်စုတ်ဗံန၊ ရေသူသီပၠန် ထဝ်သြန်ကာပ်သ၊ ဒေါၚ်ပၠဳဟွံၜုၚ် ဃောဟာပ်ပုၚ်သွ၊ ဒမာတ်ဟွံကေပ် ဂိုၚ်ဒေပ်ကာယ၊ ဒဇဲဂၞိၚ်ကွိုၚ် ဂိုၚ်ဝါစဳမြ၊ ပါန်ပုတ်တပ်ပၞုတ် ဟွံပုတ်ပ္ကဴသၠ၊ ပါန်ခဳဒေပ်ဂၞါ ဍာ်ဒွါဒသ၊ သၟာခတ်ပး ဗၠးနူဒွက်ရ၊ သမုၚ်ထောံပေန် အေန်ဇာကြံကြ၊ လဗၚ်ကမၠတ် ဗ္ဂံၚ်မတ်သုၚ်စ၊ မံၚ်ဗၠးထဏိက် ဆုဍိက်တလ၊ ဂအဳသလး ဗၠးနူဘဲလ္ၚ၊ တဏာဲဟွံဂုံ တုံဟွံသူစ၊ ဂြောဝ်ဒေပ်ထမှာဲ အမာဲဖျုန်က၊ စာၚ်တိုန်သ္ၚိဒၞဲါ ဟွံအာဂၠဲါစ၊ မၚ်ဂၠန်တလုဲ ဒကုဲလှိၚ်သ္ဒ၊ လပေါဝ်ထအာပ် သၟိက်တိက်လ္ၚာပ်ထ၊ ဇိုန်ဗဳတခါတ် ဂလီုယာတ်သၠ၊ မာတ်ဒးကာလ ဂၞကျာ်ထပှ်၊ ဂါံတွာ်ညှာညှာ ပ္ဍဲကာလဂှ်၊ သီုညးထပှ် ဒှ်တဴဒေၚ်ဗျောံ၊ စမဳရံၚ်မွဲ ညာတ်ဇြဲသဓောံ၊ ညးထပှ်ကောံ လောံလာဲဟောံဇြ၊ ဗွဲပြဟ်လုပ်အာ သၟဝ်ဇြဲသာခ၊.....
ဇရေၚ်ဇြဲဂှ် ပဒှ်ဒေသ၊ နွံလစမွဲ ပြဲသန်တေဇ၊ ဍာ်သ္ဇုၚ်တဴပၠန် ကၠေၚ်ကၠန်ဟွံက၊ ပ္ဍဲဍာ်လစ ပဥ္စမာလဳ၊ ဒကှ်ဥပ္ပဵု ရာၚ်ဂဵုတဝဳ၊ သ္ကံက်ဟၚ်ရံဒွေၚ် ဗၞူရေၚ်ဖဳ၊ လစံၚ်ရာၚ်ဂဵု ဥပ္ပဵုတဝဳ၊ ဇိုၚ်ပေါက္ခရ လစကျာ်သြဳ၊ ပ္ကဴဍာ်ပ္ကဴကၞဳ ရာၚ်တဝဳစု၊ ညးထပှ်ကၠာ ကြာသမၞိၚ်ဆု၊ ပ္ဍဲသၟဝ်တၞံဇြဲ တူယဲလမ္ၚု၊ သီုၝဲဒေံဝွံ လ္ၚုဂၠိုၚ်အြ၊ ပ္ဍဲပဉ္စမာ လၜိုဟ်ကာယော၊ သီုၝဲဒေံပြဲ ထပှ်မွဲအြ၊ တုဲဂါံစှ်ေအာ ပ္ဍဲကမာရော၊ မိပက်ပ္တိုန်ဍာ် ဂၠိုၚ်သာ်အယော၊ လာၚ်မုက္ခဝါ ဗရဲကာယျော၊ ပ္တိုန်ကျာသြဳရော အယောသ္ဇုၚ်ဂွု၊ တိုန်ၜးလှာဲကၠာ ကြိယာဇကု၊ ဗၠးနူကၠိကၠိုက် ဒှ်သ္ဍိုက်ဇံမု၊ သီုညးထပှ် တွံသၟဝ်တၞံဆု၊ သၟဝ်တၞံဇြဲဂှ် ထပှ်ဇကု၊ သ္တိက်ဒီုတဴသၟတ် ဖေက်ဘဲသတြု၊ သီုထပှ်စု သာ်ဝွံဟီုပါန်၊ သီုဖအိုတ်ရ ပအဒိထာန်၊ ယွံဒေဝပြဲ ပၟၚ်ဇြဲယာန်၊ ပိုဲညးထပှ် ကၠိုက်ကၠဟ်ဂျိက္တာန်၊ မပိုဲပၠေဲထောံ ကၠောံဂြိုပ်ဓိဝါန်၊ စဴသ္ၚိဟွံစိုပ် ဗဒိုပ်သန္ထာန်၊ ဆဵုကလော်ဗြဴ နုဘဴလောန်လာန်၊ ပိုဲဒၟံၚ်ဖဴဍေံ ညံၚ်ကောန်ကွေံကြာန်၊ ပိုဲတီကလော် ဗော်ယက္ခပ္ကာန်၊ ဖေက်တုဲဒြေပ်ဒဴ လဴဇိုၚ်ဂစာန်၊ ဒြေပ်ကၠုၚ်ဒေါ၀်ဂြိုပ် ဂၠိုပ်ဗဒိုပ်ထာန်၊ ဍေံဗက်ဂစာန် မွဲဟာန်စိုပ်ကၠုၚ်၊ ပိုဲဆဵုစာၚ်ဗြဴ မိဂၞဴပြာ်ဒုၚ်၊ ဗၠးဘဲယက္ခ မွဲဝါရပ္ညုၚ်၊ ကြဴပိုဲတွာ်ကၠုၚ် သရုၚ်ကန္တာ၊ ကလော်ဗြဴဆံၚ် ဗက်ညံၚ်နဲကၠာ၊ ဆဵုစိၚ်ဗြဴမွဲ သကဲဂြိုပ်ဖြာ၊ ပိုဲအာလွဵု ကဵုစိၚ်သေၚ်ဟာ၊ လုပ်ပ္ဍဲပါၚ်အဴ စိၚ်ဗြဴဂှ်ကၠာ၊ ဂွံဗၠးဘဲဟေၚ် ကလော်သေၚ်ဟာ၊ လမုဟ်ပိုဲစိုပ် ဗဒိုပ်ဝွံမာ၊ ဒေဝတဴဇြဲ ပိုၚ်ဇြဲသာခါ၊ ကျာ်ဖျေံမေတ္တာ ရီုမွဲဝါညိ၊ ဂးတုဲဗြဴရတ် ပတ္တဏာစိ၊ သတြုဝဲသၞ ပကဵုပါမြိ၊ ဗိုၚ်ရီုဗၚ်စိ ပိုဲဍိက်ညိအဴ၊ တုဲဒေဝဇြဲ ပ္ဍဲဂှ်သဘဴ၊ မိၚ်ညးထပှ် ပါန်ဒြဟ်ဇဝဴ၊ ဒေဝတဴဇြဲ မပြဲနုဘဴ၊ ပ္ဍဲဂွိုၚ်ဇြဲအဴ ဖျဴစွံလဝ်ရ၊ ဗၠးပရိုက်ဘဲ သတြုဝဲသၞ၊ မၚ်မွဲတဴရ ကာလဂှ်တုန်။

သၟတ်ဗြဴဝုတ်ထပှ် သ္တိက်ဒီုဒၟံၚ် ပ္ဍဲဂွိုၚ်တၞံဇြဲမွဲတၞံ ဇရေၚ်ဍုၚ်ဗြၜၚ်။
ပ္ဍဲကာလဂှ် ပဒှ်သဘဴ၊ တ္ၚဲလေဝ်ပၠိုတ်အာ လောန်ကာလသွဴ၊ ပ္ဍဲဂွိုၚ်ဇြဲရ လုပ်ပဒတဴ၊ ပ္ဍဲစိုတ်ဒမြဴ သီုဗြဴထပှ်၊ ကၠၚ်ဟဳပှ်လှ် ရမတ်ပြဟ်တိတ်၊ လ္ၚစိုတ်ဂဵုဍာဲ လောံလာဲဇြဟိတ်၊ ပယာံပန်ဂၠု လ္ၚုဆိတ်ဆိတ်၊ ဂစေံတူဆု ဗရုဟွံတိတ်၊ သ္ၚဳဒဝ်တရၚ် သ္ဍဴခၠၚ်ဖမၠိတ်၊ ကၟာဲဖလှိၚ်ကောန် သြောန်န်ဍိတ်တ်၊ တံၚ်ဇုက်သရေၚ် ဒွက်ရိုဟ်ရေၚ်ပ္တိတ်၊ ဟတ်ဂေတ်ဍိတ်တ် ပတိတ်တောဝ်တွဵု၊ ဂမှဳဂြီုဂြီု ဂၠဲါဟီုမ္ၚဵု၊ သြဟ်ပ္တဴမေတ္တာ ရာဒနာကဵု၊ ဗမၞးချပ်ဂြၚ် ဓုတၚ်ဂုန်ဖဵု၊ ထယာထဴအဵု ခပဵုကၞု၊ ဖဍောတ်ကြာကွာန် ဒုၚ်ဒါန်သၠာ်သ္ၚု၊ ထဴဗော်ဇရာ မိန္ဓာညးဗျု၊ ဂၠဲါဒွတ္တိံသ ဇွပ္ဍဲဇကု၊ ဒေါၚ်ပၠဳဇိုၚ်ဍုၚ် ၜုၚ်မံၚ်ဒုဒု၊ မာတ်တ္ၚဲမဂၠု မလ္ၚုက္ဍၚ်၊ စၚ်ရိတ်စလာၚ် တာၚ်ပ္တိတ်အခြၚ်၊.....

ကၟာဲယာံရေဝ်ရောတ် အပေါတ်မကၠၚ်၊ ထောံသ္ၚိဂၠဲါသၟတ် ကမၠတ်လဗၚ်၊ ဗဂဲဗက်ဇၟာ ကၞိကြာဗဒၚ်၊ ဒမြံသ္ကာတ်သြာဲ ဗၜဵုဂၠဲါကြၚ်၊ တတ္တောဗြုဂါၚ် ကလေတ်ပါၚ်က္ဍၚ်၊ ဒဳဒုတ်ပမိၚ် တွိၚ်ပါၚ်ဂမြၚ်၊ သတြုဂဍာ် သအဵုသအာ်ပဝ်ကြၚ်၊ ဇြုံဂၠဲါကၞိကြိုၚ် ကၠေံဂွိုၚ်ဥမၚ်၊ သ္ၚိသလျးဂဵု ကလဵုလိၚ်ခၠၚ်၊ ရုဲကၞပ်ကလၚ် မၚ်မွဲရပ်ဗ္ဂာ၊.....
တက်မွဲသရုၚ် ညန်ကၠုၚ်တက်ၜါ၊ လှိၚ်လ္ၚုသ္ၚိတ် ဒသဒိသာ၊ ဘုတ်ဒေဝတဳ ဂၠဲါသ္ၚဳအဟာ၊ ပြိုတ်ဗြုတသဝ် မၚ်ထဝ်ပသာ၊ ပ္ဍဲသုသာန်ဇၞော် ကလော်စန်စာ၊ လ္ၚဵုဒက်ဒေါန် ပအုဲကောန်ညှာညှာ၊ တလကွာန်ဍာဲ ဂၠဲါစဂုဓာ၊ ဘုမ္မဒေဝါ ဂၠဲါအဟာလွဵု၊ မဇၞော်ဇျှာသြဲ ပ္ဍဲကာသဇဵု၊ ကလော်ဒရေပ်ပၞာၚ် တဲလဗာၚ်ဂဵု၊ ကိုဟ်ဒတုံဗြော် လျးဇၞော်တၚ်ဃဵု၊ မာတ်စိုပ်သန်ဇျှာ သဂါပယဵု၊ သၞံၚ်သၟန်ဂဵု လျးလဟဵုဟော၊ ပၚ်လာဲဍိတ်တ် ပိုက်ပ္တိတ်ဝါယျော၊ လမၠာၚ်က္ဍဟ်က္ဍဟ် လမှ်အပေါ၊ ပ္ကဴထာၚ်သၟိက်ပံက် ကအီဗရံက်မြော၊ သၟီစှ်မြဟ်ကျိုၚ် ပၠလျးဂၠိုၚ်အြ၊ ဗၞဲက္ဍိုပ်သြဴ ပ္ဍေန်သ္ဍဴတေဇော၊ ပ္ဍဲပထဝဳ ကြေတ်ယာယဳဟော၊ ကောန်ကောန်ၝောံၝောံ ကလောံသီုဆော၊ စတုဒိသော ဃောမလှိၚ်ကၞပ်၊ ကောန်ဗြဴထပှ် ပ္ဍဲဂှ်ဂြၚ်ချပ်၊ ဂွံဗၠးဘဲလ္ၚ ဗြဴယက္ခလွပ်၊ ပိုဲအိုတ်ကသပ် ချပ်တုဲဒဴကၠုၚ်၊ ဒေဝဇြဲကၠာ စိတ္တာသ္ဍိုက်သ္ဇုၚ်၊ ဗၠးဒဒိုက်ပ္ညုၚ် ဗၠးဒုၚ်တ္ၚဲဗြဲ၊ မိပ်သ္ၚိပ်လောန်တဲ ဂွိုၚ်ဇြဲဒွေတဴ၊ ရာၚ်ဆာဲဂ္ညိဂၠဴ ယာန်ဒွေတဴဂှ်၊ သီုညးထပှ် တန်ဒၟံၚ်သၟဟ်တုန်။